تجمع حــوامل التوائم

[الشيخه آليزابيث]

اختي عابره!

حمل التوائم يبين بالسونار سوي اشعه والدكتوره بتقولك توينزو لالا غير كذا مافي اعراض !!

الله يتمم عليك

[حزن الزمان]

أختي الذوق شكرا على ردك والله يريح باللك ...
أختي حنان الهاجري انا طول الليل قاعدة ورايحة وجاية على الحمام ...وتعبانة بس بالنهار يجيني نوم الظهر ويجيني نوم بعد الفطوررر ...والله يا بنات دايخة من الصيام وزني ينزل ووزن البيبيات ينززل والدكتورة تعبت معي لا تصومين بس انا مصرة مابي قضاء علي
أختي اللي تسأل عن المضاد الحيوي لا تخافين انا عطتني الدكتورة لما طلعتلي دملة كبيرة وتألم والله توكلت على الله هو خير معين في كل شي ...

[حسآآآسة حيل]

قصة ولادتي الجزء الاول /


بسم الله الرحمن الرحيم ،


كان عندي موعد يوم الثلاثاااااء اشعة صوتية طبعا انا اراجع بمدينة الملك فهد الطبية بالرياض ، والاربعاء عند د/ بهاء ، المهم انا راحت علي نومة ولا كان قابلت بهاء لكن يوم جيت قالوا مشى عنده اجتماع وانتظرررت واخرتهاااااااااا دخلوووني على د/ زرقاء >> الباكستانية طبعا أول مادخلت عليها قالت انت تبين نفس الكلام متى سوي عملية؟؟ قلت اجل وشرايك بعد ؟ قالت مافيه الحين بعد العيييييييييييد ؟؟؟؟؟؟؟ قلت انا فيني طلق ياذكية اكشفي ؟ قالت لالا ؟ معليش حبيبتي
>>حبتك القراده بس خخخخخخخ روحي اذا جاء طلق من الله حددت لك عملية !!!المهم طلعت وانا بائسة لاني دخلت التاسع بحساب الدورة وهي تقول لا بقي لك 12 يوم بحساب السونااار !!!!


بعدها رحت وانا طفشانه وادعي ربي بس اني مارجع لاهلي الا وانا والده > اهلي برا الرياض ، رحت بعدها للهرم
بآخذ بقايا اغراض ، ووصلت وتروشت قلت بنام شوي قبل الفطوور ونمت 3ونص العصر وسبحاااااان الله صحيت على الام طلق غير محتمله لكن قلت متعوده وكانت الساعه 4 العصررر ، المهم حسيته يزيد بس كذبت نفسي واذن وماقدرت افطر الا تمرة وفنجان قهوه ومويه وبس ، وطلعنا ع اساس برجع لاهلي وعيالي عندهم بس قلت لزوجي خلني اروح للطوارئ اطمن ؟ دخلت وطبعا باكستانيه في الطوارئ اسمها ارسلا ، ويحطون تخطيط للاجنه نصف ساعه ، ثم جت قالت كشف يالله وتدخل يدهاااا من قلب بغييييييت امووت تغير وجهها قالت انت دارية انهم مقعدي ممكن عمليه قلت اييه يالله وش السواة مت من الطلق كم مفتوح قالت 3 سم يوم طلعت يدها الا انا انززززف تروعت مرررررة قالت ايوا مفتوح من زمان خلاص انت تنويم ؟ ويطلعوني فوق قسم التنويم ويتابعون الطلق وانا بمووووووووت من الالم جاني دكتور سعودي الساعه 11 قال بكشف انت داخله وهو مفتوح 4 سم قلت لا 3 قال لا 4 بكشف اشوف قلت لالالالالا لو سمحت دكتورة قال انا المناوب قلت مب لازم انا اصلا بولد عمليه ؟؟ راح وهو معصب ، جت الساعة 1 وجتني د/ منيرة الله يوفقها كشفهااااا يجننن حنونه وهادية وماعورتني زي الباكستانيه قالت خلاص حبيبتي 5 سم الرحم بطيئ وانت اصلا عمليه ؟ يالله ع العمليااات
ويجووون الممرضات حاله استنفااااااااااار ويجهزوني ويركبون القسطرة بغيت اموت منهااااااا تعوور ! ثم لبسوني شرابات طويلة لحد الفخذ عشان الدوالي والتجلط ، وانتظررر قالوا فيه وحده بغرفة العمليات ، وانتظرت لما الساعه 2وربع وجو وسحبوني بالنقاله الى غرفة العمليات ، وانا مغطية وجهي بالشرشف ع بالي ماشوف ، ويجي اخصائي التخدير ويسالني وش تبين ؟ كامل ولا نصفي؟؟ قلت كنت ابي نصفي عشان اشوف عيالي لكن الحييين بطلت لاني خاااااااااااااااااااااايفه قالي لالالالا النصفي افضل واهنيك ع الاختياار ،،قلت خايفه قال ماراح تحسين بشي لاتخافين، توكلت على ربي وقلت خلاص ؟؟؟ الله يكتب الي فيه الخير ويحفظني انا واجنتي ،،
لي عودة باذن الله....

[حسآآآسة حيل]

الجزء الثاني /



بعد مااقنعني اخصائي التخدير بالنصفي ،،طبعا قالي افضل لك لانك والده الي قبل طبيعي قلت اوك،، توكلت ع ربي ودخلوني غرفة الرعب >> خخخخخخ قصدي العمليات ونقلوني ع سرير العمليات والدكتورة الله يسعدها تجنن كلما تحركت قالت شاطررررره ويجي حق التخدير ومعه واحد ثاني اجنبي مايعرف يتكلم عربي بس هو الي يخدرني ويشرح لي السعودي وش راح يسوي قالي لاتخافين اول شي نعقم ظهرك ثم ابرة تخدير لموضع


الابرة الكبيرة وحسيت بنغزة صغيرة ، ثم عطوني مخده وقال لازم تقوسين ظهرك وتصير المخده بحضنك ولا


تتحركيين خليييييك ثابته عشان تدخل الابرة كويس وانا ارتجف من الرووعه والبرررررررد !! بعدها سدحوني


واشوف المقصات والحركااااااااات ، قلت تراني خايفه قالوا توكلي ع ربك ،، وانا ادعي ربي بس ، ويركبون مغذيات


بكل يديني ثم تخطيط قلبي ، وخرابيط مدري وشي ، بعدها لزقوا ع بطني مفرش مفتوح بس عند البطن ، وحطوا


ستارة بيني وبينهم وركبوا اوكسجين علي ، فجأة حسييييييييييت انهم شقوا بطني واسال الاخصائي قال لا


توهم لاتكذبين ،، قلت والله احس ؟؟؟قال خلاص ارتاحي وغمضي بس انا ملقوووفه رفعت عيوني فوق


واكتشفت ان لمبتهم الي فوق تعكس الي تحت وشششفت المجزززرة !! بعدها دخت ويرفعون الاكسجين ويرفع الضغط والسكر لانهم انخفضوا علي !


بعدها سمعت بنتي تصيييح واواوا الساعه 2,49 انبسسسطت وضحكت ، وحمدت ربي ، وبعدها بدقيقتين طلعت بنتي الثانيه الساعه 2,51 ، بس طولت مابكت تكح كح كح ههههههههه اعرف اوصف ثم صاااااااحت واواواو ،، اللهم لك الحمد وربي حسسسسسسسسسيت اني بخير ،، ثم سالتهم وش جبت >> ع بالي مااعرف خخخخخخخخخخخ


قالي 2 قيرلز لبى قلوبهم ، قلت جبهم بشوفهم ، قال اصبري ينظفونهم ! وشوي وجابت لي الاولى وتحطها ع خدي >> الله لايحرمكم من هذي اللحظه ياااااااااااارب ،، وجمييع من تتمنى ،،


المهم قعدوا يخيطون وانا ملتفته ع بنتي اشوف الممرضه تتنظفها وتحووس فيها وخلصوا الساعه 3ونص ، وحق التخدير ازعجني متى تخلصين ورانا سحوووووور !!! قلت وش دخلني انا ههههههههههههه


طبعااااااااااااا موووووووووت بررررررد طول وقتي ارتجف واسناني تتتتتتتتتتت وكانوا حاطين ع جنب زي المكيف الحار عشان يدفيني ،
والحمد لله خلصوا ونقلوني للسرير النقال لغرفة الافاقه ع قولتهم ، وانا انتفض من البرررد والخوووف ، غطوني بشرشف رووعه زي الكيس وينفخ فيه من تحت مكيف حااار وبطانيات ، ولازلت بردانه ،، جلست فيها ساعه يوم جت 4ونص تقريبا نقلوني لغرفة التنويم ، وكانت 4 سراير كلها حريم والدات ومعهم مرافقين وبزران وازعااج !!


حاولت انام بس ماقدرت ابي ابشر زوجي وامي اني رجعت للحياة واطلبهم شنطتي وجوالي ويالله جابوها 5ونص ، والحمد لله بشررت امي بعد ماكنت لاعبة عليها قلت انا في سنتر بوينت قااالت انا حاااااسه بس سكتت ، قلت الله لايحرمني منك بس ،،


طبعا طلبت غرفة خاااصه وطلعوني الساعه 3 العصر تقريبااا ، وماقصروا دخلوا زوجي الساعه 1 الظهر ولا زيارتهم ماتبدا الا 7 المغرب الى 11 ،، بس لاني طلبت خااصه وافقوا يدخل عشان يشوف الغرفة،


الغرفة ب 650 الليله ، والجنااح ب 1200 ، خذت غرفة والله روووعه من جميع النواااحي الممرضات عسل ويركضون ع مساعدتك ، وتعاملهم راقي اذا شافوني اصيح جو يواسوني ويسكتوني >>ههههههههه


والجناح الخاااص اكثر دلع ، بس مشكلتهم سالفة الرضاعه الطبيعيه !! من ثاني يوم وهم يجيبون لي البنات من الساعه 7 الصبااح الى 4 العصر او 5 بعد ! انا قلت لهم مابيهم وقت الزيارة وبالفعل ماقصروا سمعوا كلامي ،


بس الصبح انواااااااااع الازعاج ع هالرضاعه ، عشان البنات صغار ومو عارفين يمسكون الحلمه >>
والحمد لله طلعت الثلاثاء الساعه 10 تقريبااا ،، ومعي بنوتتي الاولى ، دعواتكم تطلع اختها بكررررررررة يارب ، وارتاااااااااااااااح ويصير العيد 3 اعياااااااااد بلمة بناتي لحضني ،،

وتوته توته خلصت الحتوته ،، تعبببببببت من جرحي والله يعيني يارب على تربيتهم ،،وعلى الزوار في العيد

طبعاا من طلعوني فوق وهم يقولون يالله ابدي امشي ويساعدوني ،،والله يكرمكم اهم شي تطلع الغازات بس اول ماتطلع تتعب ، ثم يسالونك عن البراز الله يكرمكم ،

طبعا انا كتبت التفاصيل للي يبي يستفيد من نفس المستشفى ،، واتمنى اني ماكنت ثقيله عليكم ، واسمتعتوا معي ،، دعواتكم بس لبنتي تطلع واشوف اخوانها ولهت عليهم والله ...

[نواعم النعومه]

الف مبروك حساسة بالحيل والله يخلي لك بناتك وتفرحين بالعصفورة الثانيه
دعواتك اني اكمل حملي على خير .... وافرح بشوفتهم



تصبحون على خير

[محجبه]

المشاركة الأصلية كتبت بواسطة نونة العسولة

مرحبا كروشات شخباركم؟

هلا وسهلا نونه وش عندك جايه تريشقين علينا ماعندك الا بطاااااريق كيف النونوات

[الفراشة الجميلة]

السلام عليكم كيفكم ياحلوات انا عضوة جديدة وسجلت عشان اكون معاكم في هذا التجمع
انا ماشاء الله حامل بتوأم وتوني في اول الطريق توني مالي الا 7 اسابيع الله يارب يسهل علي حمله وولادته يارب العالمين وجميع اخواتي المسلمات بس تصدقون يابنات انا من اول مااحللت كنت سبحانه الله شاكه اني حامل بتوأم تدرون ليش لاني عرفت اني حامل قبل الدورة ب 5 ايام ومن اول ما حللت وانا مررررررره تعبانه وكسلانة وفيني تعب وارهاق والوحم مره تاعبني بس كل شي بأجره
ولما رحت لدكتورة قالت لازم اسوي لك سونار عشان اطمن لاني قلت لها ان معي مغص اسفل بطني واسفل ظهري وبصراحه توقعته عادي انا دائم بكل حملاتي يجيني مغص قالت لازم سونار اخاف يكون حمل خارج الرحم قلت اوكي روعتني والمفاجاه انهم توأم تصدقون الله لا يعاقبني قعدت ابكي يوم دريت قلت ماابي توأم مو عشان شي اخاف مااتحمل الحمل انا واحد ويالله اتحمل وشلون ثنين من جد جتني حالة بكاء غريبه والدكتورة بس تهدي فيني والحمد لله رب العالمين على عطيته والله يتمم علي ويفرح نظرتي فيهم يارب والجميع ان شاء الله
كاني طولت عليكم وقصيت لكم قصة حياتي

[الفراشة الجميلة]

فيه احد ؟؟؟؟

[جومانا]

حساسة حيل
الف حمد الله على السلامة وربي يخاي لك بناتك
وان شاء تطلع الثانية وتشوفين عيالك وتعيدين عندهم


الفراشة الجميلة
هلا فيك معانا وربي يتمم لنا على خير وانتبهي على نفسك وارتاحي

[زود الغلا]

صباح الخيراااااااااااااااااااااااااااااااااات
حساسة حيل ................. الله يخليلك بناتك وتكون الحلوة الثانية بحظنك باقرب وقت .
الفراشة الجميلة ..............الله يتمم عليك حملك يارب .
محجبة ..........جومانا ......... شلونكم مع الثقل ؟؟؟ ومتى ناوين تجهزون ؟؟؟ عشان ما بينا شي ؟؟ وشلون حركة الحلوين ....تونس يا حلوهم الله يحفظهم .