تجمع حوامل ليبيا

[أم عويضة]

المشاركة الأصلية كتبت بواسطة ميراس

والله مابردكم زعلان منكم كلكم ماعدا بنت سيدى يقين سالت عليا خيركم اسمالله افتكيتوا من دوتى الواجدة

اهلا ميراس انت ديما في البال دزيت لك رساله ع الخاص وما رديتيش نحسابك مسافره

[أم عويضة]

المشاركة الأصلية كتبت بواسطة يقين

معليشي يا ام عويضه نبي نسال حتي اني الشهيد الصادق امتي انعدم في سنه كم وكان كبير ولا شاب لاني اول مره نسمع بيها

اهلا يقين كيف حالك وحال بنيتك
الشهيد الصادق الشويهدي عدموه في رمضان سنة1984 وكان شاب صغير اعتقد انه في نهاية العشرينات كان في هذاك الوقت ياناري عليه والله يأخذ الحق من شلة القذافي الفاسدة
ايام نكد الله لايردهن

[ام روفيدة]

المشاركة الأصلية كتبت بواسطة أم أجنادين 80

السلام عليكم

المشاركة الأصلية كتبت بواسطة أم أجنادين 80

كيف حالكم
مفيش من تهدرز عليا
بالله يابنات بنسالكم عندي ولد عم زوجي وهوا ولد خالته في نفس الوقت
توفي في اواخر رمضان ان شاء الله ربي يرحمه ويجعل مثواه الجنة
بنستفسر لأمتا المفروض ماحنيش او ندخل لفرح مع العلم اني متزوجة من سنة
ولتوا الظروف ماساعدتش ومادخلتش لفرح نهائيا او حتي مناسبة بسيطة
وعندي الأسابيع الجايه تلبيسة صاحبتي وبنت عمتي
مش عارفة نمشي او لا نحني او لا مع ان زوجي قالي امشي عادي
وحني ...
بس مش عارفة شن المفروض اندير قصدي انا جديدة ومش عارفة شن العادات والتقاليد ولو مشيت عادي او لا ,,,,
بالله عليكم فيدوني من خبرتكم

اختي ام اجنادين حبيت انردعليك بما يرضي الله وفق الكتاب والسنة :
أختي فيه قاعدة فقهية اتقول (ما جرت عليه العادة فهو مباح إلا ما قام الدليل على تحريمه ) أي بمعنى إن كل شيء في العادات حلال إلا ما حرمه الاسلام بالدليل من الكتاب والسنة وديننا الاسلامي الحنيف يحرم الحداد على الميت فوق 3 ايام إلا على الزوج لقوله عليه الصلاة والسلام:
قالت زينب دخلت على أم حبيبة زوج النبي صلى الله عليه وسلم حين توفى أبوها أبو سفيان فدعت أم حبيبة بطيب فيه صفرة خلوق أو غيره فدهنت منه جارية ثم مست بعارضيها ثم قالت والله ما لي بالطيب من حاجة غير أنى سمعت رسول الله صلى الله عليه وسلم يقول على المنبر (لا يحل لامرأة تؤمن بالله واليوم الآخر تحد على ميت فوق ثلاث إلا على زوج أربعة أشهر وعشرا )

قالت زينب ثم دخلت على زينب بنت جحش حين توفى أخوها فدعت بطيب فمست منه ثم قالت والله ما لي بالطيب من حاجة غير أنى سمعت رسول الله صلى الله عليه وسلم يقول على المنبر (لا يحل لامرأة تؤمن بالله واليوم الآخر ان تحد على ميت فوق ثلاث إلا على زوج أربعة أشهر وعشرا )من كتاب صحيح مسلم للإمام النيسابوري
والطيب لمن لا يعرفه هو الرائحة الروائح (الصنة)
فنصيحة من أختك في الله ونحبك في الله أبعدي عن هده العادات المحرمة وليكن ردك على اهل زوجك بقوله صلى الله عليه وسلم (لا يحل لإمراة تؤمن بالله واليوم الاخر ان تحد على ميت فوق ثلاث إلا على زوج أربعة أشهر وعشرا) وصدقيني مش رح يعارض احد لأنك أرضيتي الله عز وجل قال عليه الصلاة والسلام ((من التمس رضى الله بسخط الناس رضي الله عنه وأرضى عنه الناس، ومن التمس رضى الناس بسخط الله سخط الله عليه وأسخط عليه الناس) أخرجه الترمذي في السنن.
فمجارات البشر أو مسايرتهم بما يغضب الله أو بما حرمه ديننا أمر محرم .

[poucie]

السلام عليكم ورحمة الله وبركاته،،،

[poucie]

كيف حالكم اليوم ماشاء الله عالهدرزة الا اني لما انخش ما نلقى في حد يا ناري عليا وخلاص

[اعتدال]

اهلا بيك بوسي

اهلين ميراس كيف حالك وكيف صار معاك في العلاج طمنينا على اخبارك وشن آخر اخبار بني وليد؟

مشكورة ام عويضة الغالية للاجابة الشافية

تعرفوا لاحظت ان تجمعنا نوعا ما مش مفيد يعني كل وحدة تدخل في وقت مستحيل اثنين يتلاقوا مافيش تجمع فلذلك اكثر من الف صفحة بالطريقة هذي

السلام عليكم

من موجود؟

مساء الخير

شكله مافيش حد

انا طالعة

صباح الخير

وينكم

شكلكم راقدين

تصبحوا على خير!!

قصدي كل الصفحات عبارات تحية واستئذان حتى انا نفس الشي مداخلاتي عقيمة بدون فايدة تعرفوا ديمة انقول كان كل وحدة تطرح موضوع اومشكلة ونتناقشوا فيها لان الموضوع مثبت يعني نستفيدوا ونفيدوا يعني لما وحدة تقول مشكلتها الكل يهتم بيها هي بس ويلتفوا حولها لين يحلوا المشكلة لكن احنا وحدة تقول في المشاركة مثلا: (مجرد مثال باش توصل الفكرة مش حق)

العضوة 1 انا تعبانة وعندي ارتفاع في الهرمون لدرجة انه سبب ورم

العضوة 2 مش عارفة شن اندير الغداء اليوم انتم شن غداكم؟

قصدي الاجدر بالعضوة 2 والمشاركات اللي بعدها يساعدوا العضوة 1 ويبحثوا ويسألوا ويجمعوا معلومات ويحاولوا يفيدوها ويساعدوها مش يتجاهلوها ويفتحوا موضوع ثاني

احنا حتى وحدة تسأل سؤال والا تطلب استشارة ماتلقاش حد اهتم بيها وإلا تعب على خاطرها وبحث في النت واعطاها الاجابة ياريت تديروا برنامج بحيث تكون هدرزة وترفيه وفايدة وتبادل خبرات في نفس الوقت خصوصا ان كلكم ماشاء الله متعلمات وعلى مستوى عالي من الثقافة والوعي انحس نقدروا نساعدوا بعض ونستفيدوا من بعض لكن احنا سلبيات نسالوا ونستفسروا من باب القصقصة والفضول فقط مش للإفادة ماتزعلوووووووووووش هذا شعوري وقلته بصراحة بالنسبة لي انا نرشح ام قصي لبدء برنامج تطوير ورفع مستوى التجمع لان واضح انها انسانة عملية وخدومة مع احترامي للجميع طبعا

ام روفيدة واضح انها انسانة على قدر عالي من الثقافة ياريت نستفيدوا منها . ام عويضة ماتترددش للمساعدة وعندها خبرة ممتازة ربي يحفظها ام سعد ماشاء الله ايضا مهندسة كمبيوتر اكيد تقدر تختار بعض المواضيع الحلوة وتفيدنا يقين نشيطة ومتعاونة وكل وحدة اكيد عندها هوايات ومهارات ياريت ماتبخلش علينا هو صحيح تجمع حوامل لكن في الواقع مافيش حاجة على الحوامل ولافيه وحدة حامل لذلك نقدروا نحكوا في مواضيع الدين والتكنولوجيا و الطبخ والموضة والمكياج والعادات والتقاليد والمشاكل العائلية (ربي مايجيب مشاكل) انا عارفة انه موجود اقسام خاصة بها في المنتدى لكن لما انكونوا كلنا ليبيات يكون احلى وقريب لواقعنا وممتع خصوصا لو تكون المواضيع مدعمة بالصور والفيديو لزيادة التشويق

انتم شن رايكم؟

ياريت كل وحدة تقدم مقترح لنظام جديد بالتجمع وبعدين نختاروا الافضل لكن قصة انا مشيت انا جيت انا شربت انا كليت انحس فيها مملة ومش مواضيع جذابة ومفيدة هذي يوميات وخصوصيات يمكن تكون جزء من مواضيع التجمع بس مش اساس

طبعا عارفة انكم حتتجاهلوا كلامي كالعادة لكن مجرد محاولة مش قصدي التقييد وفرض الروتين الرسمي لكن رفع مستوى التجمع

آسفة على الاطالة

[يقين]

ميراس نورتي وين الغيبه ان شالله خير
اسمعي البارح كلمت بنت خالتي في تاجوراء وقالت الاحوال في بني وليد زي الزفت والله قالت الشباب يموتوا بالبلاش وما واحد يندري عليهم قالوا اول امس قاتلين واحد من الخوازم يستر الله وخلاص اني خوتي الثلاته قاعدين غادي في الحياش تي ما يروحوا الحياش غير يسلوا هما والله ما تلقي واحد يسمعك الله غالب هاني ندعي وخلاص طمنيني علي اخبارك

[يقين]

اعتدال تعرفي عندك حق في كلامك بس اني اول ما نخش للتجمع والله نحس في روحي مع خواتي ونبي نهدرز علي كل شي زي الخوات بذات اني بعيده عن خواتي ومستاحشتهم

[يقين]

هيا باي توا بنمشي ندير المم

[يقين]

ام روفيده كيف حالك وحال وليدك ان شالله كويسين