تجمع حوامل ليبيا

[ام اسيل]

المشاركة الأصلية كتبت بواسطة راجيه فرج ربها

طبعا انا اختكم سرتاويه وعندي ولله الحمد بنتان واوليد وخاطري في اعويله واجدين لكن ربي ماسخر انصبت قبل عامين بورم في صدري منعني من الحمل رغم اني كنت حامل ساعه الاصابه لكن قدر الله واجهضت وشلت الورم وخديت الكيماوي والاشعه وقعدت نستنا في رحمة ربي ونبي نحمل فكرت طبعا دكتوري قالي بعد السنتان فكري الشهر هدا استخرت وان شاء الله ربي ايسخر قولن امين انجيب ونيس لوليدي وعمري ماعاد يسمح بالانتضار اكثر لان الدكاتره قالولي كل ماطولتي يكون احسن لكني توكلت علي ربي واستخرت هو اللي يختار لي الخيره فيمايحب ويرضي زعما من مر بتجربتي ومرت اموره على خير في كل لحضه خايفه من عودة الورم اعود بالله من الشيطان لما يعرمس عليا رحمتك يارب ان شاء الله خير دعواتكن يالي بتجيبنا ان ربي يشفينا ويحقق مافي بالي ويخليني لعويلتي يارب

اهلا وسهلا بيك اختي والف لاباس عليك انا اول حاجة نبي نحكيلك قصة مرات عمي اول متزوجت مرات عمي في سنة 97 وجابت بنت على طول وبعدها وليد وبعدها بسنتين اكتشفوا عندها ورم سرطاني في الغدة الي الي في الرقبة مش عارفة شن اسمها المهم ياما صار فينا وكان تشوفي راجلها قريب مات من الخوف عليها والله يجينا في الحوش يقعد يبكي خايف عليها وبعدها شالها لتونس وشالولها الورم ودارولها كيماوي وروحت وردت بعد 3شهور عاودت الكيماوي وبعدها قعدت كويسة وقالولها كل 6شهور تجي تديري كشف

[ام اسيل]

وقعدت كل 6شهور تدير في كشف امورها تمام وقالولها الدكاترة احسن انك معش تجيبي وبعد سنة ونص من اخر علاج قالت لراجلها تبي تحمل وهو قاللها لا صحتك ومغش نبي عيال خايف عليها لانه يحبها بجنون لكن هي دارت الي في راسها وحملت وكلنا كنا خايفين وجابت طه وليد يجنن في سنة2004 وقاللها راجلها خلاص بكل العيال لكن هي كان خاطرها في بنية تونس بنتها وحملت اخرى في سنة 2007 وجابت وليد في 2008 والله احلى وليد شفته في حياتي وراجلها مازالكل 6 شهور يشيل فيها تراجع مع ان الاطباء قالولا خلاص كويسة لكن من سخريات القدر ان راجلها الي هو عمي دار حادث من خمس شهور وتوفى وهو الي ياما بكا عليها من خوفه ان تموت وتسيب عيالها اهو هو توفى وهي قعدت تربي في العيال ربي يخليها لهم وهذا عمي الي في عزاه مات الوليد الي في بطني يمكن قالولي من الزعل عليه
انا حكيتلك القصة هذي عشان تعرفي ان الي كاتبه ربي يصير وما تخممي في شي وديري الي عليك احملي وعيشي حياتك ربي يخليك لعويلتك اهم شي تايعي امورك الصحية كويس وماتهمليش فيها وربي يعطيك صحيحتك انت وراجلك وعويلتك

[ام اسيل]

المشاركة الأصلية كتبت بواسطة حبل الوصل

أن شاءالله حمل ومبروك نجاح بنتك ماشاءالله عليها ربي يخليها لك وتفرحي بيها يارب ومشكورة وااااجد عالدجاج المحشي لما نجيكم بنغازى نبيك تديريها ليا اتفقنا
انى صغاري مواليد
إخلاص 8/7/2004
وعمر23/1/2006
ام ايسم مرحبتين بيك نورتينا
نبي نعرف حاجة اللي تخش تجى مرة ولا مرتين وبعدين تهرب شكلهن يهربن مننا ياميرنا وأم أسيل الثلاتى المرح

ياشويطرة ياحسابة وولدك عمره اربعة ونص مش خمسة ونص شكله الوحم با مفعوله رورورورورورورورورورورووروروروروروووووووورررررررريي يييييييييييييي هيا فرحينا خاطري وحدة منا تحمل بيش تطمنا

[ام اسيل]

ميرنا انا عطتني الابر من ثالث يوم الدورة اول يومين ابرتين ميرونال سعر الوحدة 16 دينار يعني ليا يومين ندفع في 32 جنيه وبعدها ابرة وحدة لمدة 5 ايام
تعرفي ياميرنا العيادة الينضرب فيها في الابر اسمها عيادة الامل ويديرو فيها في عمليات الزرع واليوم نقصقص في الممرضة بعد ما شفت صبايا راقدات قالتلي الممرضة ان فيه حالات واجد بكل جابن من الزرع والله بعدها بالصدفة عديت للمدرسة وعندي مدرسة اختها كانت ايام الثانوي تقرا معايا جاية معاها قعدت نسأل فيها على صاحباتنا القدم وسألتها على وحدة جارتها كانت تقرا معانا وعديت حضرت فرحها من كم سنة وعارفة انها قعدت كم سنة ما جابتش المهم قالتلي توا عندها عيلين وبنت زرعتهم في العيادة الي كنت فيها عيادة الامل قلت سبحان الله عا الصدفة ورتني صور العيال ماشاء الله عليهم عمرهم حوالي 6او7 شهور وزرعتهم لها الدكتورة ايمان بوطلاق تعرفو انا انفكر شهرين كان ما حملتش نعدي نزرع وخلاص منحبش الانتظار
على فكرة انا درت تحليل fsh وطلع 8 وlhوطلع 5 شن رايك فيهن مازلت ماوريتهن للدكتورة وبما ان راجلك مامعقب حاجة ما مبزنس فبها حتى الدواء (اللهم لاحسد) قلت اكيد عندك خبرة في الموضوع (قالو خش حتى على بزنس السيارات)هههههه(وبزنس المكياج)

[راجيه فرج ربها]

السلام عليكم ورحمة الله وبركاته

والله حبيتكن في الله ياخواتي مشكورات على ردودكن الرائعه ربي مايحرمني منكن والله الله على قصتك يام اسيل ربي يجبر خاطرك كيف ماجبرتي خاطري ربي يطو ل بعمر راجلي يارب ونربو اصغارنا جميع امين قولن امين والله ياخوياتي متوكله على الله وراميه حبالي عليه حسا الشيباني خش بكره نكلمكن

[ميرنا]

المشاركة الأصلية كتبت بواسطة الهندية

الصابرة ربى يسهلك الولادة يارب
ميرنا امس كنت عند هلى ولما روحت لقيت وحدة من حماوتى تكنس فى الدروج وناوية الشر ومعايا راجلى وانتى عارفا من يوم العركة معاش نزلتلهم
مشى قلت السلام عليكم عطتنى بالقفا نا وبنتى ومبتش ترد ... وجعتنى لكن قلت كان مسلمتش راهو دارت منها قصة خصوصا انها جالطة وراجلى قعد يقولى كيف مترد السلام قلتله مالنا ومالها نحن نديروا اللى علينا وخلاص ؟؟شنو رايك

نجك لى يالهندية تصرفك مية المية هكى طريقة تمام واحسن حاجة انها امام راجالك شاف باعين قلة الاداب امتع اخته بيش يعرف انك مظلومة وطيبة والله لو كان وحدة ثانية فى مكانك ما سلامت ولا عبرتها ولكن انتى تعملى باصلك وبطيبة قلبك بس ادعى فى كل صلاة قولى يارب انشالله يجوزن ونفتك منهن على فكرة انتى مرة الاخ الوحيدة *

[ميرنا]

المشاركة الأصلية كتبت بواسطة اميسر

بسم الله الرحمن الرحيم
السلام عليكم ورحمة الله وبركاته
كيف حالكن اليوم


انشاء الله متهنيات وبصحه طيبه

اميسر

انستى ونورتى بس ما قلتين انتى امتى هبطت بك الطائر فى التجمع ومن اى كوكب فى ليبيا جاية وانتى متزوجة ولا ؟ وذا كنتى متزوجة وتى روحك للقصقصة كم عندك عيل وكم لك سنة متزوجة وتحملى وتجيبى طبيعى ولا لابد من تدخل الدكاترة

[راجيه فرج ربها]

السلام عليكم ورحمة الله وبركاته مراحب بالاخوات الغاليات اسفه اختي هنديه وحبل الوصال ماقريت ردودكن ليا غير اليوم ربي يبارك فيكن ويفرجها عليكن يارب امس مستعجله وخشيت وخري ماقلبت الصفحات كلهن وخرجت على طول على العموم يبارك فيك ويسمع منكن ان شاء الله ربي اختي الهنديه ولايهمك عندي وحده نعرفها من مشاكلها مع حماوتها لين جاها التبول الارادي على روحها ربي يلطف بيها ويزوج حماوتها بيش تفتك وياما مصايب ماعندك غير اللجوء لله يألف بين قلوبكن ويقلب كرهن حب يارب العالمين تو نعدي انفطر صغاري ونجيكن ان شاء الله

[حبل الوصل]

المشاركة الأصلية كتبت بواسطة ام اسيل

ياشويطرة ياحسابة وولدك عمره اربعة ونص مش خمسة ونص شكله الوحم با مفعوله رورورورورورورورورورورووروروروروروووووووورررررررريي يييييييييييييي هيا فرحينا خاطري وحدة منا تحمل بيش تطمنا

هههههههههههههههه صح عمره اربع ونص شكلى بديت ننسي الحسبة قداش ليا على القراية

[ميرنا]

المشاركة الأصلية كتبت بواسطة راجيه فرج ربها

رحبو بيا انا اول مره نشارك وتو ايجيكم الكلام

راجية فرج ربها وحتى نحن امعك
يا الف مرحب بيك ونورتى التجمع ياختى وانشالله نقدرو انساعدوك اقل شى حتى بابتسامة وانتى تقرى فى ردودنا وانشالله وجهك خير علينا ونحملو ولى حامل اتجيب بسلامة