ديوانية البحرين - دردشة حوامل البحرين - البحرينيات

[أحلام أم]

صباح الخير ياصديقات المشوار الجميل
يارب سنة جديدة وسعيدة مملؤة بالخير والسعادة والحب وبتحقيق المراد من رب العباد ويارب في هالسنة تخرج بيبياتنه للدنية بألف صحة وعافية من بعد التمام
شمس الصباح
(ملاك) تبى تطلع في السنه الجديدة ماتبى تطلع على فضلة 2010
طفلي حياتي
هالسنه هاذي أحلى سنة يارب تشوفين فيها( زينب) تنور حضنش ويفرح بضحكتها قلبش
أم خليل
هلا حبيبتي يارب هالسنة بالفرح والسعادة تستقبلين مع كتاكيتش وزوجش أحلى( حســـــــــــــــــــــــــــــــــين )
فلونة
حتى لوماعرفنه ويش في دبتش بس ربي يجيبه بالسلامة وينور عشكم
روز سول
الله يفرح قلبكم بالبنوته من بعد الولادة السهلة والميسرة
نور الدنيا
يارب سنين عمرش كلها سعادة وخير وتقوميين بالسلامة
حنين للماضي
في هالسنة بنور (علي ) عشكم وحياتكم ربي يجعلة من الذرية الصالحة
حبيبة حسوني والفتاة الذهبية
البنوتات الحلوات يارب يكونون بألف صحة وعافية ويهلون عليكم من بعد الولادة والتمام يارب
روز وبروفكشن
يارب سنه سعيدة وفيها تتحقق كل الأماني يارب
بنت الأياويد وأم حماني وفجورة وحرووف عاشقة
يارب تربون كتاكيتكم بسعادة وأفراح الدنيه كلها وتكون هالسنه سنه صحة وعافية وفرح ليهم
باقي البنات فرح الدنية وأم السادة ويارب من بعد
إن هفى لساني عن ذكركم فقلبي يتمنى لكم كل السعادة والهناء وسلامة بيبياتكم وتفرحون بهم
وأخيرا لاتنسوني بدعواتكم بسلامة حملي وجنيني وتمام شهور حملي وتقر عيوني بشوفة صغيري أوصغيرتي في حضني بصحة وألف عافية وهداية أولادي وحفظ أبو عيالي من كل شر يارب والتيسير لكل أمور الدنيا وكفاية شر العباد بحق محمد وآل محمد

[حنين للماضي]

السلام عليكم
دخلت عالسريع اسلم عليكم واطمن عليكم مرة وحدة

الم الظهر والمعدة طلعوا روحي البارحة حتى زوجي كسرت خاطره وقام يمسح على راسي ويضغط على يدي
حسيت روحي باقي شوي وبصيح بس جودت روحي


ها شموس شكلها ملوك معاندة
عاجبها موعد ولادتها وما تبي تقدم
ربي يسر ليش وللجميع ان شاءالله
اليوم بجي صديقتي والشقة يبي لها ترتيب
ان شاءالله عقب ماخلص من ترتيبات المنزلية بطل عليكم اذا مداني

[حنين للماضي]

مشكورة احلام ام على هالكلام الجميل
وانتي بخير وسلامة وعمري
ويااااااااااارب يثبت حملش وتقومين بالسلامة وتفرحين بضناش ان شاءالله

ايي والله بجي علاوي وبنور بيتنا
فديته هالاسمر اني والله(الحين جني جايفته)

تعالي نسيت قلتي جم ولد عندش؟؟؟

[أحلام أم]

المشاركة الأصلية كتبت بواسطة حنين للماضي

مشكورة احلام ام على هالكلام الجميل
وانتي بخير وسلامة وعمري
ويااااااااااارب يثبت حملش وتقومين بالسلامة وتفرحين بضناش ان شاءالله

ايي والله بجي علاوي وبنور بيتنا
فديته هالاسمر اني والله(الحين جني جايفته)

تعالي نسيت قلتي جم ولد عندش؟؟؟

الله يسلمش حبيبتي وأنتي بعد بألف خير وسلامة
مشكورة على الدعوات الحلوة نسأل الله تحقيقها يارب
يمكن علاويي يصير أبيض مو أسمر الله يبلغ بيوم ولادته وتشيلينه بين إيديش بصحة وسلامة
أني عندي بنت وولدين الله يهديهم اليوم عطلة ويلعبوون بيت ومسويين روحهم كبار الله يبلغني فيهم وأشوفهم كبار
ترى يسمووني (أم علي ) بتصيرين مثلي

[الفتاة الذهبية]

سلام عليكم كلكم
شخباركم وحشتوني مووووووووووت
مشكورة احلام ام
لانج ذكرتيني
الا بنت الاياويد شنو جابت بنت مثل ما قالوو لها الخاص والا ولد؟
انا تمام والبيبي بعد تمام
وان شاء الله نولد بالسلامة

[الفتاة الذهبية]

كلكم مختفيين
يلا انا عيل بقوم

[شمس الصباح]

مشكورة احلام ام على الأماني الزينه والله يسمع منش يا رب وانتي بعد الله يثبت حملش ويسره ليش وتشوفين ولدش او بنتش في حضنش يا رب

حنون اي والله شكل ملاك ما تبغي تطلع توها من اشوي قاعده تعفس في بطني مرة يصير يسار ومرة يمين حتى زوجي قام يضحك يقول هذة مرتاحة داخل تلعب هههههههه

الله يجيبها لي بالسلامة ويجيب ليش علاوي وفتوت بعد تشوف البنوته وكل البنات يا رب

والله يحفظ الجميع والسنة الجايه ان شاء الله يحتفلون معانا بالعام اليديد واعياد ميلادهم مرة وحده

[حنين للماضي]

السلام على من اتبع الهدى

اليوم صخة كل هاي غاصين مع ازواجكم

حبيبتي كادي والله على طاري كريمات التبييض في انواع مختلفة على حسب نوعية جلدش واني بالنسبة لي يفضل تروحين عند طبيب لو طبيبة عشان يكتبون ليش اشياء طبية احسن
واذا ماعندش وقت تروحين لدكتور في البحرين روحي الصيدلية وقولي لهم كريم لتبييض اكيد راح يعطونش عدة انواع وانتي اختاري
وفي عدة وصفات طبيعية بإمكانش البحث عنها من خلال قوقل
وشعرش يمكن الحمل مأثر عليش
سوي ليش حمام زيت على طول واكلي فاكهة وخضروات وان شاءالله يوقف التساقط
هاي كل اللي اقدر اخدمش فيه
وحياش الله بديرتنا الصغونة

فتوت مابغيتي اطلين علينا
كل هاي تكبر
شخبارش وشنو تطورات الشهر التاسع؟؟
اني التنمل اله يصيدني في يدي اثناء النوم ينرفزني حتى اصابعي ما اقدر احركهم
وهاليومن كله يصيدني شد في ظهري ورجولي
الله يقومنا بالسلامة ياااااااااااااااارب

شموس اني للحين مابديت امشي
زوجي مايشجع عدددل
شكلي من باجر الصبح بقوم امشي بروحي لأن لو عليه شكله ولا بمشي
يرجع من الشغل واذا قلت له قوم نمشي يقول لباجر اليوم تعبان وكل يوم على هالمنوال

فلونة شكله فيش بنوتة والله العالم
الاعراض اللي تكلمتي عنها كلها اعراض الحمل ببنت
تعالي شخبار علاوي
تصدقين يوم قلتي رقدوا قمت احاتي اختش واحاتي هالجاهل,,
اني بعد قبل اسبوع رقدوا عباده ومسكينة اختي تعبت معاه عدل في تبديل الحفاضات والثيابه لأن زحمة عدل ويه السيلان واياديهم صغيرة مساكين
بس الحمدلله ربي قومه بالسلامة

[rose soul]

السلام عليكم
شخباركم ؟؟
وان شاء الله تكون هذي السنة..سنة خير على الجميع يا ربـ .. ونسمع فيها الاخبار الحلوة بسـ
..
أحلامـ ام مشكورة فديتج بعد جبدي على الدعوات..الله يتمم لج حملج..ويسهل عليج الولادة يارب
..
فتوت يا الكريها..وينج؟؟اخيرا طلعتي في السنة الجديدة هههه

[بنت الأياويد]

هابي نيو يير ماهي من عوايدنا ،،، لكن بقولها لك بالمنطق الثاني
في كل عام عسى الله لايفرقنا ،،، وأعيش لك وتعيش لي يا أعز خلاني

كل عام وانتوا بخير وعساها ان شاء الله سنة خير يارب عليكم جميعا

السلام عليكم ، شخباركم
هلا والله الفتاة مابغيتي تبينين ، اي يبت بنت مثل ماقالولي واصلا دكتورتي ماتقول شنو في الوحدة الا لين متأكدة من جنس البيبي ، الا بسألكم في اي صفحة ام حماني حطت صورة ولدها؟ خاطري اشوفه وصارلها فترة مادشت بعد ؟!