الحمدلله اللي اكرمني لضمك لصدري يابنوتي

[أم تااالين]

السلام عليكم كيفكم حبيباااتي
اليوم قررت أنزل قصة ولادتي ببنوتي الحلووه
طبعا التجمع حق رمضان يعرفون عني طول الشهر التاسع وأنا انتظر الولاده
ومواعيد ومراجعات بالمستشفى قالت لي دكتورتي ولادتك في 9 رمضان اذا خلصتي التاسع كامل
ورحت مستشفى الولاده فتحت ملف وشافتني دكتورة قالت موعد ولادتك في 4 رمضان
اخر يوم بالتاسع
طبعا كل شي جربته من ( مشي -جماع -عسل وحليب - زعفران -تمر ورطب .....الخ
وباول رمضان وقفت المشي ويارايحه جايه مراجعات وكل اموري طيبه
وبنتي نازله بالحوض وتحاليلي زينه جاني سكر حمل خفيف وراح مع الحميه
المهم باخر زياره للدكتوره قالت بنعطيك 12 يوم لاني خلصت التاسع وبعدها لو ماولدتي بنعطيك طلق صناااعي وكنت خايفه من كثر مااسمع عنه انه أشد من الطلق الطبيعي
الشي اللي كنت مستمره عليه الدعاء وكنت ادعي ربي يكتب لي الخير واستخرت بالصناعي
طالت المده ومليت وأقول لزوجي خلاصصص باخذ الصناعي وبتوكل على الله
بطني تشقق وصار يطلع منه دم وصل حده وثقلت مررره وصارت نفسيتي عدم
صمت منن رمضان اسبوع بالضبط وقلت خيره طاااح مني اسبوع ولا شهر
المهم كان يوم الثلاثاء 7-9 وكنت عند اهلي زياره لما الساعه 12 الليل وكنت عاديه ماحسيت بشي
نسيت أقول لكم شربت عصير اناناس قبل ثلاث أيام من ولادتي بس مدري هل له دخل بالولاده أو لا

نرجع ليوم الثلاثاء جااا زوجي اخذني من بيت اهلي ورحنا نتسحر واسولف معاه عادي
وكنت داخله المنتدى ومرووقه واذن الفجر وصليت وبعد ماصليت حسيت بمغص خفيف في بطني
أول مره يجيني قلت يمكن من الاكل لأن جايبين سحور من بره
جااا زوجي من الصلاه وقلت له أحس بمغص غريب قال الله يسهل يارب انتظري نشوف
جات الساعه 5 الفجر وأحس بتقلصات بالرحم تروح وتجي مع الم بظهري وكان هالالم يجيني بعد الجماع
ويستمر خمس ساعات فتعودت بعد الجماع يحيني هالطلق البارد ويختفي
بس هالمره غير ماحصل جماع فقلت شكلها ولاده
وعلى الساعه 6 الصباح بدااا يزيد ورحت أخذت شورر دافي
طلعت وأنا البس ملابسي الا شي نزل مني واشوف الا بقعة دم اوووه وامسح بالمنديل
واشوف خيووط دم مع شوية مويه قلت خلاص شكلها السداده وانادي زوجي واقوله قال يالله المستشفى قلت لا اصبر لما يزيد الالم وجيت بسرعه كتبت بالتجمع انه نزل معي دم اروح للمستشفى أو لا
وشوي يزيد الالم ويروح ويجي بانتظام وخلاص شافتي زوجي كذا قال يالله المستشفى
واخذنا الشنط وأنا امشي اتمسك بالجدار مو قادره كان الم غريب
وصلنا المستشفى وجابوا لي عربيه ورحت عند غرفة الولاده وعطوني علبه قالوا ادخلي الحمام الله يكرمكم
تحليل بول وانتو بكرامه
واول مادخلت الحمام نزلت معي المويه وطلعت أقول لزوجي والممرضه نزلت مويه
ونوموني ع السرير وعطوني لبسهم الازرق وركبوا على تخطيط الجنين والطلق
وجات الدكتورة تكشف قالت 2 سانتي انصدمت كل هالالم وبس 2 !!؟
وحطت فيني شي زي العود وطلعته صار لونه اسود قالت هذي موية الجنين لازم تنويم
لأن قبل كان الرحم مفتوح 2 واطلع البيت عادي بس عشان نزلت معي مويه فخطر اطلع
بعدها جات الممرضه قالت أنتي لابسه غلط !! قلت لها ليه مو المفتوح يكون ورى
قالت لا العكس يعني المسكر خليه ورى والمفتوح قدام استغربت وقالت روحي الحمام غيريه
وأنا تعبانه اتمسك وادخل اغيره وينصب علي مويه كثيره
ورجعت للسرير ابكي وزوجي ماسكني واقوله الله يخليك خلهم يعطوني مسكن أي حاجه ماني قادره اتحمل
وجات الدكتوره وعطتني ابره بالورك شكيت فيها انها مسكن لأنها ماعملت لي حاجه
وعطوني اكسجين وكل ماجات الطلقه اشسل الأكسجين وزوجي يشوف التخطيط الطلق يرتفع
وأنا اصرخ ااااه ااااه ياربي ياربي واذا راحت الطلقه اقرا سورة الزلزله وزوجي يقرأ علي من الجوال
وجات الدكتوره تكشف قالت 4 سانتي
وفاجاتني تقول نبض البيبي بدأ يقل احتمال كبير قيصري وجلست ابكي وزوجي حاول فيها يقول لها ليه
تقول مع الطلق البيبي تتعب وبعدين الحوض صغير حقي قلت حسبي الله ونعم الوكيل توكم تقولون ليه مو من الأول الحين كل اموري طيبه ليه فجاه قيصري
قال راح يجي الاستشاري اللي بيعمل العمليه ويشوف التخطيط
وتقيسني وتقول 6 سانتي وأنا اصرخ واتمسك بالسرير وبيد زوجي مدري ايش اسوي تعبت وأكثر شي نفسيتي تعبت
وجااا الاستشاري شاف التخطيط قال لازم عمليه وانتوا براحتكم البيبي بدت تتعب النبض والاكسجين قل
وخطرر وقال زوجي خلاص عمليه وجات الممرضه لبستني على شعري وخذوني لغرفة العمليات
دخلت الغرفه بارده مرعبه وهم يدفوني وحطوني على السرير وأنا أطلق وركبوا علي اكسجين
وقلت اللهم اني استودعتك نفسي وبنتي في ودائعك
والدكتور يكلمني مدري ايش قال وماحسيت الا بأصوات الممرضات
والتفت واشوف نفسي بغرفة الافاقه واجهزة علي وابر وانادي الدكتوره اقولها كيف بنتي
قالوا زينه بغرفة العنايه خفت قلت ليه فيها شي قالوا لا بس لازم 4 ساعات بالعنايه
قلت وين زوجي نادوه وجااا زوجي لابس اخضر وقال الحمدلله على السلامه
سألته عن بنتي قال شفتها حلووه وارتحت وبعد نص ساعه خذوني لغرفتي وشوي جابوها
واااااه يالشعوور قلت هالنتفه تعبتني هههههههه فديتهاااا
بس تعبتني القسطره وجلست أربع أيام بالمستشفى والممرضات عنايتهم حلووه واخلاقهم عسل
وثاني يوم شالوا القسطره وتعبت منها ونزل دم كثيير وخلوني امشي ضروري
وعدت أيام المستشفى على خير وطلعت بالسلامه
ولدت الاربعااء 9-9 نفس الموعد اللي أعطتني الدكتوره
وكملت فرحتي لما سميت بنتي تااااالين كنت خايفه يكون ممنوع
بس الحمدلله كل شي تمام وأكتب لكم وأنا ارضعهاااا
يارب مايحرم أحد من هالشعوووووور
وتوته توته خلصت الفزووووره