حبيباتى سيدات ليبيا تفضلو لأعرف ما حالكم

[جوهرة ليبيا]

اليوم عمليتي من جهة اليمين توجع فيا داويتها من شوي وربي يشفيني

كنت انقول ان عمليتي في رنوده اوعر لكن في جوجو حبيبتي اوعر والحمد لله علي كل حال

في رنوده نضت علي نزول الميه قبل الفجر واليوم اللي قبلها متمشيه وفي الليل صار ج م ا ع قريب متت يومها هههه

نضت فرحانه خخخ بنجيب وقعدت ساعتين نتمشي في الحوش ونرتب شويه حاجات في الحوش وبخرته هههه

مع 11 ونص الوجعات بدو وراي بعض معادش قدرت لكن صبرت للواحد ونص امشيت كشفت عليا الدكتوره قالت 4 سانتي ونص فرحت توقعت الباقي بينفتح الرحم بسرعه

قعدت للساعه 3 عياطات ياااارب قلبت الدنيا هههه مع اني قلت مانبيش انعيط لكن الوجع حار موت

كشفت القت 7 فرحححححت قلت هانت وبعد شوي 8 لكن الصدمه ان النبض ضعييف والقابله اللي تسهل عليا قالت دم هلبه نزل

خشوني عمليه انا مقعمزه يضربوا في يبرة التخدير ورقدت فتحوا علي طول اتصدقوا انحرك في صوابع رجليا ونتني في ركبتي انقول لدكتوره حرام

عليك شوفي كيف انحرك راك تفتحي في بطني وانحس في كل شئ

ونرعش مع بعضي وبنعيط وبنصيح لكن طاقتي تمت وقعدت ندعي والله لما جبدوا رنوده كان روحي طلعت لدرجت ايوروا فيا فيها مش قادره

نفتح اعيوني وغبت عالوعي

بعدها تقريبا نص ساعه فقت ايزيدوا فيا في الدم وتغديه ووووو وميات حاجة يتجاروا وخلاص

يعني تقدروا اتقولوا قريب جبت طبيعي وجربت الزوز واتلحمد لله طبعا القصه باختصار فيها هلللللبه حاجات

شفت دمعه راجلي لاول مره ربي يحفظه خاف علينا حتي في جمان



اما قصه العروسه جمان

السبت الصبح خلاص معادش متحمله طول الليل الم ونزلت السداده والمشكله انها قاعده مانزلتش الحوض وواضحه بطني فوق

امشيت وتيت رنوده وقريب نتقطع شاده روحي مانبكيش قدامها حبيبتي

ووتيت ساكوها وشنطتي وساكو جمونتي

طبعا مافيش الم ولاده حقاني زي في رنوده لكن معادش قادره خصوصا ان كان عندي هبوط انحس بنطيح ودايخه

وعارفه انهم حيشدوني عمليه لان دكتورتي قالتلي

حطيت رنوده عند خالتها وقلبي بيتقطع قريب متت

حتي راجلي متاثر شاد ايدي وبس ويسوق بالتانيه وساكتين الا من شهقاتي

قاعده موصلتش للمصحه اتصلت باختي نسال علي رنوده نسمع فيها تلعب مع الصغار فرحت نوعا ما قالتلي اختي مازال تتصلي بنصكر تلفوني هههههه

خشيت للدكتوره دارتلي جهاز البنوته مضايقه والمشيمه نازله شوي

قالتلي بالكتير غدوه الصبح عمليتك لو ماتبيش توه وتعالي في اي لحضه قلتها ديريلي دخول

دارلتي دخول وانا انهدرز في الحجره انا وزوجي جوني الممرضات ايجهزوا فيا لبست وانا انحس نفسي بنموت

رنوده بين عيوني وصيت راجلي عليها وووووو

لين خشيت الحجره وركبولي الاجهزه وآآآآه من حجره العمليات صوت الاجهزه بس ايركب الرعب قعدت نقرا في الاذكار ونتاكد اني مستوره لان

دكتور التخدير بيخش وقعدت نقرا في القرآن لين فقدت

عمليتي اتعطلت لساعه عكس رنوده تلت ساعه فقط والحمد لله

طبعا طلعوني لحجرتي وجيجي هانم اتهتري ههههههه وراجلي فيديو ايصور فيا وهو ايزيد فيا يسال وانا انجاوب

تفرجنا عالفيدوا لما روحنا وامسحته مع انه يبيه يقعد باش يضحك عارفاته

ههههه

طبعا لما فقت مزبوط بدي الالم مع ان البنج قاعد وحشاكم مارجعتاش

ساعتين واعطوني مسكن

وشويه نصقع وشويه نسخن

طبعا طلعت قبل المغرب من العمليه وللاسف المفروض ايمشوني الساعه 2 في الليل لمنع اللتجلط لقدر الله

قعدت لساعه 9 الصبح وانا نتالم وبلبس العمليه

المهم بعد هالاهمال لما جت الدكتوره 9وشكيتلها بيمشوني طحت والله الطيحه احرف من العمليه والزوز والا حاولوا ايشدوني خلوني انطيح ربي يهديهم

ردوني للسرير ونفس الشئ قعدت للواحد لين امي واختي نوضوني واعطوني عصير باش مندوخش وقدرت والحمد لله

ومعادش امشيت لتاني يوم وطلبت جبوب الكربون والزرابيط لان بطني كانت منفوخه هللبه معادش قدرت نتنفس منها وماصار شئ

اعطوني اكثر من مره ولا فايده وكحه البنج قريب متت منها في الجرح طول

اليوم اللي بعده اغمي عليا ولما فقت معادش قدرت نتنفس ونرعش

طبعا اليومين الاولين قالولي انتي دلوعه وماتتحمليش

لكن لما مرضت معادش قدرت عرفوا اني ماندلعش

نبضات قلبي مش منتظمه تصدقوا

ومعادش قدرت نتنفس لين دارولي اكسجين ونزلوني للطوارئ ومسكن ومراقبه لنبضات القلب وصارت فيا حاله ساعتين كاملات بعدها الحمد لله

تعرفوا شن كنت انفكر كان كل تفكيري بنياتي وندعي ان ربي يحفظهم ويرعاهم كنت انشوف في الموت بين اعيوني

والحمد لله والله كل وقت نحمد في ربي اني بين بنياتي وفي حوشي وكل احبابي بخير

كتبت باختصار وفيه هلللللبه حاجات


وربي يهون علي كل حامل ويرزق كل محرومه ويحفظ كل صغاركم يارب

[جوهرة ليبيا]

الضئ بدي يهرب هلبه

غدوه ان شاء الله بيوصل المولد وبيجوا ايركبوا لحوشي وحوش سلفي لانه كبير

المهم نرتاحوا وكل شئ يخدم خصوصا التدفئه حوشي يولي زي التلج

اليوم غداي بازين زعما تعبني البازين

وامس جتني خالتي قالتلي قبل ماتوصل بنص ساعه قعدت نجي بخرت الحوش وطلعت لحم وحطيت الشاهي اخضر واحمر عالنار

ووتيت سفري


وغيرت بيجامتي ومكيجت عالخفيف وبنوتاتي امغيرتلهم وكل امورهم تمام وجت

نص ساعه لما تعرفي نفسك وقتك ضيق اديري فيها هللللبه حاجات والله كان بوسع الوقت نفس الحاجات انديرهم

في ساعتين ههههه سبحان الله وجت عزوزتي هدرزت وحطيت الدحيه والحلبه عالنار وجهزت السفره قعمزت انهدر ومره مره انشوف العشئ

هرب الضئ شغل راجلي المولد الصغير ايشغل 8 لامبات العاديات الصفر لكن الضئ الابيض 20 لامبه خير من لاشئ

روحت وغسلت ماعيني وارتحت

هاليومين اكيد حيجوني امتاعيني اللي ماجونيش خصوصا لما يسمعوا باختي باش يفضوا بعدين بيها او ينحرجوا لو القوني غادي

[جوهرة ليبيا]

آآآآآآىخ دويت هلبه

شكلي بنولي زي قبل انعبي في الصفحات قبل منتقل في الحمل ونتعب هههههه تذكروا

سلام توه حبيبتي جمونتي بترضع

تصبحوا علي طاعه الرحمن

[ليبياقلبي]

غاليتي جيجي الله قصتك قريب زي قصتي غير انا=ت الحمد للع افتكيتي نت الالتصاقات
الحمد لله حتى انت تعدبتي بس يالا لما تشوفي حوجو يهون شن جو رنودة معاها وتموا ناسك ولا قاغدين يتعصروا ولالالا
غاليتي امولة خيرها شن تبيكم تسموها العزوز ياكبدي هدا شعور غيرة واضح ويا حنا هي امه اهم ختى تعاملك سيئة بتتحمشي بس هكاوتك خلهم ودرا حتى انت متعدليش
وكيف حال فطومنك توا
سلام للكل

[dr.loly]

صباااحوووو


اهئ اهئ راقده 5 ساعات بس وليا 3 ايام على هالحااااله فروووسي رايح يسهر وينق ياروحي والله ماعرفت السبب
\

[dr.loly]

جنوده انواع واشكال بي بي تي واجد ع الامازون انا مرة ندور في جهاز قياس التبويض عشان طريقة العد تبقي مضمونه في منع الحمل لقيت واحد يجي معاه
توا كتبت اسمه ف الامازووون واجد طلعلي وحتي اسعاره كويسه الجق

[dr.loly]

جنوده انواع واشكال بي بي تي واجد ع الامازون انا مرة ندور في جهاز قياس التبويض عشان طريقة العد تبقي مضمونه في منع الحمل لقيت واحد يجي معاه
توا كتبت اسمه ف الامازووون واجد طلعلي وحتي اسعاره كويسه الجق


طبعا هنا ادق ف تحديد التبويض

[حبيبة حاتم]

صبااااااحو ع الحلوين كيف حالكم ان شالله تكونو كويسين تبو الحقو قداش يسهفو فيا الاخوات اللي عايشات برا ماشالله نقرا ف قصصكم ووين تطلعو وتدهورو الحق نتمني اني ف مكانكم والله فدييييييييت من لييبيا نتمني نطلع نعيش البرا بالاخص البيبي اللي بيجي قداش نتمناله يعيش ويتعلم البرا وماينحرم من شي لانكم عارفين ان هنا ف ليبيا لا عندنا ملاهي ولا مولات ولا وين نطلعو وندهورو الحق انا لما كنت صغيره بابا ربي يخليه لينا ماحرمنا من شي ديما كان يسفر فينا الحمد لله عشنا طفوله حلوا لكن توا نخمم ف البيبي حرام ماعنداش وين يلعب ولا يدهور انا زوجي يشتغل مهندس ف شركة الليبيانا عطلاته مش هلبا مره وحده بس في السنه نسافرو الحق والله ماتسد بكلللللللللللللل يارب تتحسن البلاد قبل ماجي البيبي يااااارب

[dr.loly]

المشاركة الأصلية كتبت بواسطة حبيبة حاتم

صبااااااحو ع الحلوين كيف حالكم ان شالله تكونو كويسين تبو الحقو قداش يسهفو فيا الاخوات اللي عايشات برا ماشالله نقرا ف قصصكم ووين تطلعو وتدهورو الحق نتمني اني ف مكانكم والله فدييييييييت من لييبيا نتمني نطلع نعيش البرا بالاخص البيبي اللي بيجي قداش نتمناله يعيش ويتعلم البرا وماينحرم من شي لانكم عارفين ان هنا ف ليبيا لا عندنا ملاهي ولا مولات ولا وين نطلعو وندهورو الحق انا لما كنت صغيره بابا ربي يخليه لينا ماحرمنا من شي ديما كان يسفر فينا الحمد لله عشنا طفوله حلوا لكن توا نخمم ف البيبي حرام ماعنداش وين يلعب ولا يدهور انا زوجي يشتغل مهندس ف شركة الليبيانا عطلاته مش هلبا مره وحده بس في السنه نسافرو الحق والله ماتسد بكلللللللللللللل يارب تتحسن البلاد قبل ماجي البيبي يااااارب

مرحبا حبيبه شخبارك توا واخبار البيببي..

بالنسبه للنبض يبان عادة من الاسبوع السابع وفي ناس يطول اسبوع زياده عادي
ماننصحكش بالسونار المهبلي اصبري شوي وان شاء اللخ خير
هو قلب الجنين يبدأ في التكون ع اسبوع 6 الي 7..




ومن وين انتي اختـي..؟


حتى ليبيا فيها بعض الاماااكن يعني لكن ممكن توا من قلة الامان والفوضه لي صايره
الواحد ممكن يقلل تدهوير وربي يهدي العباد ويريح البلاد..


توا مثلا في بنغازي وين ماندهورا فيه منتزهات واماكن عائليه وكذلك جبلنا وامشرق
احلى جو مع الطبيعه والهواء النقي نقصد البيضاء وسوسه شحات راس الهلال

[اوشي]

السلام عليكم ورحمة الله وبركاته