توضيحات لازم تاخذنها في بالك في تجهيزك :
- مقاس new born
الكثير ينصح انه لا تاخذي مقاس نيو بورن عشان ان المواليد خلال فترة الاربعين
يكبروا بسرعة لكن في اطفال يولدوا خدج قبل موعدهم
اويكون حجمهم مرة صغير يعني حتى نيو بورن كبيرة عليهم
وفي اطفال يولدوا مكتملين في نهاية التاسع بس وزنهم 2 كيلو
باختصار: لو كنتي عارفة ان وزن جنينك قليل اشتري ع الاقل بدلتين
نيو بورن تمشي فيهم فترة الاربعين
- ( الصدريات)
قد تحتاجيها بكثرة يعني تشتري درزن 12 حبة
وقد تحتاجي 2 بس
والسبب .. ان بعض الاطفال يستفرغوا الحليب بكثرة ,
وبعضهم الله يحفظهم ما يرجعوا ابدآ او يستفرغوا كمية بسيطة جدا مجرد نقطتين
تمسحيها بمنديل وانتهينا.
- المهادات – الكوافل – القماط. << بكل اللهجات
احتياجك منها يختلف عن غيرك
على حسب هل هناك من يغسل لك الملابس كل يومين ,, هنا ما تحتاجي غير 2 أو 3 فقط
وعلى حسب هل طفلك يرجع الحليب بكثرة
وعلى حسب هل انتي ناوية تعودي ولدك على اللف دايمآ! لان بعض الامهات تلف ولدها
فترة الاربعين بس او وقت النوم بس.
وعلى حسب ايضآ انه هل ناوية تشتري بدلات من الاطقم اللي تجي بربتوز وطقمه مهاد
.. يعني مايحتاج تزيدي تشتري مهادات ثانية لوحدها
- الرضاعات
افضل رضاعات AVENT
فيه نوع منها بلاستيكها اصفر.. بتلاحظينها فيها صفار..
صراحه روووعه ومايلزق الحليب من جوا..وتنظف بسرعه.. شوفي هذي صورتها..
وماله داعي ست او سبع رضاعات تشتريها
يكفي 4 رضاعات تشتريها اثناء تجهيزاتك وانتي حامل
رضعتين 60 مل وحدة للاعشاب وحده موية و2 بتكون 120 ملي للحليب.
وبعدين لمن يجي البيبي حتحكم الظروف لانه قد يعتمد على الطبيعي فقط
- مقاس حلمات الرضاعة(المصاصات)
ركزي انه في مقاسات لحلمات الرضاعة
احيانا تجي بارقام (1,2,3)
واحيانا بحروف ( ( S,M,L خذي الاصغر وبعدين لما يكبر كبري الرقم معاه.
- اللهاية
لا تستعجلي بشراء لهاية او اكثر الا اذا كان نيتك تعودي طفلك من بدري
لان اللي تجي تعود طفلها بعد عمر شهر يرفضها في الغالب
- مناديل الاطفال المبللة
صح حتحتاجيها عشان لمن يكون في عندك ضيوف او لمن تخرجي برا ..
بس هيا الخراب اللي تسبب تسلخات للطفل فترة الاربعين لان الام تعتمد عليها
في مسح فضلات البيبي وماعاد تغسل له مؤخرته بالماء الا مرة باليوم لمن تروشه
انصح ماتجيبونها..
- الشراب ( الجوارب)
لاتاخذي بكميات كبيرة مقاس مولود لانك بتكون اغلب الملابس كامله وماتحتاجين شراب.
خلي الشراب اخر شي تقضيه عشان تشوفي ايش الالوان اللي تحتاجيها
بالضبط وكم العدد اللي تحتاجيه
- الجو
ركزي على كيف حيكون الجو في تاريخ ولادتك وكذلك في تاريخ وصول ولدك الى مقاس 3-6
لان في بعض الامهات يوم يقضوا ياخذو كام بدلة من مقاس 3-6
ركزوا ع الجو عشان ماتشتروا شتوي وماعاد تستخدموهم أو تشتروا صيفي والجو بارد
واحلى شي للمواليد البربتوزات الكاملة وليس اللي تجي قطعتين
لأن البنات النونات مو حلوة عليهم الفساتين ولا البنطلونات
احلى شي البربتوزات الكاملة والافرهولات
- منتجات جونسون وغيرها
منتجات جونسون اللي تجي كرتونة المجموعة كلها مع بعض
انتبهي لصلاحية كل علبة داخلة لوحدها
لانه في الكرتونة الواحدة تلقي تواريخ الصلاحية مختلفة لكل قطعة
- المدس
اشتري حجم صغير لان البيبي المولود صغير مرة وممكن يضيع جوا المدس
وعلى فكرة المدس الكبير بدل ما يخلي شيل البيبي سهل..
يصير مرة صعب ويخليكي تخافي تحمليه
- الماركات
الكل يقدر شوقك لتدليع ولدك بأحلى الماركات بس لاتنسي
ان البيبي خلال الاربعين يكون باللفة محد يشوفه ويكبر بسرعة
يعني مايلحق يلبس البدلة الا مرة او مرتين
بعض الماركات قد تخرب من الغسيل ويبهت لونها ..
وتنقهري لان سعرها غالي بعكس لو قطعة متوسطة السعر خربت ماتتضايقين كثير
- الهدايا:
لا تستعجلي بشراء جلاسة او عربية خروج او كرسي سيارة او مرجيحة
او مشاية او كرسي طعام لأنه ربما تجيكي هدية
وخليها لمابعد الاربعين