حبيباتى سيدات ليبيا تفضلو لأعرف ما حالكم

[هدية الخالق]

السلام عليكم ورحمة الله وبركاته
كيف حالكم ياحبوبات وحشتوني وصحيتوا مشكورات اللي فقدتوني ان شاء الله ماتفقدوا غالي اني تعب هاليومين الجمعه رفعت سما للروضة وبعد كملنا مشيت لسوق قريب عالروضة لدت لين رجليا طاحو واني مروحة قلبت عليا الدنيا سما في الباص عياطات حشاكم وماتبيش العربة اضطريت شديتها شوية في ايدي مع انه غلط خطر عالعيل والباص يوقف كل شوي في المحطات
المهم روحت مادة لساني وقلت توووووبة معاد نبي روضات ههههههه
ويوم السبت طلعنا كالعادة مع راجلي جبنا النواقص وتغدينا برا وكان الجو صقع مووووووت والمطعم الي مشينالها بعيداجلنا الغدي لبعد الشوبنق لكن بعدين حسيت روحي منمووت من الجوع والطريق بعيدة قالي راجلي تخيلي نوصلوا ونلقوا المحل مصكر انضني بتقتليني ههههههه لأني جيعانه وهو اللي أجل الغدي ماليها في الفطور وشبعان وطبعا روحنا الدنيا مظلمة يادوب صلينا وكلينا فواكه ودرت دورة علي سما وللنوم فورا
واليوم صابحة عيانة وصاحب راجلي جي بيتغدا درت كسكسي بالبصلة وامبطن وقبل منزيد معاهم بطاطا مقلية وخلاص لاني واقفة بالسيف امشي راجلي قاللي ساد معاش تديري شي وبعدها ضميت المطبخ وموعد ازالة الشعر درت بالماكينة عالسريع ودوشت وصليت العشي وكيف قعمزت اااااخ نحس في رقبتي تقول مجروحة ونبلع في ريقي بالسيف شكلي منمرض الايام هادي بكل الجو صقععع واني مهملة من ناحية اللبس الثقيل مانحبش نلبس هلبة نضايق ويولي عليا بعدين
المهم كيف حالكم كلكم كلكم
جيجي ربي يسهل امورك ويكمل اسبوعك علي خير
جنودة ديري بالك من كل شي تصوري اكتشفنا حاجات مش حلال عمرهم مايخطروا علي بالك
زوجي مسكين اول سنة جي اهني مايعرف شي مايعرفش محلات الحلال ياكل في حوت وخضروات بس وقال كان واحد اردني ساكن معاي ياكل في خنزير حشاكم !!!!ويبرر في التصرف متاعه بأنه هوا مضطر وعادي قاله زوجي ليش انت مضطر تاكل لحم وكان ماكليتش لحم بتموت ؟؟
واني للأسف صارتلي غلطة حبوب الفيتامينات اللي ناخد فيهم طول الحمل طلع فيهم ومش كاتبين عليه لين صاحب زوجي اكتشفه قال ولدي يلعب بشيشة الدواء مشي تحول الكاغط من عليه اكتشف انه مكتوب تحت الكاغط
فروسة حتي اني زيك نستغرب اللي يفتوا ويقولوا الدجاج عادي
وحتي في الروضة عطوا للصغار زبادي مابيتش نعطي لسما مشي وحدة لبنانية استغربت قلتلها مرات فيه جيلاتين قاتلي والله بتدققي في كل تتعبي قالت اهم حاجة اللحم حلال والباقي مو مشكلة
وقالت الجيلاتين قالوا الشيوخ عادي لانه مكرر قلتلها لا خليني في السليم اضمنلي
وجارتي الليبية ماتعلم بيها من وين زارقة تشري في شوكلاته ومستكة بدون ماتشوف قالت مانعلمش انه حتي هدوما فيهم
والله اني الحمد لله راجلي حريص بكل ضروري يقرأ علي كل شي وكان حاجة مالقاش عليه شي ماياخدهاش وخلاص