هل ممكن ان تؤثر الرضاعة على هرمون الحمل؟هل ممكن يكون التحليل سالب وأطلع حامل؟

[بسمة أمل 111]

مرحبا صبايا

ارجعتلكو من جديد ان شاء الله اتكونو بخير اتحملوني بس حابة احكي شو صاير معي بالتفصيل
انا عندي بنوتة عمرها 11 شهر وابترضع رضاعة طبيعية اجتني اول دورة بعد الولادة في تاريخ 24-1-2015 وانا رحت عند الدكتورة وتابعت التبويض وقالتلي البويضة ابتنزل في 14 من الدورة يعني يوم 6-2-2015 ومنعتني من الجماع طول الشهر الا بهادة اليوم وصار متل ما قالت وبعد يوم التبويض باسبوع نزلت عندي قطرة دم بنية وحدة بس ما شفت غيرها وكانت الدكتورة قالتلي في يوم 21-2-2015 بتحللي للحمل حللت منزلي بس طلع سالب خلص اتوقعت ما في حمل ورح تنزل الدورة بس ما نزلت وصار عندي الم في اسفل بطني وضهري متل الم الدورة بالضبط بس اقوى شوي ابيبدء في الليل تقريبا 10 مساءا ولحتى 10 الصبح وبخف الوجع في النهار رجعت عدت التحليل بعدها بيومين طلع كمان سالب خط واحد والخط التاني ما ابيظهر الا اذا سلطت عليه الضوء يعني ما في حمل رجعت عدتو بعدها بيومين كمان سالب قلت يمكن الهرمون ضعيف رحت حللت دم طلعت النتيجة 25 MLU/ml يعني كمان سالب وما في حمل بس طبيبة المختبر قالتلي ما تركني على هاي النتيجة اذا ما نزلت لبعد 10 ايام تعالي عيدي التحليل اليوم جبت تحليل منزلي وكمان سالب بس اختفى الم اسفل بطني وضهري من قبل يومين يعني كأنو الالم اجاني في موعد ايام الدورة ومع اخر يوم راح
هلأ سؤالي معقول يكون عندي حمل وما ظهر بسبب الرضاعة ولا ما الو تأثر ؟ ومين عمرو حصل معها هيك اشي؟ وابتنصحوني اعيد التحليل ولا انسى الموضوع واتوقع ما في حمل ؟ومعقول يكون صار عندي تبويض متأخر ويكون لسة ما ظهر الحمل لانو من بعد 19-2-2015 رجعت للجماع الداخلي عادي؟

بس حابة اضيف إنو انا قبل هيك بعد بنتي البكر صار معي تقريبا نفس الاشي اجت اول دورة بعد الولادة على ال 6 شهور وكنت ارضع طبيعي وبعدها ما اجت حللت منزلي بعد تأخرها ب 10 ايام طلع سالب اتوقعت ما في حمل وتابعت حياتي عادي والاقارب قالولي بكون خف الحليب واجت الدورة ولما يزيد الحليب ما ابتجي بس ماما لوحدها كانت تحكيلي انتي حامل مش معقول اتكوني سمنانة وما عندك الا كرش هادة اكيد حمل وانا كنت احكيلها لا مستحيل عملت تحليل وما ظهر حمل وللاسف طلعت حامل عنجد وما عرفت الا بعد 3 شهور لما اجهضت الجنين كنت اخد دوا قوي جدا سببلي الاجهاض ...
يعني انا مش مستعجلة كتير على الحمل بس حابة اعرف وارتاح عشان ما اكرر التجربة السابقة اكيد فهمتوني ..........اللي ابتعرف يا ريت اتفيدني واللي ما ابتعرف يا ريت تدعيلي الله يرزقني صبي صالح وسليم ومعافي إلي والكو اجمعين يا رب

[زوجة مهدي]

حبيبتي اتوقع انك حامل

والله تعالى اعلم

والله يرزقني واياك توام ذكور صالحين سالمين حلوين اذكياء

[ريحانة الجنة]

عشان ماتكررين الخطا -الحرص ولا الندم -عيدي التحليل وخليه للدم رقمي لانه دقيق
والله يبشرك بمايسسرك

[بسمة أمل 111]

شكرا على مروركو صبايا الله يرزقني واياكو

ان شاء الله رح اعيد تحليل الدم بس مش حابة استعجل يعني لو بعد اسبوعين بكون منيح

وان شاء الله رح اتابعكو في اللي بصير معي عشان الكل يفيد ويستفيد من تجارب الاخرين

[كولين]

اتوقع انك حامل ربي يرزق الجميع بالذريه الصالحه يارررب

[بسمة أمل 111]

شكرا حبيبتي الله يعطيكي انتي كمان ويعطي الجميع

[افنان الحربي]

الله يرزقك بالولد الصالح يا ررررب

[بسمة أمل 111]

شكرا حبيبتي ويرزقك انتي كمان

[yara.maroc]

غريب هالشي بس اعتقد الاحتمالين واردين ممكن تكوني حامل و ممكن الرضاعة اخرت الحيض او في كيس بالرحم انا وقف لي الدورة شهرين و ما انتبهت الو الا مؤخرا
الله يفرحك

[بسمة أمل 111]

بنات شكرا لكل مين جاوبتني او دعتلي انا وعدتكم انو احكيلكو شو بصير معي لانو ما بحب اخلي موضوعي معلق
عشان اللي بصير معها متل ما صار معي تستفيد
فحبيت احكي انو ما طلعت حامل لانو اليوم اجتني الدورة والخيرة فيما اختاره الله
الله يرزقني ويرزقكم اجمعين