بنات جدة تعالو قولولي فين احصل مستشفى ودكتوره تولد طبيعي .. بسرعه دخلت التاسع ,,,

[Ḿٱ۾ڵيڼٱỄ]

السلام عليكم ورحمة الله وبركاته

بنات انا من اول شهر بالحمل المن بداية التاسع وانا اتابع بالاطباء المتحدون عند فاطمه النمر
بس امس صدمتني جالسه تتكلم عن ابر وشكلها تبغى تولدني قيصري ومره دمها بارد

انا الحمدلله وضعي طبيعي ووضع الجنين الحمدلله طبيعي
راسها تحت يعني مستعده لولاده طبيعيه
لكن لأنو وزنها قليل 1.300 يعني كيلو وربع لكن ان شاء الله يزيد ويكون طبيعي
تقول الدكتوره انو ممكن ماتقدر تدفع بالولاده الطبيعيه وتلمح انو تولدني قيصري وتحط بنتي بحضانه وبس جلست تتكلم عن الابر

بصراحه مضايقه مره كرهتها والله وحابه اغير المستشفى مع انو كان نفسي اولد بهالمستشفى عشان الخدمه والعنايه والفخامه لكن لا والله مو على حساب صحتي وصحة بنتي

المهم دلوني على مستشفى كويس ودكتوره تخاف الله وتولدني طبيعي يعني تكون صبوره جدا اهم شي تولد طبيعي
وياريت اعرف اسعارهم لأنو بالمتحدون الولاده الطبيعي 7000 واعتقد كمان زياده 7500
ابغى دكتوره تخاف الله ويكون سعرها كويس ومعقول

انتظركم وبسرعه بنات لأني دخلت التاسع خلاص

[ام صوفيا]

شوفي يالغالية انا والدة بنتي الاولى قيصرية الله لايسامح الدكتورة هيا كانت ناوية على القيصري في السعودي الالماني انصحك انك ما تولدي في هذه المستشفى لانهم يولدوا قيصري كتيييير وبنتي الثانية كنت بأتابع في مستشفى غسان فرعون عند دكتورة هندية مرة كويسة قالتلي المفروض انك تقدري تولدي طبيعي واستنت عليا الين خلصت التاسع وبعدين سوتلي تصوير بس للاسف الرأس كانت فوق واعطتني الصورة وقالتي روحي اسالي اي دكتور عشان تطمني وبعدين حددتلي موعد قيصري بس ماشاالله اشوف كتييييييير عندها وكلهم والدين طبيعي والعناية مررررررررررة ممتازة في المستشفى للام والبيبي اذاتبغي اسم الدكتورة اسمها (تاج خانوم) جربيها وانشالله تدعيلي
بس يمكن دكتورتك قالت كده عشان وزن البيبي روحي عندها وشوفي والله انا جربت غيرها بس الصراحة مافي احسن منها
الله يسهلك ولادتك ياااااارب
اذا عندك اي سؤال انا حاضرة

[Ḿٱ۾ڵيڼٱỄ]

^_^ شكرا اختي على ردك ^_^ وفعلا الالماني مره مايمدحوها

طيب بكم الولاده عندها طبيعي ؟؟ وهيا تعمل خياطه تجميليه ؟

[نكهة القهوة]

غريبة يا أم لينا بصراحة دائماً يمدحون بالأطباء المتحدون فاطمة النمر وحنان الشمراني بس انتي أستخيري وبصراحة صعبة تراجعين عندها طول فترة الحمل وفي الأخر تغيرين مدري يمكن قصدها أبرة الظهر والأطباء المتحدون أختي تولد فيه وتمدحه من ناحية العناية والفخامة بس أختي تولد بقيصري .

[Ḿٱ۾ڵيڼٱỄ]

نكهة القهوه شكرا اختي على مرورك ^_^ وانا فعلا دخلت هالمستشفى عشان سمعة الدكتوره وسمعة المستشفى وطول فترة حملي كنت اتابع عندها
لكن تخيلي تجي على نهاية حملي ووضعي طبيعي وتقولي بولدك قيصري ؟! لا وتقول اطلع بنتك نحطها بالحضانه هذا معنى كلامها وعن الابر لا هيا ماتقصد ابرة الظهر هيا تقصد ابر تعطيني اياها عشان تطلع البيبي وتحطها بالحضانه وتتعذر بإنه ماهي ماخذه غذاء كفايه ببطنك *_*
وجلست كمان تتكلم عن الطلق الصناعي
والله مصدومه مره وتفكيري من امس مشوش وحايسه مره حتى حاولت اقرا عن كذا دكتوره وكلهم ولاداتهم غاليه مره يعني مثلا عندك هادي حنان الشمراني ولادتها اعتقد ب 10 الاف
ليش!؟؟! اجل لو بتولدني قيصري كم بتاخذ !؟
وانا ادفع كاش يعني مو تامين عشان اقول مو مشكله
خايفه اكمل عندها مره والله عقلي سار يودي ويجيب يقولي انفذي بجلدك احسلك قبل لا تتورطي معاها الله يستر يارب

[ام صوفيا]

حبيبتي الولادة الطبيعي عندها ب6000 الاف تقريبا هادا الكلام قبل سنتين والخياطة التجميلية ما اعرف بس اذا رحتي عندها اسأليها اتوقع تسويها حتى انا لما رحت عندها بعد ولاتي الاولى وولدت عندها الولادة الثانية سوتلي تجميل عشان العملية الاولى ماكانت كويسة

[حلا جده]

هلا حبيبتى عادى انا اختى زي كدا وزن الطفل صغير وبنت عمى كمان وولدو طبيعى بلعكس اذا الطفل وزنه كبير زي 4 او 5 كليو يولدو قيصرى الدكتوره تلعب عليك تبغى الفلوس روحى عند مستشفى خالدادريس مره مره ممتاز واول
مستشفى فى جده روحى عند الدكتوره ميمى لها 23 سنه فى المستشفى لو شفتى زحمه عليها حتى من الطائف والرياض يجو عندها وسعر الولاده مقبول تقريبا
3500 او 3000 فى هذا السعر

[روتيلا]

طيب بنات اهم شي الخياطه.......؟؟؟ يمدحون مين..احس الخياط اهم شي والله

[المخملية]

أنا ولدت ببنتي الأولى عند دلال بوقس في سليمان فقيه...مرة ممتازة ورهيبه
وكنت على تأمين طبي فأعتقد ولادتها كانت حول 5000 وشوي
بس دحين خرجت من التأمين ولما رحت لها وسألتها بكم تولد لاني ابغى اولد عندها قالت صرت بين 8000 و 9000 مرررة انصدمت
وحزنت بنفس الوقت اني ماحأولد عندها بس يلا خيرة لي
رااح أدور غيرها ...وللأن أسماء شحرور تولد 6500 -7500 ريال للولادة الطبيعيه والقيصري 12000_13000 ريال
والتانيه الي حاطتها ببالي كيتي ببخش هدي مارحت لها الين دحين بأستخير وأروح لها اذا ارتحت بكمل معها
وأنتي استخيري وربي ييسرلك حملك وبولادة طبيعيه

[&&جلنار&&]

فقيه اختي والده فيها قبل يومين بـ7 آلاف عند الدكتوره اسماء شحرور
خالتي ماتروح إلا عندها يعني مره خبره هالدكتوره ومره كويسه وخياطتها كمان يمدحوها
الله يسهلك يالغلا
تغذي كويس =)
والجنين حسب كلام امي انه يزيد وزنه بالتاسع كل ماطول فيه*
وكلي امرك لله و ربي حيسهلها لك من عنده ويسخرلك احسن دكتوره