مشكلتي مع زوجي

[jojo 123456]

السلام عليكم ورحمة الله و بركاته

اخواتي ما لي صديقات اشكيلهن همي وما احب احكي مشاكلي لاهلي حتى تضل علاقتهم جيدة مع زوجي لاني طول ها السنتين ابدا ما اشتكيت من زوجي

انا اليوم بأسوء حالات ونفسيتي تعبانة بسبب عشوايئة زوجي وعدم نظامه
انا سيدة طول اليوم بشغلي برجع البيت المسا بلاقي شغل البيت قدامي مجلى وطبخ وترتيب والله تعبت ولي متعبني اكثر زوجي ما بيساعدني ابدا بس هو يزيد تعبي بيرمي ثيابه وين ماكان واغراضه معبين كل ارجاء البيت
وكمان ينادين بكون بالمطبخ جوجو جيبي كاسة ماي جوجو تعي بس اجي بلاقي بدو مني شي تافه تعي شوفي ها اللقطة ب التلفاز ساعتها بنقهر واذا ما جيت يزعل وبكون كثثثثير مشغولة بالمطبخ
والمصيبة الكبرى بيكون شغلي لفوق راسي بحتاج شي بقلو انزل جيب لي كذا يقلي ما رح انزل ليش ما قلتي لي قبل ما فوت ع البيت وطبعا ما ينزل بضطر انا انزل وأترك الطبخ ع النار
- مرات اكره زوجي بسبب تصرفاته وهو هيك طبعه حتى وقت كان شاب أعزب مستحيل يتغير حااااول بكل الطرق
-صعب اكمل حياتي هيك
ما فيني اترك شغلي لان شغلي مع اخي وراتبي مريح
ما فيني جيب شعالة لاني جربت ما فيهن غير المشاكل ووجع الراس

علاقتي بزوجي كثير ناس يحسدوني لان زوجي ما عنده رفقات انا رفيقته نطلع سوى ونرجع سوى ما يبات برا البيت واذا رحت نمت ببيت اهلي ينام هو كمان مرتبط بي وبيته لدرجة كبيرة
العشوائية وعدم النظام والكسل هن المشكلة الوحيدة بينا وانا صرت كثيييير عصبية أصر وأبكي

انصحوني والله تعبت

[ميمي 17]

أستغفري الله لو تشوفي بلاوي الناس تهون عليك بلوتك انا نفس الشئ وزيادة ساكنة مع العيلة وعندي رعاية بنتي اتهد حيلي الله يعين بيحبني بس مايساعد ادلعي وعملي مرات انك مريضةو عملي حركات النسوان

[سوزان الرياض]

ياحبيبتي احمدي ربك هذي مشكلتك
مو انه راعي بنات ولا شراب ولا شي كبير
تحملي وحاولي والشكوى لله على اجر ان شاءالله
وادعي ادعي الدعاء راح يحقق لك كل احلامك

[الأمورة سوس]

ريحي نفسك جوجو
هاي مشكلة صغيرة بس يبقي لك تتحمل و تنظم وقتك أكثر لا تضغطي نفسك بالشغل بالبيت و أنت بعد تشتغل خارج البيت يعني المفروض
تنسق ويكون شغلك خفيف
ماعندك حد بالبيت فخلك مهمله شوي ههههه معليه و حرص على زوجك على الأقل في حاجياته الي مالاداعي تساعديه فيه
و أتوقع أنت من النوع الحريص جداً على الترتيب و الشغل هيك أكيد راح تتعبي
الله يخليكم لبعض

[دموع الليل]

حبيبتى جوجو لاتزعلى حالك وتعصبى هاى مشكله صغيره
حاولى انك تفهميه بطريقه حلوه انك بتتعبى من الشغل ومو ملحقه ع الشغل برا البيت وجوا البيت وانه مو حلوه يرمى اواعيه بكل مكان اكيد رح يتفهم وضعك ويساعدك

الله يسخره لك

[demoshka]

ممكن تستخدمي هالطريقة

اولا الرجال من طبعهم الفوضى لانه اغلبيتهم تربو على انه البنت بتعمل كل شي وهو شيخ الشباب

بدك تجلسي مه وتشرحيله يلي زاعجك وتقترحي عليه هالاقتراحات


ممكن انك تحطي بالغرفة سلة غسيل وتخبريه انه بس يشلح تيابه المتسخة يحطها فيها هيك ماالو عذر انه يقلل مروة يروح عالحمام يحطها او على غرفة الغسيل بصير عليك انتي بس تحملي السلة وتفرغيها

بالنسبة للاشياء يلي متل الشاحن الموبايل وماشابه ساوي مكان خاص لشحن الموبايلات وخلي يلتزم فيه هيك بتم مكانه واحد ومابتضري تضبضبي من وراه

مثلا اذا جالس عم يتسلى عالتلفزيون ببعض المسليات حطي جنبو كيس يرمي فيه الباقيا من اوراق واكل وتسالي بصير اسهل عليك تمسكي الكيس وترمي بسلة المهملات

طبعا انا رايح هلا من بالي الاشياء التانية بس انتي ممكن كل شي تعمليلو مكان وطريقة سهلة انو هو مايحس زوجك انه عم يرتب ويحس انه سهل عليه انه يمشي على التعليمات الجديدة


اذا لاقيتيه مصر على انه مايلتزم اقترحي عليه مكان واحد يحط كل عفشيكو فيها بمخبأ عن ناظر الناس مثلا بغرفة النوم منشان يسهل عليك لمها وضعها بمكانها


والله يعينك

[farfocha]

حبيبتي مشكلتك صغيرة والها حل بادن الله ودام زوجك ماففيه عيوب غير هيك ، فانا ابشرك انك ممكن تغي يه وتعوديه عنظام جديد ، بس لازمك خط وصبر وحكمة ، بتنالي مرادك بادن الله

[jojo 123456]

المشاركة الأصلية كتبت بواسطة ميمي 17

أستغفري الله لو تشوفي بلاوي الناس تهون عليك بلوتك انا نفس الشئ وزيادة ساكنة مع العيلة وعندي رعاية بنتي اتهد حيلي الله يعين بيحبني بس مايساعد ادلعي وعملي مرات انك مريضةو عملي حركات النسوان

والله لو شو ما عملت ما ينفع معه اذا عملت حالي مريضة بيجيب اكل من برا بس هذا لي بيقدره الله يعملو
ومرات بمرض بجد وبقوم اعمل شغل البيت وبقلو انا مريضة يقلي مانك مريضة لو كنت مريضة كنت نايمة بسريرك

[jojo 123456]

المشاركة الأصلية كتبت بواسطة سوزان الرياض

ياحبيبتي احمدي ربك هذي مشكلتك
مو انه راعي بنات ولا شراب ولا شي كبير
تحملي وحاولي والشكوى لله على اجر ان شاءالله
وادعي ادعي الدعاء راح يحقق لك كل احلامك

اهلا وسهلا سوزان اسعدني شوفتك صار لك زمان
الحمدلله انه ما يدخن ولا يشرب صحيح انا بنعمة بس والله تعبتتتتتتت من عشوائيته ما بيقدر تعبي
جزاك الله كل خير

[jojo 123456]

المشاركة الأصلية كتبت بواسطة الأمورة سوس

ريحي نفسك جوجو
هاي مشكلة صغيرة بس يبقي لك تتحمل و تنظم وقتك أكثر لا تضغطي نفسك بالشغل بالبيت و أنت بعد تشتغل خارج البيت يعني المفروض
تنسق ويكون شغلك خفيف
ماعندك حد بالبيت فخلك مهمله شوي ههههه معليه و حرص على زوجك على الأقل في حاجياته الي مالاداعي تساعديه فيه
و أتوقع أنت من النوع الحريص جداً على الترتيب و الشغل هيك أكيد راح تتعبي
الله يخليكم لبعض

صح انا من النوع الحريص على النظافة والترتيب من باب البيت للمطبخ بضل اعمل شغل البيت ل 10 بالليل
ما بقدر اقعد بمكان مو مرتب والله حتى كاسة الماي بجبه ياها ومرات يجبرني اقعد اتفرج مع على كرة القدم او برنامج و اترك شغل البيت