نظامي حق النفاس رائع وبسيط وللي يبي يستفيد منه حياه الله

[برنسيسه2013]

بسم الله وعلى بـركة الله
السلام عليكم ورحمة الله

مرحبا بنات
فيه عضوه كثير استفدت منها واعجبني نظامها بمنتديات زميله لهالمنتديات الرائعه
وحفظاً لحقوقها جزاها الله خيرا ماحبيت اتجاهلها ابـداً

لكن يشهد الله اني احببت الفائده لكم كما احببتها لنفسي
وهي احبت الخير لنا واخبرتنا بنظامها المعتمد
ولاخبت عنا اي معلومه مفيده الله يجزاها خير
واذا يسمحون لي مشرفات هذا المنتدى الرائع فانا ودي اذكر اسمها كمان
بس اذنهم قبل كل شي خايفه يحذفون موضوعي احم احم


بس رجااااااء لاتحذفونه ..... ونبدأ ع بركة الله

اول شي .....
اقري النظام زين
ثم اجمعي مقادير كل خلطه واتجهي للعطار على خير


ثانيا ،،،، نبدأ بالنظام

جهزي علب بلاستيكيه او زجاجيه اللي يتوفر عنـدك
وحطى عليهم ورقه صغيره وسجلى عليها اسم الخلطه
ووقته المنآسب
وابدى جهزى العلب بنفسك على بركة الله


1
علبه سفوف او لهوم / الايام الاولى
ابسطها
ماش + حلب
تطحن ..
ملعقتين صبح وملعقتين بالليل
واى لهوم او سفوف ماتشربين بعده مويه او عصير
اشربى شاهى اعشاب او حليب دافئ

2
سفوف او لهوم / العشرين الاخيره
كما اخبرتنا راعية النظام انه ممكن نزود بالمفيد
لكن جابت لنا ابسطها وافضلها للمبتدئات ..
وهو :
( محلب+رشاد+حبه حلوه)
تطحن الا الرشاد طبعا مايطحن
وملعقتين صبح وملعقتين بالليل

3
علبه شاهى اعشاب
مقاديره :
(كمون+ دارسين + فوه + قيصوم + حزاه )
طبعا بدون طحن كلهن
وتطبخين مويه بابريق وتحطين شوى من الشاهى ويطبخ
ويحلى عادى ، وتشربيه هالشاهى بكل الاوقات عااادي


4
علبه صغيره.. رشة فلفل
وهو الفلفل اسود
ويكون مطحون ، رشه مع اكلك و رشه مع الحليب الساخن
واكتبى عليها فلفل رشه ويكون طوال ايام الاربعين ..

5
علبه صغيره.. رزنه
وتكون مطحونه
وتحطي شوي مع كاسه الشاهى او المرقه
او مع عجينة الخبز اللي يخبز لك كمان الصباح او المساء
هذه كل وقت طول النفاس او الدوره

6
علبه الخمس الفناجيل

وهذه مقاديره معروفه عندكم وهي
فنجال لكل من (محلب وكمون وقرنفل ورشاد و فلفل اسود )
وطبعا تكون اخر ايام دورتك ماتستخدم ابدا اول ايام الدوره
لان المحلب فقط يستخدم اخر 20 يوم من الاربعين
يطحنن ويخلطن الا الرشاد مايطحن
والعلبه تكفيك شهور قدام بس تكون بثلاجه

وكما استفدت من نظام الاخت :
تقول هذي الخلطه تشبه بمفعولها مع سفوف ايام العشرين الاخيره
فتقول من تنتهي الايام العشرين الاولى نبدا بالسفوف
ثم بالاسبوع الاخير من الاربعين نبدا بهالخلطه
ونوقف هالسفوف

مدري عاد انا ودي اسئلها اذا اقدر اخلطهن مع بعض او لا !!!!
بما ان المقادير متشابهه اللهم الا الحبه الحلوه مو مع خلطة الخمس فناجيل


7
الغسول

ينقسم الى قسمين
غسول ايام العشرين الاولى ( ملح ومره فقط ) يطحنن ويحطن بعلبه داخل الحمام
عشان يسهل عليك كل مادخلتي تلاقينه قدامك
غسول ايام العشرين الاخيره ( ارطا اعواد و قشر رمان )
وهذا له طريقه خاصه وهو انه تطبخي شوى منهم بقدر
ثم تخلينه يركد بعدها تحطينه بعلبة موية صحه كبيره
وتحطينه كمان بالحمام اذا لك خاص و يستعمل كغسول

8
الكبو
مقاديره تجمع ثم تطحن ناعم ويطول معاك
وهي :
( خوا جوا - قرن بقره - فلفل الهواء- كمون - قشر بصل- مره )
ويستعمل آخر الايام افضل..


9
دواء قهوه
وهذا دواء قهوه شكل مبسط لكل مبتدئه
يكفيك تحطين كسرة ( مره ) بفنجالك
او تجمعين بشكل مبسط التالي :
( مره - عنزروت - مقل )
تطحن وتحط بالفنجال وتشرب عليه قهوه بس الافضل بدون هيل
لان الهيل حار


10
علبه .... الطبخ

تكون كبيره شوى و اجمعى فيها
( حبه سوداء و ماش و رشاد حب بدون طحن )
وتحطين مع طبخك المرقوق و المرقه وغير كذا
واتوقع حتى الحليب


اخيرا .... تمرة النفاس
طبعا مااحد ينساها
وهي تنقسم قسمين
قسمها الاول / للعشرين يوم الاولى
وهي تمره تعجن بدون نوى مع سمن وياليت السمن الاصلي
لانه ربيب الارحام
نضيف عليها :
( فلفل اسود ربع ملعقه و شمر ويانسون ودارسين وكمون و حبه سودا حب )
طبعا يطحنن الا الحبـه السوداء
قسمها الثاني / تمرة العشرين للايام الاخيره
وتعجن بدون نوى مع سمن ونضيف فقط حب الرشاد الغير مطحون


^^^^
و بكذا نكون ضبطـنا عشرة علب كلها من اختصاص صاحبة النظام استفدتها منها
وانتهينا من نظامها جزاها الله كل خير
^^^^

وانا زودت من عــندي كمااان لنظامي الخاص بحمدالله شيئين

خلطة العتيبيات
تكون رقم 11
اعجبتني كثير ومدحتها صاحبة النظام
بس نصحتنا بأنه نلغي اما الفلفل الاسود او الابيض
فالغيت الفلفل الاسود لانه موجود بادويه ثانيه
ولان الفلفل الابيض له فوائد كمان حلوووه

مقادير خلطة العتيبيات :
( سكر نبات ربع كوب + ماش كوب + حبة حلوه نصف كوب+
حلب نصف كوب + حبه سوداء ربع كوب +. فلفل ابيض ربع كوب )
وطريقتها :
تؤخذ الحبوب وتغسل وتجف ثم تطحن
-الا الحبه السوداء اذا طحنت ماتنفع سبحان الله -
توضع في علبه ثم تستخدم ملعقه الصباح مع كوب حليب وبالمساء مع مرقه او حليب كمان

وقتها : فقط بالعشرين يوم
لانها تحتوي على الحلبه والحلبه فقط تستعمل بالايام الاولى
اما اذا ودك تكملين فيها
فـسوي الخلطه مره ثانيه بدون حلبه

ايضا اضـفت :
رقم 12
وهذا من اختصاص الماما الله يطول بعمـرها ، وهي
دواء للهواء
وهو نافع جدا للهواء اللي يصيب المره وينفعها بكل وقت
نفاس ودوره وايام عاديه خاصه بعد الجماع
فالمره تهمل نفسها للاسف ممايسبب لارحامها دخول الهواء والاصوات والافرازات
فنفعني هالدواء كثير

واحببت ان اضيفه للنظام كممممممان

مقاديـره :
الخواء+ فلفل الهواء+ عود الهواء+ محلب + مره + مقل
الخوا وفلفل الهواء = نصف فنجال
وعود الهواء = نصف عود
والمحلب والمره و المقل = فنجال

يطحنهن طحن مو حيل ناعم مع بعض
وينتبه لايكثر حقات الهواء الفلفل والعود

هذي كثير افادتني فاحببت اذكرها لكم
والله يطول عمر الماما ويخليها لنا ياااارب
ويخلي لكم امهاتكم ويرحم من توفى منهن

/
\
/

[
u]استفادات من صاحبة الخلطه :[/u]

1- خلطة الخمس فناجيل تكون آخر اسبوع من النفاس، وهي تشبه اللهوم حق العشرين الاخيره.
2- الحلبه ينتبه لها انها تستخدم فقط اول 20 يوم فقط وتوقف بعدها
لانها تسبب المويات وترخي الرحم .
3- احذري الصك واللك والشبه والعفص .
4- ربط البطن ابعدي عن المشدات ففائدة ربط الشماغ العادي افضل واقوى .
5- القيصري مثل الطبيعي ماعدا ان شرب الحليب اول الايام مايشرب وتبعد عنه
اللي مسويه قيصري ، لانه يسبب امساك كمان ماتربط بطنها لانه يضر العمليه.
6- لالتئام الجرح بالقيصري وتساقط الخيوط مافي انفع من الحلتيته الرطبه تمسح ع البطن.
7- المحلب والرشاد يستخدم فقط آخر 20 يوم ، اما الحلب والماش والزنجبيل ففي اول 20 يوم كما اسلفنا.
8- تمرة النفاس.. تزينينها بالتاسع وتحط داخل كيس بلاستيكي ثم يوضع بوعاء محكم..
9- اذا مستمره معك الرطوبه والافرازات فنبتعد عن الزنجبيل مع شاهي الاعشاب..
10- اذا استخدمتتى العلب وسط جو صحيح يعنى وسط محافظه من الجوع والهواء والشمم
والترويش الغلط والمشى حافيه والاكل الممنوع بتكون امورك بخير ومليون خير
وترجعي عروس بـأذن الله وتعجبين زوجك وترد حتى بشرتك وحيويتك..


ختـاماً ....
النظام تضبطينه بعلب وتجهزينها من السابع او الثامن
لان حاجتك لها كبيره

واوعدكم ان شاء الله بس اجهز العلب راح انزلها لكم بالصور
بأذن الله حتى نتساعد ونشجع بعض
والله يتمم لنا ولكم ع خير وييسر لنا الولاده ويجعل احلى الايام ايامنا المقبله


.....

[Orchid109]

نظامك جنان
بس حبيبتي الكبو يحذرون عنها
انا اتوقع انو مو كويس بالذات لو عندك جرح ولسه مالتهم اتخيل انو بيسببلك جراثيم وبكتريا والتهابات
فالافضل النفاس تمشي على النظام بس بدون الكبو

تشكري حبي على موضوعك

[برنسيسه2013]

هلا حبيبتي لو لاحظتي الكـبـو ، متى وقته

آخر النفاس يعني ان شاء الله كل شي ملتئم ....


تسلمي لمرورك

[a7tajk]

ألف شكر يالغلا

يعطيك العافيهه

[برنسيسه2013]

يعااافيك ربي اختي
( احتاجك )

لاخلا ولاعدم

[dr.loly]

يسلمووووووووو

[المتأمله خير]

ماشاء الله موضوع مميز وبرنامج روعه...جربيه وخبرينا بالنتايج .. وبانتظار الصور

ربي يعطيكِ الصحه والعااافيه ويقومك بالسلامه

[برنسيسه2013]

ام فراس .... الف شكر لمرورك..

المتأمله خير ... شكرا لك ولمرورك وان شاء الله
نخبركم بالنتايج

[االبنفسج]

ألف شكر يالغلا

يعطيك العافيهه

[برنسيسه2013]

يعافيك ربي يالبنفسج

شكرا لمرورك