قصتي مع الحمل اللاجيني " كيس بدون جنين "

[مملكيه]

بسم الله الرحمن الرحيم..

قصتي باقولها بالتفصيل عل وعسى تستفيدون منها..

انا حملت بأول حمله لي من 5 شهور ..

فرحت وااايد لان طول عمري اتخيل روحي ام واحب الاطفال وايد..

ماكملت فرحتي كلها كم يوم وقالولي حملج مب طبيعي مافي اثر للجنين... ولا في نبض ولا شي بس كيس.. والكيس يكبر وهو فاضي.. واعراض الوحام قويه تعبت نفسيتي اكثر..

جربت 3 مستشفيات كلهم نفس الكلام وكل مستشفى يعيد السونار بعد اسبوع عشان يتاكد وانا انطر وانا على هالحال..

وقف نمو الكيس فالاسبوع السابع وبدت تخف اعراض الوحام ليما راحت.. بعد ما تلقيت الخبر تم الكيس فيني اكثر من شهر .. قالت لي الدكتوره لازم نسويلج تنظيف لان مب زين يطول يمكن لا سمح الله يسبب تلوث في الدم..

قريت وايد عن التنظيف وعرفت ان له مساوئ منها انه يضعف الرحم خصوصا للبكر .. ولازم عالاقل انطر 6 شهور عشان ارجع احاول احمل..

وصفت لي الدكتوره حبوب للاجهاض اشتريها من بره واخذها فالمستشفى وانا متنومه.. ماحصلتها لا في البحرين ولا في السعوديه..

حاولت بالخلطات الطبيعيه + الجري + المشي + شاي الدارسين + الحسو والجلاب .. لمدة اسبوع..

فقدت الامل وقعدت اتجهز لموعد العمليه كان المفروض اروح 6 المغرب.. 4 وشي العصر دخلت اتحمم واتجهز.. الا اشوف بدى فيني مثل بداية الدورة بس بدون الم..

اتصلت فالمستشفى والغيت موعدي ورحت اتمشى عشان يزيد...

كان شي بسيط وبدون الم.. لي اليوم الثاني اشتد علي الالم والمغرب اشتد اكثر واكثر والدم زاد صار مثل الدورة او يمكن اقل..

رحت الطوارئ ويوم وصلت الطوارئ من الالم جلست ابكي ومو قادره اوقف حالتي كانت جدا صعبه.. ودوني قسم الطوارئ الخاص بالولادة والالم اشتد اكثر ماتتصورون يا بنات والله ماتصورت الالم جذي.. شي فوق طاقتي من شدة الالم يوقف تنفسي وماقدر حتى اتكلم..

كلها دقايق واجهضت.. فحصتني الدكتوره وكان الفحص جدا مؤلم وقالت لي عندج لي بكره بنشوف اذا تحتاجين تنظيف اكثر.. ونقلوني الجناح.. حطو علي دوا مؤلم طول الليل ماقدرت انام.. بس عشان ماحتاج تنظيف والحمدلله ماحتجت

رخصوني الظهر وصرت احسن بعد اسبوع.. وطهرت بعد 12 يوم..

قالولي اخذ فولك اسد 3 شهور واتجنب الانجاب 3 شهور..

بعد شهر رحت استلم نتيجة فحص الكيس وطلع كل شي الحمدلله طبيعي..

نفسيتي وايد تعبت وتخوفت من الحمل مره ثانيه.. بس الحمدلله من كم يوم رجعت من العمره وحسيتها فترة نقاهه ارتحت اكثر وتشجعت اكثر للحمل مره ثانيه..


ادعولي الله يعوضني يارب ..

[فوضت امري لله]

ياحبيبتي الله يكتب لك الحمل ويثبته عليك بالرقيه الشرعيه حبيبتي -----------

[ام هيثووووم]

الله يعوضك يارب بالحمل السليم وتجين وتبشرينا يارب ياكريم

[نبعة الحب]

الله يعوضج ان شاء الله بحمل سليم يارب

[على ابواب الامومة]

الله يعوضك بالحمل السليم المعافى كامل الخلق دون زيادة او نقصان
يااا رب يااا كريم

[مسكّ العطورّ]

ياعمري الله يعوضك
ياقلبي والله خيررره والحمد الله ع سلامتك
وان شاء الله تحملين حملي طبيعي
حطي امل ياعمري غيرك فيهم عقم ماله علاج نهائيني
ياعمري انتي ان شاء الله. خيررره

[ùm Ļάyάή]

الف حمد لله على السلامه صدقيني خيتوو يمكن خيره لك لاتزعلين ترا ربي كريييم
الله يعوووضك خير ياااااارب

[أسوووم]

الله يعوضك يااااااااااارب

ولا تزعلي ان شاء الله ربي يعطيكي

[مملكيه]

الحمدلله رب العالمين واملي بالله كبير..

والله دعواتكم تعني لي الكثير ما تتصورون.. اشكركم من كل قلبي والله يرزق كل وحده فيكم ما تتمنى ويجعل فيه خير وصلاح لها..

شكرا لكم خواتي

[أسيرة زوجي]

حبيبتي عسى أن تكرهوا شيئا و هو خيرا لكم
ربي مو كاتبلك الحمل الأول يتم مو معناه إن الحمل الثاني كمان ما يتم
حبيبتي الله يعوضك بالحمل السليم المعافى في القريب العاجل
أكثري من الاستغفار و شوفي سبب إجهاضك الأول و إن شاء الله ما يصير معك إلا الخير