بقول لكم حالتي من اول شي ((قصه))خخخخخ
يوم الثلاثاء من اول ما صحيت لصلاة الفجر الإ احس بوجع ببطني مثل الدوره قلت يمكن عشاني باديه بالسادس ...ورجعت انام الى الساعه ست ونص صحيت عشان اصحي زوجي للدوام حسيت الوجع زاد رحت للحمام وانتم بكرامه الأ اشوف قطع مثل البني تنزل خفت وما علمت زوجي ..قلت له استاذن اليوم بروح للطبيبه احس بمغص بس ..هو داوم وما رضى مديره يطلع ..العصر زاد الوجع وزوجي عنده العصر دراسه في المعهد وما يطلع الا الساعه ثمان ونص باليل الوجع زاد علي وبدا ينزل الدم نقط بعد ما طلع زوجي من المعهد رحنا للدكتوره عبير بالشعبه خبرتها عن الدم قالت في البدايه بشوف السونار عشان الجنين ..بعدين قالت الحمدالله الجنين تمام والحركه تمام قالت بكشف عليك من داخل قلت اوكي اول ما كشفت قالت الرحم مفتوح وبحولك الان للمستشفى بسرعه احتمال يكون عندك ولاده مبكره وانا خفت وبكيت وهي نادت زوجي وقالت له وخوفته زياده قلنا اكتبي التحويل للمصانع رحنا طيران للمصانع للطواري ..بعدين جلست ساعه في الانتظار والالم زاد والخوف والدموع وكل شي الساعه كأنها سنه بعدين شرفت الدكتوره وكشفت قالت الرحم مفتوح شي بسيط واحنا ماعندنا سرير الأن لكن ارجعي للبيت وارتاحي ولا تتحركي كثير وراح اكتب لك موعد بعد اسبوعين تراجعينا واذا زاد الالم خذي حبتين فيفادول وتعالي بكره عشان تحددي الموعد وعندك تحاليل وبس
رجعت للبيت وانا ميته وجع وخوف وبكى ..مانمت ذاك اليله من الهموم واقلقت زوجي معاي الالم مستمره معاي وخاصه المغص من بكره داوم زوجي وبعده استاذن رحنا وحددنا الموعد وحللنا ...قالي زوجي تقدرين تتحملين اسبوعين ..قلت لا الالم زاد والدم زاد علي رجعنا للطواري مره ثانيه وجلسنا في الانتظار وجاتني الدكتوره الهنديه وكشفت علي قالت روحي للاشعه ..رحت للأشعه مشي بدون عربيه من غرفت الانتظار للأشعه بعدها خلاص تعبت زياده قالو الرحم مفتوح 2 صانتي واحنا ما عندنا سرير بنحولك للخالديه او للعسكري
رفض زوجي الخالديه اكتبو التحويل للعسكري بالرياض طلب منهم اروح بالاسعاف رفضو
رحنا بسيارتنا ..اول ما وصلنا هناك العسكري انواع الخدمه اول شي جابو السرير الى السياره وبسرعه دخلوني للدكتوره وركبو المغذي واخذو تحاليل بعدين كشفت علي الدكتوره قالت عندك ولاده مبكره الرحم مره مفتوح اخذوني من الطواري للقسم الولاده بالاسعاف دخلوني غرفت الولاده هذا يوم الاربعا المغرب الساعه 7 جاتني الدكتوره عطتني مسكن قات الى ان يجي الاستشاري بكره والحمدالله حسيت ارتحت بعد المسكن شوي من بكره الخميس جاء الاستشاري ما كشف علي بس قالت له الطبيبه الحاله وقال نامي على ظهرك وارفعي رجليك بمخده اذا رجع الجنين سوينا لك ربط لأن الجنين كان نازل مره رفعت رجلي طوال الخميس وانا نايمه على ظهري الي الساعه 5 الفجريوم الجمعه جاتني الطبيبه وكشفت علي قالت ما في امل يرجع الجنين وراح تولدين والجني الله اعلم ما ادري يعيش او لا بس اثنا الولاده راح يكون عندك اشتشاري الاطفال ..بكيت ذاك اليوم بكاء الله اعلم فيه من الخوف من الولاده والخوف اني افقد الجنين وجاتني هموم الدنيا كلها في ذاك اليوم دقيت على زوجي وعلمته بكل شي ..اما امي لا قلت انهم قالو اصبري يومين كمان عشان ما تقلق علي ..جلست انتظر الطلق وحطو علي جهاز الطلق وجهاز نبض الجنين وجهاز للتدليك على رجلي خافو من التجلط الان لي 3 ايام ما مشيت ..والساعه اربع العصر بدا الطلق الى الساعه 7ونص ولدت واو تعب مره الولاده وخاصه الطلق موت ..ما سوو لي توسعه لأن الجنين صغير ولا سوو لي خياطه ..بعد ما ولدت اخذ الدكتور بنتي وبدا يكشف عليها والممرضه عطتني ابرة الفخذ والحمدالله بس طوال الوقت اسئل بنتي عاشت او ماتت وما احد رد علي في النهايه قالت الممرضه الي عندي ان شاءالله بنتك عايشه طلعوني للتنويم خبرت زوجي واهلي جاء زوجي للمستسفى وراح للعنايه يشوف البنت من شافه الدكتور قاله بنتك مستحيل تعيش اكثر من ثلاث ساعت هذا الساعه 8ونص والساعه تسع وخمس واربعين ساعه توفت البنت الله يشفعلي فيها يارب
دق علي زوجي وبد يقولي لا تأملي تر الدكتور ما مدحها والله بديت ايئس منها وابكي على حالي لأني كنت مأمله فيها لكن الله كريم من بكره اتصل المستشفى على زوجي حتى يجي يستلم البنت تأثر زوجي في البدايه لكن انا اكثر منه ونفسيتي تعبت بس ما بينت لأحد شي كتمتها بصدري وكل ما وضعت راسي على المخده بكيت الى الصبح ما ادري ليش بعدها بدا الحليب ينزل من صدري ويزيدني هم ونكد لكن الحمدالله ..والله اكتب لكم قصتي وانا دموعي بعيني الله يعوضني يارب
وذاك اليوم رحت لغرفتي وكان زوجي موجود فيها وعنده اوراق فتحتها الأ هي اجرائات الدفن ما قدرت امسك دموعي بكيت وبكاء زوجي معي قلت لا اشوفها مره ثانيه بغرفتي
والحمدالله لِله ما اخذ وله ما اعطى
هذي قصتي بالكامل ....واي وحده عندها اي استفسار انا موجوده
بس اعتذر لكم ما راح ادخل كثير لأن امي ما توافق اني اجلس على الكنبيوتر
دعواتكم لي بالصبر واني انسى بنتي بسرعه والله انها في بالي دائما مخاصه اذا الحليب نزل ابكي بالحمام عشان امي ما تشوفني الله يعين ضيقت صدوركم معي
الحمدالله على كل شي ...واسف على الاطاله
05-26-2011, 12:23 AM
رد: دردشة حوامل أهل الخرج - دردشة بنات الخرج - تجمع حوامل الخرج
حنان 1985 
جديد منتدى إستفسارات حوامل من الشهر السابع إلى الشهر التاسع
العرض المتطور
