السلام عليكم خواتي الحوامل ..
عندي مشكلة صغيرة وياريت اتساعدوني من خبراتكم او من احد المختصين من الي تعرفونهم !!
انا ببداية حملي كانت عندي مشاكل صحية والحمدلله تمت على خير وكمل حمالي عادي وكان زوجي يهتم فيني ويلبي طلباتي وماكان مخلي بخاطري شي كذا حلووين طيب ..!
حبينا نعرف نوع جنس البيبي وفي الشهر الخامس عرفت ان الي ببطني بنوته وفرحت بس زوجي تلقى الخبر كالصاعقة وانصدم وماتكلم معاي لمدة يومين؟؟ وقتله اولا واخيراً خلقة ربي وقسمته وثانيا انا فقط مجرد وعاء حامل وانت الي تتحكم بالجنس سواء بنت ولا ولد ايش ذنبي اذا بناتك عندك حركيات ونشيطات ..!
والله ياخواتي انا دخلت الشهر السادس وانا قاعدة بيت ابوي لأنه على قولته مايبي يشوفني ويشوف بطني ومايبي يسمع طاري هالبنت الي في بطني .. معاملته تغيرت معاي تماماً ولا حتى صار يتصل بس اذا عندي مواعيد اكلمه ونفسه خايسة او ابعث له مسج وانتم ساكتين طول الطريق احنا رايحيين واحنا راجعيين .. بس عنده كلمه وحدة (( هاه خلصتي)) ..!
حالتي النفسية مرة داقة ومش حابة اسوي اي شي شغلي كله اجازات ويومي كله افكار وهواجس اخاف افقد البنت ولا اموت ولا يصير فيها شي من سبته كله بس اصلي وادعي واقعد اصيح بالساعات ولا عارفة ويش اسوي بالضبط ؟؟ احس اني كرهت الدنيا كلها وبس اشووف وحدة من برع ولا من جماعتنا عندها ولدين اتضايق واتذكر زوجي على طوول واقوول الحمدلله انه ماشاف هالمنظر ..!
للعلم فقط انا عندي بنوته من قبل البكر عمرها سنتين وصار لنا متزوجين 4 سنين بس والي يعور القلب انه ابو زوجي يبغى يزوجه قال اني ماجيب الا البنات ..!
دعواتكم وردودكم الطيبة .. ودمتم بود