ما نتيش حبيبتى حبيبتى مااااااااااااااااااااااااتت

حنين الجنة · 08-04-2010, 09:37 PM

بسم الله الرحمن الرحيم
السلام عليكم ورحمة الله وبركاته

جـــحـــــاشعور سخيف
إنك تحس بإن وطنك شيء ضعيف
صوتك ضعيف
رأيك ضعيف

إنك تبيع قلبك وجسمك
وإنك تبيع قلمك وإسمك
ما يجيبوش حق الرغيف

سألوا جحا عن سر ضحكه
قالك أصل اتنين وشبكو
اللى كان من تحت ميت
واللى كان من فوق كفيف

دا شعور سخيف
وشعور سخيف
إنك تكون رمز الشحاتة
تبنى مبنى للشحاتة
تعمل وزراة للشحاتة

يا ساقية دورى ... عدى فوقى ودوسى
نصبوا عليا وشحتونى فلوسى
ربطونى فيكى .. حتى ما اتغميت
هما اللى فرحوا ووحدى أنا اتغميت

أنا اللى صاحب البيت
عايش بدون لازمة
ولما مرة شكيت
إدونى بالجزمة

مش لاقى تطفح أديك
هاتولنا وجيبولنا وإدونا ودونا
هنجيب منين نديك
مش لاقى تطفح أديك
طافح يابلدى غدايا .. ولوعتى غدايا
وآدى الأحبة ألتقوا وإتجمعوا عدايا

أنا اللى زارعك دهب
بتأكلينى صباخ
مان كان ده تقل ودلع
بزيادة دلعك باخ
لا شفت فيكى هنا
ولا شفت فيكى طرف
كل اللى فيكى قرف

كرامتنا متهانة
واللقمة بإهانة
بتخلفينا ليه لما انتى كارهانايعنى ايه تبقى إنتى هبة النيل يا بوبه
وكل يوم المية تقطع
يعنى ايه لما اشتكى غلو الفاتورة
يقولو تشكى بس تدفع

لما قش الرز ثروة بتتحرق
وأما نفط الأمة ثروة بتتسرق
وأما جلادك على ولادك بيبطش
وأما عٍلمك ما يلاقيش يآكل فيطفش

يعنى ايه نرفع ايدينا بالسلام لجل الغزاة
ويعنى ايه لما ابقى ماشى فى حالى اتشد اشتباه
يعنى ايه لما اتحبس أربع سنين حبس احتياطى

حبس إعتباطى

يعنى ايه مش حاسة بالعمر وغلاوته
بتصبى مر العمر ليه
دة انا كنت ح اوهب لك حلاوته

أنا عمرى ما أتأمرت
ولا حطيت شروطى
ومكان ما ترسى مركبك
بابنى شطوطى
أنا كنت جيشك لما مماليكك باعوكى
وكنت يوسف لما عشتى سنين عجاف
وضلوعى دى اللى فى معركة قادش حموكى
وشفايفى دى اللى ما بطلتش فى يوم هتاف
دة انا كل شبر فى أرضك اتمرمغت فيه
وكل يوم عشتيه
أنا اتعذبت بيه

بتكرهيني. عيونك السودا وأيامى اللى فااتت
ما انتيش حبيبتى من النهاردة

حبيبتى ماتت

مع صوت أدانك جرس
فى الشدة صاحينلك
من امتى؟ كانوا الحرس
هما اللى باقينلك

بعتينى علشانهم
وعنيكى معصوبة
ياهل ترى خاينة
ولا زيى مغصوبة

كل الكلام اتقال
والشعر بقى ماسخ
والصبر علو جبال
والظلم شئ راسخ
وطن وغرقان فى النطاعة
كل شئ ريحته نطاعة

علمونا بالعصاية
ورضعونا الخوف رضاعة
علمونا فى المدارس
يعنى ايه كلمة قيام
علمونا نخاف من الناظر
فيتمنع الكلام
علمونا ازاى نخاف
وازاى نكش
بس نسيوا يعلمونا الاحترام
فمتزعلوش
لما ابقى مش باسمع كلامكم
وماتزعلوش لما ابقى خارج عن النظام

مستنى ايه من طفل ربوه بالزعاق
غير المشاكل والخناق
كل اللى بيقولك بحبك دول نفاق
أنا لما قلت لك بحبك
كان نفاق

الحب يعنى اتين بيدوا
مش ايد بتبنى وستميت600 تيت تيت يهدوا
الحب حالة
الحب مش شعر وقوالة
الحب يعنى براح فى قلب العاشقين للمعشوقين
يعنى الغلابة يناموا فى الليل دفيانين
الحب يعنى جواب لكل المسجونين
هما ليه بقوا مسجونين
يعنى أعيش علشان هدف
علشان رسالة
يعنى احس بقيمتى فيكى
إنى مش عايش عوالة

يعنى لما اعرق تكافئيى بعدالة
الحب حالة
الحب مش شعر وقوالة

الحب حاجة ما تتوجدش فى وسط ناس
بتجيب غداها من صناديق الزبالة

الحب جواكى .. إستحالة

الشاعر\هشام الجخ

شموسه · 08-04-2010, 10:09 PM

ههههههههههههههههههههههههههههههههههه
حلوه

ومشكووووووووووووره

صاحبة السيادة · 08-04-2010, 10:40 PM

مشكوووورة وعبارات حلوة ومسلية

بنت الريف · 08-04-2010, 10:43 PM

هههههههههههههههههه

يعطيييييك العااااااااافية

gogo · 08-05-2010, 01:25 AM

الشاعر ده شايف كل حاجه ف بلده وحشه يبقى عاش فيها وقال عليها بلده ليه
وبدام عاش فيها يبقى من حقها عليه انه لو اول ما طلع ابداعه طلعه ف تشويه بلده يبقى على الاقل يقول كمان حسنتها وميقلش ان مفهاش حسنات لان مفيش بلد ملهاش حسنات على اهلها مهما كانت سيئتها

بحبك يابلدى لانك بلدى