السلام عليكم ورحمة الله وبركاته
كيف حالكم جميعا وحشتووووووني
شن اخبار البلاد ان شاء الله افضل والله مانحب نتعب اخبار كرهت الاخبار من ايام الاحداث
امووووولة الف الف مبروك البنوتة الحلوة والحمد لله على سلامتكم ان شاء الله تكونوا بألف خير وان شاء الله غير ماتعبتيش
جيجي لاباس عليك وردي بالك من البردة وانتي نافس صعب تصحي بسهولة لانه مناعتك ناقصة كثري شرب السوائل الساخنة والشوربات
وان شاء الله لاباس عليك شن اخبار جمان وشن جو رنودة معاها اكيد فرحانة بيها ربي يخليهملكم
جنودة عقبال مانسمعوا بخبر حملك في القريب العاجل ياااارب
شن اخبارك واخبار دراستك وشن جو امريكا احني اللاسبوع هدا ماشااء الله مطر قووووية وصقع بكل
على فكرة الشامبو والبلسم اللي خديتيهم واخدة منهم اني وحتى احني عندنا بثمانية دولار بس اربعة الشامبو واربعة البلسم واني واخدة اللي لونه احمر بالكيراتين وماليش هلبة نستعمل فيه لكن حسيت البلسم يجفف شووووي والا؟
فروسة شن اخبارك وشن جو لولي ان شاء الله كويسة والله اني سما على مانحكي عليها سلامتها مانوصف حتى الربع عندها نشاط مش عادي ماشاء الله هاليومين متعلمتلي حاجة جديدة تفتح في دولاب المطبخ وتطلع في اللي موجود امس مطلعة النايلو اللاصق وفاتحاته قريب مشي منا النص حالة وخلاص شكلها من الكساد يخطر عليها حاجات بكل والله وجعتني قلت منرفعها في روضة جنب وحدة صاحبتي ليبية ديما ترفع في صغارها امشي اليوم مشيت شفت الوضع وشفتها يعجبها الجو والا عالاقل تتعود عالناس والصغار خير ماتجيني انطوائية مسكينة ديما اني وبوها بس وحتي باش تلعب نين تعيا غادي وتفرغ طاقتها غادي وتروح عيانة وتهدا في الحوش ههههههههه وطبعا نظام الروضة اني نقعد معاها مش نحطها ونعدي هذا ليش اشجعت نسجلها لان اني نكون معاها لاني والله ماتهون عليا نخليها في حضانة والله ماقدرت وهدا اللي مخليني ماحصلت نقرأ انجليزي ماتهونش بنيتي نخليها للغريب واني موجودة وعلى قيد الحياة هكي قناعتي الخق
ومبارك ماشريتي من هدايا ماشاء الله ناشطة بديتي احسن كل مرة خودي لواحد خير مايجوك في مرة وتتلخبطي ومرات تنسي وخيتك والله قاعدة متنبلة وماخديت حاجة بالنسبة للهدايا
الحق مانعرفش شن ناخد محتارة وراجلي يقوللي مادخليش فيك انتي اختاري
قوليلي انتي شن خديتي متلا لامك وخواتك وعزوزتك وسلفاتك ومن خليت اني ههههههه
قصدي لعيلتك وعيلة زوجك هدوم مقربين هلبة ضروري حاجة باهية كل واحد
مش عارفة الحق قوليلي انتي شن بتهدي مش نخنب منك الفكرة ههههه
اوشي حبيبتي شن اخبارك واخبار الصغار صحيتي ياغالية علي الرقية وطريقة العسل والحرير قلت عليهم لمرت خالي لكن هيا مسكينة مشكلتها مش في النزيف بس لكن الحمل ضعيف قالتلها الدكتورة الكيس صغير هلبة ومشنشف شوية شاكه انه تشوه لاسمح الله وقالتلها استني عشرة ايام ووليلي كان الوضع زي ماهوا منديرلك تنظيف وربي يعوض عليك
شموسة ربي يسهل سفرتكم ويعاونك صح اصعب حاجة التجهيز للسفر تحسي روحك ناسية حاجة وتحسي في كل شي مهم وتبي ترفعيه ان شاء الله تمشوا وتجوا بالسلامة يااارب
اثري وسوسو وام نوزة شن اخبارك انتم وعويلاتكم وينكم غيااااب
رغودة وام معاد وام ورد وام مكي ان شاء الله اخباركم تمام انتم وعويلاتكم
من ثاني ؟؟؟ان شاء الله مانكون نسيت حد
11-18-2013, 08:25 PM
رد: حبيباتى سيدات ليبيا تفضلو لأعرف ما حالكم
اوشي 
.
جديد منتدى ملتقى عضوات حوامل
العرض المتطور
