ايش رايكم أوقف إرضاع بنتي ً!!!!!!?

[وتـيـن]

يسعد صباحكم

كيفكم خواتي انا حابه أسألكم صار لي اسبوع من ولدت والحمدلله جبت بنوته بعد تعب وربي يخليها ويحفظها

انا إرضاعها طبيعي بس حلمات صدري تجرحت وصارت تألمني وصرت أدهنها بالفارلين بس مازالت توجعني وصاير صدري كبير وكانه متحجر ويوجع هل هذا طبيعي ولالا

كيف اعرف انا بنتي اكتفت رضاعه وكم رضعه اعطيها وتكون بين كم فتره وفتره


اتمنى احد يرد علي ربي يسعده

[ام اسكندر]

حبيبتي رضعيها كلما بكت دامها لسا بالاربعين

اما لما يتعدل نومها بعد4شهور نظمي رضاعتها

والحلمات دهنيهم ع طول سواءبفازلين او زيت زيتون
ورطبيهم بالمويا قبل الرضاعة عشان ماتمص الكريمات

وربي يحفظها لك

[Miss YoYo]

أبــد لاتفكرين تفطمينها
الرضاعه في البدايه شي ابدا مو سهل
ماحنا متعودين احد يمص طول الوقت .. الحلمات تتجرح وتألم لأن البيبي توه صغير
باقي ماعرف وشلون يمسك صدرك زين .. أو مسكتك له غلط
اصبري شوي وتتعدل الأوضاع .. شيلي فكرة الفطام من راسك لاتفكرين فيها
كلنا نمر بهالمرحله في البدايه .. شي طبيعي لا تحسبين انك انتي لحالك كذا
والله الرضاعه إحساس حلو كل ماكبر البيبي وبدا يتعلق فيك اكثر واكثر
إحساس يذوب القلب .. ماراح تحسين فيه إلا وانتي ترضعين

بالنسبه للجروح حطي عليها مرهم وقت اللي يكون البيبي مايرضع
واذا حب يرضع غسليها ، والحين فيه مراهم بالصيدليات خاصه بالرضاعه
يقدر البيبي يرضع وهي على صدرك
وحطي هالشي في بالك كل مارضع البيبي من صدرك كل ماطابت جروحك بشكل اسرع
حتى لو فيه دم يطلع مافيه خطر على البيبي .. بينزل الدم مع البراز

انا والله تبهدلت بهدله غير طبيعيه مع الرضاعه زي حالتك
بس صبرت وشديت على نفسي وراجعت مع اخصائيه رضاعه
لأني بغربه ومامعي احد يعلمني وهذا اول بيبي لي
دايم اقول مافيه احسن من حليب الأم لولدها
وبعد الولد اللي يرضع من امه يكون حنون عليها طول عمره

انا اضطريت انوم ولدي بعد اسبوعين من ولادته
وكانو حاطين عليه اسلاك تخطيط لدقات القلب
وماكنت اقدر اشيله ارضعه فـ كنت اشفط وأعطيه بالرضاعه
من بعدها خلاص عيا ياخذ صدري بس ما استسلمت
بقيت احاول وأحاول واشفط الحليب من صدري واعطيه لمده 3 اسابيع
بعدها حسيت الحليببدأيخف فقررت اشوف اخصائيه تغذيه
نصحتني استخدم الحلمة الصناعيه عشان يتعود انه يكون على صدري
واحاول معه كل مره بنص رضاعته اشيل الحلمه واعطيه صدري
لي الحين شهرين وزياده استخدم الحلمه واحاول معه بس ماهو نافع
ومع كذا مصره .. وعندي امل انه بيجي يوم ويمسك صدري بدون الحلمه الصناعيه
وإذا ما قدر يمسك ببقى استخدم الحلمه لين يكمل عمره سنتين وافطمه

بالنسبه لصدرك والتحجر هذا شي طبيعي .. مو طبيعي لو يكون صدرك مو متحجر
بهالفتره البيبي ماعنده جدول معين للرضاعه ، عشان كذا جسمك ينتج حليب طول اليوم
لكن بعد فتره طفلك راح ينظم رضعاته نوعا ما
على طول صدرك راح يقل انتاج الحليب فيه على حسب حاجة طفلك
على الاغلب على اربعينك او بعدها بفتره
تمنيت اني اعرف هذي المعلومه من قبل بس للأسف ماعرفتها إلا بعد ماتنظمت رضعات ولدي
فـ نصيحتي لك الحين استفيدي من مخزون الحليب اللي عندك
اشفطي حليب وجمديه قد ماتقدرين .. لأنه بتمر عليك ايام بيقل حليبك
اما من قلة اكل او تعب .. كذا يكون عندك حليب طبيعي مايحتاج تعطينه صناعي ابد
او كنتي مستعجله بتطلعين مكاناو كذا
تراه يقعد بفريزر الثلاجه 3 شهور وبالفريزر الكبير 6 شهور

بالنسبه وشلون تعرفين اذا شبع او لأ
هذي سهله .. البيبي متى ما حس بجوع بيبكي
رضعيه واذا شبع بيسكت وبينام
ماعليك من خرابيط الناس .. هذا كلام اخصائة
ودامها باقي صغيره .. كل مابكت رضعيها
انسي شي اسمه انظم رضعاته
هي لحالها بعدين بتتنظم


ربي يحفظها لك ويقويك على رضاعتها
والله مافيه افضل من حليب الام لأطفالها
تصبري و بتتحسن الامور
خذيها من وحده مجربه
كلنا كذا في البدايه بس كل ماكبر البيبي يوم تصير الحياه اسهل

^_^

[إحسآس]

استخدمي كريم أفالون لتشققات حلمات الثدي

جدا مريح ومفعوله سحري

واتركي الفطاام

[سفن بارد]

استخدمي كريم افالون. زي ماقالت اختي احساس انا مجربته رووووووعه

واختي مس يويو كفت ووفت وكلامها رووووعه وميه بالميه صحيح اايدها واللع

[ام مراوي]

بالنسبه للتشققات استخدمي كريم من الصدليه اما بالنسبه للرضاعه ارضعيها كل ساعتين وان شاء الله بتكون اشبعت