تجهيزات النفاس وشنطة المستشفى

[na3ooma]

شوفي حبيبتي ..
بما اننا كلنا مانعرف وقت الولادة يفضل ان الشنطة تكون جاهزة اخر اسبوع بالثامن
لانك سبحان الله ممكن تولدي على بداية التاسع او نهايته فالافضل يكون كل شي جاهز.


ايش تحطي فيهاا ..

1- قميص نوم قطني مريح لكي ,,واختاريه قصير شوي ميدي واكمامه قصيره ويكون له فتحه بالصدر علشان الرضاعه..هذا تلبسيه بالليل لما تعرفي انك خلاص بترتاحي لحالك ومافي زيارات وتكوني بغرفتك براحتك.

2- قميصين استقبال اذا جو ضيوف تلقي منهم بنعومي او اي مكان للانجري , البسيهم فترة النهار وقت مايكون الوقت للزيارات .

3- شراريب علشان ماتبردي , وصندل مريح للغرفة والحمام ,,مع ان المستشفى بتوفره بس علشان ترتاحي

4- عباية وشوز هذي علشان لما ترجعي بالسلامة بيتك , لانه عبايتك اللي بتروحي فيها اكيد اتمرمطت وحاست ولازم ياخذها زوجك تنغسل يوم تولدي .

5- للحمام بتحتاجي شامبو وبلسم وشاور جل وفرشة اسنان ومعجونك الخاص , وسشوار علشان لازم تنشفي شعرك قبل تطلعي من الحمام لاتاخذي برد لان اكيد المناعه ضعيفة والجسم مرهق. وبرضو المستشفى توفره والممرضات بيحمموكي بس انتي وراحتك اذا حابة اغراضك او اغراض المستشفى.

6- للبيبي ماتحتاجي الا لبس خروجه من المستشفى معاكي باذن الله , لانه طول ماهو عندهم اللبس يكون من عندهم والحفايض والحليب .. يعني بيريحوكي من هالشي .
لبس البيبي اكيد فانيلة داخلية وبربتوز وطاقية وكوفلة او بطانية او مدس ..اختاري واحد منهم .

7- كيس فاضي لملابسك اللي بتحتاج غسيل.

8- كاميرا وجوالك وشاحن جوالك , واذا معك ايباد او جالاكسي او اي جهاز لاتنسي شاحنه.

9- شنطة صغيره فيها عطرك وقلوس وبلاشر وكحل ولاتكثري مكياج , وفرشة شعرك

10- ولاتنسي الالويز او اي نوع يريحك , مع اندروير اللي من الصيدلية لبسة وحده , والقطن الطبي اللي للحلمة بعد الرضاعه لمنع تسرب الحليب , وستيان الرضاعه , وكريم التشققات اللي بتستخدميه للبطن والارداف

وماراح تحتاجي اكثر لان المستشفى بيعطوكي مضاد حيوي على هيئة مرهم ومرهم مسكن وغسول مطهر , ويمكن يعطوكي مضاد حيوي حبوب , وفيتامينات


ان شاء الله البنات يفيدوكي يمعلومات ثانية ممكن اكون نسيتها ولاتنسي احتياجاتنا تختلف عن بعض بس هذي اغلب الاغراض .