صباح الخير على جميع رفيقات الرحله والمشوار والله يوصلنا جميعا للتاسع على خير وصحه وسلامه .
أسلم على البنات كلهم
زود الغلا ...مللووكه .....قمرين 2........حساسه حيل .........منى المحبين ........جومانه .....توأمى..... وكل البنات اللى ينطرون تكملة تجربتى مع توأمى السابق أقولهم والله انا اسفه جدا وغصب عنى التأخير لأنى من أمس وأنا متكدره من سالفة السفر اللى كنت أنتظره بفارغ الصبر .
المهم بكمل ......انا وصلت معاكم لولدى ابو الوحمه لما سبحته ليلة العيد !!!!!!!!!!!!!!!!!!!!!!
انا بعد ماسبحتهم اثنينهم ولبستهم مع المربيه كان المغرب ودخلت دارى كنت بحف والسوالف هذى لانه بكره العيد وكنت منومه التوأم . ماحسيت الا أحد يظرب الباب حيل ولا المربيه تصيح وتقول مدام دم دم دم....
يمه انا هنيه ماقدرت اطلع من الحمام . بعد ماتمالكت نفسى فتحت الباب ولا على بالى احد من عيالى الكبار متعور لكن المفاجأه ان ولدى التوأم ابو الوحمه اللى كلمتكم عنه شايلته معاها وكان طبعا ملفوف بالمهاد ولا بقعة دم كبيييييييييره على صدره وكأنه ياحياتى اسم الله عليه كانه نفس الأفلام لما ينظربون بالمسدس .
ياربى الله لايعيد هذاك اليوم المنظر قبيح والدم حار ولزج ويطلع من رقبته لبرا المهاد انا قعدت أصيح ماعرفت أتصرف خدامتى الثانيه راحت تتصل بزوجى وانا كنت خايفه لافتح المهاد لحد ماجت جارتى اللى بالشقه اللى يمى كانت طالعه الأصنصير ولا تسمعنى وهى تمون على ومثل أختى .
فتحنا المهاد لقيت الدم يطلع نوافير من الوحمه اللى بصدره ظغطت عليه وهو ياقلبى يصيح ولفته بالمهاد وزوجى كان معاى بالتلفون لحد ماوصل عقب تقريبا 7 دقايق . والله رحمنى يومها ماكان بعيد .
وديناه المستشفى طلعتالوحمه اللى كلمتكم عنها واللى كانت كبر كف ايد شخص بالغ فى منتصف صدر ولدى كان فيها من أول بقع بنيه دائريه جافه ولانى يومها الظاهر لما حممته خليتها جافه زياده مما سبب تشققها وخروج الدم .
نقلوه لمستشفى ثانى وفحوصات وكونسلتو واستغربو من حالته وتخيلو يومها نمت معاه بالمستشفى يوم العيد وكان اهم شى عندى وقتها سلامة ولدى .
طلعونى وحولونى لمستشفى ثالث للجراحات التجميليه والحروق وشافوه مجموعة دكاتره وقالو ماله حل الا ننطر لما يصير عمره 7 سنوات نستأصل الوحمه ونرقع مكانها بعملية تجميل ولأنه عمره وقتها 4 شهور بس عشان جذى مانقدر نطلع له جلد عشان نغطى الفتحه بعد العمليه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
أنا انصدمت من كلامهم يعنى انطر سبع سنين والولد يتعذب لأنه مالها حل الا انى أحافظ عليها ناعمه ورطبه وادهنها بكريم وأبعده عن أى اصددام ؟؟؟؟؟؟؟؟؟؟؟؟؟؟؟ طيب أنا شلون أظمن كل هذا الوقت انها ماتنجرح ثانى مره .
قعدت عقبها أسبوعين واحنا بعذاب وتغيير الظماد لازم يكون بالمستشفى لأنه الشاش اللى حاطينه يلزق بالوحمه وغصب يشيلونه وتعالو شوفو صياح ولدى والعذاب لما يشيلون الشاش والنوافير من الدم اللى كل تغيير تطلع. انا انجنيت قلت مو حاله يتعذب طول عمره بهالطريقه وصارله أسبوعين ومالتأمت ؟؟؟؟؟؟؟؟؟؟؟؟
وسبحانه ربى ما تظيق الا تفرج . وقتها زادت على الهموم لأن زوجى اقبلوه بالقاهره دراسات عليا ولازم يسافر كان وقت اختبارات .
انا صارت حالتى النفسيه زفت شلون يخلينى ويروح والولد كل يوم حالته أسوأ . وحتى زوجى كان تعبان لانه بين نارين موقادر يطوف البعثه ولاقادر يخلينى وكانت ظروف سفرتنا معاه صعبه حيل .
لكنى استخرت ودبرت أمورنا وقررت أسافر معاه واللى يصير يصير .
طبعا وقتها شوفو الانتقادات والتشمت من اهل زوجى وانتى شلون رايحه معاه ومدارس العيال وووووووووووو
صكيت اذنى عن كل شى ورحت معاه ..............
هناك عرضته على أحسن دكاتره فى مستشفى دار الفؤاد وكان المستشفى قمه بالتطور والمستوى العالى لأنه تابع لمستشفى كليفلاند بأمريكا .
تجمعو على ولدى 5 بروفسرات واحد أذكر اسمه دكتور خالد أشهر دكتور جراحه وتجميل فى القاهره ودكتور فرنسى متخصص بالأوعيه الدمويه المهم كل الأطبا كانو متخصصين وعلى مستوى .
للتوضيح مشكلة ولدى وحمه دمويه اللى تشوفونها مرات بالأطفال اللى لونها عنابى نفس الفراوله أو الكبده واسمها العلمى ( همنجيوما ) وهى عادة تختفى مع السن لكن المشكله عند ولدى حجمها الكبير جدا وثانيا بعد الفحص والكونسلتو والأشعات بمصر لقو انها مو سطحيه لكنها مرتبطه بأوعيه دمويه كبيره متصله بالقلب !!!!!!!!!!!!!!! وكثرة النزيف سببت نقص فى الخلايا الحمرا لولدى وشخصو حالته انها خطيره ولازم جراحه وقالو لاتخافين راح نسوى تجميل .
قلت شلون عمره 4 شهور وماعنده جلد ؟ لكن دكتور خالد شاطر ومتخصص بالتجميل وقالى راح انفخ جلد الفخذ ياحياتى كان هذا أسمن جزء فيه . وبعد النفخ تطلع كمية جلد نرقع فيها الفتحه اللى راح تكون مكان الوحمه .
استخرت وتوكلت على الله وسوينا العمليه ونجحت وزوجى الحمدلله كان يمتحن وهو متطمن لانى انا والعيال عنده وسبحان الله صارت روحتى معاه خيره .................
07-15-2010, 01:59 AM
رد: تجمع حــوامل التوائم
ام البنين 
.gif "hwaml16")
انا توني داخله الشهر الرابع .
العرض العادي
