السلام عليكم ورحمة الله وبركاته..
كيفكم بنات؟الله يتمم لكم على خير ويرزقكم بأطفال معافين.
ويبارك فيكم وحده وحده..ويخلي لكم أحبابكم.
باحكي لكم عن ولادتي وبعض الأشياء اللي ح وصيكم عليها.
أنا آخر دورة كانت بتاريخ 14/5
وتاريخ ولادتي كان 22/1
يعني ولدت في آخر اسبوع من الثامن ولادة مبكرة.
أعتقد لأني طحت في الحمام..طول الثامن وأنا مغص وألم بالظهر و ثقل..وفوق
هذا ماريحت نفسي..
المهم قدر الله وماشاء فعل.
كنت مقررة أولد في أحد..بس لما شفت المويات نزلت علي رحت على طول
للولادة(ماوثقت في غيرهم)
ومن 9 الصباح مابدأ معايا الطلق الا12 الظهر وماولدت إلا 12 الليل.
كانوا رافضين يتكلمون عن حالتي..كل مره يقولون ممكن مافيك ولادة ونطلعك على قسم الحوامل لأنك بعدك بالثامن..مع اني كنت أحس ب الطلق..وكنت واثقةانها ولادة..الين ماجاتني دكتورة ع المغرب وقالت الرحم مفتوح 5 سم.
بنات التساهيل من الله ادعو الله بولادة سهله ميسرة وانو يسخرلكم عباده.
الدغاء ثم الدعاء ثم الدعاء..
فيه بكريات يطولون وفيه بكريات على طول.
وفيه مش بكريات يتعسروا ومش بكريات يتسهلون.
يعني الأمور نسبية مافيه مقياس.
الولادة مش سهلة لكن تتيسر وتأكدي انها لحظة منسية وبتصير ماضي.
تمنيت انو يكون معايا هدفون وقرآن وقت ماكنت في الكشك فلو قدرتوا خذوا معاكم(ألا بذكر الله تطمئن القلوب)
نفذي التعليمات اللي تطلب منك من قبل المدوايف ولا تستسلمي للألم حتى تخلصي على خير.
طبعا مافيه مسكنات..الله يكتب لنا الأجر(فيه واحده جنبي حطولها الكمامة السودا..وأنا رفضوا)
لما تخلصوا على خير ويطلعوكم غرفكم لاتروحي الحمام الا بعد ساعه اشربي شوية موية واجلسي(لاتوقفي على طول)وبعدين روحي الحمام مع أحد يساعدك..لازم أحد يدخل معاك..أمك أو أختك والسستر توقف عند البيبي حتى ترجعي(فيه أم داخت وأغمى عليها وتوقف عندها القلب بسبب دخلتها
الحمام انتبهوا)
جهزي في شنطتك صابون سائل ومعقم لليد مع أغراضك.
خذي أكثر من كلوت وفوط نوعين حقت مابعد الولادة وأولويز(ممكن يكون الدم خفيف ف تكفي الأولويز )و أرواب قطنية بأكمام وطرحة..وطبعا أغراض البيبي.
لازم تنتبهي ان البيبي بول وبرز لاااازم..وأعتقد خلال ساعات بتلاحظين هالشيء..
لاتخرجين على مسؤوليتك أبدا..انتظري لحد مايتأكدوا من صحتك وصحة البيبي.
فيه نقطه حابةأتكلم فيها وهي اللي تعبتني نفسيا(الخياطة)بخلاف الخوف يبغى لها اهتمام..وعناية..بقولكم طريقتي أنا:
اتشطفي بموية فاترة مرة بالديتول ومرة بالمرة..واستخدمي كمادات(قطن مغمس بغسولك)لما تخلصي نشفي بالمنديل المنطقة المحيطة بالخياطة
لكن مكانها خليه مبلول وخذي زين نارجيل وطبطبي عليها حتى تغرقيها بالزيت
وبعدين اعصري كريم ميبو وامسحي عليها,في الفوطة حطي بودرةBaneocin
هالبودرة مرة كويسة..أحيان حطيها بدل الميبو مسكنة للألم.
أخيرا للبكريات حطي في شاش مبلول زيت نارجيل..وخليه على حلمات الصدر.دلكيها بين فترة وفترة حتى تلين وماتتعب البيبي بعدين.
ووووبس مافي بالي شي ثاني الحين..
أشوفكم على خير.
01-04-2011, 11:42 PM
رد: تجمع حوامل المدينة المنورة
غلاها 
العرض العادي
