مشاركتي في مسابقة البوفيه هي كالآتي...

[um farah]

المنسف
طبعا بما اني في الاردن لازم اشارك من خلال هادي المسابقة بأزكى اكلات الاردن وهي المنسف
طبعا المقادير ما بزبط احددها رح احكيها لكن ست البيت هي اللي بتحدد الكمية المناسبة

المقادير :
لحمة ، ارز ( حبة قصيرة ) ، جميد ( سائل أو حب انا براحة بستعمل جميد الكسيح ) ، بقدونس و لوز وصنوبر للتزيين ، ملح ، كركم أو عصفر حسب التسمية عندكم ، خبز شراك

اول شي طبعا بنحط اللحمة لحتى نستويها بنغمرها بماء و بنخليها لتغلي و بس نشوف الرغوة بنشيل الرغوة و بنحط رشة ملح و بنوطي النار لحتى تستوي

تاني شي طبعا بكون الرز منقوع بنصفي و بنسلقه طريقة السلق بنحط مقدار كاسة ماء ماء و رشة ملح و رشة كركم و شوية زيت نباتي و بنخليهم ليغلوا و بعدها بنحط الرز و بكون على نار عالية و بس نشوف الرز نشفت عن وجه الماء بنوطي تحته و بنستنى ليستوي بده 5-7 دقايق و بعدها بنطفي تحته
*** معلومة عن الارز < الرز بتفلفل ل 3 اسباب ، الاول يكون الرز ماخد راحته بالطنجرة يعني الطنجرة اكبر من مقدر الرز مش عالقد وتكون مرصوص / تاني سبب الماء عليه وهو عالنار ما يكون كتير لحتى ما يخبص / تالت سبب والمهم انك تتركيه مغطى بعد ما تشيليه عن النار لمدة 10 دقايق و بعدها تسكبيه >
و خلال هالفترة بدنا نعمل جميد هلا انا بستعمل جميد الكسيح
بتحطي باكيت في الخلاط و بنفس الباكيت بتعبي ماء و بتحطيه فوق الجميد وبتخلطيه و الباكيت التاني و هكذا حسب كميتك
المهم بتكون اللحمة استوت بنصفيها من الماء و بندير الجميد اللي جهزناه فوق اللحمة و بنحط معلقتين سمنة بلدية و رشة كركم و بنحطه عالنار و طول ما هو عالنار بتضلي تحركيه و ما تتركيه وتغطي ازا حسيتي جامد حطي كمان شوية ماء اللي ما تشيل طعم الجميد شوية وبعد ما يغلى شوي و توخد اللحمة طعم الجميد
بتحطي خبز شراك في السدر و بتحطي معلقتين من الجميد اللي جهزتي و بعدها بتحطي الارز و بعدها اللحمة و بتكوني طبعا مقطعة بقدونس و قليتي اللوز والصنوبر و بتزيني فيه و بتسكبي شوربة الجميد بصحون جنب السدر
طبعا بتقدم جنبه جرجير و بصل أخضر
و الف صحة وعافية