تجمع حوامل ليبيا

[تيمو ليبيا]

قالولي لما تتزوجي دوره معادش توجعك وتزوجت ودوره قعده بتقطعني مشكله منقدرش ناخد مسكن لاني مازال ارضع في بنتي قولولي علي حاجه طبعيا ناخدها تسكن الم من غير القرفه قرفتهم مش حلوه نسرينا ولولي شغلتونا عليكم انشالله مانع خير

[أم سعد]

اشربي سخون

ديري شاهي سخوووون بالنعناع يقولو كويس

[تيمو ليبيا]

منور بيك ام سعد كيف حال حملك توا كملتي سابع ولا مازال

[تيمو ليبيا]

والهي درت لاكن وجعها قوي هلبه لازم بروفين ناخد حمدالله وخلاص

[ღॐ آية ღॐ]

المشاركة الأصلية كتبت بواسطة راجيه فرج ربها

السلام عليكم ورحمة الله وبركاته كيفكم كلكم بلا تخصيص وشكرا لكل من سال ودعاء وله بالمثل مشيت لطرابلس وشوفو الضحكه دخلت محل حنين للاطفال ولقيت وحده تشري هي وزوجها في ملابس مواليد ومعها طفل عمره هكي سنتان تقريبا طبعا ولت تنادي عليه ياايوب مشيت زي المهبوله سالتها انت سماك ايه ابتسمت وقالت لا واستغربت مني زعما هدي انت ياايه والله انا تدروشت قالي زوجي يا تاجوراء ماريتي عمر المراه خافت منك المهم حصلت لبنتي حاجات نازكه في محل ماما والله محل نازك كل نزله لطرابلس ناخد حاجات الصغار منه وتو فتحوله فرع جديد جنب النبراس كل الاعمار طبعا عمر بنتي حاجات بسيطه لكن وفت بالغرض لله الحمد شن امور البنات ان شاء الامور ميسره وللامهات يحفظ الله الصغويره وللحمال ربي ييسر الامور وللمشتاقه ربي يبل الشوق يارب العالمين ويشفينا جميعا قولن امييييين
معليش النت مفصول هالفتره كل مانحصل ندخل نطمن ان شاء الله المره الجايه بالبشرات الكن كلكن يارب

راجية والله تمنيت كنت اناراهي كانت صدفة حلوة
انا اسمي الحقيقي آية يعني لو كنت انا راني قلت اي
خسرة والله ...
المهم حصلتي حاجات حلوة وشن صار في الثريات انا اليوم وامس طلعت انا وراجلي نبو نشرو تريات للحوش الجديد وطبعا مش رح نختار غير الكريستال
فيه محل اسمة الشعاع في السراج ترياته تجنن
والله يهبلو ومديرين فيهم تخفيض الكبيرة بي 350..

[أم سعد]

كملت السابع وخشيت للثامن وإن شاء الله ربي يستر ... خايفة من الولادة هلبه ... نحس في الحكاية قربت

وربي يشفيك .. أنا توجع فيا الدورة لكن ماناخدلها في شي بكل

نتحمل الأيامات متاعها وخلاص

متعبة هيا ...

[أم سعد]

آية .. قداش فيها لامبة الكبيرة يعني كيف حجمها

والصغيرات والمتوسطات شن أسعارهم

وأما كرستال تقصدي

[تيمو ليبيا]

مشالله هانت لالا متخافيش كتري من الدعاء وصدقيني كله تنسيه اول ماتشوفي اوليدك قدامك ربي ينوضك بسلامه بتجيبي في عياده ولا مستشفي ايقولو الخضرا روعه ولت توا اني مشيتلها قبل منسافر مرت خوي جابت فيها معاش مستشفي عام خاصه داروها

[تيمو ليبيا]

بنسبه للتريات مفيش زي تريات الاناره كان في حي الاندلس وتوا في نوفلين حاجه محصلتش وحتي عنده طاولات جانبيات وتحف ايجننانو

[أم سعد]

تيمو .. إن شاء الله بنجيب في الأمل لأم دكتورتي تولد في الأمل والبشرى

وبالنسبة للخضراء صاحبتي جابت فيها بالعملية قتلي عناية صفر ... وحطولها ولدها جنبها وهي تعباااااانة هلبه

من غير طبعا زيادة الأسعار اللي صارت عندهم مش طبيعي وعلى شنو ؟؟؟ مافيش عناية مقومة

طبعا هذا اللي قالوه

والله أعلم في لحظة الولادة شنو يصير ...بالك نجيب حتى في السيارة