Icsi اطفال انابيب

[Kinderwunsch]

السلام عليكم يا صبايا..
حابة اكتب قصتي هون لأنو ما في حدا تاني ممكن احكيله اللي عم يصير جواتي.......
انا متزوجة من 3 سنين وكان عمري 27 وكان حلم حياتي اني انجب ذرية صالحة أول ما اتزوج لأنو خطبتي كتير طولت وما عدت صغيرة بس كان حلم زوجي انو اكمل تعليمي بالجامعة وبعدين نجيب اولاد.. سايرته بالبداية وسجلت ماستر بالجامعة وبعد 3 شهور قعدت ابكي قلتله انا بدي اولاد وما بدي نمنع.. وقفنا التمنيع وعدت الأشهر عالفاضي.. لا أنا عم بقدر اركز بدراستي ولا رب العالمين أذن انو يصير حمل رحت عند الدكتورة وقالتلي انو ما فيني شي ولازم نعطي جسمنا وقت وانو ارجع بعد 6 شهور.. رجعت بعد 6 شهور وحولتنا لمركز انجاب
وراح بعدها زوجي عالطبيب وقله انو النطاف كتير قليلة وحركتها كمان بطيئة
بمركز الانجاب عملولنا مرة تلقيح صناعي.. وانا ما ارتحت ابدا وما مشي الحال
دورت ع مراكز تانية وعملت مرة تانية تلقيح صناعي وكمان ما مشي الحال
قررنا نعمل مرة تالتة واذا ما مشي الحال رح نعمل ivf اطفال الانابيب
وطبعا المرة التالتة كمان ما مشي الحال وبدينا بالـivf وكان الطبيب كتير عم يطمنا انو جسمي الحمدلله قوي وكله رح يكون تمام وصرت أضرب حالي ابر لمدة 10 ايام وويوم السحب طلع عندي ماشالله 15 بويضة وزوجي عطاهن النطاف واستنينا لتاني يوم ودقينا.. واذ............... قال ما تلقحت ولا بويضة :( كان عندي فحوص بالجامعة ما رحت عليهن....
بعدين قرر الدكتور انو النطاف مع انها منيحة هالمرة انو يحقن النطفة بقلب البويضة يعني icsi بس قال لازم اريح جسمي لأنو صار عندي فرط تبويض المرة السابقة.. انا تنحت وقلتلو بدي اعملها حتى لو بس بالبويضة الوحيدة اللي رح تطلع
قلي مناخد كلوميد نص حبة باليوم بلكي بيطلع بويضتين.. والحمدلله طلعت بويضتين ولقحون ووحدة انقسمت ووحدة لأ.. ورجعولي ياها واليوم تالت يوم من الترجيع.. ما قدرت اتفاءل لأنو بعد الترجيع قالولي اقوم فورا عالبيت وما خلوني اريح جسمي شوي
ما بعرف ليش كتير زعلانة وكتييييير مكتئبة وحاسة الله لا يقدر رح اخسر زوجي لأنو انا صايرة كتير عصبية ورح اخسر جامعتي لأنو ما عم بقدر ادرس ورح اخسر شعور الأمومة
خايفة اتفاءل وانصدم وخايفة من تشاؤمي ما يصير حمل.................
انا كتير حزينة من جوا وحاسة حالي صايرة ختيارة وما عم بحب اشوف حدا.. الله يخليكن ادعولي رب العالمين يثبت حملي ويرزقني الذرية الصالحة ويحبب زوجي فيني ويحببني بالدراسة
واذا عندكن اي نصائح ليثبت الجنين بتمنى تنصحوني