[عزيزة النفس]

كانيلوني بالبشاميل..

براءة الاختراع لثريا، هي سوتها بالأول و حبيتها جدا
أمس سويتها لفطورنا بس نسيت أصورها, فجوجل ما يقصر P :


*المقادير:

- علبة معكرونة كانيولني، تكون مثل أنابيب كبيرة تنحشي.. مثل هذي:

- جبن موزاريلا مبشور

* للحشو:
- بصلتين مقطعين مكعبات
- زيت
- نص كيلو لحم مفروم
- حبتين طماطم مكعبات
- 3 ملاعق صلصة
- خضار مشكلة
- كزبرة مفرومة
- ملح و فلفل و بهارات

* للبشاميل:
- 3 أكواب حليب
- 3 ملاعق زبدة
- 5 ملاعق طحين
- ملح و فلفل أبيض


* الطريقة:
- نبدأ بالحشوة.. في قدر صغير نحط مقدار اللحم مع ربع البصل و نضيف عليهم كركم و قرفة و نتركه يستوي
- الخطوة هذي مهمة عند أمي عشان زفارة اللحم تروح. إذا مستعجلة ممكن ما تسوينها
- نحمر البصل بالزيت و نضيف عليه اللحم و البهارات (فلفل أسود، ملح، بزار، حبة حلوة) الموجود.. و نتركهم يتحمرون
- نضيف الطماطم و نقلبه، ثم نغطيه عشان تذبل الطماطم
- نضيف الصلصة و نتركها تتحمر مع اللحم بعدين نضيف مقدار نص كوب ماي بس عشان ما يحترق
- نضيف الخضار المشكلة و الكزبرة المفرومة و نتركه عالنار ربع ساعة..
- لما يستوي نطفي النار و نترك الحشوة تبرد و نبدأ بسلق المعكرونة
- في قدر نحط ماي مغلي + ملح و زيت و نضيف المعكرونة
- نتركها تنسلق 4 - 5 دقايق.. ما نبالغ في سلقها عشان ما تتقطع معانا و تكون متماسكة و سهل نحشيها
- نصفي المعكرونة و بالمصفاة نحطها في وعاء كبير فيه ماي بارد مع مكعبات ثلج
- هذي أهم خطوة، لأنه لو ما سويناها بتظل المعكرونة حارة و بتبدأ تتقطع، الماي المثلج يخلي عملية النضج توقف مباشرة فما تخرب..
- نحشي كل أنبوب بشوي من الحشوة و نصفها في القالب
- نجهز البشاميل: في قدر نحط الحليب + الطحين + الزبدة و نقلبها عالنار لين ما تستوي كثيفة، نضيف الملح و الفلفل..
- نصب البشاميل فوق المعكرونة و فوقها الجبن المبشور و ندخلها الفرن ثلث ساعة تقريبا.. و هني و عافية

* ملاحظة: ممكن تستخدمين صلصة الطماطم بدل البشاميل.. حسب الرغبة

الوصفة الثانية..

سلطة الأفوكادو

الأفوكادو من الأشياء الي أحبها جدا، لذيذة في كل شي..!
سواء موالح، حلويات، عصاير،، فاكهة عجيبة..
هالسلطة من تخبيصي، بس نتائجها مضمونة P :

* المقادير:

- 3 خيار
- 2 طماطم
- خس
- 2 حبة أفوكادو
- زيتون أسود
- التتبيلة: ملعقة مايونيز، ملعقة روب، ملعقتين زيت زيتون، عصير ليمون كبيرة، رشة ملح و فلفل أسود


* الطريقة:
- نقطع الخيار و الطماطم و الخس مكعبان أو شرائح
- نقص الأفوكادو من النص و نطلع البذرة.. بالملعقة نكشط اللب و نقطعه مكعبات
- نخلط مكونات التتبيلة و نحطها فوق السلطة.



و نختم بالسويت؟

* مقادير كب كيك الشيكولاتة:

- نص كوب بودرة كاكاو
- كوب ماي حار
- كوب و ثلث طحين
- نص ملعقة ملح
- نص كوب زبدة (113 جرام)
- كوب سكر
- 3 بيضات
- ملعقة شاي بيكربونات الصودا
- ملعقة شاي خل

* الطريقة:

- نشغل الفرن و نصف الورق في قالب الكب كيك ( تكفي تقريبا لحوالي 16 حبة)
- نذوب مسحوق بودرة الكاكاو في الماي الحار
- نخلط الزبدة مع السكر لحد ما تصير كريمية و خفيفة
- نضيف البيض بالتدريج
- نضيف مزيج بودرة الكاكاو الي ذوبناه في الماي
- نضيف الطحين و الملح
- في كاس صغير نخلط بيكربونات الصودا مع الخل و نضيفهم للعجين و نخلط
- نوزع العجين على أوراق الكب كيك و ندخلهم الفرن ثلث ساعة تقريبا
- نطلعهم من الفرن و نتركها تبرد


* الحشوة:

- نذوب كوب سكر على النار لحد ما يصير ذهبي
- نضيف علبة قشطة و نحرك لين ما يختلط
- نتركها تبرد قبل ما نحشي فيها الكيك



* التزيين:

- بملعقة البطيخ الدائرية، نسوي فجوة في الكب كيك من فوق.. نحشيها بالكراميل أو إذا كنتي من عشاق الشيكولاتة مثل مصباح استخدمي نيوتيللا للحشو مع أو بدون مكسرات
- القطعة الي فرغناها من فوق نشل الجزء السفلي منها و نسويها مثل غطا نسكر فيها على الحشوة.. بنفس الطريقة هذي:

- نغرف ملعقة آيس كريم شيكولاتة أو فانيليا أو أي نكهة مفضلة.. نحطها فوق الكب كيك.. نزينها بصوص الشيكولاتة مع مكسرات أو سبرينكلز

تم تقليل : 91% من الحجم الأصلي للصورة[ 700 x 467 ] - إضغط هنا لعرض الصورة بحجمها الأصلي