بعد تأخر سنه هذا ما حصل معي ؟!

[حكيمة زمانها]

السلام عليكم ورحمه الله

لطالما انتظرت بشغف الانضمام معكم في عالم الحوامل
بالرغم من تجاربي القليله الا اني استفدت الكثير من عضوات هذا المنتدى واطمع بالمزيد

طبعا لي سنه تقريبا متزوجه زوجي كبير ,, عمره بالاربعين ولم يكتب له الذريه بزواجه الاول

من اول شهر من زواجنا وهو يبي حمل ويحاول بشتى الطرق
ولكن كنت رافضه الفكره بداية زواجنا لاننا داخلين حياة جديده ونحتاج نتريث شوي ,,

الاشهر الاخيره زاد الضغط علي من زوجي وام زوجي وحتى امي على سالفه الحمل
بعدها صرت احس بقلق اكثر مع زيادة الضغط
وما انكر صرت اوسوس اني يمكن فيني مشكله او في زوجي
خصوصاً انه سبق له الزواج وما رزق بإطفال

استسلمت للضغوطات سويت كل اللي طلبوه مني من معالجه لغيرها
حتى سويت تحليل وكنت سليمه من هرمونات وغيرها وكان هالكلام قبل 4 اشهر او اكثر

قررت بعدها دام سليمه اتابع التبويض
وتحديداً الشهر الماضي رحت افحص التبويض في يوم 10 من الدوره وبنفس الوقت اقيس درجه الحراره
مع العلم ان دورتي ما بين 26 إلى 27 يوم
والتبويض عاده يكون في اليوم 12 إلى 13 من الدوره

وكنت احس بآلام التبويض والافرازات وغيرها في هالفتره من كل شهر
وكل هذا اكتسبته منكم انتم وهالمنتدى الرائع

قالت لي الدكتوره عندك بويضه حجمها 12
علماً اني في اليوم 10 من الدوره
وقالت حجمها ممتاز وسوي جماع بعد 3 ايام ؟!

قلت براجعك ورفضت بس جماع وخلصنا اتكلت على الله
وفي اليوم المحدد تأخرنا شوي بالجماع
وهذا خلاني اتأكد انه ما راح يكون فيه حمل

وفعلا شرفت الدوره بعد 26 يوم بالضبط

وكانت غريبه جداً سويت تحليل باليوم 3 وطلع عندي هرمون lh مرتفع ؟؟

استغربت اكثر وشلون وانا كنت سليمه
عطتني الدكتوره كلوفاج 500
ولكن رفض زوجي استخدمه لانه يكره العلاجات والادويه

الزبده

بعد التحليل بديت اشرب زنجبيل بكثره لاول مره بدوراتي واستمريت عليها
وكنت ساعات اشرب بردقوش ومراميه بناء على نصايح البنات هنا
وداومت على الاناناس خصوصاً اني سمعت انه ممتاز للهرمونات
واكل عين الجمل لعل وعسى تكبر البويضه

تخيلوا يا بنات اول مره اسوي هالاشياء كل دوراتي عاديه والتبويض كل شهر احسه فيه من ألم إلى افرازات الا هالدوره غررررريبه غررررريبه

لدرجه اني كنت راح ازيد عليهم وآكل غذاء ملكات النحل بس خفت يرفض زوجي لانه عنيد وما يقتنع بسهوله

قررت اروح للدكتوره اللي شافت لي التبويض الشهر اللي راح << احسها ملت مني
خصوصا ان ماشاء الله زحمه عندها وكان شغلها سريع مع انها ممتازه ونصايحها حلوه

في يوم 12 من الدوره شافت التبويض ووجدت بويضتين اكبر وحده حجمها 13

تحطمت بعد هذا كله و 13 ؟؟!! تخيلوا الشهر اللي فات البويضه كانت افضل واكبر

استغربت وقالت تعالي بعد 3 ايام
قلت لزوجي قال ان امي قالت لي عن غذاء ملكات النحل ؟؟<< يعني الحين عجزت اقنعك واقتنعت من امك

مع العلم ان زوجي في هذا الشهر وقبل غذاء ملكات النحل سوا تحليل وكانت الحيوانات المنويه 20 مليون فقط والسرعه متوسطه
والدكتور يقول في حدود الطبيعي

طلعنا على طول من الدكتوره وجاب غذاء ملكات النحل
وتناولته انا وياه من اليوم 12 لحد موعدي عند الدكتوره يوم 15 وكانت المفاجأه
صار حجم البويضه 20


قالت يصير جماع اليوم وبكره ..قلت يادكتوره انا ابي اشوف البويضه نازله خصوصاً ان هرمون lh مرتفع وهو سبب في تكيس المبايض

وبناء على نصيحه الدكتوره اللي سوت لي التحليل
كانت تقولي لازم تتأكدين من نزول البويضه وانها ما تتكيس

بس هالدكتوره رفضت وقالت ما يحتاج وليش مستعجله على الانجاب

المهم قلت لزوجي وصار جماع بنفس اليوم ورفضت يصير من بكره وقلت خله يوم ايه ويوم لا...
علشان الحيوانات المنويه تكون انشط
وعلشان أتأكد انه البويضه نازله
خصوصاً ان التبويض هالشهر متأخر مع الدوره مبكره
وآلالم التبويض حسيت فيها بدايه يوم 15 من الدوره والافرازات كذلك

وفعلا وكان اخر جماع قبل امس من يومين ونمت بعدها ..

وكنت حريصه انه يكون حمل وحمل بذكر خصوصاً ..
يحمل اسم زوجي بعد هالعمر ويفرح امه الكبيره بالسن
مع العلم اني احب البنات واموت فيهم

واخذت الاحتياطات من غسول بيكربونات الصوديوم وغيرها

بعد 10 ساعات تقريبا من الجماع يعني الصباح صار شئ غريب
ما اعرف اوصفه حسيت بألم خفيف بالمبيض الايسر مثل الم التبويض ولكن كان نازل شوي مو بالمبيض نفسه
وصار شئ غريب مثل ضغط ثم انفجار صغير او ختراق بس حسيت انه حيوان منوي اخترق البويضه<< بس من جد كان مثل هالوصف

ما اهتميت كملت نومتي ومن وقتها اللى الان
وانا احس بألام الدوره والم بالمبيض الايسر نازل شوي على الرجل اليسرى يزيد وانا نايمه
لدرجه اني احسه الدوره بتنزل

الافرازات مستمره ما بين شفافه الى بيضاء وبعد اكثر من 24 ساعه على الجماع نزل مني كميه اكبر من العاده من الافرازات
مثل زلاال بيض ولكن ثقيله ومختلطه بين شفافه وبياض خفيف
والان يجف ثم ترجع كميه تنزل ثم تجف وهكذا

والالام والافرازات بعد كل فتره تبويض تختفي ولكن هالشهر استمرت

اثناء النوم في تطرف بدرجه الحراره ساعات احس بررررد وساعات حرررر
درجه الحراره ارتفعت شئ خفيف عن قبل ولازالت مرتفعه وبالليل تختلف

ايضا معي غازات خفيفه ولكن مزعجه وانتم بكرامه

ما حسيت بإي الم بالصدر,, ما لاحظت شئ في مزاجي او نفسيتي عادي جدا



هل هذا حمل ؟

وإذا حمل تتوقعون ذكر ؟
لاني اعرف الحيوان المنوي الذكري يعيش ساعات قليله واللي حسيت فيه كان بعد الجماع 10 ساعات


قولوا لي وشلون اتأكد

واعتذر عن الاطاله

[ساره999]

يارب تكون اعراض حمل ويبشرك ربي بكل خير ، غذاء ملكات النحل ممن الصيدليه كم حبه تاكلين باليوم وكذلك زوجك
لاني ناويه استخدمها ان شششاء الله

[ساره999]

والجلوكوفاج ترا يحسن من التبويض ويقلل من ال اتش
انا نفس حالتك

[حكيمة زمانها]

حيااااك ساره

غذاء ملكات النحل من وادي النحل خلطة عسل يخلطها قدامك مرررره ممتازه

الكيلو سعره 280 ريال تقريباً ,, وممكن تسوينها بالبيت وطريقتها موجوده بالنت


اما الجلوكوفاج إذا نزلت الدوره وما صار حمل استخدمتها

[حكيمة زمانها]

على فكره لازم تشوفي مداويه شعبيه وتتأكد من الرحم إذا مايل او نازل او مرتفع
لان هذا يأثر على الحمل كثير

وحده مو سعودية 6 سنوات وهي تحاول تحمل وما كتب ربي لها الا لما راجعت معالجه
قالت عندك ارتفاع بالرحم ومن اول تمريخ حملت ما شاء الله
وانا شفت ايضاً مداويه وقالت عندك ارتفاع في الرحم وسوت تمريخ 3 اشهر وقت الدوره

واعرف وحده ما شاء الله لقت الارحام نازله ومايله بنفس الوقت
ومن اول تمريخ ما شاء الله حملت وما احتاجت ترجع لها

[عايشه يوسف]

الله يكتب لك الحمل ان شاء الله

[قوتشي]

اهلاً عليكم السلام
حياك الله اخت عزيزة وغالية بيننا

عموما مستحيل نقدر نثبت لك اذا هذي اعراض إنغراس او حمل او دورة او شيء ثاني
لأنها كلها نفس الشيء! من تجربتي وتجربة الاخوات .

الزلال اللي تقولين نزل خلال ٢٤ساعة من الجماع احتمال يكون بقايا السائل المنوي
لانه يظل ينزل من الزوجة يوم كامل تقريبا .

ايضا المعروف طبيا ان البويضة تكبر يوميا ٢ملم وانتي ذكرتي ان بويضتك في اليوم ١٢ حجمها ١٣ملم
إذن طبيعي انها في اليوم ١٥ تكون وصلت ٢٠ملم سواء بمشروب او بدونه لكن اتوقع يكون له دور في سرعة نموها وكفاءتها.

عيشي حياتك ياقلبي وانبسطي لاحقه بيجيك رزقك
الحين الهبه صاروا اغلب البنات والشباب يشترطون على بعض
مايجيبون اطفال الا بعد خمس سنوات من زواجهم يعني هاي هاي وكذا .

[مَلك]

بشرينا ايش صار معك

[حكيمة زمانها]

حياك قوتشي تصدقين اني عايشه يومي وما افكر بشئ
حتى مع هالاعراض اللي لاحظتها ما صرت اهتم ولا افكر

وبصراحه انا افكر مثل هالبنات افضل تأخير الحمل
بس زوجي مثل ما قلت لك كبير بالعمر وامه كبيره وتعبني بهالموضوع



ملك عزيزتي حياك
ابداً ما صار شئ حتى الان رغم تأخر الدوره على أسبوع تقريباً
ولكن يمكن يكون بسبب تأخر التبويض

ثانياً ما حست بأي اعراض تأكد الحمل سوى اللي ذكرتها قبل
حتى نسيت الموضوع تقريباً

بس افرازات مستمر وجع الدوره يروح ويرجع
وقبل امس سويت تحليل منزلي وطلع سالب
واليوم نزلت معي افرازات بنيه ووجع اسفل البطن شكلها بتشرف

والحمد لله في كل امر خيره