قد قريتو اقصة ولادة .. لكن ماقد قريتوا قصة موعد متابعه

[خطاي إني وفيت]

صباح الخير...
هذي قصة موعدي الأول طويلة الله يعينكم عليها أمس رحت لموعدي بالمستشفى الجامعي صليت الفجر وطلعت من البيت لأن بيتي بعيد وصلت للمستشفى الساعه 7 وكان موعدي الساعة 8 كنت مبسوطه قلت أول وحده تتدخل على الدكتوره ومخطط إذا خلصت نفطر برا قلت ماراح ياخذ الكشف أكثر من نصف ساعه
جت الساعه 8 وتوهم يدخلون حقين الإستقبال ويوم عطيتهم ورقة الموعد قالولي روحي غرفة قياس الضغظ لقيت فلبينيه وعطتني علبه تحليل البول (الله يكرمكم ) وإختفت على طول
ودخلت ثانيه جيت بسأله إنه وين دورة المياه ووين أحط التحليل وبنت اللذينا أول ماقلتلها سستر إنفجرت بوجهي ماما سوي تحليل أول قلتلها طيب وين ورفعت صوتها خرعتني تقولي أستغفر الله ماما ليه إنتي ماتسمعين كلام قهرتني ماخلتني أنطق أكلتني بقشوري قمت رفت صورتي وقلتلها إنتي إسمعيني
المهم خلصت وكنت خايفه إن دوري راح ...
وجت 8 ونص ولا نادوا إسم أحد وجت 9 .... 9ونص .....عشر إلا....
قمت جلست جنب وحده حبوبه مراجعه سألتها وسولفت معاها ...
قالتلي معلومة الصراحه إنصدمت إنهم ماراح يدخلوني على الدكتوره الإستشاريه اللي مكتوب إسمها على ورقة المواعيد وإنها بس إسم حاطينها بالورقة
وإن اللي يكشف على الطلبه عاد أنا وحظي ياتطلعي طالبة أو طالب حسيت إني فار تجارب
وعلى الساعة 10 دخلوني على طالب أنا أول ماشفتة بغيت أصيح مواصفاته (طالب / سعودي / وبزر / وخكري ) وقام يسألني أسأله محرجه أنحرج أجاوبها لحرمه موعاد رجال ويناظر فيني ويضحك وغير كذا قالي ولادتي بشهر 6 وأنا ولادتي بشهر 4 يعني زادني شهرين وكل ماكتب على علاج خانقته الممرضه وتقطع الورقة والله مايعرف كوعه من بوعه بغيت أقعد أشرحلة رحمته مرتبك بس وقح
يوم كشف علي قال ماقالولك شي عن البيبي قلت له إلا بنت قال : لا أقصد صحتها ماقالولك قلت لا
قال حسيتي بحركتها؟؟؟ ووصفي لي الحركه ؟؟؟ كل كم تتحرك ؟؟؟؟وماقد جاك إغماء ؟؟؟؟
بعدين قال إنتي لازم تسوين أشعه صوتيه مستعجله اللحين وطلب 5 عينات دم
أنا ماقدرت أوفق على رجولي من الخوف وقمت أصايح وأقول إن المستوصف الخاص اللي متابعة الحمل عنده ماقالتلي شي الدكتوره شكلهم بس يبون فلوس وماهمهم صحتي وصحة الجنين
المهم يوم سويت الأشعه وتقوم الدكتوره الهنديه حسبي الله عليها تهاوشني وتقولي إنتي كذابه
كذبتي علينا وعلى الدكتور
قلتلها وش السالفه !!! قالت مافيه دم ليش تقولين لدكتور كذا وكل مادخلت وحدة قالتها هذي كذبت على الدكتور الجنين سليم كذبت عشان نسويلها أشعه ...
قهرتني أنا من خوفي من كلام الدكتور ماقدرت أرد عليها وأول ماقالتلي إن الجنين سليم إنربط لساني يعني هم اللي غلطانين وينافخون خوفوني ووقفو قلبي بغيت أنهار عليهم يحسبوني ألعب عليهم علشان يسوون أشعه مادروا إنه كل مراجعه لي بالمسوصف الخاص آخذ أشعه وإني موبحاجتهم الحمدلله ...
ونسيت أقولكم نقطة بعد كل مراجعة لي عند طالب جديد أقعد أشرحله قصة حياتي ...
مرة مصدومه من المستشفى ومقهوره بعد ولا طلعت من المستشفى إلا الساعه 1 الظهر وتحول الفطور لغداء ...
الله يكوني بعون اللي مضطر له والله يسخر لي الدكتوره الحنونه اللي تولدني ...
وبالنهاية أنا صرفت النظر عن الولاده بهالمستشفى ..
وآسفه على الإطاله ...