ديوانية البحرين - دردشة حوامل البحرين - البحرينيات

[om khalil]

أم حماني
استخدمي له الحلوه ومرقدوش احسن من مضادات الدخاتر
وكله بطحيه على بطنه قد ماتقدرين، صعبه بس خلي امش تعلمش
اني من اصيد ياهل في هالسن على طول اسدحه على بطنه احيانا حتى وانتين منبطحه نوميه على صدرش احساس حليو وفي نفس الوقت تخف الغازات منه وهونيها وتهون شوي شوي بتتعودين على هالشي.. ومايشوف شر ان شاءالله.

طفلي حياتي
شفتش غارقتين مابينتين قمت عن يازعم بانام متى يتني النومه، بس زين اليوم طفرت من غبشه سبع ونص اني قايمه، لازم نكمل ترتيب باقي الأغراض قبل لا اييبون بيت عمي اغراضهم الحمدلله ماباقي وايد، اني خب عليي التوجيهات هني هناك فوق تحت ^_^ وبس نظمت الثياب وقططت كالعاده ثياب وايد احب هالشي لما يفضى الكبت ^_^
واني كنت باجهز ليها قبل رمضان او في رمضان بس صار وحملت وماصار جانس كل يوم ورا يوم، اختي تقول اشترت شنطة بتها من القبايل وايد حليوين، باروح اشوف ان ماعجبوني باخليه يوديني سوق واقف. هي الا تبا شن دشيب مدري ويش الخرفان اللي يحطونهم في mbc3 والا سبونج بوب على قولتها هههههههههه، افتكينا من فله وطختها اغلبهم مايناسبون يهال كله مفصخين.
اييييه السنين تركض يختش كاني توي معرسه، بي بيه عيد عرسنا هالشهر ولا ليي خلق باسوي روحي مريضه مجسحه خخخخ. مشكل كل سنه اني اذكره ماعدا اول اللعام هو ذكرني. تدرين مالي خلق هالحركات كبرنا عليها عيدميلاده السنه في شهر 1 مادري حسيت اني لازم اسوي روحي رومانسيه شوي احط له كارت كل سنه وانت طيب ونتفة حلاوه قبل روحته الشغل الصبح.
سويتها وعلى حظي
ماقعدت الصبح الا الريال ذابح روحه من الصياح ويش فيك الا يقول يدته ماتت.. الله يرحمها بس ياني شعور مادري وي شكلي اني تسببت ليها استغفر الله ههههههههه.. استغفر الله رحمش الله يام خليل.
الله يبلغش يا طفلي حياتي ان شاءالله وتشوفين ولادش وولاد ولادش ان شاءالله.

روز
عليكم السلام ويش فيش تطلين بس سلام ولا تسولفين ولا تقولين لينا ويش اخبار الحمل وياش. شكلش طفشانه الله يساعدش.

حروف عاشقة
الله يساعدش بروحش، اني شفت توزيعات اللي يطبعون الكرت على الشوكلاته وايد عجبني، مايحتاج تلصقين كرت ولا شي، وحده تسويهم بمركز البحرين التجاري، فكرت اخذ من عندها الحلاوه اخليها تغلفه لي بشفاف. واني باشوف لي شي في سوق الجمله في السعوديه جان رحت، فيه اشكال وايد مراضع صغار وغيره عجبوني وماياخذون وقت ولا يتعبون.

[حروف عاشقة]

هلاااااااااا أم خليل

يساااعد الجميع إن شاء الله ويش اخبارش ويه التحوااال ...
اي انا متى الحين ادور في البحرين التجاري شوفي هذا الموضوع مره نزلت حنين الماضي لنا من شغلها واااايد نظيف وحلووو انا طرشت لها رساله وإن شاء الله ترد علي ..

http://www.mbahrain.net/vb/showthread.php?t=36370

[om khalil]

حروف عاشقة
وايد حلوين اللي عندها اني من زمان شايفه المرضعه وعجبتني قلت باحط فيها الحلاوه يبيعونهم في سوق الجمله في السعوديه الوحده بريال. بس وايد حلوين اللي في الرابط عجبوني الله يبلغنا لذاك اليوم ان شاءالله

[om khalil]

واو رهيبييييييييين الستاندات اينووون بالذات حركة الاسم احلى من اتز ابوي واتز اقيرل
ماشاءالله عليها

[أم حماني]

صباااااااااااح الخير فديتكم

[بنت الأياويد]

صباح الورد والياسمين والفل حيالله ام حماني ، طمنيني عن ولدج شخباره؟

[دوحة الأمل]

سلالالالالالالالالالام شلونكم كروشات ؟
ابغي اعرف اني في اي شهر بالضبط ,أني الحين 14 اسبوع و6 ايام؟
اللي تعرف تفيدني؟

[بنت الأياويد]

صاحبة الاستاندات الي عارضين اللنك مالها اهني في احد يعرف رقمها او اسعارها في حدود جم ، شغلها عجبني لاني ابغي كذا ستاند حق توزيعاتي، عندي واحد وبعد ابغي زيادة

[أم حماني]

هلا بنت الاياويد ... شخبارج وشلونج مع الثقل والدوام؟

[أم حماني]

المشاركة الأصلية كتبت بواسطة دوحة الأمل

سلالالالالالالالالالام شلونكم كروشات ؟
ابغي اعرف اني في اي شهر بالضبط ,أني الحين 14 اسبوع و6 ايام؟
اللي تعرف تفيدني؟

هلا دوحة شخبارج انتي ؟؟؟ متى تاريخ اخر دورة لج ؟