دردشة بنات ليبيا , دردشة حوامل ليبيا , تجمع بنات ليبيا

أم أجنادين 80 · 08-23-2012, 12:50 PM

مني صايمة اليوم انا صايمة
نحكيلكم علي موقف صار معاي في العيد .......
طبعاً انا لبست الردي في العيد هدية من عمتي مع بلوزة جوبير بسيطة جدا نسقتها معاه
طلعنا نعديوا علي أقارب زوجي ووصلنا لحوش عمته واحني نازلين من السيارة جت وحدة من البنات
المتزوجات جيران عمت راجلي " وهيا اصغر مني في العمر " ...
ولما تعيد عليا جنب السيارة قالتي " وشن لـــــــــــــــــــــز عليك لبس الردي " الحق انا كنت حايسة شوية في الفراشية
اول مرة نلبسها بس فرحانه بيها اللبسة ...
قعدت ساكته مبيتش انرد عليها وهيا مستمرة في الكلام " كان لبستي عباية عليها خيرلك واريحلك "
قعدت ساكتة وزادت علقت " عباية خير " قلتلها هجا لبس عربي يبي حاجته وسكتت وهيا قالت " مش قصدي
العباة الكحلة العباية الكبيرة البيضاء " ... مبيتش انرد
مش عـــارفة ليش تحشر في نفسها انا مقتنعه بيها لبستي وانحب نلبس الردي ....
ونفس البنت هذه أول ماتزوجت تقريبا ليا 5 شهور متزوجه في حالة وفاة شفتها سلمت عليها وقعمزت بعيد
وهيا جت جنب حماتي سالتها شني مرت خوك حامل قالتلها حماتي مش عارفة الباين لا
زادت قالت " الواحد مفروض يشوف روحه " وهيا هداكا اوقت حامل ببكرها قالتها حماتي احني مندخلوش في خصوصياتها
تعرفوا هديكا المرة اول مرة نشوفها البنت في حياتي كلها ,,,
ليش هالحشرية هذه وياريت حتي نسكن جنبهم بعيده عليهم ,,,,,
ياريتني نعرف انرد عليها كلمات نخليها ساكته ,,,
تعرفوا انا مليت منه الموضوع هدا موضوع الحمل انا ناسياته وعايشة مرتاحه وهما
حاملين همي ليش من شكالهم مش عارفة ,,,

أم أجنادين 80 · 08-23-2012, 03:51 PM

ويـــــــــــــــــــــــــنكم

أم أجنادين 80 · 08-23-2012, 07:21 PM

يلا نهدرز بروحي ,,,
درت فطوري انا وراجلي شربة وبيتزا سندويتشات
وكنتاكي ورز بالخلطة ,,,
والحلو مش مدايرة فيه حلاواة العيد ,,
انفكر اندير للسحور مهلبية ,,,,

أم أجنادين 80 · 08-24-2012, 02:12 PM

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يومين ولاوحده
شن القصة ماعندكمش نت ؟؟؟؟؟؟؟؟؟؟

أثري في مدادي · 08-24-2012, 02:34 PM

السلام عليكم ورحمة الله وبركاته
كيفك أم أجناديــــــــــــــــــــــــــن ؟؟؟
أني اليوم رابع يوم صيام ،،، ومنهم يوم دين ،،، فطرته لأنني تعبت وجتني نزلة معوية ،،، ومازال ثلاثة أيام أخرى ،،، من غير اليوم ،،،وربي يعين

أثري في مدادي · 08-24-2012, 02:44 PM

""""""""""" إي والله ذكرتني بأيام المحنــــــــــــــــــــــــــة ،،، هههههههههه
لما تأخرت بالحمل وقعدت تيسع سنوات أنتظـــــــــــــــــــــــــــــــر
كان اللي يشوفني لازم يتضمن سلامه : شنوووووووو مافيش حاجــــــــــــــــــــــة ؟؟؟؟
كنت نقول لأهلي : اللي يسلم علي وماينشدنيش ، أكيد مازبطنيـــــش ~~~~~

وبعد ما حملت وجبت ، قلت في خاطري سيرة وافتكينـــــــــــــــــــــــــــــا منها ،،، لكن للأسف ،،،
ولدي مازال ماصكرش عام ،،،، وبدوااااااااااا : شنووووووووووو مافيش حاجة " ثانية " ؟؟؟؟؟؟
آآآآآآآآآآآآآآآآآآآآآآآآآه
عندهم هوايـــــــــــــــــة ،،،بل إحتراف ،،،، في حرق الأعصاب وإستفزاز البشرية .....
بس أني أخذت منااااااااااااااااااااااااعة
قبل حتى ما نحمل ونجاوب عليهم بعين صحيحة وبكل ثقة : لا والله ما في شي ،،، توا ربي يسخر الحال ~~~~
ولا أتحاشى الكلام عن مواضيع الحمل والإنجاب والتربية ،،، اللي يشوفني يقول جايبة طزينـــــــــــــــة .....
المهم إنني واثقة من حكــــــــــــــــــــــــمة ورحمـــــــــــــــــــــة وقــــــــــــــــــــــــــــــدرة خالقي ،،،،،
فالحكمة تقتضي تأخــــــــــــــــــــــــــــر حملي
ورحمته أعظم من رحمة أمي بــــــــــــــــــــي
وقدرته بالغة ، فليس بعاجزسبحانه عن خلق جنين في رحمي "حاشا لله "
فلتقر عينــــــــــــــــــــي ولا تحـــــــــــــــــــــــزن ~~~~~

أم ورد · 08-24-2012, 05:59 PM

السلام عليكم ورحمة الله وبركاته

أم أجنادين 80 · 08-24-2012, 07:11 PM

وعليكم السلام
والله عندك الحق اثري
وكلامك كله حــــــــــكم وجواهر,,
حتي انا زيك خديت مناعه ضده هالكلام ولو يسألني حد نجاوب مفيش مزال ربي مسخرش ,,,
ونتابع هدرزتي ومانخليش الموضوع يأثر عليا ولا نحكي لراجلي عليه
قبل كل كلمة بخصوص الموضوع هدا انقوله عليها
القيته حرق اعصاب ليا وليه وهذه حكمة وارادة ربي ,,,
حتي يقولوا ديري وديري مخليتها علي ربي ,,
آخر شي حماتي قالتلي بنمشي بنحزم بالك بتمشي معاي قصدها انتي عطلتي ماحملتيش نمشي نحزم انا وياك ,,,
كل انسان ادري باموره الخاصة وانا التحزيم مايمشيش مع حالتي ,,,
وطبعاً امي تكلم فيا وخالاتي يكلموا فيا امشي لمصر تعرفي ىخر مرة مسكت اعصابي
جيت بنقول معادش نبي من يكلمني في هالموضوع فديت فديت منه ,,,,,,,
يحسسوك كانك فيك عيب ولا مرض قوي ,,,
بس والله الا صحه الوجه ةطولت اللسان باهيه مرة مرة
بس طبعي اني ساكته صعب نتغير ,,,,,

ام قصى محمد · 08-25-2012, 03:10 AM

السلام عليكم
وكل عام وانتم طيبين
ام اجنادين ولا يهمك والله الناس ما تريح حد انا مش حملت ببنت وراه على طول
وجبتها على طول قعد الناس الحشريه احملى جيبيلها اخ ولما حملت وجت بنتى الثانيه الله اكبر تقول عندى عشره بنات
الوصفات شن ناكل وامتى نرقد مع راجلى وهذى العشبه الى تخلينى نجيب اولاد على طول وهذى الوصفات
وحملت ونزلت الولد والله ما زعلت قلت الى قدرها ربى
وتوا مش حامل يعطن فيا وصفات والى تقولى مضمونه والضمان فى الله والى تجينى خير وبركه بطنى مش رح تجيلى عدو بنت واله ولد مش فارقه سيبك من الحشريه الزاياده

ام قصى محمد · 08-25-2012, 03:24 AM

نحكيلكم على عيدى
اول يوم العيد كنت من ليله السبت الميه مقطوعه عندنا وما جت الا ساعه3 الفجر تخيلو قعدت نظف فى الحوش لقبل صلاه العيد درت حمامى ومشي جرى لصلاه وبعدها عيدت على عميمتى ورقيت شقتى طحت راقده لساعه12 اصلا اهل زوجى ما يجينا حد بدرى وهم نفسهم يطولو وهم مرقدين المهم
نزلت لقيت عمتى دوبها حاطه طنجره طبيخه العيد على النار ساعدتها ودرت المسير
وتغدينا وبعدها على المغرب مشيت انا وراجلى والبنات نعيدوا على اهل زوجى جديته وعمته والمهم مشيت لحوش جديتى نعيد عليها روحت الساعه 12 تعبانه رقيت ورقدت انا والبنات
ثانى يوم مشيت لاهلى وطبعا ما روحت الا متاخر
وثالث يوم طلعنا تغدينا فى مطعم فى سوسه وبعدها مشينا لشحات منتجع شحات المعروف بالكهف
وقعدانا غادى لعند الليل تعشينا وروحنا

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
دردشة بنات مصر , دردشة حوامل مصر , تجمع بنات مصر	سماسم	إستفسارات حوامل من الشهر السابع إلى الشهر التاسع	15243	06-15-2013 02:43 AM
تجمع حوامل ليبيا	ميرنا	إستفسارات حوامل من الشهر السابع إلى الشهر التاسع	21344	01-02-2012 10:29 PM
دردشة بنات مصر , دردشة حوامل مصر , تجمع بنات مصر	سماسم	إستفسارات حوامل من الشهر السابع إلى الشهر التاسع	32704	01-02-2012 10:16 PM
شجرة تجمع حوامل ليبيا	أم أجنادين 80	إستفسارات حوامل من الشهر السابع إلى الشهر التاسع	6	12-19-2011 10:44 PM