.·¤ تجمع الحوامل اللي ولادتهم في محرم¤·.

[مسكّ العطورّ]

انا اتوقققع الي بتوولد اول



اعز

ام اسكندر

مراوي

نوقا

انا

ميشووو

[روعة النسيان]

مساء الخير كل عام انتم بصحه وسلامه
اليووووم تعبت تعب حسيت شكل بطني تغير والله خفت اولد
والسبب السهر كملت 24ساعه مونايمه ومن غير الشغل على الغداء اللي عند عمي ومن غير رفعت الضغط من الحريم وانتي بس هزي راسك وتبسمي بنات عمي ثنتين والدات وحده يوم الترويه وحده عرفه وكلهم جابوا بنات اللي تقولي الحقي خوياتك واللي تقولي بتجيبين بنت مثلهم واللي تقول عطيناك بس عشر ايام لاتعدينها وانا مسفهه لهم ماعلقت

[ملكتني بهمسك]

المشاركة الأصلية كتبت بواسطة نهال الدوسري

مسساء الخير
وكل عام وانتم بخير قبل الزحمة
انقطعت لظروف عائلية النفسية زفت وبما ان الوضع جديد علي انا وزوجي مرة نفسياتنا تعبانة وزايدة المشاكل بيننا

انا امس رحت المستشفى لاان جاني رعاف للمرة الثانية الدكتور كشف علي للمرة الاولى يبي يشوف الرحم فاتح ولالا مع اني لسى مادخلت التاسع بس والله عورني حيل صحيت اليوم معي دم وللحين تنزل معي افرازات بنية انا مادري هل هالشي طبيعي لاانه كشف علي او ان هذي السدادة المخاطية حقت الرحم ؟؟ اللي عندها خبرة بنات تفيدني بليز

وانتي بالف خير -- الله يهدي النفوس ويسخر لك زوجك ويهديه --- حتى لو نزلت السداده عادي مابتولدي الا اذا شد الطلق خصوصن انك بكريه وانا اتوقع نزل الدم من قوه الكشف يعني دخل اصباعه لين جوت الرحم وهذا يسونها الدكاتره عشان يعرفون وين وصل راس الجنين وحوضك يستحمل الولاده ولا لا والتحريض يعني يحرك يده بشكل دائري جوت الرحم اما الكشف يدخل اصباع واحد

[ملكتني بهمسك]

المشاركة الأصلية كتبت بواسطة جالكسيoo

بنات لا يفوتكم قبل شوي صار لي اكشن
طبعا الفتره اللي راحت قلت لزوجي جب لنا صوص ودي يونس ولدي ويغير جوو البيت خخخخخخ
وقلت للخدامه طلعيه من القفص حقه خله يدور لانه واحد وصغنون مشكلتي خوافه مررررره وانا امشي جا عند رجلي وبدا ينقر فيها انا من الروعه صرخخخخت ونطيت نطه مااذكر اني نطيت زيها يمكن من قبل مااتزوج خخخخ صرت ريشه والله وحسيت شي بلل فخوذي على طول يعني يملا ربع كوب الله يكرمكم والمشكله ان الدكتورة قالت لي يوم الاثنين ان المية عندك مش وحشه يعني قصدها على الحفه تقول بنسبة سته وش رايكم خفت ياثر على الجنين وش تنصحوني اسوي والله بدا ظهري يعورني من النطة *

ههههههه انتبهي يا الغاليه على نفس مايأثر باذن الله الي يأثر كوب كامل وتكون دااافيه والمهم عوضي المويه الي خرجت بانك تشربي مويه زمزم ومويه زمزم مشاءالله بكل مكان

[ملكتني بهمسك]

المشاركة الأصلية كتبت بواسطة مسكّ العطورّ

. بنات قريت قصة هالبنت بمنتدى .. اقروها لي الاخر !! والله قطعت قلبي ادعولها واتعظو من العين
!





....................

حبيت انقل قصتها بناء على طلبها ولان فيها عبره للحوامل
..

وادعولها الله يعينها ويصبر قلبها
..

راح انقل لكم اقتباسات من كلامها..لانى مهما عبرت ماراح انقل الصوره مثل ماهى واصفتها
..

تابعوها
..

السلام عليكم ورحمة الله وبركاته

انا اول ما تزوجت ما فكرت كثير بالموضوع لاني مشغوله بشهر العسل ههههههههه

وبعد ما خلص شهر العسل وبنهاية الشهر الثاني من الزواج

جتني الآآآآآآآآآآآم فظيعه ولما رحت للطبيبه عملت لي التراساوند

و قالت الغريب ان عندك 3 بويضات جاهزه والمفروض تكون وحده

والالام منها لان التبويض يمغص البطن

ولو صار جماع هاليومين ممكن تحملين ب 3 اجنه

وتعالي شوفي الحماااااااااااااااس خخخخخخخخخخ

مع اني ما حسبت حساب الحمل بدري وما فكرت كويس بالموضوع

وتحمسنا وهببنا كل الايام اللي حددتها الطبيبه

وبعدها باسبوعين ننتظر الدوره ماااااااااااااااااااااافيه

وقلت بس اكيد اني حااامل

وكان نفسي اكون حامل بصراحه عشان احس باحساس الامومه

ومو مستوعبه اني ممكن اكون مسئوله عن كائن صغنون البسه واغسله والعب معاه

يوم سويت التحليل المنزلي طلعت خطين زي اللمبه ههههههههههههه

ومن يومها وانا في شقاء وتعب وثقل بس لو متوقعه هالشي كان اجلته شوي ما تهنينا

وانصدمت بالوحم اللي يحكون عنه الناس صار اكثر بكثير مماتوقعته

بس ان شاء الله ربي يتمم حملي على خير واشوفهم بين يديني زي الكتاكيت

ولا يحرم اجد من هالاحساس الحلوووووووووووو

وان شاء الله تجيبي توأم قررررررررررررررررررررريب يارب

و انا من خوفي من ابرة الظهر فكرت اطلب تخدير كامل
..

بنفس التاريخ
..

شكرا لك على الدعوه الطيبه

عندي اخوين توأم مو متشابهين اكبر مني عمرهم 20 سنه

واختي بعد عندها توأم بنات وحملت بهم مثلي بعد الزواج على طول

وخالتي اخت امي كانت حامل بتوأم بس بالشهر الرابع ضمر واحد وتوقف نبضه وكمل الثاني

وولدته والان عمره سنه
..

كل العايله
توائم مالي طعم ههههههههههههههه

متعودين اهلي بس اهل زوجي ابدا ما عندهم لا من قريب ولا من بعيد

بتكون مفاجأه حلوه لهم

بس انا حامل ب3 اجنه غيرت النظام حق اهلي

عقبالك يا قمر
.

بتاريخ 25 \8\ 2007

يارب يرزقكم باحلى التوائم

ويقولون دعوات الوالده باذن الله مجابه

وراح ادعي لكل من تتمنى تحمل بتوأم

بكره عندي موعد تنويم لان الجنين اللي تحت نازل كثير

والماء حولينه ابتدا يقل

وحيولدني ان شاء الله بعد اسبوع يعني اذا صرت

30 اسبوع

ادعو لي ولاطفالي بالسلامه
وان شاء الله اذا ولدت راح اخلي زوجي يدخل يبلغكم

بتاريخ 29 \ 8 \2007

انا زوج مشاعل

ماشاء الله والحمد لله ولدت مشاعل ولكنها تعبانه كثير ادعو لها وللاولاد

هذا رجائها

بتاريخ 4 \ 9 \2007

ماتو بعد معاناة دامت 29 اسبوع

ولدتهم يوم 26 _8

سليمين معافين مثل الملائكه اوزانهم كيلو و700 جرام

وماتو بعدها بكم يوم بدون اي سبب طبي فقط توقف القلب مع انه سليم

الى الان لم استوعب الامر

الحمد لله

بتاريخ 5 \ 9 \2007

شكرا لكم جميعا

كلنا مو مستوعبين كيف صارلهم نفس الحاله

يقول الطبيب الاول والثاني صار عندهم تباطؤ بدقات القلب

وعملو لهم انعاش بس القلب توقف تماما

وكلمو زوجي يحضر ولما وصل لقاهم ملتمين على الثالث

لانه بدأه نفس الوضع وبعدها بربع ساعه وبحضور زوجي قالو توفى

وشالو عنه الاجهزه جميعا

وطبيب الخدج انسان يعرف الله وملتزم سعودي يقول لزوجي

حالتهم مفاجئه وليس لها سبب طبي واضح

ويقول قد تكون عين لم تذكر الله وماصلت على النبي

حسبي الله ونعم الوكيل

احس ان الدنيا توقفت خلاص

وزوجي ايضا تعبان ومن يومها مايروح لدوامه

اتمنى ان يكون حلم اعيشه واصحى منه قريبا يالله

لكن الم جرح القيصريه يرجعني للحقيقه المره

اني والده وبالنفاس لكن بدون اطفال

الله يجعل توائمي الثلاثه شفعاء لي

ويصبر قلبي على فقدهم

كل قطعه شريتها لهم اتخيلها

واسرتهم

وبطانياتهم

ورضاعاتهم

وكل شي

بنفس اليوم
..

امين

جزاكم الله خير

قد اغيب فتره

ماعدت طايقه اي شي حتى الزوار مارضيت استقبل احد

نصيحتي للجميع وبالذات الحوامل باكثر من جنين

لاتتعجلين باخبار الناس بعدد اطفالك الى ان يوصلون الامان

ويصيرون باحضانك

فهناك من لايذكر الله ويصلي على النبي

كفانا الله الشر

وكثير قالو كيف جابت 3 وهي ماكملت سنه متزوجه بدون ذكر الله

واحدهم قال لوالدي الناس يجيهم طفل ب3سنوات

مو 3 باقل من سنه باستهتار

والاخريقول لزوجي زوجتك هذي هي الودود الولود

حسبي الله على كل من فيه شر

اعاني الان من حمى النفاس لان الحليب متحجر بصدري

وللاسف اشفطه بالشفاطه بدل مايرضعونه اطفالي

اللهم لك الحمد

ادعو لي بالصبر فخيالهمامام عيني بكل وقت

وصوت بكائهم يتردد بمسمعي

بنفس اليوم
..

امين يا نصف آدم

وماتتصورين ماافكر باطفال ولا باي شي

غيرهم قلبي تفطر واندفن كل جزء معاهم يارب

ارحمني وصبرني

ودي انام شهر والا سنه بس انسى

دموعي ماتوقف وكأن توني فقدتهم من دقائق

حتى والله مو قادره اكل غصب عني

كل شي ماصار له طعم

حتى امي كرهت جلوسها عندي وزوجي

اجلس لوحدي بغرفتي ومعي قبعات قطنيه كانت

على رؤسهم بالمستشفى

وريحتهم فيها

الحمد لله على جميع الاحوال

بتاريخ 6 \ 9 \2007

يارب ارحمني

احاول افتش عن اي شي يصبرني

بين سطوركم لكن للاسف

الحزن احرقني وصرت مااحس باي وجود

في هذه الدنيا حتى زوجي حاول يكلمني

اليوم لكني مااقدر اواجهه ولا اناظر بعيونه

حرمني من اغلىلحظه حرمني من حضنهم و رؤيتهم للمره الاخيره

ودفنهم بيديه بدون مايخليني اشوفهم

مااتخيل كيف بتكون حياتي بعدهم

لانهم توقفت بتوقف نبض احبابي الثلاثه

والله لو تعرفون كيف صرت افكر انا كل وقت ادعي ربي

يرجعهم وابكي واطلب الله ان يكون حلم و كابوس

وينتهي واراهم بين يدي

اشم رائحتهم حولي

اشمها بين اصابعي اللي لمستهم بها

لونهم ابيض مثل اللؤلؤ واصابعهم ناعمه مجعده

عيونهم ماقدرت انسى نظراتهم لي

في اول مره حضنتهم فيها وكنت اقول للطبيب

يناظروني وهو يضحك علي لاني مو مصدقه

انهم صارو بين يدي

بعد ماحملتهم باحشائي شهور

المصاصات اللي مصوها بالمستشفى

اتلذذ بطعمها الان ورائحتها

نفسي اموت بهالايام واروح لهم بالجنه

لان اللي تموت بالنفاس تكون زي الشهداء

كيف راح اواجه الناس وارد على تساؤلاتهم اللي راح

تقتلني لو تذكرتها

سامحوني

لااجد اي متنفس لي الا بصفحتي هذي

ارجوكم ادعو لي ان انسى اوافقد الذاكره حتى

لاتتوقعون اني سيئه واراد ربي ان يعاقبني

بهم ابدا والله اني احب الناس واساعد الجميع

ومابقلبي اي حقد او حسد على احد

لكن من هم اسوا مني بكثير يعيشون سعداء بلاهم وحزن

ياليتني ماحملت بهم بهذي السرعه

او ابتلاني الله بالعقم كان اهون من انتظار اطفالي

اجزاء مني ثم الموت والحسره على فقدهم

لا اطلب من الرحمن الا ان يصبرني اما العوض باطفال غيرهم

لا اريده لاني ساتذكرهم الى ان اموت

كل مااتخيلهم وحيدين كل واحد في قبر اتألم واموت

الف مره يارب صبرني

يارب صبرني

يارب صبرني

تصدقون من يوم وفاتهم ماتحممت الا بالماء

لان رائحتهم بجسمي والله اشمها قويه

نمت ساعه بالليل و دخل علي بالنوم صوت

بكاهم والله مااتخيل بكاااااااااااااااء اطفالياعرفه

ولما فتحت عيوني تحول البكاء لاذان الفجر

وبعدها صرت ابكي واغمض عيوني وادعو ربي ان اكون بحلم

وان تحصل معجزه افتح عيوني واراهم

لكن فتحتها ولقيت نفسي وحيده بين اربع جدران

تخيلو احس باكتئاب وضيقه غريبه اذا

سمعت صوت امي او دخلت عندي اليوم كله

ماشفتها فقط الخادمه تجيب الاكل وترجع تاخذه

مثل ماهو واذا دخلت عندي اتضايق من ابتسامه

ترسمها انا وين وهم وين مايدرون باللي بقلبي

ارجو من الله ان اتوقف عندهذا الحد

فحياتي ستكون حزن وهم وعذاب

لاني انتهيت بنهاية فلذات كبدي

الحياة الدنيا كلها حزن وهموم لكن الله عنده السعاده

اللي مستحيل نلقاها في الدنيا

ادعو لي بالنسيان فقدان الذاكره الموت

اي شي فيه راحه لي من ان احترق

والناس من حولي واقرب الناس لي يعيشون حياتهم

ويكملونها طبيعي وكأن شيئا لم يكن

خساااااااااااره ضاع مني اغلى واحلى حلم

كم مره سهرت بفراشي وانا اتابع رفساتهم ببطني

المؤلمه الحلوه بالساعات

وكانت الشمس تظهر علي وانا افكر بلبس معين واتخيل نفسي

البسهم وكيف ارضعهم من صدري

واتخيلهم يركضون امامي ويتضاربون على من يجلس بحضني

قد اكون اذنبت يوما وهذاعقابي

ماادري ولكن الله لن يتركني وحدي فهو ارحم من عباده

بتاريخ 7 \ 9 \ 2007
..

انا فكرت اني لما اشفط يخف الحليب

لان الالم بعد يخف

يارب يجف هذا الحليب

ياليت اطفالي عندي كان بيكفيهم ويزيد

صورتهم معي بالجوال

وصورهم باخر اشعه رباعيه

سميناهم فهد وفيصل وفارس

وكان حجمهم ووزنهم 2كيلو لكل واحد

ياليتني اقدر ازورهم وابكي عند تراب قبورهم

سبحانك ربي

قضاءك تام لامحاله فرضني بماقضيت

تعبت من الدعاء ليل نهار بان انسى همي

او افقد ذاكرتي وعقلي

لان كل شي بيذكرني بهم عملت لهم غرفة نوم

جميله وحطيت لهم فيها3 اسره كبيره

ومليتها العاب وحتى كراسي السياره اشتريناها

ياليتهم ظلو ببطني ولم يظهرو للعالم

والناس الحسوده حسبي الله ونعم الوكيل عليهم

انا وزوجي سبب بموتهم

لاننا قررنا نخبر الدنيا كلها عنهم

ولم ادري انها طريقهم للقبر

قتلو فرحتي الغاليه

حطموني بيوم كنت فيه اسعد ام بالعالم

نزعو قلبي من مكانه ودفنوه مع اطفالي

الثلاثه رفضو ان انظر لهم اخر مره

ويقولون انتي صغيره والمستقبل امامك

وممكن تحملي باي وقت

اه الف مره اي مستقبل لام بلا قلب ولا روح

هذي هي الامومه ليتني ماجربتها

ولا عرفتها ليتني جلست مع صديقاتي بالمدرسه

ولم اعرف الدنيا بمرارتها وقسوتها

بتاريخ 7 \ 9 \2007
..

جزاكم الله خير

وهم ببطني لم اخبر احد انهم 3 الا امي و زوجي

ولكن اول ماولدت خبرنا كل الناس

والكل تفاجأ بهم

ولكن اللي يقولون لاتخلين اغراضهم

عندك احس انه ماصبرني الاهي

اذا تذكرتهم وبكيت عليهم

مجرد مااشم قبعاتهم او مصاصاتهم

او اي شي يخصهم ارتاح وينشرح صدري

وبالنسبه للحمى اخذ مسكنات وخافض

حراره وتنزل شوي

وبعدها ترجع عطوني اسم حبوب او اي شي

ممكن ينشف الحليب

والمستشفى ماعاد اطيق ادخله

ومجرد التفكير ان اطلع من البيت انجن

وابكي ساعدوني باسم دواء

واطلبو الله لي بالصبر والراحه

بتاريخ 7\ 9\ 2007

شكرا لكم

للاسف زوجي من يومها

ماشفته اذا جا مااخليه يدخل عندي

اكره رؤيته وحتى امي

وحتى جوالي مقفل ماودي ارد على احد

تفكيري بعيد عنه وعنها ولو جلست معه

ستكون حالي أسوأ مما هي الان

قررت ان اعيش باقي حياتي بسلام

بدونه وكل معارفه واهله

واتوقف عن الدراسه مؤقتا

فقط في غرفتي ولو تحسنت نفسيتي

برجع لمدرسه اثانيه السنه القادمه

لا اعرف فيها احد ماابي احد يسألني

عن اطفالي وعن مصيبتي ويذكرني بهمي

اما الناس لا ارغب في رؤيتهم

او الاختلاط بهم

وزوجي بيرزقه الله بزوجه قويه

تنجب له الاطفال ولاتخاف مواجهة الناس

مثلي والله معي ان شاء الله

بنفس التاريخ
..

صدقوني قلبي متعلق

بالاذكار من يومها

وانا مؤمنه بالقضاء والقدر

ولكن راحتي في انعزالي عن كل اللي ممكن

يذكروني بحرماني من اطفالي

ومستحيل ترجع حياتنا مثل ماكانت

حبي الشديد لزوجي تحولت لكره

اكره رؤيته والجلوس معه

ولن انسى انه حرمني من رؤية اطفالي

لاخر مره ابدا ابدا

وانا دايما استغفر الله

واستخرت واختار لي الصالح

واعرف ان موت اطفالي الثلاثه بيوم واحد

ليس نهاية الكون ولكنها النهاية لحياتي

ومستقبلي

وقررت ان احاول الخروج من هذه الحاله

تدريجيا ولكن لن يحصل هذا الا باول خطوه وهي

الانفصال والله استخار لي هذا

وسيكون معي بجميع اموري

لاتزعلون مني انتم ماتعرفون

ايش يعني ان تستشعري وجود اطفالك حولك

وان تشمي رائحتهم وتسمعي بكائهم

ولا تجدينهم لانهم تحت التراب

ولا تعرفون ماذا يعني الحزن على 3 اطفال

ان تتخيلي كل واحد وكانك بداخل قبره وتتخيلي ضحكته

ومناغاته ويملؤك حزن الدنيا

ثم الثاني والثالث

خسارتي عظيمه 3 اولاد مثل البدر

نورو حياتي كشمس ساطعه قويه بل 3 شموس

وفجأه يظلم كوني ظلام حالك

ويفرض علي موتي وانا حيه

قسمت قلبي ومزقته ل3 اقسام ودفنته مع كل واحد

ياتيني احيانا ابليس اعوذ بالله منه

ويقول دفن اطفالك وحيدين خايفين

و وضعهم تحت الارض

وغطاهم بالتراب مااقسى قلبه المجرم

وارجع اتعوذ مرات ومرات

واطلب الله ان لايجعل للشيطان مدخل

بدل ان انشغل عنكم وعن الدنيا كلها بصراخهم

وارضاعهم والباسهم و
.....................

اجلس وحيده مع هذا اللاب توب الذي لو نطق

لاشتكى من حرارة اصابعي

و واهج مثل الشرار يخرج من صدري واحشائي

ودموع كأنهار جاريه عجزت عن ايقافها

وارجع في كل مره اطلب الرحمن واناجيه

واتقرب له بالدعاء

تدرون ماذاادعو ربي كل يوم

وما يأست ادعوه وانا مغمضه عيوني

ان اكون بحلم طويل مزعج وابكي وانا ارجوه ان افتح

عيني وينتهي ذلك الكابوس واراهم

امامي ولكني في كل مره لا اراهم

واجد نفسي وحيده

والله اني احس بوجودهم حولي والتفت حولي

لعلها حقيقه ولكن الحقيقه تقول اني لن اراهم ولن احضنهم

واضمهم لصدري مره اخرى

سامحوني لكنكم لاتعرفون شئ عن هذا الاحساس

ووصيتها كانت
.....

انتم اكثر من الاخوات

شكرا على هذا العزاء الطيب

والدعوات الصادقه

ارجوكم بالنيابه عني اكتبو قصتي باكثر من منتدى

احتاج دعوات اخواتي بالاسلام فقلبي ينفطر كل دقيقه

وجسمي يرتعش وهو حااااااار

ساعدوني بدعواتكم اتمنى لو تمسح ذاكرتي

وانسى مامر بي ساموت من التفكير والتحسر

يارب لا تؤاخذني

منقول

آآآه ياقلبي الله يهديها ويصبرها هي وزوجها ويعوضهم على بالها ان زوجها مو متأثر زيها تلاقين قلبه يتقطع من الحره على عياله صح ماتوحم ولاحمل ولا ولد بس هذا ضناه قطعه منه الله يعوضهم ويخليهم لبعض ولا يحرمنا من عيالنا ولا يفجعنا فيهم ولا يضيع لنا تعب

[ملكتني بهمسك]

المشاركة الأصلية كتبت بواسطة عيون احمد

مرحبا حوامل
كل عام وانتو بخير
توي امس اكتشف القسم هذا وشفت الموضوع وعجبني وقلت اشارك وياكم لانو ولادتي في محرم ع خير
عندي سؤال فيني حاروق يروح ويجي بس اكثر شي يجيني وقت النوم يذبحني مااقدر انام
والحكه اللي في بطني ذبحتني معني احاول مااحك واحط زيت بس كل مالهم يزيدون وش الحل وياهم :(
ومن دخلت الثامن والم الدورة موراضي يروح عني وساعات تجيني نغزات تحت اتعور

ياهلا وسهلا فيك بينا وكل اعراضك طبيعيه تطمني

[ملكتني بهمسك]

المشاركة الأصلية كتبت بواسطة روعة النسيان

اغلب شي يجيبلي الحرقان هو الشاهي اذا شربته بعد الاكل اومعه علشان كذا مقاطعه الشاهي عكس العالم الناس القهوة تجيب لهم حرقان وانا العكس تمام القهوة ماتسوي لي شي الحمدلله

وانا نفس الشي اول مره امر بحمل اشرب فيه شاهي ويجبلي حرقان والقهوه تجبلي غثيان فضييييع

[ملكتني بهمسك]

المشاركة الأصلية كتبت بواسطة نهال الدوسري

من كلامكم واضح ان اللي نزل معي هي السدادة لاانه مو دم خفيف هي فعلا افرازات دم وكثيرة واستمرت تنزل معي بعدها على شكل افرازات بنية
طيب ليه الدكتور يسوي لي تحريض لسى مادخلت التاسع
انا مامعي طلق الحمدلله بس الم عنق الرحم وبطني ذابحني
حسبي الله على بعض الدكاترة لعبوا بحسبتنا

الله يعينك ويسهلها عليك اذا زاد على طول روحي للمستشفى وبعد الكشف طبيعي لو ينزل دم بس مره خفيف ويختفي نفس اليوم

[ملكتني بهمسك]

المشاركة الأصلية كتبت بواسطة rawan393

سلام ياكروشات كيفكم ’’’
اهلين عيون احمد نورتي التجمع’’
انا زيك في الاسبوع 34
الله يسهل للجميع ان شاءلله’’’
.
.
.
تقبل الله منكم الصيام’

اللهم امين وكل عام وانتي بخير -- سرتي ماتدخلي التجمع كثير

[ملكتني بهمسك]

المشاركة الأصلية كتبت بواسطة جوري مشعل

نهال حبيبتي ﻻتهملين عمرك ﻻزم تروحين المستشفى مدام الدم مستمر حتى لو مافيه طلق
حبايبي رفيقات الثقل عيكم مبارك
وعقبال مانهني بعض بفرج الولاده قريب ان شاء الله

وعيدك سعيد اللهم آآآمين الله يسهلها للكل