قصة ولادتي بديمتي

[smsmah86]

الحمد لله من قبل و من بعد ..

ولدت يوم الإثنين 11 / 9 / 1433هـ = 30 / 7 / 2012 م

وجبت ديمــآآ حبيبة قلبووو ..

دخلت الشهر التاسع من 13 شعبان .. وكان نفسي أول من بداية شهري مو حابة أتأخر أبدآ أحس اني تعبت .. ومن يوم ما دخلت شهري رحت لأهلي لأني بمنطقة و هم فمنطقة .. وبعدها بأسبوع عملت سونار أخرتني الدكتورة 7 أيام و قالت تولدي من 18 إلى 20 رمضان ..


حسستني باحباط بس قلت مو دايم كلامهم صح .. وسرت أمشي يوميا عشان تتيسر ولادتي أحيانا ساعة أحيانا نص ساعة .. وأجلس القرفصاء باستمرار .. بس ما في أي تغير ..

بطني مرتفعه .. ما في آلام نهائيا .. يمكن مرة أو مرتين حسيت بمغص واختفى .. كنت جدا عصبية .. جسمي و شكلي مرة تغيرو .. خصوصا خشمي مرة كبر وكنت أعصب لما أخواني يعلقو ع شكلي .. هههههــآآي


لحد ما جاء يوم 10 رمضان و أنا ما أحس ولا بشي .. قلت لأختي يلا نطلع نمشي .. ومريت ع العطار وأخدت زيت خروع .. رجعت البيت متردده أخده ولا لأ .. الساعة 12 استخرت وقررت أخذه ..

أخذت ملعقتين و شربت بعده كاسة حليب دافي ..

أفتكر بعدها دخلت المنتدى وقلت لبنات تجمعي اني اخذت زيت خروع وسولفت شوي وطلعت ..

بعدها بدأ مغص قوي قطع لي بطني .. وسرت رايحه جاية ع الحمام ..وكنت أدخل الحمام العربي عشان أجلس القرفصاء اطول :)
وماما كأنها حست انو في شي وسألتني .. قلت لها ولا ريحة تعب .. خفت أخوفها لأني أعرفها من النوع اللي قلق..

ع الساعة 4 بطني فضيت بس الألم مازال مستمر .. شوي تحول المغض إلى آلام فأسفل الظهر و الفخذ ..

ألم مرة قوي .. دخلت المجلس لأنه كبير وغير كذآ ما أبغى أحد يحس إنو في شي.. وسرت أمشي فيه .. وشوي يزيد الألم وما أقدر أمشي وأجلس ع الكنبه ..

خفت لا يكون طلق كاذب وافتكرت كلام البنات إن الطلق الكاذب يروح مع الترويش .. بس استمر الألم ..

لما جات الساعة 10 إتصل علي زوجي .. وقعد يسألني كيفك وصوتي متغير يقولي أيش فيك أقوله تعبانه .. بس أحسه مو مصدقني شوي وأنا أكلمه حسيت بشي نزل مني .. بس قلت يتهيء لي ..

حسيت فيه مرة ثانية .. قمت أخذت مناديل وحطيتها شوي تعبت كلها مويا صااافيه ..

سرت أقول لزوجي بتنزل مني مويا ... خوفتو معايا .. رحت بسرعة للحمام اتشطفت و غيرت ملابسي ورحت صحيت أخوي يوديني للمستشفى ..

ما صحيت ماما خفت أقلقها وهي ما نامت إلا متأخر .. رحت للمستشفى .. فالسيارة ما حسيت ولا بشي لا تعب و لا ألم ولا حتى مويا .. كله أختفى ..

كنت ح أقول لأخوي خلاص رجعني البيت ..بس أستحيت منه لأني صحيته من النوم ..

دخلت المستشفى .. قاسو لي الضغط و نبضات القلب و درجة جرارتي و سووا لي تخطيط لنبضات قلب الجنين و الطلق ..
وجات الدكتورة و قاست لقيت الرحم مفتوح 2 سم .. وهي تقيس نزلت كمية كبيرة من المويا ..
قالو لي أنه مرة بدري وخصوصا اني بكرية ..

بس عشان المويا لازم أكون تحت الملاحظة .. طلعوني فوق واتصلت ع أخوي يقول لماما عشان تجيني ..

أول ما طلعت أعطني ملابس حقت المستشفى .. وغيرت .. حطو لي مغذي و ركبو لي التخطيط حق الطلق وحق الطلق .. وأحس بألم مرة قوي فظهر أقولها في طلق .. لأني بكرية وما أعرف كيف الطلق تقولي أيوه ..

شوي جات ماما كان وجهها مرة مخطوف وسارت تقرأ علي .. الله يخليها لينا يارب ..

أذن الظهر قلت أبغى أصلي قالت لا ارتاحي شوي بعدين تقومي .. شوي سرت أحس ظهري ح يتكسر كانت وقتها الساعة 2 .. قلت لها أبغى أقوم أمشي قالت ما ينفع أنت نزلت المويا قلت طيب خلاص أبغى أصلي .. قمت توضيت وصليت .. حسيت بشي نزل مني .. دخلت الحمام .. مسحت .. لقيت دم ..

غسلت .. وطلعت قلت لها .. نزل مني دم .. جات قاست قالت مفتوح 4 سم .. قامو غيرو لي المغذي .. و أعطوني منوم وطلق صناعي .. وحده فالمغذي وكأنت مرة حارة و الثانية فالورك ..


سرت أنام و أقوم ع ألم قوي بس أقو يارب رحمتك وأستغفر ويخف وأرجع أنام واستمريت ع هذآ الحال إلى الساعة 4 ونص تقريبا ..

شوي حسيت بألم مرة قومي جسيت اني أبغى أقوم أشرد من السرير هههههــآي كأني لو شردت ح يخف الألم .. سرت أقول لماما في شي يبغى يخرج من ورى .. وأنا متمسكه بطرف السرير و أبغى أقوم بس الألم مو مخليني أتحرك نادة ماما الدكتورة ..

ساروا يقولو لي نامي ع ظهرك أقو ما أقدر بجد أحس الألم مربطني مو قادرة أبدآ ساعدوني وقاست الدكتورة قالت 8 سم .. ويدها جو قالت دفي عشان يفتح لـ 10 .. قات لي ماما أكتم نفسك وسكري فمك بقوة ودفي سويت زي ماما قالت لي ..

وفتح لـ 10 سم ونقلوني بسرعة لكشك الولادة ..

لما نوموني ع سرير الولادة كنت موقادة أفتح رجولي أحس عصبا عني تتقفل .. بس ساعدوني ..

وسارت تقولي شوفي الولادة 90% عليك .. 10% علينا .. وبمجرد ما تحسي بألم دفي ..

أول ما حسيت بألم دفيت بس وقف الألم فنص الدفع وكان نصر رأس البيبي طلع قامت أعطتني إبرة وع طول حسيت بألم ودفيت ووصلت ديمتي للدنيا حطوها لي ع بطني كانت ساكته ما بكيت شوي فتحت عين وحده وبعدها كحت وبكيت ..

كأنت أحلى لحظة لحظة ما شفتها .. نستني كل التعب اللي حسيت فيه من قبل ..


الله يحفظها لي و يقر عيني بها ..