الحقوني انا انتهيات خلاص

[قلبي كسرني]

السلام عليكم
حبيبتي اولا لازم تعرفين ان ربنا غفور رحيم يقبل توبة المخطأ ويسامحة وهو ارحم بالعبد من امه ربنا رحمته مالها حدود وغفرانه واسع وباب عفوه مفتوح لكل عباده
ثانيا انتي كنتي ضحية تحرش جنسي وهذا شي مو هين هذا يدمر حياة الانسان ويخربط كل نفسيته بس انتي انسانة نظيفة وطاهرة والدليل تعذيب الظمير والقلق الي انتي عايشة بيه انا بصراحة افتخر بيج لانج ماتركتي صلاتج ولا دعا ربنا بس حبيبتي مايصير تدعين على نفسج بالموت ماكو شي بها الدنيا ماينحل
كل الاطفال الي يتعرضون للتحرش يصير عدهم عقدة ذنب وخجل واحساس ان هم مو نظيفين هذا الي انتي تقولين انتي تحسين بيه بالنص وتماما مثل ماقلتيه هو المذكور بالكتب والدراسات هو الي يصير لضحايا التحرش
اول شي لازم تسويه الجاي لربك وادعيه من قلبج ان هو يرحم بحالج ويحل مشكلتج
ولازم تسامحين نفسج وتحبيها وتعرفين ان الي صار وياج مو بيدج
نجي هسة لحل مشكلتج
ليش ماتقولين لامج اذا هية واعية وتكدر تتصرف صح هو هم جزء من الي صار لج مسؤليتها انها تركتج يمة واانتبهت بس لاتقوليلها رحتي لدكتورة ولاتقوليلها شقالت الدكتورة قوليلها انتي ماتذكرين زين كل الي جان يسويه وياج بس احجيلها كل الي قلتي النا جان يسويه وقوليلها الباقي مااتذكره هسة هية تاخذج لدكتورة ثانية وتفحصج وحتى لاسامح الله اذا طلعتي مو بنية تقدر امج تساعدج انه تلقى احد يسوي هاي العملية ترة موجودة بالعراق ويسوها ضحايا الاغتصاب هواية
اما اذا كانت امج تحسيها مو واعية تماما ومراح تقدر تدبرها شوفيلج وحدة من اهلج اختج الكبيرة او بيبيتج او عمتج وقوليلهم
الحمل الي انتي شايلته هواية الله يعينج عليه الله ينتقم من الي اذاج ويشوفج انتقامه بيه
بس انتي لازم احد يساعدج حتى تقدرين تكملين حياتج وتتزوجين وتعيشين مثل البنات انتي حالج حال ضحايا الاغتصاب يعني لاتساوين روحج بوحدة يومية مصادقة واحد شكل ومسوية اشكال الوان
نصيحة لوجه الله زوج المستقبل كلشي لاتحجيله لان راح يلزمه عليج الرجال تفكيرهم غريب واناني وحتى. وهو يعرف مو ذنبج ماتدرين شنو ردت فعله استري على نفسج مثل ماربنا ستر عليج
راح ادعيلج دايما وشوكت ماحبيتي تحجين او تفضفضين اكتبيلي
اختج فالله