سيدات ليبيا الحبيبات ..تفضلووو

[هدية الخالق]

منسالكم علي حاجة بالله
اني عندي حماتي اللي كانت معاي في نفس المدينة وانتقلت ليها سنة لمدينة ثانية واول ماانتقلت نكلموا في بعض بالدور مثلا الاسبوع هذا نتصل
اني الاسبوع الجاي تتصل هيا المهم بعدها بفترة انتقطعت معاش ادور رحت نتصل بيها اني بس وطلعت حامل وماخبرتنيش وقتها لين سمعت من راجلي في نهاية الثالث وجاي يلوم فيا لاني ماخبرتاش لقاني ماعنديش علم مع إني نكلم فيها اسبوعين المهم مادورت وقلت ماعلينا حرة هيا وصفيت نيتي واستمريت بالاتصال بيها اني وهيا لااااااا ونهدرز بالساعات لانه الاتصال مجاني داخل كندا المهم بعد فترة مرضت سما بالحرارة وهيا بعتتلي عالفايبر دردشة قاتلي كيف حالكم قتلها علي سما مريضة توقعتها تتصل مادورتش وثاني يوم مشيت لصاحبتي تتوحم درتلها عصبان راجلها خاطره فيه وهيا منريضة ماتقدرش المهم حماتي سمعت بيا مشيتلها ورفعتلها عصبان اتصلت ثاني يوم قاتلي قالوا امس مشيتي لفلانة ورفعتي عصبان؟؟؟وماسألتش علي سماحتي بالكدب اللي هامها إني مشيت ورفعت وقاتليي خيرها مااديرش لراجلها ايبديها مكسورات قتلها المراة مريضة وربي عالم بحالها واني حاسة بيها طبعا حماتي ماتتوحمش هذا علاش مش حاسة حتي انيب حكيتلكم زمات كيف دارتلي حالة في الوحم وقاتلي مش مهتمة براجلك المهم بعدها بفترة جابت حماتي ومن لما جابت للأربعين واني نتصل بيها ديما ونسأل عالبنية وهي شييييي ماادور نقعد عشرة ايام نقول تو هيا تتصل لين نلقاها مااتصلتش نقول عيب هيا نتصل اني الصغيرة ونسأل عالبنيات المهم بعدها بفترة سمعت بوفاة خوي الله يرحمه وخبرها راجلي وكلمتني في الليل واني سامعة من الصبح المهم مدة المكالمة مافاتتش تلات دقايق عزتني وسألتني كيف وامتى توفي وقاتلي هيا بالسلامةمنها لبعد اسبوع اتصلت شوي كيف حالكم وخلاص وبعدها رجعت للتغطيس مرة ثانية تقعد بالاسبوعين لاحس لاخبر لين نتحشم اني ونتصل والمدة اللي فاتت عرس اختي مااتصلتش وباركت واستنيت بعد العرس قلت منخليها لين تتصل هيا وتبارك استنيت استنتيت وقلت معاش فيها خليني نتصل ونسأل لاني طيبة زيادة عاللزوم وقلبي مشرشح علي قولة السوريين ههههه نتحشم مانقدرش مانسألش وندور عالأقل عليشان زوجي المهم لمااتصلت اني ماباركتليش عالعرس حتي بالكدب قاتلي شن جو العرس وشن داروا وشن جابوا بس!!!!لكن ماعطيتهاش تفاصيل وحسستها إني مضايقة منها كل ماتسألني علي حاجة نقوللها الحمد لله تمام ماشي الحال والدوة هادي ليها اسبوعين وقاعدة ماتصلتش ولا اني اتصلت قررت المرة هادي ماني متصلة ومنستني ونشوف ادورني والا لاني حسب وجهة نظري إني درت اللي عليا وزيادة وكان استمريت عالوضع هذا معاش بدور هيا وبتاخد عليا اني نتصل ديما
فلهذا نبي نصائحكم وارائكم في هالموضوع هل انتي غالطة لو معاش كلمتها والا معاي حق

[sosolibya]

رغودة جابت ولد ماشااااااااء الله ,, عرفتوها رغودة ولا نسيتوها ,,, جعله الله من عباده الصالحين,,

[هدية الخالق]

معليشي الكملام ملخبط نكتب من التابلت

[هدية الخالق]

هههههههه جيجي صار تخميناتنا غلط والله عجزتيني شني امالا ان شاء الله خير ؟؟؟؟ههههههه نبصر مش قصقصة راهي المهم ان شاء الله تكمل علي خير ونتستنوا فيك تفاجئينا وتبشرينا وفرحتلك لما قلتي احلللللي

[هدية الخالق]

الف مبروك لرغودة ان شاء الله يكون من الاولاد الصالحين
وعقبال شموسة وفيفي ربي ينوضهم بالسلامة
وعقبال سوسو ربي يرزقها الحمل السليم هيا وكل متمنية

[هدية الخالق]

المشاركة الأصلية كتبت بواسطة جوهرة ليبيا

بنوتي انحس فيها بطلع سنون !!!!!!!!!!!

هي حتي التقعميز مش مزبوط

يارب اطلع في عمر السنه بعد ماتمشي زي وخيتها

لان تعب قبل المشي

ولد اختي قبلها بشهر مطلع 3 راح ضعيييييييف ومريض ديما يسخف

ياسلمها السموحة ان شاء الله بطول عمرها
كم عمرها هيا توا؟
وماتخافيش حتي لو طلعت توا ان شاء الله مايتعبوهاش الصغار مش زي بعض كل واحظ ومناعته
اني سوما طلعت قبل ماتمشي وماشاء الله ماحسيناش بيهم لدرجة كل مرة نلقوا وحدة طالعة بالصدفة
لكن توا اطلع في الجانبيات واللي داخل متعبينها ياروحي ديما تنتش فينا بغل اني وبوها مهبلتتا
وعندها حرارة الايام اللي فاتوا واسهال حشاك

[هدية الخالق]

وينكم اختفيتوا فجأة
هيا بالسليمة اني منوض نصلي الضهر ومنفكر شن مندير حاجة بيضاء غدي لانه راحلي بيرفع منها لصاحبه اردني كيف جاي قالي ديريلنا حاجة مش حارة وحمراء هلبة فكرت في رز بلاو أو مكرونه بصلصة الدجاج والجبنة في الكوشة

[هدية الخالق]

وينكممممم
فرحت سوما رقدت سلامتها ومنوض نحوس علي روحي امشي خشيت عليها في الدار منحط حاجة ناضت علي صوت الباب ولما طلعتها للصالة ولت رقدت عليا توا نضت من تحتها بالشوية وخليتها عالكنبة والمشكلة مانقدر ندير شي لانها بتنوض علي صوتي لقيتها سبلة قعمزت منرتاح شسوية ماعندي جو ندير شي
هبلة ولقت سبلة
طلعت دجاج دوبته في الميكرويف لانه بياخد وقت باش يدوب بروحه ومندير مكرونة بالدجاج في الكوشة وعندي عجينة بيتزا وصلصة فاضلات من يوم العزومة منديرهم عشي وبس

[هدية الخالق]

رقدتوا شكلكم تصبحوا علي خير نوم العوافي

[جوهرة ليبيا]

انا قاعده ياهدهد

وقريب انموت انحس نفسي خلاااااااص

الاموره فاتحه عيونها وتبيني نلعبها وبس

تصدقوا !!!!


طيبت غداي !!!!!!!!!!!!!!!!!!!!!!!!!!!!!!

توا بس طفيت عليه

درت رز وبازيليا

وعجنت بيتزا وطيبتها اول حاجه بردت وحطيتها في الفريز باش انسخن تطلع طازه

قلت نرقد براحتي

حوشي مرتب

وغداي نطمن عليه

انوض مش جري في جري

صح


هذا لو رقدت العسل