شاركينا بتجربتك متى علمتي بحملك؟؟؟ وكيف علمتي ؟؟

[بنوتة الأحساء]

بأذن الله الله يكرمني وعلمكم بالتفصييييييييييل اهئ دعواتكم
الله يقوووم كل كروشه بالسلاااااااااامه ويرزق كل من تتمنى ياااااااارب

[دلوووعـــه%]

متى علمتي بحملك ؟؟؟
قبل ثلاث ايام
بعد تاخر الدورة بكم يوم ؟؟؟
تأخرت عشر ايام عن موعدها وكنت داااايم ادعي لماتتأخر انو اكون حااااااامل
متى حللتي ؟؟؟ وما نوع التحليل؟؟ بول منزلي ام بالمشفى ام دم ؟؟برضو حللت قبل ثلاث ايام تحليل دم بالمستشفى وبعد ربع ساعه طلعت النتيحه
وكنت متوووووووتره وابكي وادعي انو ربي يكتب لي حمل والحمدلله والشكر
ماذا كانت اعراضك ؟؟؟
اعراض دوره100% مصحوب بغثيـــااااان شديد وقيء
واذا دخل زوجي للبيت ابكي لدرجة انو صار ينام بالمجلس وانا مدلعه بغرفة النوم هههههههههآآآآآآآآآي
ومااقعد من النوم الاساعه عشان اكل وارجع انام
هل حللتي حمل منزلي وطلع لك سالب ؟؟؟ ومتى حللتي مرة اخرى ؟؟؟ وماذا كان نوع التحليل ؟؟؟
حللت حمل منزلي ماطلع غير خط واحد ورحت للمستوصف ووضح عندهم

[أم حماني]

متى علمتي بحملك ؟؟؟
تاريخ 3 - 1 - 2010
بعد تاخر الدورة بكم يوم ؟؟؟
كانت متأخره يومين بس
متى حللتي ؟؟؟ وما نوع التحليل؟؟ بول منزلي ام بالمشفى ام دم ؟؟ حللت بثالث يوم وماكنت ابي احلل اصلا لاني كنت واثقه الدورة بتنزل بس اختي الكبيره كانت تلح علي وايد واهيه اللي شرت لي التحليل وجبرتني اسويه والصراحه انا سويته بس عشان افتك من حنتها ... ههههههههه ماكان عندي امل اكون حامل .. حللت بالبيت وطلع خطين على طول وبعد ماكنت واثقه ولارحت سويت تحليل دم

ماذا كانت اعراضك ؟؟؟
كانت فيني اعراض الدورة وكنت متوقعتها تشرف بأي وقت لدرجة اني كنت حاطة الفوطة الصحية
هل حللتي حمل منزلي وطلع لك سالب ؟؟؟ ومتى حللتي مرة اخرى ؟؟؟ وماذا كان نوع التحليل ؟؟؟ لا ماطلع سلبي ... بين على طول

تفاصيل اكثر ... يوم اللي عرفت اني حامل كنت عازمة امي وابوي واختي واعيالها عندي بالشقه ... بعد ماحللت وطلع خطين كنت وايد منصدمه والف مليون فكره يات براسي وسويت مثل المسلسلات حطيت يدي على بطني وحسيت بشي ثمين وغالي بداخله .. ناديت اختي مب عارفه شلون اقول لها بس قلت لها روحي شوفي النتيجه بنفسج وطلعت من الحمام تصارخ ... (( يمه ... يمه .... بنتج حامل )) ههههههههه وامي شقت الحلج اول مره اشوفها مبتسمه هالكثر وانا حدي انحرجت من ابوي .. و زوجي ماخبرته واهوة كان بالدوام اصلا .. طلعت العصر مع هلي كلهم ورحنا المستشفى عشان اتأكد .. وطلعت فعلا النتيجه ايجابيه وقلت لزوجي اني رايحه المستشفى مع ابوي لانه ريله تعوره شوي .. وبعدها رحت شريت باقه ورد وعلبه فاضيه وبطاقه .. وغلفت العلبه بورق التغليف .. لفات كثيره عشان ماتنفتح بسرعه .. و يوم رحت البيت واهوة كان عند امه .. كلمته قلت له تعال الدورة نزلت علي وانا تعبانه .. اهوة كان عارف انها بتشرف اي وقت .. ويوم ياني الشقه قلت له دور لي ( مطارة الماي ) ماعرف شنو تسمونها بس اللي نحط فيهاا ماي حار ونخليها على البطن واهوة يدورها انا خليت باقه الورد على السرير مع العلبه ويوم شافهم تفاجأ .. وكان بالصدفه يايب لي معاه ورده و لونها وردي .. قال لي احرجتيني .. انا يبت لج وردة وانتي يبتي لي باقه .. وشاف العلبه ما اهتم لها يحسب عطر او ساعه او شي .. الريال قاعد يقول كلام رمنسي وانا في قلبي اقول اخلص علينا بسرعه بس .. هههههههه ويوم قلت له افتح العلبه وانا اصوره فيديو .. عصب وتملل لانه مب من النوع الصبور .. وانا اقوله يالله واصل واهوة مايبي يواصل يحسب مقلب لانه العلبه خفيفه كأنها فاضيه .. ويوم اخيرا فتح العلبه شاف الورقه مالت التحليل وقعد يقراها ومافهم شي ههههههههههههههه على انه شاطر بالانجليزي بس من الصدمه مافهم شي وانا قعدت اقرى له واقوله .. واهوة مب مصدقني .. واحلف له يقولي لا لا يمكن التحليل غلط ... اقوله لا هذي تحليل دم مستحيل يكون غلط .. وبعدها شوي خذني على قد عقلي وحضني وقلبه يدق بقوة ومب مصدق ... على طول طلعنا من الشقه وكانت الساعه 8 ونص بالليل ورحنا حق امه واخته نبشرهم وهذا غير اللي بشرهم بالتلفون ... والكل فرح وبارك لنا الحمدلله ... بس تصدقون كان بعد مب مصدق وماصدقني الا يوم وداني عند دكتورة وشاف كيس الحمل بالالتراساوند .. بعدها قال .. الحين صدقت ههههههههههههه ومرت الايام وبدى الوحام الصعبببببببببببببببببببب وكرهت كل شي بحياتي .. حتى حملي استغفر الله كرهته .. كنت كأني ميته ولا ادري عن اي شي بالدنيا .. بس بنص الرابع بدى يخف عني وتمتعت بباقي الحمل الحمدلله رب العالمين ...

سوري طولت عليكم >> زين حسيتي ههههههههههههههههههههههههه

يارب يارب ياررررررررررررررررب تمم على كل حامل على خير
وارزق كل محرومة يارررررررررب عاجلا غير آجل

[جنة حبيبي]

بعد ماتاخرت الدوره عشر ايام ماكنت متوقعه انه يكون حمل بتاتا لأني كنت أعاني من هرمون الحليب شهور كنت لما تنزل الدوره اتعب واتضايق لأني كنت حاطه الحمل ببالي الا الشهر كنت ناويه أعالج الهرمون سبحان الله مع الاستغفار والصدقه بنية الحمل لهم تأثير سويت تحليل منزلي وطلع خطين ماصدقت من الصباح رحت المستشفى وسويت تحليل دم والحمداالله طلعت حامل يااااااااارب. لك الحمد........

[همسة خير]

مساء الود
اشكرك على هذا الموضوع
وبالنسبه لي بحكيلكم معاناتي مع التحليل

الدوره اتأخرت علي كم يوم وجبت جهاز اختبار الحمل وطلع سالب
بعدكذا كان عندي اختبارات وانشغلت فيها الين فيوم جأني الم فظيع في بطني
لاني اكلت سندوش ماناسبني
ورحت للمستشفى والدكتور قال لي انتي حامل؟
قلت له ما ادري
قال ابأخذ لك عينه من الدم واشوف
وفعلا اخذ عينه وقال لي مو حامل ووصف لي ادويه ياكثرررره عشان جتني جرثومه في المعده
وتخيلو جلست اكل بهذي الحبوب وكل حبة اقوى من الثانيه الين ماطحت طيحه جامده من الادويه وصرت ادوخ ومو حاسه بجسمي
اكلت الحبوب لمدة يومين بس بعدها وقفتها
حسيت انها هي اللي تضرني
وبعدها زوجي جاب لي جهاز تحليل الحمل المنزلي مرة ثانيه وطلع موجب
ورحت اتأكد من الدكتوره في مستشفى الاطباء المتحدون وطلعت حامل
بس تخيلوا هذاك الدكتور كيف اعطاني هذي الادويه القويه اللي كانت بتضرني بس الحمدلله ربكم لطف

[ام مازن ان شاء الله]

انا متزوجة جديد وحملت في الشهر التاني من زواجي وجاتني اعراض الحمل قبلها باسبوع كنت شاكة اني حامل واعراض الحمل كانت الم في ظهري وغثيان وبعد غياب البيريود بيوم جبت الاختبار المنزلي والحمدلله طلعت حاااامل فرحت جدااا بصراحة وسجدت لله وشكرته
وزوجي فرح كتتتتير
وميرسي علي موضوعك الحلو

[|| A L W A N ||]

مشكورة حبيبتي عالموضوع..

أنا كنت تاركة حبوب المنع لكني كنت أسوي عزل حتى تنشط البويضة بعد الحبوب..
شهرين سويت العزل ولا حملت.. بعدها قرب رمضان وكنت ماأبي الدورة تحوسني فيه.. فرجعت للحبوب لمدة شهرين..
وبعد رمضان رجعت للعزل.. شهر ذي القعدة تأخرت الدورة تقريبا 5 أيام وتوقعت الحمل بس لهذ السبب لأن دورتي منتظمة.. واشترينا جهاز التحليل المنزلي وطلع خط واحد أنا مو مصدقه وأقول لا حامل.. لكن زوجي مصدق التحليل وتأخرت الدورة ايضا وما صبرت رحت للمستشفى وحللت وطلع سالب........وبعده بيوم نزلت الدورة !!! وأنا متعجبة من التأخر..

في شهر ذي الحجة عزلت أيضا_ والسبب فقط ما أبغى تكون ولادتي برمضان_ وتأخرت الدورة أسبوع وأنا أقول عادي لأنه تأخرت الشهر الماضي يوم تأخرت عشر أيام اشترينا جهاز التحليل وطلع خطين واضحين على طووول...
لكن هالمرة انا انصدمت.. وفرحت بنفس الوقت .. لكن ما صدقت ورحت للمستشفى بسوي التحليل .. لكنهم رفضوا لأنه يكفي التحليل المنزلي للبول..
وسوت لي الدكتورة سونار وشافت البويضة بالرحم..!!
أنا أبغي الحمل بس ما كنت أبغاه هذا الشهر والحمد لله على كل حال!!!
وفرحنا كلنا بالحمل _ وأسأل الله أن يجعلنا من الشاكرين...

...طولت عليكم >>>>>>>> هذي قصة مو إجابة سؤال!!!هههههههه...

[روعة الحب]

المشاركة الأصلية كتبت بواسطة قطرات ندى

متى علمتي بحملك ؟؟؟

بعد تاخر الدورة بكم يوم ؟؟؟

متى حللتي ؟؟؟ وما نوع التحليل؟؟ بول منزلي ام بالمشفى ام دم ؟؟

ماذا كانت اعراضك ؟؟؟

هل حللتي حمل منزلي وطلع لك سالب ؟؟؟ ومتى حللتي مرة اخرى ؟؟؟ وماذا كان نوع التحليل ؟؟؟

انا حزتها كنت انتظر الدورة وجاني الم الدورة
وبديت اشرب دارسين ونزل مني دم خفيف وقلت واخيرا جات
وبعدها وقف الدم وبديت اشك ان فيه خلل بدورتي
ولا على بالي الحمل ابد ...
انتظرت 6 ايام وماشفت الدم رجع بس كان بني خفيف
والم الدورة اختفى كله
عقبها رحت المستشفى احلل
وطلعت النتيجة مبروك انتِ حامل
يؤؤؤ شلون متى خخخ
عطتني الدكتورة مثبتات وخلاص بدى مشوار الحمل
ربي يرزق كل متزوجة ومتزوج يارب العالمين

[اميرة لحالي]

المشاركة الأصلية كتبت بواسطة قطرات ندى

السلام عليكم ورحمة الله وبركاته
وعليكم السلام يا حبيبتي

كيفكم كروشات ربي يسهل عليكم

الحمد لله انا تمام وكرشي مو بين مرة
كيفكم كروشات عن قريب
وبنات علشان ما حدا يزعل هع

كما واضح من العنوان شاركينا بتجربتك علشان الكل يستفيد لان الكثير يسال عن اعراض الحمل وعن التحليل فقلت احسن شيء اسال الحوامل ربي يثبتهلم حملهم امين رب العالمين ويسهل عليهم


متى علمتي بحملك ؟؟؟

قصتي قصة متاخرة 7سنين الحمد لله على كل حال الله عوضني

بعد تاخر الدورة بكم يوم ؟؟؟

بعد تاخير الدورة ب9 ايام

متى حللتي ؟؟؟
وما نوع التحليل؟؟ بول منزلي ام بالمشفى ام دم ؟؟ بعد دورة ب9 اول بول منزلي بعد نتيجة ايجابي على طول مستشفى سويت تحليل دم الحمد لله طلع ايجابي

ماذا كانت اعراضك ؟؟؟

والله ما حسيت باي شي بس صدري يوجعني شوي

هل حللتي حمل منزلي وطلع لك سالب ؟؟؟ ومتى حللتي مرة اخرى ؟؟؟ وماذا كان نوع التحليل ؟؟؟

قبلاتي تسبق تحياتي

اشكرك كثيرا على هيك مواضيع .
.....ودي واحترامي

[جداوية رايقة]

تأخرت الدورة عني وجتني افرازات ذات رائحة نفاثة وذهبت للدكتورة لمعالجة الالتهابات وسويت تحليل دم وبشرتني بحملي