اقتباس:
المشاركة الأصلية كتبت بواسطة راية
والله يا متفائلة اني قالتلي عليها ماما من صاحبتها تمشي تعالج عندها وتشكر فيها ...زحمتها عادي لو تمشي قبل موعدها وتاخدي رقم متعطليش هلبا بالكتير سويعة او اكتر شوية بالك عندك هلبة اني عادي عندي... وان شاءالله يا حلوة ربي يرزقنا ويرزق كل من تبي ..انت شنو كشفتي ولا لا
|
راية آني قصتي بالتفصيل كالتالي .... بعد ماتزوجت بدت الدورة تتلخبط عندي وبعد ماتزوجنا بأربعة شهور وماصارش حمل قلت لراجلي خلي نمشي بالك الدورة اللي ملخبطة مسببتلي مشكلة ... مشيت للعيادة وطبعا اللي يشوفني في العيادة يقولي اربعة شهور ليك مازال بكري على شنو مستعجلة وكويس اني مشيت من هضاكا الوقت ... المهم خشيت للدكتورة وقالتلي عادي يصير تلخبيط الدورة مع اول الزواج ودارتلي جهاز وقالتلي مبايضك كويسات ومافيهمش لا تكيس ولا حاجة الحمد لله والرحم كويس لكن بس فيه شوية ترسبات ويمكن يكون السبب ان كان في بداية حمل وماصارش منه هذا سبب الترسبات ... كتبتلي فيتامينات ودوفاستون ناخده لمدة شهر واحد ... خديت الدوفاستون هضاكا الشهر وتنظمت الدورة شهر الدوفاستون بس والشهر اللي بعدها جتني من اليوم 16 وجتني شويييية وغريبة لدرجة ان الدكتورة قالتلي هادي مش دورة يمكن هذا التبويض هكي دار شوية دم لكن طبعا كيف جت الدورة اللي بعدها اكتشفت ان هادي كانت دورة لكن مانعرفش علاش هكي جت .... المهم الدكتورة قالتلي خلاص انتي امورك كويسة وماعندكش ولا حاجة ... وتوا قبل مانخشوا ونزيدوا نتعمقوا في حالتك ونطلبوا تحاليل مرات مايكونش ليها داعي وتكوني مش بحاجة ليها .... نكتبلك تحليل لراجلك بش كان طلع هوا سليم نزيد نطلب عليك انتي تحاليل .... خديت الموضوع بجو وقلت مستحيييل تطلع فيه حاجة انديروه هكي وخلاص لأن الفكرة اللي واخدتها ان في الغالب تكون المشكلة في المرا ... مشينا درنا تحليل راجلي وانصدمنا صدمة كبيرة .... طلع في مشكلة في الحركة عند راجلي وتشوه بنسبة كبيرة هلبا في الحيوانات المنوية... بعتتني الدكتورة لدكتور وقالتلي بش يعرف شني السبب .... طبعا مالحقناش نمشوا للدكتور هذا لأن مشينا لتونس .... وقلنا يمكن جت مشيت تونس فيها خيرة بش نتابعوا موضوعنا .. مشي راجلي لزوز دكاترة ... والإثنين طلبوا عليه تحاليل وداروله صور وقالوله ان عندك دوالي في الجهتين وهذا اللي مسببلك المشكلة ولازم تبي عملية .... طبعا بالرغم من ان حتى في تحاليل تونس طلعت في مشكلة لكن تحليل تونس سبحان الله كان افضل هلبة من تحليل ليبيا مانقولكش انه طلع سليم لكن طلع افضل .... المهم استخرنا وتوكلنا على ربي ودرنا العملية والدكتور اللي دارله العملية قاله الحالات اللي نديرلهم آني في عملية يصير حمل بين 3 الى 6 شهور ... وادير تحليل بعد 3 شهور بش تشوف مدى التحسن اللي صار ... توا لينا اربعة شهور مدايرين العملية ... والشهر اللي فات يعني بعد 3 شهور من العملية درنا تحليل والحمد لله الحركة صار فيها تحسن كبير لأن قبل كانت الحركة البطيئة والحركة اللولبية كويسات لكن الحركة السريعة اللي عليها الكلام كانت صفر ... في التحليل اللي فات الحركة السريعة ولت 15 ولله الحمد والطبيعي مفروض يكون 25 ... يعني الحمد لله في شوية تحسن ... لكن التشوه مازال في التحليل مابانش ان في اي تحسن .... وبعد ما درنا العملية في تونس قلتله راجلي هكي توا خلي نمشي آني لدكتورة نستغلوا الوقت طبعا مشيت لدكتورة حبوبة في تونس واسلوبها حلو وتحسيها كويسة ... وقلتلها ان الدورة عندي ملخبطة وتجيني شوية يعني مش هلبة دم ينزل ... دارتلي حتى هيا جهاز وقالتلي مبايضك ماشاء الله كويسات والرحم مافيش التهاب والا حاجة والمهم ان في دم ينزل يعني ان يصير تحليل مش بالضروري يكون في هلبا دم ... واعطتني كورس دوفاستون لمدة ثلاثة شهور .... وطلبت عليا تحاليل .... درت التحاليل طلعوا الحمد لله كويسات .. في زيادة بسيطة في هرمون الحليب البرولاكتين وقالتلي زيادة ماتأترش ومافيهاش حاجة لأنها بسيطة .... خديت الدوفاستون ثلاثة شهور .... الشهرين الأولات الحمد لله الدورة تجيني كويييسة ويوم 28 وعلى طول تجي دم وامورها تمام وتمسح على القلب... الشهر اللي فات اللي هوا آخر شهر من الكورس جتني من يوم 25 بدت افرازات بنية بسيطة وبعدين في يوم 26 بدت تزيد ... يعني جتني بعد 26 يوم بدل 28 ... والشهر هذا طبعا ماخديتش فيه ولا حاجة والدورة تأخرت واستغربت فيها لأنها عمرها مادرتها حتى كيف كانت ملخبطة كانت تجي بكري يعني يوم 22 21 والا 24 لكن عمرها ما قعدت لليوم 33 زي الشهر هذا ... طبعا وكل يوم تعطل كل يوم يزيد عندي الأمل ونتخيل روحي حامل وفي الأخير في اليوم 33 جت والحمد لله يعني بعد تأخير 5 ايام ... وجت نفس الطريقة في الأول افرازات بنية بسيطة وماتبانش الا بعد مانمسح وبعدين كل شوية تزيد والى حد الآن قاعدة تنزل شوية شوية آني اليوم ثالث يوم ... يعني ولت حالتي زي ماكنت قبل الدوفاستون .. وما نعرفش شني السبب والدكتورات يقولولي كويسة وما فيك شي مانعرفش كيف .... فتوا ندور في دكتورة ثانية كويسة بش نمشيلها وتشوف برنامجي بش على الأقل نشري راحة بالي من ناحيتي آني .... اليوم قالتلي " عيون " على دكتورة آمنة قرينات في مصحة الرحمة ... كلمت المصحة وقالولي الدكتورة مسافرة ... وسمعت بدكتورة اسمها اعتماد سألت عليها اليوم في عيادة وقالولي تشتغل السبت والثلاثاء .. توا مش حنقدر نمشي السبت .. فبإذن الله نمشيها الثلاثاء .... وان شااء الله يااارب يصير الخير .... ادعييلي هلباااا ... وشني راايك في التطويلة هاااادي .. حسيت روحي خاطري نكتب قصتي بش نفضي اللي في داخلي .. لأني قصة راجلي مش قايلة عليها لحد ومافيش حد يندري عليها الا آني مراعاة لشعور راجلي .. والنفسية مهمة في الموضوع مانبيش نفسيته تتعب ويقعد يخمم في الموضوع اكثر كيف يحس ان اماليه يعرفوا ... ومايبيش يشغل امه عليه على خاطر هكي ماقالش الموضوع .... ونشوف في المواضيع هادي خصوصية بين الراجل ومرته ومافيش داعي ان حد يخش عليها ....
وانفكروا ان مرات نمشوا للمركز اللي مشتله سالي ماشاء الله الأردني ... وحملت فيه بالتلقيح المجهري .. راجلي بدي يفكر في الموضوع هذا بجديات .. ادعووولنا ربي ايديرلنا اللي فيه الخيرة ....
وهادي قصتي يابنات من طأطأ للسلام عليكم وبالتفصيل الممل ...
ادعوووووووووووووووووووووووولي هللللللللللللللللللبة ..
12-08-2011, 10:33 PM
رد: تجمع حوامل ليبيا
ميمونة 
العرض العادي
