الحل النهائي للإمساك بإذن الله ..

[أم جهآد]

بسم الله الرحمن الرحيم

السلام عليكم ورحمة الله

هذا اول موضوع ليا بالمنتدى عشان كذا حابة اعرفكم بنفسي قبل ادخل بموضوعي:

امممم من فين ابدأ

ولله الحمد انا متزوجة من 11 سنة تقريبا ومارزقني ربي بالحمل

سويت انابيب فجدة بس ماكتبلها الله النجاح وكنت مرة مبسوطة ومرتاحة طول الـ 11 سنة لاني كلي يقين انها حكمة وخيرة من الله ولله الحمد

ليا بلندن تقريبا 3 سنوات بحكم الدراسة وكنت مابين جدة ولندن سنتين ونص تقريبا عشان جامعتي ولما استقريت مع زوجي فكرت ادرس لغة واكمل الماستر درست كم اسبوع وبعدها قلت ابطل دراسة افضل وكنت برضو مرتاحة مو زعلانة لاني عارفة انها خيرة من الله .. والحمدلله كتبلنا الله انو نزور دكتور معروف بلندن عربي اطفال انابيب والحمدلله بدينا وانا الحين بالشهر الرابع تقريبا ..


هذي انا بإختصار

نجي للموضوع :

بصراحة بداية حملي كنت احمل 3 اجنة بس الحمدلله برضو خيرة من ربي جاني امساك عمري بحياتي ماعشتو ..

راح اقولكم الاشياء اللي سويتها عشان احاول اخفف من الامساك :

1- شربت ملين ملعقتين باليوم طبعا وصفتو ليا الدكتورة
2- على الريق ملعقتين زيت زيتون
3- تحاميل شرجية
4- ابرة فاضية اعبيها موية وادخلها وانتو بكرامة بفتحة الشرج بس عن جد ماقدرت اسويها :( وصفة من الدكتور
5- حليب دافي
6- موية 2 لتر
7- ملوخية شربت الين دخت
8- بامية
9- برتقال
10- البس قلفزات واحاول اساعد نفسي من جوة وانتو بكرامة



جربت ذا كلو ومافاد معايا شي

والحل الاكيد اللي سخرو ليا الله كان الكيوي .. انا ماحبو ابدا اكلت حبتين مافادت .. وبعد كذا قلت اعصرو احسن وفعلا عصرتو بعصير برتقال مو موية وشربت 3 كاسات ومامرت ساعة ولله الحمد الا انا مرتاحة من الامساك ..

صار الكيوي ابدا ماينقطع من البيت ..

وطبعا الله يكرمكم البواسير التهبت اخذت مرهم من الصيدلية طبيعي واستخدمتو 3 ايام والحمدلله ارتحت بعدها

ولما رحت لموعد العيادة قالو اللي ثابت جنين واحد بس .. انا قلت يمكن من قوة الامساك ولاني كنت اجلس كثير اضغط على نفسي بالحمام تكرمو .. بس الحمدلله


الله يبعد عنكم الامساك يارب جربو الكيوي وادعولي

السموحة على الاطالة بس حبيت تعيشو المعاناة عشان تتحمسو للكيوي

مع ارق التحايا