ديوانية البحرين - دردشة حوامل البحرين - البحرينيات

[شمس الصباح]

ام محمود يا هلا أهل البديع يعني انتين قريبا منا والله يثبت حملش

مشمر زري حاولي تاكلين علشان تعوضين الدم اللي ينزل

احلام ام اني توني جايه من صوب بيت ابوشقلت لزوجي يدليني راوني بيت قال هذا بيتهم بعدين رد قال لاااااا مو هو ويرد يقول هو المهم بيت ابوش فيه نخلة ومظلة حوليها عجبتني النخلة بالمظلة ما شاء الله وايد كشخة اني من زماااااان ما رحت هالجهة حدي بيت عمي واني راجعة

عجل في سوق الأربعه صرتين كانش جايه من الحج ههههههههه الكل يحبش اني بعد دبحني قاسم مع الألعاب بس ما قدرت اواصل حظي يبغي يدور السوق كلها بعدين يقرر شنو يشتري وعدته اوديه القبائل

[أحلام أم]

شمس
هذا هو بيت أبويي نخله طالعة من وسط المظله ههههههه ،تعالي تشرفينه ترى ديكور المظلة من داخل عجييب تراثي السقف حصير وجندل أحمر ومحطوط فيه ثريه على شكل ليتات كروية كل كرة فية إسم الله والنبي وإمام وعلى الجوانب سفر خوص خبرش أبويي رئيس جمعية تراثية ربي يطول في عمره فبيتنه متحف تراث ههههههههه
ويش أسوي صار ليي دهر ما أشوف اهل الديرة وكأني ياية من الحج ههههههههههههه الله يهدي هاليهال مايشبعون من الألعاب
أشوفكم ...

[الفتاة الذهبية]

هلا شخباركم

دشيت من شوي وجيت بكتب
الا بنتي قعدت من الرقاد متروعه

وقمت وما كتبت شي

انا يوم الاحد ان شاء الله عيد ميلادي وااااااو
ويوم الخميس ان شاء الله بنسافر الامارات عند حماااتي
وراح توحشوني وااايد

[مس توته]

صباح الخير غاليات

رجعت لكم بعد المرض العصيب اللي صادني والحمدلله رب العالمين اللي شافاني ببركه دعائكم لي الله يخليكم واشكر كل من ذكرني وحتى اللي ماذكرني..

شاوصف لكم الالم ضلوع صدري احسها تتكسر وعلى كلام الناس لي انش اكيد شامه البخوور بتاع هالحميييييييييييييرررررر اللي بررره اللي مغربلينا كل يوم وفعلا كان قبلها بيوم حسيت عيوني تحرقني وخشمي بس ماشميت ريحة شي ويوم ثاني قعدت اقول لزوجي والله احتضر اني احتضضر بمووووووووت وزوجي يمي مجود ايدي يقول لاتقولين جذي قومي المستشفى اقعد اصرررررخ كل خمس دقايق تجي نوبات الالم قويه عدل واني في خاطري اقول كأني اطلق بس في الصدر الالم ووداني المستشفى وحطوا لي سيلان جان اقعد اصررررخ سستر سستر تعالي بموووت واقعد ارجع ارجع لين طلعت جبدتي ويا الزوع وغمى علي وقعدوا يصحون فيني ورجعت بيت ابوي واسبحهم من الترجيع ولا قدرت اكل شي ابداً ولا حتى ماي والحمدلله رب العالمين تشافيت

هذي قصتي وسامحوني طولت فيهااا..

شخباركم بعد والله انتون خووش بنوتات ربي يحفظكم

[اميرة الورد ~]

صباااااااح الخيييييييييييير
كيفكم كروشاااات

[مشمر زري]

صباح الخير أحلى كروشات

[فلونة]

السلام عليكم.. شصاير اليوم الديوانية صخة وماميش حس حق احد

مس توتة.. ماتجوفين شررر حبابة واذا على ريحة البخور لا اطلعين برة البيت و احكمي المنافذ الدريشة والابواب والايسي بنديه حزة البخور واذا كلش قصي بصلة وشميهاا لين ينبط الخشم من الريحة

مشمر زري. ام محموود ,, الله يتمم لكم على خير و يرزق كل محرووووومة يارب

طفلووو.. وين استقريتين احين؟؟ الله يسهل الامور و يرجع زوجش بالسلاااامة ويشافي العمة العزيز ويشافي كل مرضى المؤمنيين و المؤمنات قادر ياكررريم ان يشملنه بعطفه و رحمته ..
وبالنسبة حق زوووزة حاولي تهوووينها بالساعات و ليس الدقائق اكو وردتي مازال الحرار مستمر ومابيدي عليها شي

فتوووت .. هبي بيرثدي تو يوو حبابة و تروحين وترجعين بالسلامة عاد ننطر البخور و العطوور من دبي دار الحي و ييبي حق بنيتي دشداشة

شمس الشمووسة وام علي ماطليتون علينا اليوم لكم وحشة حبيبات البي..

الباقي ام خليل رووز ام بشوورة و ررووز ام بنوون .. حنوووون ،، ام حسين الدار ، حبيبة حسوونها ،، ام السااادة ... حزززينة ,, وكل العضوات نفرة نفرة تمنياتي الجميع بخيرر و ننطر عودتكم و اخبارركم

[فلونة]

اليوم بسوي قيمات على طريقة السيدة بسوي كمية كبيرة اذا الله قدرني و ان شاء الله تضبط عندي لانه اليوم بيقروون مجلس للتوسل بالامام عجل الله فرجه و لقضاء الحوائج .. ما بنساكم من الدعاء حبيباتي ولا تنسوون الدعاء بالفرج العاجل لاخوانكم و خواتكم البعيدين عن اهاليهم رحم الله والديكم :)

[الفتاة الذهبية]

هلا فيكم كلكم
وشصاير صدق صاخين خخخخخخ

فلونة
شكرا حبوبة انا بروح الشارجه وليس دبي ههه
بس دشداشه تامرين امر

[الفتاة الذهبية]

مس توته
ما عليج شر يا رب