تجمع الجزائريات المتأخرات في الحمل و أهلين بالتونسيات الغاليات

[oum abderaouf]

ربي يرزقك الذرية الصالحة حبيبتي
ان شاء الله الصابر ينال

[أمة الرحمان السلفية]

لبنات قلتلكم ادعولي رني مقلقة من عجوزتي ربي يهدينا ويهديها عندي عام ملي رحلت من عندها ورني كارية هربت من مشكلها ومازلت تلحقني ولت تروح لناس وتقللهم قلولو ايطلقها رحت الخوها وقتلو احكمو وحرشو وقلو يطلقها وزادت شفت وليد عم زوجي يحب زوجي يموت عليه تقول خوه زادت طلبت من سلفتها قلتلها قلي لوليدك يقلو طلقها وان الحمد الله متفهمة مع زوجي ولي غيظني هو زوجي مسكين قلي وليت نكره كي نروح لعندهم كره المشكل من قوة المشاكل ولا يشيب في عمر 39 ريح يشيب حتى في حواجبو صدقونة غير كرهت

[oum abderaouf]

ربي يهديها كون بنتها واش تدير الله يهدينا حرام عليها هذي باينة حابة تشوف ولاد ولدها بصح مكتوب ربي و بالاك هو اللي فيه المشكل علاه هذا الشر من الناس ياربي اكتب مافيه الخير لهذي الولية
دايما كي يتأخر الانجاب تتوجه اصابع الاتهام للزوجة و غالبا ماتكون من اهل الزوج
اتقو الله
ربي يصبرك حبيبتي ان شاء الله خير انت المهم راك متفاهمة مع زوجك
يارب يرزقك ب توأم سليم و معافى يا رب هكذا يتغلقو قاع الافواه اسمحيلي على بعض الكلمات بصح خرجت مافي قلبي منبغيش الظلم

[المتغربة]

لبنات هاذي جيتي مالطبيب و مانيش حامل الحمد لله علا فيها خيرة اما الي مجنني محبتش تعطيني دواء ينزل الدورة

[ميمي 17]

امة عبد الرحمان الله يرزقك بالذرية الصالحة عاجلا غير اجلا انا قبل مانحمل بشهر قاتلي عجوزتي ادا جاتك الدورة اجري على روحك من الغيض قتلها قولي اجرو مش اجري لخطر لعيب ليجي للمرا ثاني يجي لراجل ودخلت شومبرتي نبكي وندعي وربي رحمني احملت الشهر الي بعدو الحمدلله وسكتت الافواه الي كانت تتكلم وهي اول وحدة بشرتها وكي قتلها يمة راني بالحمل حسيت روحي اخبطتها بموس ودمعة كانت دور طيحلها لخطر كانت ماهيش حابتني نجيب اولاد حتى شوفتها في المنام تحوز فيا بصح الي يتوكل على ربي هو الاقوى

[حياتي قمراتي]

السلام و عليكم منورة التجمع ام عبد الرؤوف حتى انا عندي 7شهور زوأج و حمل متزوجة من شهر ماي ياك؟

[oum abderaouf]

ميمي شحال قعدتي و حملتي؟
انا راني 7 اشهر و قاتلي الطبيبة المبايض راهم منتفخين راني ندير في الدوا
انا كلام الناس هو اللي يضر راك بالحمل علاه محملتيش علاه .... بزااااااااااااااف
لدرجة وليت نقولهم راني ناكل في حبوب المنع باش مايستناوش معايا كل شهر
و خاصة اهل الزوج كيما امة الله يعينها و غيرها كثيييير

[oum abderaouf]

منورة بيك حبيبتي خولة
لا انا من شهر جوان عرسي يعني 6 اشهر و الله حاسة روحي كثر
المهم مبارك الحمل الله يجعلها ذرية صالحة يا رب
ويعطيك وقفة ساهلة شحال راك حمل؟

[حياتي قمراتي]

امة ربي يعطيك الصبر و الله الناس مهمش متفهمين ربي يهديهم المهم زوجك راه مقدر و انشأء الله ربي يرزقكم كامل

[حياتي قمراتي]

تعيشي ام عبد الرؤوف انشأء الله تربحي علينا انا حامل بتوام فالشهر السابع حسب التوقيع