الغاليات بنات فلسطين اتفضلو هون..... [الأرشيف]

سما الدنيا

06-27-2013, 02:21 PM

السلا عليكم ورحمة الله وبركاته..
بعد انقطاع الدردشة بطلت احس للمنتدى الو طعم بدونكم اتمنا اتشوفي موضوعي حبيباتي بنات فلسطين ونطمن عاخباركم..ونكون بتواصل دائم هون بقسم ملتقى عضوات حوامل...

سما الدنيا

06-27-2013, 02:48 PM

............................................

سما الدنيا

06-27-2013, 03:44 PM

سبحان الله وبحمده سبحان الله العظيم

سما الدنيا

06-27-2013, 04:02 PM

.............................

سما الدنيا

06-27-2013, 04:40 PM

...........................

سما الدنيا

06-27-2013, 05:22 PM

......................

سما الدنيا

06-27-2013, 06:52 PM

وينكم يا بناااااااااااااااااااااات ...

سما الدنيا

06-27-2013, 08:12 PM

يسعد مساكم طبعا انا بحكاي حالي

لولو حمادة

06-27-2013, 09:24 PM

مساء الخير يا سما
اشتقتلك كثير كثير كيف عمورة ؟

سما الدنيا

06-27-2013, 10:12 PM

هلاااااااااااا لولو منوره شو وصلتك مسجي عالفيس..وانا كمان مشتاقه يلا انشاء الله باقي البنات يعرفو ويفوتو هون لانو مشتاقين ونطمن عاخبارهم

فوفو89

06-27-2013, 10:38 PM

مرحباا صبايا

كيفكم وشو اخباركم ؟

اشتقتلكم موووووووووووووووووووت

سما الدنيا

06-27-2013, 11:17 PM

هلا فوفو منوره كيفك وكيف امورك وكيف البيبي...

حلا الماس

06-28-2013, 10:22 AM

صباحووووووو يا حلوات

اشتقتلكم كتييييييييييييييييييييير والله

مشكورة حبيبتي سما على الموضوع
طمنيني عنك ... شو أخبارك ؟؟ وابنك كيفو

فوفو
كيفك يا قمر ؟؟؟ ورزونة كيفها
كم صرتي حال هلأ

حبيبتي لولو حمادة
الله يسعدك متل ما خبرتني عن الموضوع .... والله المنتدى مالو طعم بدون الدردشة معاكم

خبروا باقي البنات كلهم ...

انا رح أقول لدودو ولولو وحواء لأنهم عندي عالفيس ويا رب كل البنات ترجع هون ونرجع نتطمن على بعض متل الأول

سما الدنيا

06-28-2013, 11:19 AM

هلا حلا حبيبتي يسعد صباحك كيفك انتي..والله احنا تمام وعموره تمام بيسلم عخالتو وببعتلها بوسة كمان...
اه والله يا ريت كلنا نرجع نلتم هون

سما الدنيا

06-28-2013, 12:54 PM

|جمعة مباركة عليكم ..شو طابخين اليوم

فوفو89

06-28-2013, 12:58 PM

مرحباااااا يا حلوين

كيفكم اليوم

جمعة مباركة

سما
الحمدلله انا تمام انتي كيفك
جمعة مباركة علينا وعليكي
انا بدي اعمل جاج مشوي بالفرن

حلا
زمااااااااااان عنك يا عسل
كيفك وشو اخبارك
وكيف الاولاد والبيبي
انا الحمدلله تمام ورزونة منيحه الحمدلله بتبوس دياتك
امبارح دخلت بالشهر السابع ولله الحمد ،،
عنجد شعور حلو لما الوحدة تخلص شهر وتفوت بشهر جديد ،،بس الخوف من الولادة بيزيد هههههه
الله يهونها يارب ويسهل حملنا وولادتنا يارب

سما الدنيا

06-28-2013, 02:55 PM

صحتين يا فوفو انا عاملة معكروتة منشاني انا وعمور جوزي ما بحبها طالعين راح ياكل عند دار حماي..
يلا هانت ان شاء الله بتمم حملك عخير ما ضل اشي..رح اتصومي رمضان يا فوفو؟

ام عبدالله لولو

06-28-2013, 03:24 PM

مساء الخير يا بنات
الحمد لله انو رجعتو هههههه من بعد غياب والله كل يوم بفتح ادور عليكم
المهم شو اخباركم حلا وسما وفوفو ولولو حمادة يسلمو ع المسج
حلا شو اخبار دودو ولدة بما انه عندك ع الفيس احكولي شو اخباركم وحدة وحدة

نور العمر

06-28-2013, 03:52 PM

مسا الخيررر ... كيفكم يا بنات ... والله اشتقتكم كتيرررررر كتيييرررررر ...

المنتدى مالو طعم من غير الدردشه .. ما بعرف ليه اتسكر ...

المهم شو اخباركم جميعا من غير ما انسى حدا ....

سما الدنيا

06-28-2013, 03:53 PM

هلا ام عبد الله منورة ...والله لسا الدردشة باولها منا تفاعل والكل يكون موجود كيفك وكيف امورك والبيبي...
دودوان شاء الله اكيد صارت والده ..عقبال عند باقي الصبايا

سما الدنيا

06-28-2013, 03:54 PM

هلا سيلا منوره... مشتاقين والله للكل كيف امورتك الصغيره..بتغلبك ولا هادية الله يخليلك اياها...

سما الدنيا

06-28-2013, 03:57 PM

الدىدشة مغلقة صاحبة الموقع الرئيسي هيك طالبه يمكن من الضغط كان

نور العمر

06-28-2013, 03:58 PM

مرحبا سما كيفك وكيف عموره

سيلا والله صارت احسن من قبل بس اخوها مغلبني وكمان بنقل ع بيت جديد طول النهار بشتغل في البيت بعزل بالاغراض والله تعب شوي ...

شوي وبرجع ...

ام عبدالله لولو

06-28-2013, 04:16 PM

هلا سما منورة كيفك وكيف عمورة لت شاء الله بخير انا الحمد لله بخير والله انبسطت لانو رجعت التقي فيكن
نور الله يعينك كيف اميرتك الصغيرة

فوفو89

06-28-2013, 04:18 PM

سما
والله مش مبين رح نصوم رمضان او لا
جوزي بيحكيلي لا تصومي عذرك معك هههههه
خايف علي وع البنوتة لانه مرينا بتجربة اجهاض سابق بعيد عنكم وعنا
الله يهونها ويصبرنا ونصوم ان شاء الله

سما الدنيا

06-28-2013, 04:26 PM

الله يعطيكي العافية نور العمرام عبد الله والله عموره تمام بس مغلبني كتير بضلو يفتح جوارير وبينفش الاغراض وبضل وراه عالدعسة خوف يعملو مصيبه هههه...
فوفو الله يعينك وان شاء الله بتقضيه بعد ما تولدي واتحسي حالك رجعت صحتك متل قبل انا وبعمورافطرت نصرمضان والاقي كملتو الله يعينا عالصيام ويتقبل منا

beboo

06-28-2013, 04:57 PM

مسا الخير كيفكم

اشتئتلكم كتيييييييييييييير والله المنتدى مااله طعم من دون الشات والصبايا

فوفو89

06-28-2013, 11:28 PM

تسلمي سما
الله يسمع منك يارب
انا بدي اجرب واشوف حالي اول يوم اذا بقدر اصوم واكمل او لا ..
انا اول ما اصحى الصبح بسرعه بروح ع الثلاجة اشرب مي ،، وبعدها بكون فارطة جوع ولازم اوكل ،،شو بدي اعمل ب رمضان ،،الله يكون بعوننا يارب

beboo

06-29-2013, 07:07 AM

صباح الخير على احلى صبايا

كيفكم انا كتير اشتئتلكم مين هوون مشتائة ادردش معكم

حلا الماس

06-29-2013, 08:40 AM

صبااااااااااااااح الفل يا حلوين

البنات الي كانوا مبارح منورات كلكم

حبيبتي ام عبد الله
والله ما بعرف عن دودو .. لانو اخر مرة كلمتها عالفيس من حوالي اسبوع .. بس عالاكيد انها والدة
لولو الفلسطينية ولدت من اسبوعين .. حواء كمان زمان ما شفتها عالفيس

فوفو
الحمد لله انك بخير حبيبتي ..
الصيام بيعين ربك عليه .. انتي رح تكوني بالسابع ... انا هكون بالتاسع والتعب اكتر بي عالاكيد رح اصومو ومش هفطر ولا يوم لانو الصيام مع الناس ارحم من اني اصوم لحالي ... يعني اتوكلي على الله وصوميه والبيبي ربك متكفل فيه وبرزقو

بيبو
يسعد هالصباح يا عسل
كيفك ؟؟ طمنيني عنك والامور بيان شو اخبارو ؟؟

فوفو89

06-29-2013, 09:26 AM

يسعد صباحكم يا حلوين

كيفكم اليوم

حلا
تسلميلي يارب
الله يقومك بالسلامة ويقدرك ع صيامه
انا نص الاول من رمضان بكون بالسابع والنص الثاني بكون بالثامن هههه
الله يقدرنا ونصومه ان شاء الله

بيبو
يسعد صباحك يا عسل

باقي الصبايا ام عبدالله ،، لولو حمادة ،، حواء ،، سما يسعد صباحكم

لولو حمادة

06-29-2013, 11:33 AM

صبا ح الخير
كيفكم ؟
هاليومين كثير مضغوطة بدنا ننقل لبيت تاني

إنبثاقة أمل

06-30-2013, 01:56 PM

مسا الخيرات

نورتو من جديد حبيباتي

شو أخباركم انبسطت اني اطمنت عليكم

ربي يسعدكم جميعا

نفسي اشوف لولو الفلسطينه والبنوته بين ايديها

ربي يقر عينها فيها ويجعلها من الصالحات

حلا الماس

06-30-2013, 05:50 PM

مسا الخير

طمنوني صبايا شو أخباركم ؟؟ وكيف استعدادكم لرمضان ؟؟
ربي يبلغنا رمضان بصحة وعافية ... وكل عام وانتوا بخير خلص بدا العد التنازلي

انا بكرة بدخل بالتاسع ( ٩ ) اووووه وأخيرا صارت الأيام معدودة لاستقبال بيبي جديد
حاسة حالي بحلم والله الأيام بتمضى بسرعة والواحد ما بيحس كيف بتعدي ....

حلا الماس

07-02-2013, 07:06 AM

مرحبا يا غايبيين

الكل مختفي ... بس يا رب الكل يكون بخير

وينكم ؟؟؟

لولو الفلسطينية

07-02-2013, 04:48 PM

مسا الخييييير ....... اشتقتلكم كتيييير كتييييير أنا ولدت يوم الجمعة 14-6 و جبت بنوته زي القمر و سميناها صابرينا طبعا هالاسم ما كان لا عالبال و لا عالخاطر. و الحمد لله أموري تمام. ،،،،،،، ولدت بطل صناعي بعد 12 ساعة من العذاب هههه عقبال عند باقي الحوامل ياااا رب ،،، الله يسهلها عالجميع ،،،،،،،، دودو ولدت امبارح بس ما بعرف التفاصيل ،،أن شاء الله تكون هلا بخير هي و عمورة انبثاقة يا قلبي انتي أن شاء الله ياااا رب عقبال ما نشوفك أحلى أم و معك أحلى تؤم بالدنيا يا الله يا كريم باقي الصبايا كلكم كلكم اشتقتلكم كتيييير ،،،،، يا رب كلكم تكونو بخير ياااا رب

ام عبدالله لولو

07-02-2013, 06:06 PM

مساء الخير يا صبايا
ريتو الف مبروك يا لولو وبتشوفيه احلا عروس بدنيا والحمد لله على سلامتك يارب وين هربتي تعي احكيلي الاكشن يلا بستنا انا هههههه ىوحطيلي صورت القمر خليني اشوفه اشتقتلك كثير والله
دودو الف حمد لله على سلامته بس كثير اتاخرت مسكينة يارب تكون بخير هي وابنه ممكن حسابه مو صحيح
حلا مبروك التاسع يا حلوة شو اخبارك والاولاد ان شاء الله بخير يارب
فوفو وانبثاقة ولولو حمادة وسما وحواء احساس وكل الصبايا اشتقتلكم مالكم هيك اتعودت عليكم ارجعو زي اول

لولو الفلسطينية

07-02-2013, 07:14 PM

أهلا أهلا أم عبدالله ، و أنا اشتقتلكم كتيييير و اشتقت لحكاياتك كمان. ....................عقبال ما تقومي لنا انتي و عبودة بالسلامة ياااا رب ........ نيجي للاكشن هههههه يا ستي زي ما تقولي أنا رحت للموت برجلييه ههههه كان عندي يوم الجمعة موعد عادي و كنت ماخدة معايه الشنطة و حتى أخذت مرت عمي معانا أنا و زوجي ههههه و ما كان عندي و لااااااا أي طلق و لا حتى بوادر ههههه يعني رحت بكامل قواي و لما وصلت و الدكتور عملليتخطيط و سونار شاف في شوية تكلسات بالمشيمة و سألني شو رأيك نستنى ولا حابة توليدي ،، طبعا هو قال ممكن نستنج بس الأفضل نولدك ،،،،، و أنصحك حكيتلو التوكل على الله بس هو كان في الأول معارض لانه قال الطلق الصناعي قوي و حرام خصوصا انو اول حمل و أنا قال كنت متشجعة هههه حكيتلو مش مشكله المهم هاد كلو مزح ،،،،، نيجي للجد ههههه اول ما فحص وني طلع عندي أصلا توسع2سم و اعطاني تحميلة الطلق الصناعي على الساعة تمنيه الصبح و على طووووول بلش الطلق طبعا اول ساعة كان خفيف الوجع و أنا مبسوطة و بحكي لزوجي إذا هادا هو الطلق بسيييييطة هههههه ،،،ً المهم بعدها بلش الجد و بلش الوجع يزيد كل شوية و الدكتور حكالي امشي شويه بالمستشفى و مشيييينا للساعة 12 الضهر بس كنت مستوية و حالتي حاله و كل النص التحتاني من ورى و من قدام بدو يتفجر هههه و مرة ابكي و مرة اتنطط زي المجنونة و مرة أقول خلص اعملولي عمليه المهم بعد ما فحصوني كمان مرة صار التوسع 4 سم و "لسا القصة مطوله " رجعو ربطوني بالتخطيط ههههو زوجي جنبي طبعا المسكين عضعضتلو أيديه من كتر الوجع ،،،، و ضلييييييت أتلوى زي المجنونة ههه و كانو كل ساعه ييجو يفحصو و لما وصل 6سم أجا الدكتور و دخل أشي طويل و فتح ميه البيبي و بعدها الوجع يزيد و يزيد و أنا صوتي بطلت عارفة أتحكم فيه و صرت أصيح بصوت عالي و أمي و مرت عمي رايحين جايين و طلبت الدكتور لقتله منشاااان الله يا بتعمللي عمليه يا بتعطيني إبرة الضهر ،، حكالي إبرة الضهر مضاعفاتها كتيبة و رح تضلي تعاني منها قلته مش مشكله المهم هلا ارتاح و بعدين بفرجها الله قالي لااااا المهم طلع و ناديته بعد خمس دقائق قلتلو أعطيني إبرة ضهر ابرة زفت المهم أشي يخفف الوجع و هو بضحك ههههه المهم ضليييييييت على هالحاله و لما فحصوني آخر مرة كانت تقريبا على السبعة و نص كان التوسع كامل 10 سم وحكولي خلص كل ما تحسي بطلقة قويه ادفعي لتحت لأنو الدكتور حتى لما فحصوني حس شعر البنوته بأيده ،،،،، و رفع لي رجليه و بلغت ادفع طبعا كل الي صار بعد هاي اللحظة لحد الآن مش مصدقة منه ولاااا أشي عند أشي زي الكذب ،، كانو حلم ،،،و الساعة تمنيه المسا طلعت بن تي عالدنيا بس سبحان الله فورا بروح الوجع و ولا كانو كان في وجع ،،،، بس لما طلعت بنتي كان الحبل السري ملفوف على رقبتها و مربوط و فيو عقدة حتى الدكتور نفسه استغرب،،، بس الحمد لله ربنا حماها ،، بعدين خيط الدكتور الأشياء الي خربت ههههه ،،،،،، بس أنا قبل ما أولد بشويه ارتفعت حرارتي و نبض البيبي صار سريييييع و ما عرفو السبب و أعطوني دوا و نزلت الحرارة و بعد ما ولدت بكم ساعه رجعت ارتفت و أخدو بنتي عالخضانه احتياط عشان الحرارة الي صابتني و قعدت فيها يومين و أنا قعدت بالمستشفى تلات أيام و هم يعطني إبر و مضاد حيوي لحد ما نزلوا الحرارة و بسسسسس هههههه ،،،، و هلا هيها مطلعة الشيب في راسي لا بتنيمنا لا ليل ولا نهار هههه ،،،، عقبال عندكم كلكم يااااا رب ،،،،،،،،، هاد هو اكشني يا أم عبدالله ،، عقبال ما تقومي لنا بالسلامة و تكون ولادتك سهله انتي و كل الصبايا الحوامل يااااا رب ،،،، و عقبال ما نشوف. ولاد حيفا و انبثاقة يا الله يا رب

لولو الفلسطينية

07-02-2013, 07:23 PM

بس الحمد لله مقارنه مع الي كنت اسمعه ،،ولادتي كانت منيحة ،،،هههه زوجي بسالني و أنا بتوجع ، بدك تعيديها ؟ بحكيلو مستحيل ، بس بعد ما ولدت و خلصت قلتلو بعيدها بس بعد سنتين هههه ،،،،،، الحمد لله عدت بخيرها و بشرها

ام عبدالله لولو

07-02-2013, 10:15 PM

مساء الخير يا صبايا
الحمد لله على سلامتك يا ام صابرينا هههههه واخيرا صرتي ام والله احساس يفوق الروعة
الله يخليلك اياه ويعطي كل مشتهية يارب بس تغرفي حلو ههههههه وبس طلعت مسكتهية حضنتيه شو اعملتي كملي الاكشن ههههههه المهم قومنك بالسلامة ومرة تانية الف حمدلله على سلامتك وعقبال ما تعيدها ههههه

إنبثاقة أمل

07-03-2013, 02:57 AM

صباح الخير

يا احلى ام انت يا لولو

والله عم ابكي واضحك بنفس الوقت عشت معك جو تاني

الف الحمدلله ع سلامتك ياقلبي

ربي يخليها ويحميها القمر الصغيره ويقر عينك فيها حبيبتي

ربي يسعدك

دودو

الحمدلله ع سلامتها

الله اعلم شو اكشنها دودو هههههههه

يلا بتيجي وبتخبرنا

ام عبدالله

اشتقتلك كتييييير شو أخبارك

عقبال فرحتنا فيك بالسلامه يارب

حلولي

مبروك دخولك التاسع

هانت ياقلبي ان شاء الله بتقومي بالسلامه يارب

وكل الصبايا الحوامل ربي يفرحنا بسلامتكم

حاسه حالي كتير مبسوطه خواتي قامو بالسلامه

فلسطيـــن

07-03-2013, 06:11 AM

شووو أدخل معاكم و لا ؟! ^^

ام عبدالله لولو

07-03-2013, 10:09 AM

صباح الخير يا صبايا
يسعد صباحك انبثاقة وان شاء الله ربنا بوعدك قريبا يارب والله قطعتي قلبي يا بنت ليه بتبكي
بكرة بتصير تنتفي بشعرك منهم بس اصبري وخلي املك بالله وحده والله بازن واحد احد ازا ربنا قدرني الا ادعيلك وانا بولد ههههه بحكو دعوت الولادة والله واعلم مستجابة ههههه
ان شاء الله ربنا بكرمك يا انبثاقة انتي وحيفا ها الضرسانة اشتقتله راحت وما عاد رجعت الله يسامحه
فلسطيم اهلا وسهلا فيكي بينا
ياصبايا ارجعو زي اول مالكم هيك بعد ما اتعودنا على بعض هيك بتعملو شكلو عطلنا زي المدارس هههههههههه يسعد صباح الجميع واكيد اشتقلكم كثير حواء واحساس تعالو حلا وفوفو ولولو وسما وام جودي ونور العمر ومش عارفة مين وكل الصبايا يسعد صباحكم

لولو الفلسطينية

07-03-2013, 02:15 PM

يسعد مساكم صبايا
انبثاقة حبيبتي و الله و الله اني رغم الوجع الي ما كنت قادرة احكي منه اتزكرتك انتي و حيفا و دعيتلكم من قلبي و الله
ربنا يجبر بخاطرك و تبشرينا عن قريب يااااا رب
ام عبد الله ههه شكلو روح قلبك الاكشن
بعدين يا ستي ماما ضلت معاية اخر اشي يعني بالولادة و كانت هي كمان تصيح علييه عشان ادفع لانه راس بنتي انحشر تحت و تعبت و نبضها ضعف و بعد ما طلعت البنوته امي تركتني و لحقت الممرضة الي اخدتها عشان تحممها و تلبسها و هي بتبكي المسكينة و على طووول اتصلت على اختي الصغيرة و حكتلها انبي ولدت و هي بتبكي و اختي صارت تضحك عليها هههه بعدين انا صرت انادي على ماما و احكيلها طمنيني كلشي في البنت سليم و تمام قالتلي بتجننن و الدكتور حمالي مبروك الاء جبتي بنوته شقرا و بيضا و بتجنن هههه و انا نسيت وجعي و صرت احمد في ربنا و صرت اضحك مع حالي و انا ميته من التعب بس الحمد لله ربنا عوضني عن تعبي بشوفة بنتي و انا هيك كنت زي كأني عايشة في خيال و بسمع الممرضات و الستات الي كانو جنب غرفتي الي ولدت فيها بدخلو و بحكو ما شاء الله شو هالبنوته و بلعبو فيها و بتجنن و مش عرف ايش و هي بتبكييي هههه و بعدين اخدوها على الغرفة و لبسوني و ودوني عندها و توته توته خلصت الحدوتة هههه
باقي الصبايا وينكم اشتقتلكم كلكم ... يا رب الكل يكونو بخير
ا

ميوووش محمد

07-03-2013, 03:35 PM

مسااااااالخير يااا صباياا ..

كيفكم ؟؟ انا حابه اشترك معاكوو .. انا من غزة ..

ومتزوجه اللي 3 سنوات وعملت تلقيح الشهر الماضي والحمد لله تم على خير .. وانا الان حامل صاري 3 اسابيع

عقبال عند كل اللي بنفسهم .. وربنا يكملي على خير

إنبثاقة أمل

07-04-2013, 02:28 AM

ام عبدالله الله يسعدك

والله اني بحبكم وبعزكم كلكم ربي مايحرمني منكم

والدموع فرحا لحبيباتي

لولو ربي يسعدك ويخليك الاميره الصغيره وقر عينك فيها

ربي يستجيب منك

فلسطين وميوش اهلا وسهلا نورتونا

ميوووش محمد

07-04-2013, 08:17 AM

صبااااااااااااح الخير ياا صبايا ..

شكلوو ما في حد موجود هون

فلسطيـــن

07-04-2013, 11:01 AM

تسلمو صبايا ..

كيفكم ^^

أنا قصتي تزوجت و ماكنت مخططة للحمل لأنه لازم أعمل عملية منظار للكلى بالأول
بس حملت بمشيئة الله و فرحنا بالحمل لأنه كان كل شي سليم بالبداية لكن أجهضت بعد 8 أسابيع حمل و الحمد لله على كل حال

و بعدها أخدت حبوب منع حمل بس حملت عطول ,, أجاني نزيف و أنا فكرت انها الدورة بس طلع نزيف لأنه زاد رحت المستشفى طلع هرمون الحمل 5 آلاف وشوي مع اني حللت بعد الإجهاض و كان 2ونص
فهيك صرت مجهضة مرتين خلال أول شهور زواجي و الحمد لله على كل حال

بس الحمل التاني كانو توأم فضل واحد مانزل و الحمل مهدد الله أعلم يتم و لا لأ .. هلأ أنا حكولي أضل ملازمة السرير و عندي موعد لنشوف النبض و نتأكد من سلامة الحمل

طبعا أنا هالحكي كلو صار من يومين و لا أنا كنت مفكرة إنه هاي الدورة و إني ما رح أحمل حتى أعالج مشاكل الكلى إلي عندي ..

..

عملت تحاليل و تبين إنه جسمي ماعندو مناعة يعني صعب أمنع الحمل

و الشي التاني جسمي بيطرد الحمل بسرعة يعني بيصير حمل سريع و بتبعو إجهاض و لحد الآن مو عارفين السبب حتى إبر التثبيت بتجيب نتيجة عكسية و مو لاقيين تفسير

فحكولي لو تم الحمل خير و بركة و لو ماتم ماتصير علاقة مع زوجي حتى نخلص جميييع التحاليل و نعرف شو المثبت إلي بيتناسب مع جسمك و شو سبب طرد الحمل

و تحليل جرثومة القطط كان سليم الحمد لله ..

ميوووش محمد

07-04-2013, 11:16 AM

الف سلامة عليكي ... وربنا يثبتلك حملك ياااارب ..

ربنا يجيبلك اللي فيه الخير ..

كبريآء أنثى ـآ

07-04-2013, 12:15 PM

وآخيييييييييييييرا رجعتوا من جديد
وين يا صبايا هالغيبة والله اشتقتلكم كتييييير كتييييير
لولو ألف سلامة عليكي حبيبتي ومبروك البنوتة وإن شاء الله بتتربى بعزك وبعز أبوها يااااااارب
يلا إنتي ولدتي في 14/6 وأنا ولدت في 15/6 هههههههههه
والله كتييير كنتي تيجي ببالي وكان نفسي أعرف ولدتي ولا لأ
والحمد لله على سلامتك يااااااارب ... بس قوليلي كيف الولادة هههههههههههههههههههه ؟؟؟؟

كبريآء أنثى ـآ

07-04-2013, 12:16 PM

فلسطين ... الله يثبت حملك ياااااارب وإن شاء الله ما بتشوفي شر
وإن شاء الله يكون وجه البيبي خير عليكي
خلي إيمانك بربنا قوي ..

لولو الفلسطينية

07-04-2013, 06:04 PM

يسعد مساكم جميعا
ميوش
اهلا فيكي و ربنا يتمملك على خير
فلسطين
نورتينا ..... ربنا يثبتلك حملك و بكون كلشي تمام التمام
شوفي انا كمان باول اربع شهور من زواجي اجضت مرتين ... المرة الاولى حملت مباشرة باول شهر زواج و اجهضت بعد تمن اسابيع تقريبا و بعدها على طووول حملت مرة تانيه و برضو احهضت بعد ست اسابيع و عملت تحاليل كتييييرة لنعرف السبب و طلع عندي تخثر بالدم و هيني لما حملت تالت مرة من اول يوم عرفت اني حامل بلشت اخد ابر مسيله للدم و حملي تم بخير و سلام و هيني ولدت قبل عشرين يوم و جبت بنوته زي القمر عقبال عندك يااا رب ...... ضروري تعملي تحاليل التخثر لانه في نسبه كبيرة من الاجهاضات هاد هو سببها ... و ان شاءء الله خير
ام مروان
هههه الحمد لله على سلامتك انتي و بتوتك كمان .... الله يخليلك اياها
ههههه الولادة بتجنن هههه ..... انتي جربتي و عرفتي هههههه .. . بعين الله هادا حال الدنيا
باقي الصبايا كلكم اشتقتللللكم

فلسطيـــن

07-05-2013, 04:40 AM

يسعد مساكم جميعا
ميوش
اهلا فيكي و ربنا يتمملك على خير
فلسطين
نورتينا ..... ربنا يثبتلك حملك و بكون كلشي تمام التمام
شوفي انا كمان باول اربع شهور من زواجي اجضت مرتين ... المرة الاولى حملت مباشرة باول شهر زواج و اجهضت بعد تمن اسابيع تقريبا و بعدها على طووول حملت مرة تانيه و برضو احهضت بعد ست اسابيع و عملت تحاليل كتييييرة لنعرف السبب و طلع عندي تخثر بالدم و هيني لما حملت تالت مرة من اول يوم عرفت اني حامل بلشت اخد ابر مسيله للدم و حملي تم بخير و سلام و هيني ولدت قبل عشرين يوم و جبت بنوته زي القمر عقبال عندك يااا رب ...... ضروري تعملي تحاليل التخثر لانه في نسبه كبيرة من الاجهاضات هاد هو سببها ... و ان شاءء الله خير
ام مروان
هههه الحمد لله على سلامتك انتي و بتوتك كمان .... الله يخليلك اياها
ههههه الولادة بتجنن هههه ..... انتي جربتي و عرفتي هههههه .. . بعين الله هادا حال الدنيا
باقي الصبايا كلكم اشتقتللللكم

يا الله قصتك قريبة كتير لقصتي ,, و أنا قربت أطبق 4 شهور زواج ~

عموما الحمد لله ربي عوضك ,, و ربي يحميلك البنوتة يا عسسل

تسلمي أعطيتيني أمل أحمل حمل سليم

إن شاء الله بحلل للتخثر و إن شاء الله خير

بس بدي أسألك بعد تاني إجهاض متى حملتي الحمل التالت ؟؟

حلا الماس

07-05-2013, 07:31 AM

صباااااااااح الورد والفل على الصبايا الحلوين
جمعة مباركة عليكم يا رب

ام مروان + لولو
حمد لله على سلامتكم حبيباتي ... ومبروك دخولكم بعالم الأمومة ربي يحفظلكم بنوتاتكم من كل شر :)

دودو الغالية ... أحلى ام عمر
حمد لله على سلامتك وسلامة القمر
يلا شدي حالك بسرعة وتعي قوليلنا كيف كان ميلادك

ام عبد الله العسل
ربي يسعدك وين ما كنتي ... طمنيني عنك ؟؟ كيف وكيفو عبودي الأزعر ؟؟ لسه راسو فوق ولا قلب لتحت

الصبايا الجداد فلسطين وميوووش
أهلا وسهلا نورتوا وربي يتمملكم حملكم على خير يا رب

أدعولي راس ابني يقلب لتحت صرلي تقريبا أسبوع بالتاسع ولسة راسو فوق هالازعر

لولو الفلسطينية

07-05-2013, 06:08 PM

مسا الخيييييير
شو الاخبار ؟؟
فلسطين
حبيبتي ربنا يعوضك انتي كمان و تجيبيلنا توم زي العسل
انا بعد الاجهاض التاني الدكتور حكالي لازم امنع الحمل على الاقل تلات اشهر بس انا منعت خمس شهور و بعد ما تركنا المنع حملت عطول و الحمد لله
هو الافضل ما يصير حمل على طوول بعد الاجهاض عشان الرحم لااازم يرتاح و انتي كمان لازم ترتاحي و تربحي نفسيتك قبل ما تحملي هيك احسن
و اي استفسار تاني انا جاهزة
حلا
ربنا يبارك بعمرك و يفرحك بولادك يااا رب و تقوميلنا انتي و بوسف بالسلامه ان شاء الله...... ما تخافي و وكلي امرك لربنا و ام شاء الله بيقلب راسو و بنولدي طبيعي و ولادتك بتكون ميسرة ياااا رب
ام عبد الله
مالك ما طليتي الك يومين .... ان شاء الله تكوني بخير ؟؟؟
دودو
اشتقنالك ... تعي احكيلنا كيف كانت ولادتك ؟؟ و احكيلنا كيغو عمورة الازعر ؟
باقي الصبايا كلكم و بدون زكر اسماء و الله اشتقتلكم .... ويييييييينكم ؟؟

نور العمر

07-05-2013, 06:28 PM

مسا الخير صبايا ... كيفكم وشو اخباركم ؟؟...

لولو .. وام مروان .. حمدالله على سلامتكم والف مبرووك ...

لولو والله فرحتلك دائما كنت بفكر فيكي شو صار معك لانو اخر مره حكيتي كتبتي انو عندك مراجعه يوم الجمعه وماعرفنا شو صار بعدين لانو سكرت الدردشه بس الحمد الله قومتك بالسلامه انتي والبنوته بس كيف صابرينا معك بتغلب او لا مافيه فرق بالعمر كتير بينها وبين بنتي .... وكم وزنها بس ولدتيها ... كتير اسئلتي خخخخخخ

ام مروان ناطرين اكشن الولاده وحمد على سلامتك و سلامة البنوته

دودو حمد على سلامتك وسلامة عموره بدنا نشوف اكشن الولاده ...

حلا مبروك دخولك التاسع .. وان شاء الله يقلب الراس لتحت وتكون ولادتك سهله وطبيعي ...

انا امبارح نقلت ع بيت جديد بس تعب ان شاء الله يخلص ترتيبو قبل رمضان بحكو رمضان يوم التلاتاء ... كل عام وانتم بخير ينعاد علينا وعليكم بالصحه والسلامه ياااارب ...

ميووش ... فلسطين نورتم واهلا وسهلا فيكم وربي يتمم حملكم على خير يااارب ...

وباقي الصبايا ان شاء الله تكونو بخير فيه كتير بنات مش مبينات منهم احساس انثى وجارة القمر وغموض وام جودي ودموع هدول ما شفتهم بالدردشه الجديده ان شاء الله يكونو بخير ... وان شاء الله ماكون نسيت حدا ...

اما فوفو وسما وام عبدالله ولولو حماده وباقي صبايا يلي كتبو بالدردشة هون واختفو وينكم ان شاء الله تكونو بخير ... وجميع الصبايا ان شاء الله نسمع اخباركم وترجع الدردشه من تاني كان الواحد ما بلحق يقرا صفحات ... ان شاء الله نطمن ع الكل قبل رمضان ...

وكل عام وانتم بخيرررررررر ......

ديدو أم عزمي

07-05-2013, 07:32 PM

مرحبااااااااااااااااااااااااا
تعبت لحتى لئيت التجمع الجديد هههههههههههههههههههههه
كيفكم جميعا
واحشيني موووووووووت
كان نفسي احطلكم صورة لدودو بس الجهاز اللي انا ئاعدة عليه ما عليه صور الها
ما شاء الله عمرها صار سنة ئبل أسبوعين ب 23-6
و الها 4 أسنان
و بتخطي لسا مشيها مش ثابت منيح
و انا بالنسبة الي مش حامل و لا ناوية الحمل هلأ مشان ولدت بعملية بدي اريح شوية
المهم انتم كيفكم واحشيني مووووووت
بالنسبة للبنات اللي ما بيعرفوني لا تستغربوا من برمي الكتير ههههههههههههههه انا كنت هون من زمان بس النت عندي مفصول و لما اروح عند اهلي بطمن البنات عليا و على بنوتي

وردة سورية

07-05-2013, 07:36 PM

http://forum.hwaml.com/t262569.html

ديدو أم عزمي

07-05-2013, 07:40 PM

وينكم يا بنات
احساس
عسولة
غموض
جارة
حواء
حيفا
بينك روز
سما
ام عمر
لولو الفلسطينية
لولو حمادة
سهى
و مسك
واحشيني موت يا بنات
اللي نسيتها ما تزعل امانة
كلكم واحشيني

زهرة نفسي

07-05-2013, 07:57 PM

اهلين فيكم بنات بلدي
جد كحتاجة اتكلم مع حدا
مخنوقة جاااااااااااااااااااامد
انا من القطاع
عرفوني بحالكم

سما الدنيا

07-05-2013, 10:16 PM

مساااااااااااء الخير كيفكم سا صبايا...مشتاقلكم كلكم ..
الي فترى ابني تعبان ولسا لليوم لخف الله يبعد عنو وعن احبابكم كل شر ويعافيهم...
هلا بام عزمي منوره يا عسل..
لولو الفلسطينه الف الحمد لله عالسلامه وتتربا بعزك بنوتك ..وقرات قصة ولادتك فعلا كاينه اكشن بس اكشن حلو ههههههه..ان شاء الله اتعيديها تاني وتالت ورابع .....
ام مروان كمان الف مبروك والحمد لله على السلامه انتي وابنك ..
ودودو الحمد لله عسلامتها...
حلا ونور العمر زام عبد الله ولولو وبافي الصبايا يسعد مساكم

سما الدنيا

07-05-2013, 10:17 PM

زهر نفسي اهلا وسهلا فيكي بالتجمع وان شاء الله اتكوني النا متل اخت هون...
فلسطين كمان اهلا وسهلا فيكي منورات البنات الجداد

نور العمر

07-05-2013, 10:19 PM

اهلا وسهلا ديدو ام عزمي نورتي الدردشه من جديد ...

انا بسمع عنك بس ولا مره اتعرفت عليكي .. لانو انا جديده بالدردشه صارلي فتره قصيره بس حبيت كل البنات هون متل اخواتي واكتر ..

زهرة نفسي نورتينا وانا كمان من غزه

وسلامتك من شو مخنوقه ..؟؟

نور العمر

07-05-2013, 10:21 PM

سما سلامتو ابنك شو مالو من شو تعبان ... اصعب شي لما الصغار بمرضو ... حمد الله على سلامتو

نور العمر

07-05-2013, 10:26 PM

وينكم يا صبايا .. بتحكو وتختفوا ..!!

فوفو89

07-06-2013, 08:55 AM

يسعــــــــد صباحكم صبايا

كيفكم زماااااان عنكم

كانت عنا ورشة دهان بالبيت ،، ومن يومين خلصنا

تنظيف وتعزيل وشغل كثييييييييييير ،، امبارح بالليل ما عرفت انام من وجع ظهري ،،بوجعني اكثر شي من تحت
الله يكون بالعووون

لولو الفلسطينية
الحمدلله ع سلامتك ومبروكة البنوتة تتربى بعزكم ودلالكم يارب
شو ان شاء الله ما تغلبتي بالولادة ؟؟؟
وكيف البنوتة؟ نزليلنا صورتها نشوفها

مين كمان ولدت او حملت ؟

~{{ DoDo }}~

07-06-2013, 09:14 AM

صباح الخير صبايا
اشتقتلللللللكم كوميات كوميات جميعا
وتسلمولي يارب فقدتوني وسالتوا عني الله يخليلي اياكم

طبعا عرفتوا انه ولدت الحمدلله يوم الاتنين الماضي واجا احلى عموري عالدنيا
الله يحفظه ويخليلنا اياه ويحميه ويبعد عنه كل شر يارب
كانت ولادتي كتير صعبة بس الحمدلله عدت على خير بدون اي مخاطر تذكر يعني

اللي صار اني خلصت التاسع وما في اي بوادر ولادة حتى كان يصير تقلصات
وطلق بس بارد كتير بس مش طلق ولادة يعني
اعطوني بس اسبوع مهلة فوق التاسع اذا ما ولدت خلص عطوني موعد دخول مستشفى
وطبعا ولادة بالطلق الصناعي ، وفعلا هاد اللي صار مع اني هلكت حالي مشي وطلوع درج
ومشي ع رمل البحر وتمر وحركة وقصص بس عالفاااااضي ربنا ما اراد
المهم دخلت المستشفى يوم الاتنين الساعة ٨ صباحا
غيرولي وفحصوني وحضروني واجت دكتورتي واعطتني تحميلة الطلق الصناعي
وحطولي التخطيط وتركوني وبلش الوجع
ويا عييييييييييني عالوجع ، يعني التقلصات والطلق اللي كان يجيني غير منتظم بالبيت
ولا شييييييييي بالنسبة للوجع الجد ، الحمدلله طبعا ما طلع صوتي بس كنت اضغط ع حالي كتير
وصار الوقت بين كل طلقة وطلقة يقل ووجع الطلقة يزييييييد اضعاف بعدها اجوني شالوا التخطيط
وقالولي امشي عشان ما تحسي بالوجع ويخف عنك شوي وفعلا لما امشي الوجع يكون اقل من وانا متمددة او قاعدة
وهاي نصييييييحة تمشوا وقت الطلق والله بيخفف كتير
وصرت مع طلقة ادعي يا بنات لكل اللي وصوني وتزكرتهم وطبعا منهم حيفا وانبثااااقة دعيتلكم من كل قلبي
المهم نسيت اقلكم اني من اول التاسع ما كنت متوسعة الا سنتي ونص بعدين صاروا تنين
ويوم الولادة الصبح قبل الطلق كنت ٣
وبعد يمكن ٤ ساعات او ٥ من الوجع لقوني توسعت ٤ تركوني اتوجع كمان :(
وانا استغفر واسبح وادعي ومنعوني طبعا من هاد الوقت اكل او اشرب اي شي
المهمصارت تعدي الساعات والوجع يزيد قالتلي الدكتورة حابة تاخدي ابرة الضهر او لا
زوجي كان حابب كتير بس ماما لا ، بالاخر قويت قلبي وطلبت نصيحة الدكتورة نصحتني اخدها
لاني بكرية ومنطقتي ضيقة وما رح تعطيني اياها بجرعة قوية ، لا رح تخلي دكتور التخدير يعطيني اشي مخفف يخففلي وجع طلوع الراس بس
اما باقي الاشياء كلها احسها عادي وهاد اللي صار استنوني لما صار التوسع ٥
فتحولي مية البيبي ونزلت كتير وحطوني على كرسي ونقلوني على غرفة الولادة طبعا ومن وقتها كان ممنوع اتحرك
اجاني دكتور التخدير وكان روسي وصار يشرحلي عن الابرة وشو اعمل عشان ما اتغلب وانا باخدها وقلي عن اعراضها الجانبية الممكنة
وتوكلنا على الله واخدناها وتوجعت وانا باخدها بس الحمدلله عدت على خير وبلشوا رجلي ينملوا شوي شوي
ويقوى الطلق اضعاااااف اضعااااااااف وكانوا مستغربين اني حاسة بالطلق القوي مع اني ماخدة الابرة
ووقتها مع كل طلقة كان يطلع صوتي واقول ياااااا اللللللللللله وماما وزوجي جنبي طبعاوبلشنا الجد
صاروا يجوا كل شوي يشوفوا اديه فيه توسع وتوسعت اخر ساعتين بسرعة كتيييييييييير وبلشت لما صار ٨ ونص ل ٩ ادفع مع كل طلقة
والدكتورة والقابللة ودكتورة الاطفال ودكتورة الحضانة واقفين بيستنوا البيبي وزوجي ماسك ايدي عاليسار وماما واقفة عاليمين بتدعيلي
طبعا اولها ما كنت قادرة ادفع منيح وتعباااانة ومهدود حيلي والدكتورة تهددني تقلي بجيب الشفاط وبنشفط البيبي
وهاد مش منيح لسا العملية احسن من الشفاط وانا اتشجع وزوجي يشجعني وادفع بكل قوتي
المهم يمكن كانوا ١٠ دفعات او اكتر شوي والدكتورة والقابلة باخر دفعة طلعت جنبي وضغطت ع بطني من فوق لتساعدني
ودفت وطلع عمورة باشا للدنيا واول ما طلعتوا الدكتورة حطتوا عند صدري مسكت ايدو وصرت ابكي واقول الحمدلله
احلى لحظة بحياتي والله العظيم الله يعطيها لكل مشتهية يااارب وما يحرم حدا منها طبعا سمعت صوتوا ببكي اطمنت واخدوه للفحص
وقتها اطلعت على زوجي وامي كانوا منهارين من البكى وانا كان شعوري غريب عجيب متل الحلم على قولة لولو
طبعا بعد وجع ١٢ ساعة كمان متل لولو ههههه اجا الفرج ، وهيني الحمدلله رغم كل الوجع اللي لسا موجود والتعب والسهر
وهاي القصص كلها بقول الحمدلله على كل شي والله يرزق الجميع بهاد الشعور وما يحرم حدا منه ياااااااارب

بدي تصلوا عالنبي وتقولوا ماشاء الله ههههههههههه وبما انه الافندي نايم بدي اروح استغل الفرصة وانااااااام وبعدين برجعلكم ؛)
في امان الله وتسلمولي جميعا على سؤالكم عني وخصوصا ام خليل ولولو كتير تفقدوني عالفيس بوك حبيباتي

حلا الماس

07-06-2013, 09:39 AM

صباح الخير يا حلوات

تعبااااانةة وحاسة كل جسمي مكسر :(

كيفكم أنتوا ؟؟ طمنوني عنكم ؟؟

سما حبيبتي
سلامتك عموورة خير شو مالو ؟؟

نور العمر
كيف وكيف ولادك ؟؟ شو تحضيراتك لرمضان ؟؟

فوفو
الله يعطيكي العافية ... حاسة فيكي وبتعبك لأني من فترة كان عندي ورشة دهان ببيتي
اهم اشي اشتغلي ببراحتك ما تحملي أشياء تقيلة ...

ام عبد الله
وينك يا بنت الحلال ؟؟ تعي نورينا مشتاقتلك انا

لولو
كيف وكيف البنوتة ؟؟ الله يسمع منك ويلف راس ابني لتحت يا ب
والله اكتر اشي شاغل بالي .... مراجعتي عند الدكتورة آخر الأسبوع وان شاء الله خير يا رب

زهرة
أهلا وسهلا فيكي معنا :) نورتي
سلامتك من شو مخنوقة ؟؟ اعتبرنا خواتك واحكيلنا عشان ترتاحي

دودو الغالية
ألف حمد لله على سلامتك ومبروك عليكي عالم الأمومة والله فرحتلك من قلبي
المهم انك هلأ بخير انتي وابنك ... وولادتي طبيعي مش بعملية وتعبك أكيد كلو بأجره وثوابه
اكشنك حلو دمعت وانا بقرأ فيه

ام عزمي
منوووووووووورة

اشتقت لإحساس وحواء وجارة وغموض وحيفا وانبثاقة وأم جودي وكل الي كانوا بالتجمع القديم
يا رب الكل يكون بخير

~{{ DoDo }}~

07-06-2013, 10:34 AM

حلا
حبيبتي ام خليل الله يسعدك
هااااانت يا قلبي ويشرف يوسف باشا
يارب تكون ولادتك سهلة وميسرة
بالنسبة لوضعية البيبي انا اول التاسع كان فوق وبعد يومين رجع نزل تحت واستقر
يعني صار عندي يقين انه هاد الشي بايد ربنا لو حتى اخر ساااااعة
الله يعينك يا قلبي ويخفف عنك ويقومك بالسلامة يارب

نور العمر

07-06-2013, 10:44 AM

صباح الخير ... كيفكم يا صبايا وكيف اصبحتم مع التحضيرات لرمضان

كيفك يا فوفو .. وحلا وكل عام وانتم بخير

دودو حمد الله على سلامتك انتي وعموره والحمد الله انو ولدتي طبيعي ..

انا تحضيراتي لرمضان رح نستقبل رضان السنه في بيت جديد خلصنا اخر مرحله من البنا يوم الاربعاء يلي فات وعطول نقلت يوم الخميس وتعزيل الاغراض تعب لهلأ ما خلصت وكمان لانو اخر شي كان دهان كان تشطيف البيت متعب شوي بس الحمد لله انو خلصنا قبل رمضان لانو برمضان الواحد ما بقدر ينقل اغراض ويرتب ... وهلا بكتب بقائمه المشتريات لانو طالعين العصر على السوق لنجيب اغراض رمضان

وانتو شو تحضيراتكم لرمضان ..؟؟

فلسطيـــن

07-06-2013, 12:04 PM

حلا إن شاء الله يتعدل وضعو

و تسلمو صبايا ع الترحيب ^^

فلسطيـــن

07-06-2013, 12:06 PM

لولو تسلمي حبيبتي و الله 5 شهور كتير أنا ماكنت بدي أحمل صحيح بس تعلقت بالحمل بشكل كبير لما حملت
و هلأ أنا على أعصابي حاسة إنه التاني مارح يستمر من كتر مانزفت بس الله كريم ~

يلا إن شاء الله خير

الله يكتب الي فيه الخير ~

لولو الفلسطينية

07-06-2013, 02:47 PM

مرحبا يا حلويين
الله يبارك فيكم كلكم .... عقبال عند العايزين هههه
دودو
الف الحمد لله على سلامتكم هههه و انا بقرا في اكشنك كل شويه بقرا شي و بتزكر حالي .... يا الله شو قصتك بتشيه قصتي و الله كانها نفسها سبحان الله حتى بتصدقي انا اعطوني ابرة في الوريد من كتر ما كنت اتوجع يعني مش ابرة ضهر بس ابرة بتخفف شويه و الله ما حسيت باي تخفيف بالعكس طبعا كان كل شويه يزيد حتى الدكتور استغرب ... هههههه بس هاي الابرة خلتني انعس بس طبعا الوجع هو هو ههههه ..... تخيلي الوضع نعسانه و الطلق مووتني ههههه ...... بعين الله شو بدنا نعمل .... لابد من هاد التعب و الوجع ... بس الحمد لله ربنا اعطانا هالبيبيات الحلوين و الباقي بيهون ان شاء الله
الله بخليلك عمورة و يفرحك فيه
نور العمر
هههه ولا يهمك
وزنها اجا تلاته كيلو حتى الدكتور حكا انها اسبوع كامل مش زايدة يعني لما كانت ببطني بس الحمد لله هيك منيح
بس هلأ مطلعه عيوني هههه مشكلتها غي النهار بتنام و في الليل سهرانه لبعد الفحر ههههه لااازم تسمع الاذان و بعدها يمكن يمكن تبلش تنعس و طبعا انا و زوجي شغالين مناوبة على حملها و مرة نشغللها قران و مرة موسيقا هاديه و مرة صوت مطر و مرة صوت بحر وووووو بدون فايدة هههه انا الي بنعس مش هي
ربنا يخليلك سيلا و اخوها و يفرحك فيهم يااا رب
ام عزمي
هلا و تلله اشتقناااالك يا قمر
الله يحميها دودو و مبووووك سنوناتها
الصبايا الجداد
اهلا فيكم نوترونا
سما
سلامته ابنك الف سلامه عليه
حلا
وكلي امورك اربنا و ان شاء الله ربنا بغير وضعيته و بتولدي طبيعي ياااا رب
ام عبد الله
وييييينك يا ضرسانه هههه ؟؟؟
فلسطين
بعرف انه كتير خمس اشهر بس احسن هيك للحمل و لصحتك انتي .... انا كمان كنت كتير حابه و متشوقة للحمل بس صبرت زي ما حكالي الدكتور ...
ربنا يجيبلك يلي فيه الحير
ربنا كبير و ان شاء الله بتمم حملك على خير
فوفو
اهلا اهلا وين هاغليبه ؟؟ اشتقنالك
هههه ولادتي اشي بسطل ...الحمد لله على كل حال .....
الله يقومك بالسلامه
باقي الصبايا تلي ما بطلو و الله اشتقتلللكم

جارة القمر

07-06-2013, 08:37 PM

يسعد مساااااااااكم

هيكم هون ........
انا كنت مقرر ما ادخل المنتدى بس شي قلي روح اتفئد
ههههههههههههه

الف مبروك لولو +دودو يتربو بعزكم ان شالله

إنبثاقة أمل

07-06-2013, 11:18 PM

مسا الخيرات

دودو الف الحمدلله ع سلامتك ماشاء الله

ربي يجعله من الصالحين ويقر عينك فيه ياقلبي

ربي يستجيب منك ياقلبي ويجزاك الخير

فعلا شعور جميل الامومه ربي مايحرمنا منه جميعا

فوفو ونور الله يعطيكم العافيه

هي انجازات الصيف الي لابد منها ههههههه

حلوولي

سلامتك ياقلبي

وان شاء الله وضع البيبي بتعدل وبتقوميلنا بالسلامه

ام عزمي نورتينا

أخيرا طليتي .. شو أخبارد طمنينا عنك اشتقنالك

جاره

اهلا اهلا نورتي

وكل الصبايا منورين ويسعد مساكم

والي غايبييين اشتقنالكم كتييييييير

ديدو أم عزمي

07-07-2013, 02:15 PM

http://www.hwaml.com/up/uploads/1373195671861.jpg (http://www.hwaml.com/up/)

ديدو أم عزمي

07-07-2013, 02:16 PM

هذه صورة دودو و هي بتتحمم ئبل يومين ههههههههههههه

ديدو أم عزمي

07-07-2013, 02:19 PM

http://www.hwaml.com/up/uploads/1373195833631.jpg (http://www.hwaml.com/up/)
هذه صورة دودو يوم عيد ميلادها

ديدو أم عزمي

07-07-2013, 02:20 PM

عموما شكلهم الصبايا مش عارفين التجمع الجديد
وصلوا سلامي للجميع
بحبكم في الله يا احلى اخوات

sosolibya

07-07-2013, 05:35 PM

السلام عليكم ورحمة الله وبركاته

هل من ترحيب من بنات فلسطين

أحب أبارك لدود بعد ماشفت قصتك

قصة حلللللللللللوة ومؤثرة ويارب يحفظلك ابنك من كل مكروه ويخليه من حملة كتاب الله
يارب

واحب انك تزورى قصة ولادتى أنا كمان

سما الدنيا

07-07-2013, 09:02 PM

يسعد مساكم يا رب..
ام عزمي ما شاء الله عنها هدهوده الله يحميها زايده حلاه قمر والله يخليها لاهلها يا رب واتشوفيها عروسة والعمر كلو..
اها شكلو مش كل البنات بيعرفو بهالتجمع..

سما الدنيا

07-07-2013, 09:03 PM

sosolibyaاهلا وسهلا فيكي بينا..
والحمد لله على يلامتك وسلامة البيبي وكل عام وانتي بالف خيييير

سما الدنيا

07-07-2013, 09:04 PM

وكل عام وكل بنات فلسطين بالف خير ينعاد عليكم رمضان بالصحة والعافية يا رب

ام عبدالله لولو

07-08-2013, 09:35 AM

صباح الخير يا صبايا
كل عام وانتم بخير للجميع الله يعيدو على الجميع بصحة وعافية وسعادة هداة بال يارب ويرزق كل مشتهية بالدرية الصالحة
دودو مبروك يتربى بعزكم يارب
حلا ان شاء الله بينزل راسو لتحت انا الحمد لله تزل من شهر تقريبا
لولو يسعد صباحك يارب كل الصبايا يسعد صباحكم كلككم

sosolibya

07-08-2013, 04:45 PM

مشكورة حبيبتى سما الدنيا بالترحيب الحلو وكل عام وانتم بخير

جارة القمر

07-08-2013, 10:28 PM

انبثاقة
:
حبيبتي كيفك

ام عزمي:

ربي يحميها شو حليانه اشتئتلك كتتتتتتتتتتتير

حلا الماس

07-09-2013, 08:18 AM

صباح الخير يا غاليات

كيفكم جميعا ؟؟ طمنوني عنكم ..... مبارك عليكم الشهر الفضيل ويا رب ينعاد عالجميع بخير وصحة وعافية

يلا قوليلي شو ناوين تعملوا اول فطور بكرة ؟؟ ولا محتارين متلي !!

علقتوا زينة رمضان ولا لسه ؟؟ انا علقتها مبارح بالليل وولادي ما نزلوا عن الشباك من كتر الفرحة كانوا طايريين ومبسوطين عالزينة

ام عبدالله
حبيبتي وأختي الغالية الله يسمع منك ويلف راس يوسف لتحت

جارة
كيفك حبيبتي ؟؟ طمنيني عنك

انبثاقة
يا عمري يا غالية ويشهد عليي ربي أني بعزك كتييير.... يا رب بعد هالشهر الفضيل تجي تسمعينا خبر حملك ان شاء الله هو قادر على كل شيئ انتي وحيفا الي بايعتها ومو سائلة فينا

كل البنات بحبكم انا وكتيييير اشتقتلكم :)

حلا الماس

07-09-2013, 08:19 AM

صباح الخير يا غاليات

كيفكم جميعا ؟؟ طمنوني عنكم ..... مبارك عليكم الشهر الفضيل ويا رب ينعاد عالجميع بخير وصحة وعافية

يلا قوليلي شو ناوين تعملوا اول فطور بكرة ؟؟ ولا محتارين متلي !!

علقتوا زينة رمضان ولا لسه ؟؟ انا علقتها مبارح بالليل وولادي ما نزلوا عن الشباك من كتر الفرحة كانوا طايريين ومبسوطين عالزينة

ام عبدالله
حبيبتي وأختي الغالية الله يسمع منك ويلف راس يوسف لتحت

جارة
كيفك حبيبتي ؟؟ طمنيني عنك

انبثاقة
يا عمري يا غالية ويشهد عليي ربي أني بعزك كتييير.... يا رب بعد هالشهر الفضيل تجي تسمعينا خبر حملك ان شاء الله هو قادر على كل شيئ انتي وحيفا الي بايعتها ومو سائلة فينا

كل البنات بحبكم انا وكتيييير اشتقتلكم :)

حلا الماس

07-09-2013, 11:28 AM

وييييييييييييييييينكم !!!!!

كبريآء أنثى ـآ

07-09-2013, 01:01 PM

صبايا مين موجودة ؟؟؟؟؟؟؟؟؟؟؟؟؟؟؟

كبريآء أنثى ـآ

07-09-2013, 01:04 PM

مرحبااااا
كيفكن ؟؟
كل عام وإنتن بخير صبايا ورمضان كريم
وينعاد علينا كلنا بالصحة والعافية ياااااارب
كيف تحضيراتكم لرمضان ؟؟
والله أنا تعبانة كتيييير وما بنام منيح ولسا غرزي مانزلوا لهلأ
وبتوجع كتيييير لما أقعد وأقوم وحالتي حالة ههههه
صحيح أنا نسيت أكتبلكم قصة ولادتي .... بس أخلص شغل راح أكتبها

كبريآء أنثى ـآ

07-09-2013, 01:12 PM

ممممممممممم ما في حدا هوووون
كنت بدي أستفسر عن شي ضروري وما في حدا أسأله غيركن

كبريآء أنثى ـآ

07-09-2013, 01:20 PM

ممممم خلص بدي أكتب قصة ولادتي يمكن تيجي وحدة منكن لحتى أسألها

كبريآء أنثى ـآ

07-09-2013, 01:39 PM

قصة ولادتي ..
أول شي أنا ولدت يوم السبت 15/6/2013
هلأ ليلة الجمعة كنت سهرانة عند نسوان اعمام زوجي وكنا قاعدين وبنضحك ومبسوطين كتييير وحتى خططنا لحتى نروح ع البحر تاني يوم اللي هوا السبت واللي كانت الأساس بالتخطيط لرحلة البحر هو أنا ههههه (( بس راحت علية يا خسارة )) هع هع hwaml7hwaml7
المهم خططنا لكل شي وكل وحدة اتفقت من زوجها إنه بدنا نتجمع ونروح ع البحر كلنا سوا العيلة وننبسط وروحت من عندهم تقريبا الساعة 1 بالليل
سهرنا أنا زوجي وقعدنا ع التلفزيون نحضر فيلم أكشن ههههه (( انقلب الأكشن علية هع هع )) hwaml02hwaml02
المهم تقريبا الساعة 3 بالليل صار جماع ومن بعد الجماع مباشرة صابني مغص خفيف ما أخدت فيها كتييير .. وحطيت حالي وبدي أنام لما صارت الساعة 4 الفجر زاد الوجع وما عرفت أنام وطبعا زوجي نام وصار بسابع نومة وأنا صاحية ومش عارفة أنام من الوجع hwaml4hwaml4
صارت الساعة 5 وكل شوي الوجع بيزيد بعدين صرت أحكي بعقلي والله شكلي بدي أولد وصرت أحسب بين الطلقة الأولى والتانية وكانت الوقت 5 دقايق بين كل طلقة ومن دراستي للمواضيع هون بالمنتدى لما شفت الوقت 5 دقايق بين كل طلقة عرفت إني راح أولد خلص ما ضل فيها كلام
استنيت يطلع النهار حتى أرن ع إمي ومش هاين علية أصحي زوجي قلت حرام خليه ينام شوي عشان يكون مصحصح لما نروح ع المستشفى
وع 6 ونص خلص مش متحملة وصرت أعيط من الوجع ورن ع إمي رن ع إمي طبعا إمي نايمة ههههههه hwaml23
رنيت على أختي الصغيرة عشان تصحي إمي برضو ما حدا رد علية بالآخر رنيت ع أختي المتزوجة رعشتلها ترعيشة قصيرة كتييير ومافي ثواني الا أختي بترن علية وكنت بعيط ومش قادرة أحكي من الوجع وصارت أختي تسأل فيني وتقلي كام الوقت بين كل طلقة وحكتلها 5 دقايق وحكتلي خلص هاد ولادة وصارت تقلي اقرئي آيات وكلي تمر وامشي واغلي قرفة واشربي وعملت متل ماحكتلي .. قامت أختي رنت على أبوي وحكتله يحكي لإمي وصحيت إمي من النوم ورنت علية وحكتلي بدي أخلص شغل وأجيكي بس إنتي امشي وكلي تمر حكتلها ماشي
وصحينا حماتي من النوم وعملنا قلق لكل العيلة هههههههه hwaml02
المهم حماتي بتقلي ناخدك ع المستشفى حكتلها لأ مهل بس أستوي على الآخر (( بيني وبينكم ماحبيت أروح خوف لأطول وأنا بالمستشفى وأشوف هاد بتطلق وبتولد وأخاف بزيادة )) hwaml27
وأنا طول الوقت أمشي وآكل تمر وأقرأ آيات وأطلع الدرج وأنزل كتيييير يومها انهلكت
وكان يومها عندي معاد بعيادة الوكالة لأنه كان آخر يوم بشهر 15/6/2013
رحت أخدت دوش حمام دافي وصحيت زوجي وحكتله بدنا نروح ع العيادة ونشوف شو بدهم يحكولي
ورحت عالعيادة وأعطوني تحويلة ع المستشفى ع طول لما شافوني تعبانة .. المهم روحنا وبرضو مارضيت أروح ع المستشفى غير لما أتعب على الآخر
هههههه أحلا شي وأنا بطلق بالبيت ورايحة جاية ودموعي على خدي بقول لزوجي ((عجبك راحت علية طشة البحر )) صار يضحك ويقلي إحنا في شوو وإنتي في شووو هههههههه hwaml02hwaml02
المهم أجت إمي الساعة 11 وقعدت تقرأ آيات على راسي وعلى بطني ولما صارت الساعة 3 خلص قلتلهم خدوني ع المستشفى مش قادرة تعبت كتييييير .. راح زوجي طلب سيارة وأخدنا شنطة البيبي ورحنا أنا وزوجي وإمي وحماتي على المستشفى
ووصلنا المستشفى تقريبا الساعة 4 إلا تلت .. دخلت غرفة كشف الولادة عملولي تخطيط وسونار وفحصتني الدكتورة كنت موسعة 4 سم وأعطوني إبرة في فخذتي وحكولي امشي وكلي تمر
وبعد الإبرة زاد الوجع وصرت أمشي وآكل تمر وكل ماتيجي الطلقة أخشب ما أقدر أعمل حاجة لا أمشي ولا أقعد ولا أي شي واقرا آيات وأدعي بعد بساعة فحصتني لقتني موسعة 5سم وحكولي يلا امشي كمان وكلي تمر وبعد بساعة فحصتني كنت موسعة 6 سم وحكتلي خلص ستوب ما تمشي ريحي حالك لما شافوني موسعة بوقت قليل خافوا علية أتعب بالولادة ما أقدر أدفع حكولي اتريحي ورحت قعدت تقريبا صارت الساعة 6 وأنا أدعي وإمي تقرأ علية وحماتي كمان تقرأ علية والساعة 6 وربع حكولي يلا تعالي هههههههه هما حكولي يلا تعالي أنا صرت مش قادرة أمشي قلت أجاك الموت يا تارك الصلاة هههههه خفت كتييير والله حسيت حالي رايحة على مجزرة خلص بجد كنت مرعوبة ............... يتبع

حلا الماس

07-09-2013, 01:40 PM

مسا الخير

حبيبتي ام مروان سلامتك يا رب

هي انا هون لو بتحبي تسألي عن شي أزا بقدر بساعدك

بانتظار قصة ولادتك يا قمر

حلا الماس

07-09-2013, 01:44 PM

ياااااي حسيت بأكشن حلو
يلا يلا كملي .... بانتظارك

أحلى شي انك بتطليق وزعلانة على مشوار البحر هههههه ما ازكاكي

كبريآء أنثى ـآ

07-09-2013, 01:49 PM

المهم دخلت غرفة الولادة وركبولي المحلول وفحصتني الدكتورة كنت موسعة 9 سم وطبعا فقشتلي مية البيبي بإيدها وحكتلي كل ماتيجي الطلقة ادفعي بأقوى ماعندك وأنا شو تحكيلي أرد عليها وكانت إمي جنبي .. زوجي مارضي يجي صار يقلي مش هاين علية أشوفك وإإنتي بهالحالة بجد حسيته خاف علية كتييير وشوية بدو يعيط بس مابين قدامي عشان مايضعفني ..
وأنا ماسكة إيد إمي وأشد عليها ههههههههه صارت إيد إمي زرقة زرقة وأنا ولا صوووووت الحمد لله كنت أضغط ع حالي بس كنت بعيط كتييير من الوجع وكل ماتيجي الطلقة أدفع بأقوى ماعندي وأقول كل شوي لإمي مطولين والدكتورة تقلي شطووورة ادفعي أكتر وتمسك شعر البيبي وهو ببطني وكل ماتيجي الطلقة أدفع والساعة 6 ونص نزلت حبيبة قلبي ونورتلي دنيتي ووقتها لما نزلت ما حسيت بوجع ولا بألم بجد من لما شفتها نسيت كل إشي وصرت أحكي الحمد لله حبيبتي يا ماما حبيبتي يا ماما بجد شعوووور لا يوصف الله لا يحرم حدا منه هالشعور ياااارب
وأخدوا البيبي ينظفوا ويلبسوه وأنا أجت الدكتورة تنظفني وتغرزني والله لا يوريكو الولادة كووووم والغرز كووم تاني
وأنا بولد ماطلع صوتي بس لما اتغرزت طلع صوتي هههههههه hwaml02hwaml02
وكل شوي تضحك علية تقلي بدنا نغرزك بس غرزتين يلا ارخي حالك وانا أصرخ وأشد حالي ههههههههه صرت أقلها هدول مو غرزتين بتضحكي علية هههههههه صارت تضحك الدكتورة ونسيت أسألها كام غرزة أخدت بس لليوم بعاني من وجع الغرز لحتى الآن نزلوا بس 4 غرز
والمهم طلعت من غرفة الولادة لقيت زوجي حاضن بنوتتنا الحلوة وكان مبسووط كتييير وأجا قعد جنبي ع السرير ويباركلي ويقلي الحمد لله ع سلامتك وقعدنا ساعتين بالمستشفى بعدين روحنا ع البيت بس اهم مافي الموضوع طشة البحر راحت علية هههههههههه بدي أفقع والله hwaml4
والحمد لله الحمد لله ياااااربي الله يطعم كل مشتهي ياااااااارب

كبريآء أنثى ـآ

07-09-2013, 01:59 PM

أنا هلأ صارلي 24 يوم والدة تمام .. الحمد لله من يوم ماولدت لليوم مانزل علية دم أحمر لأنهم بالمستشفى نظفوني منيح منيح
يعني من لما طلعت من غرفة الولادة مباشرة من بعدها كان الدم الأحمر بس لما روحت ع البيت ما نزل بعدها
وهلأ بنزل علية باللون الأصفر المائل للبني الفاتح ومابعرف أصوم أو لأ
أنا أختي بتقلي كنت بابني هيك وسألنا الشيخ وحكى أصوم بس ما أصلي وأنا مش عارفة شو بدي أعمل لهلأ .. ؟؟
وتاني شي .. أنا إلي 24 يوم بس لهلأ الغرز ما نزلوا وكتير بتوجع لما أقعد ... ولما يكون إلي فترة قاعدة وأقوم برضو بتوجع أكيد فهماني إنتي ؟؟؟؟ يعني خايفة يكون مش طبيعي انه الغرز يضله لهيك يوم حاسة إني طولت كتييير
وبعدين عيد زواجي بكرة بصيرلي سنة متزوجة هههههههه

حلا الماس

07-09-2013, 02:13 PM

ألف حمد لله على سلامتك حبيبتي

بالنسبة للصيام لا ما تصومي إلا لما تكملي ال ٤٠ يوم هيك بتكوني طاهرة تمام

لأنو بعد ٢٠ يومبيخف الدم وممكن ما ينزل ببعض الأيام بس رح يضل ينزل عليكي للاربعين
لهيك ما تصومي قبل الأربعين ... انا بابني خليل ولدت قبل رمضان ب ٢٠ يوم وكنت تقريبا طاهرة وما بينزل دم بس إفرازات بس ما صمت الي بعد الأربعين
لأنو هيك الصح ... يعني لو انقطع الدم والإفرازات يومين حتفكري انك تطهرتي بس لما تعاود تنزل بعد يومين أو ٣ دليل انك لسه مش طاهرة صح والإفرازات الي نزلت منك أساسا كانت موجودة بجسمك باليوميين الي فكرتي فيهم أنك طاهرة ... لهيك بعد الأربعين اضمن

والغرز عادي اتضل أزا كتير ... اهم اشي اهتمت بنظافة المنطقة الحساسة عشان ما يلتهبوا

وإياكي والجماع قبل الأربعين لأنو بيضرك أولا الغرز عندك مش نازلة وممكن لو صار جماع تنفك أو تلتهب
وتانيا لأنك لسة مش طاهرة حتى لو انقطع الدم ... الإفرازات هاي دليل انو انتي لسة نفساء ... اصبري لبعد الأربعين اضمن

كبريآء أنثى ـآ

07-09-2013, 02:18 PM

الله يسلمك حبيبتي
ههههه شو جماع إنتي التانية أنا متوجعة من دون جماع فما بالك بالجماع ههههههههههه
مهل بس ينزلوا كلهم ما اضل ولا غرزة
يعني اطمن هاد اشي عادي ؟؟
طيب في شغلة تانية لسان بنتي أبيض لييييش ؟؟ ولا مع الحليب والرضاعة ؟؟

حلا الماس

07-09-2013, 02:41 PM

ههههههه بيعين الله حبيبتي بعد ما تشفي بشكل تام رح تنسي الوجع خخخ

بالنسبة للسان بنتك عادي من الرضاعة إلا أزا كان البياض منتشر كمان بتمها من جوة وعلى اللثة هاد بيكون فطريات

بتقولي انك سألتني شيخ وقال صومي وما تصلي !!!!! بالله عليكي هادا شيخ مجنون

كيف بيقول صومي وما تصلي ولا عمرها صارت ما بينفع طب مهي الصلاة عمود الدين

متل ما هو الصيام ركن من أركان الإسلام كمان الصلاة ركن من أركان الإسلام ما بيجوا تتركي ركن وتعملي ركن

أصلا فتواه بالأساس غلط !!!!

ام عبدالله لولو

07-09-2013, 02:53 PM

مساء الخير يا صبايا
ام خليل منورة الله يسعد هالمسا كم يوم اليك بالتاسع

كبريآء أنثى ـآ

07-09-2013, 03:04 PM

لالالا البياض جوا بس ع اللسان وحتى بأول لسانها مافي بياض لونه احمر عادي
والله مابعرف يختي عنه الشيخ هههه صارو هلأ كلهم يفتوا على كيفهم

كبريآء أنثى ـآ

07-09-2013, 03:05 PM

هلا ام عبد الله
منووورة
والله يقومك بالسلامة ...
حلا بدي أسألك معلش غلبتك بأسئلتي سامحيني
شو أحسن وسيلة لمنع الحمل ؟؟؟

ام عبدالله لولو

07-09-2013, 03:12 PM

الحمد لله على سلامتك ام مروان تتربى بعزكم يارب كنت بقراء بقصة ولادنك كثير حلوة وما تغلبتي كثير الله يخليلك اياه وكل عام وانتي بخير وعيد زواح مبارك يارب
انتي مثلي انا بولاد وبعدها بشهر بطبق السنة

كبريآء أنثى ـآ

07-09-2013, 03:20 PM

الله يسلمك حبيبتي ... اه والله سهلة الحمد لله وعقبالك يااااارب
الله يبارك فيكي ... ورمضان كريم يا عسل
ربنا يقومك بالسلامة ... كيف الحمل ؟؟؟

ام عبدالله لولو

07-09-2013, 03:23 PM

حلا انا بدي اطبخ جاج مع بصل بالفرن وشوربة فريكة واوزة اول يوم ما بعرف شو اقتراحات عندكم احكولي وبعدين ممنوع الغياب برمضان عشان الطبخة
ههههههه بدي اعرف شو اطبخ

ام عبدالله لولو

07-09-2013, 03:30 PM

الحمدلله بخير الرفس شغال هههههه الله يعينا ع رمضان يارب العطش كثير بعطش انتي شو بدك تطبخي اول يوم وكيف القمر الصغيرة مغلبتك ولا هادية

حلا الماس

07-09-2013, 04:07 PM

معلش حبيباتي فصل النت وهلأ رجع

ام عبدالله
حبيبتي الله يسعد هالمسا يا رب ... انا ماشية مع الشهر اليوم التاريخ ٩ /٧ وانا صرلي ٩ أيام بشهري
بالنسبة لبكرة كنت مقررة اعمل مقلوبة بس اكتشفت انو بكرة في عزومة بدار حماي وما بعرف شو رح يكون فطورنا اول يوم على مزاج حماتي عازمتنا سلفاتي وبنات حماي يعني لمة كبيرة .... حاسة راسي بيوجعني من عجئة الولاد من هلأ :(

أكيد ممنوع الغياب برمضان ولا يوم طبعا ...وان شاء الله نحصل متواصلين اكتر من هلأ

ام مروان
هههه ما تؤاخذني بس عصبت من كلام الشيخ هادا هههههه
بنتك أزا البياض بس على طرف لسانها معناتو من الحليب والرضاعة بسيطة يعني

نور العمر

07-09-2013, 04:46 PM

مسا الخيرر .. كيفك(( حلا و ام مروان و ام عبدالله ))وشو اخباركم مع رمضان ..؟؟

كل عام وانتم بخير ...

نحنا معزومين بكره عند بيت حماي على مقلوبه و جاج وملوخيه وشوربه طبعا ... وانتو شو طابخين ؟؟..

وشو كيف انتو والفوانياس امبارح اولاد الحاره وابني معهم حاملين الفوانيس بالحاره كانو بجننو...

كبريآء أنثى ـآ

07-09-2013, 07:04 PM

ممممم انا مو مستقرة لحالي أنا عايشة مع عيلة زوجي ولسا عمتي متحيرة بالطبخة لبكرة
بس احتمال راح تعمل دجاج بالأكياس الحراري بالفرن وجنبه رز أوزي وشوربة طبعا وسلطة
مممممم بنتي ما شاء الله عليها يوم هادية ويوم بتجنني ويتستفزني هههههه

كبريآء أنثى ـآ

07-09-2013, 07:05 PM

هلا نور العمر
أنا منيحة إنتي كيفك ؟؟
كل عام وإنتي بخير
هههه أنا ما بعتقد أصوم لساتني والدة إلي 24 يوم هههههه

فوفو89

07-10-2013, 09:45 AM

مرحبا يا حلوين

كيفكم وشو اخباركم

كل عام وانتو بألف خير ورمضان كريم

كيف اول يوم صيام معاكم ؟ خصوصا الكروشات ؟

انا صبحت عطشااااااااااانةة

اليوم افطاري عند دار عمي مقلووووبة مع شوربة وسلطة
مع اني ما بحب الرز ب رمضان ،، بحب اكثر شي الصواني

وانتو ؟

سما الدنيا

07-10-2013, 11:23 AM

هلا يسعد صباحك فوفو وكل عام وانتو بالف خيررر ...
انا عاملة اليوم كوسا محشي بكشك وورق عنب ..اتفضلو....

ميوووش محمد

07-10-2013, 11:44 AM

صباح الخير صبايا ,,

امم باتوقع امي راح تعمل دجاج محشي وبطة محشية بالفرن وفته

حلا الماس

07-10-2013, 12:21 PM

صبااااااااااااااااااح الخير

يا الله ما احلا الاحساس برمضان .. ان شاء الله بينعاد عالجميع

فوفو
ام رزونة .. صباح المسك حبيبتي
مبارك عليكي الشهر .. كيفك حبيبتي وكيف الحمل معك ؟

الصيام لهلأ منيح الحمد لله .. الله يكملها معانا بخير

وانا كمان متلك صحيت عطشانة .. بس هلأ خف العطش

واحنا كمان اليوم فطورنا ببيت حماي عازمين خوات جوزي واحنا ودار سلافي كلنا مجتمعين ببنت حماي

حماتي رح تعمللنا ملوخية .... مع اني كنت مقررة اعمل مقلوبة بداري اليوم بس باجلها لبكرة

حلا الماس

07-10-2013, 12:26 PM

سما وميوش
يسعد صباحكم .. ومبارك عليكم الشهر حبيباتي

صحتيين عالاكلات الزاكية

ميوووش محمد

07-10-2013, 01:04 PM

هلا فيكي ياا حلا

وربنا بعدب الشهر عليا واحنا باحسن حال

حلا الماس

07-10-2013, 01:21 PM

هلا فيكي حبيبتي ميوش

الله يسمع منك ..

ميوووش محمد

07-10-2013, 01:34 PM

الله يقدركم على الصيام .. انا مش صايمه بس مش جاي على بالي اي شي .. متلي متل الصايمين

فوفو89

07-10-2013, 04:10 PM

ميوش ،، وسما ،، وحلا
ينعاد عليكم بالصحه والعافية
وصحه وهنا سلفا

انا جعت كثييييييييييير وعطشااااااااااانة ومش قادرة اقوم من التعب ، الله يهونها يااارب ويصبرنا

ام عبدالله لولو

07-10-2013, 10:50 PM

كل عام والكل بخير

وردة سورية

07-10-2013, 10:51 PM

http://forum.hwaml.com/t264518.html

حلا الماس

07-11-2013, 02:38 PM

مرحباً بنات

شو وينكم اليوم ؟؟؟ ولا تعبانين مع الصيام

كيف كان صيامكم مبارح ؟؟

انا كان بالنهار عادي بس بعد الفطرة تعبت ودخت وصار راسي يوجعني :(

اليوم حاسة حالي تعبانة وراسي بيوجعني لأنو نزلت عالدكتورة اليوم والجو حر ومع الصيام تعبت

المهم انو الحمد لله راس البيبي نازل لتحت وداخل بالحوض وصحتو منيحة :)
نصحتني دكتورتي أبدا بالمشي بما انو الرأس نزل لتحت وهادا كل شي .... الحمد لله

بس يا رب يضل راس البيبي تحت وما تتغير وضعيتو ... أدعولي ربنا يهونها عليي

لولو الفلسطينية

07-11-2013, 03:29 PM

مسا الورد لاحلى صبايا
شو اخباركم ؟؟؟
ام مروان
بالنسبه للسان بنتك هادي هادا من الرضاعة ... انا كمان بنوتيي لسانها على بياض
.و بالنسبه للصيام انا سألت حكواي اذا طهرتي خلص و مش شرط للاربعين .... انا هيني صايمه لانه الحمد لله صارلي تقريبا عشر ايام و اكتر و انا نضيفه و ما في ولا اشي .... من الاساس كان الدم قلييييييييييل
ربنا يخليلك بنوتك و يحميها
حلا
حبيتي ام خليل ... الحمد لله انو كلشي تمام ... لسا بفكر فيكي
ما تخافي خلا اصلا صعب يرجع يقلب .... و ان ساء الله يا رب بضلو راسو لتحت و بتولدي طبيعي ياااا رب
الله يهونها عليكي و على كل الحوامل
باقي الصبايا يسعد مساكم ... اشتقتلكم

~{{ DoDo }}~

07-12-2013, 11:46 AM

صباح الخير صبايا
كل عام وانتو وعائلاتكم بخير يارب
ورمضان مبارك عالجميع
طبعا هالسنة مميز مع وجود فرد جديد عنا
بينام طول النهار وبيصحينا طول الليل ههههههه
انا السنة شكلي مش رح الحق اصوم ولا يوم برمضان للاسف
ان شاء الله الحق كم يوم بالاخر يارب
ولسا والله بعد الولادة لهلا ضهري بيوجعني بس بيقولوا طبيعي
شو لولو انتي كيف بعد الولادة امورك طمنيني وكيف بنتك والرضاعة
انا الحمدلله تغلبت شوي اولها بالرضاعة بس هلا الامور منيحة احسن يعني

حلا وام عبد الله وفوفو طمنوني عنكم كيف بيبياتكم اشتقتلكم كتير
نور العمر وام مروان وسما والصبايا الجداد ميوش وفلسطين منوريييييين
وجارة وحواء واحساس وصبايا كتير مفقودين وين هالغيبة

صحي الافندي يلا مش رح اقدر اكمل ههههههه بشوفكم ؛)

إنبثاقة أمل

07-13-2013, 05:23 AM

صباح الخيرات

شو أخباركم .. وكيف رمضان معكم

انا من ناحية العطش والجوع الحمدلله مابعاني

بس الصداع هو الي متعبني

واليوم طويل جدا وبحس بين العصر والمغرب يوم لحاله كأنه ههههههههه

الله يتقبل منا جميعا يارب

حلولي ربي يسعدك والله اني بعزك وبحبك كتير

والحمدلله انه البيبي نزل راسه

ربي يهون عليك ويقومك بالسلامه ياقلبي

نور العمر

07-13-2013, 05:38 PM

كيفكم يا صبايا .. وكيف رمضان معكم ..؟؟

شو طابخين اليوم ؟ ........ نحنا اليوم معزومين عند بيت حماي عازم بناتو وخطيبة سلفي يلي هي بتكون اختي يعني اختي صارت سلفتي خطبو قبل رمضان ب اسبوع ...

انا اليوم كتير عطشانه ...

سلامي لجميع الصبايا ... بتكونو هلا مشغولين بالفطره .. انا اليوم اجازه بس رح روح انزل شوف شو بدهم مساعده ..

حواء مثالية

07-13-2013, 10:14 PM

سلام عليكم كيفكم

لولو ودودو الف الحمدلله على سلامتكم ان شاء لله كانت ولادتكم هينه

حلا بالسلامة يا رب

اشتقتلكم كلكم موووووووت

حلا الماس

07-14-2013, 10:58 AM

صباح الخير

شو وينكم يا بنات ؟؟؟
معقول هادا تعبانين مع الصيام !!!!!!!

تعوا طمنونا عنكم .... ما تختفوا هيك

حواء
نورتي الدردشة برجوعك حبيبتي

نور العمر
منورة حبيبتي
مبروك لسلفك ولاختك ...

قولولي شو بدكم تطبخوا اليوم ؟؟؟

انا محتارة كتير ... بفكر بمحشي بطاطا بس مترددة

لسه ما اعتمدت اشي

حواء مثالية

07-14-2013, 02:31 PM

نهاركم سعيد ومليء بالرضا والطاعة يارب

نورك حلا تسلمي ياقلبي

كل عام وانتو بخير كلكم

ام عبدالله كيفك اليوم وكيفو عبود باقي كم يوم بنفوت التاسع يالله شدي حيلك اشوف مين راح يعملها اول انا ولا انتي هههههههههههه الله يهونها علينا يارب

حلا هلا الدور عليكي يارب يتمملك على خير وتقومي بالسلامة انتي والبيبي

نور العمر

07-14-2013, 02:51 PM

مسا الخير صبايا كيفكم ..؟؟

كيفك حلا ... الله يبارك بعمرك يااارب .. ان شاء الله يااارب نباركلك بس تقومي بالسلامه انتي والبيبي ..

حواء كيفك منوره .. وكل عام وانتي بخير ...

شو طابخين اليوم ..؟؟

انا طابخه جاج بالفرن بالخضار وجنبو سلطات ...

حواء مثالية

07-14-2013, 03:51 PM

انا لهلا ما بعرف شو راح اعمل اكل بس على الارجح مقلوبه انا اصلا كل ما احتار بالاكل ما بلاقي حالي الا انا عامليتها لانه زوجي بموت عليها

تسلمي نور العمر حبيبي انتي

~{{ DoDo }}~

07-15-2013, 12:03 PM

صباح الخير صبايا كيفكم

مشتقالكم كتير بدون اسامي
وعمور افندي بيتدلل علينا صرلو يومين
ببكي كتير وما بينام شكله مغص
وسرته لهلا ما نزلت صرله اسبوعين
وعم بفكر اخده للدكتور ان شاء الله خير
مين منكم طولت سرة بنتها او ابنها لتنزل

حلا
طمنيني عنك شو الاخبار
لسا شديدة
بوساتي للحلوين ماسة وحلا وخليل وبيبي يوسف
هااا شو طابخة اليوم

فوفو
طمنينا عنك كيفك وكيف البيبي
وشو اخبار الصيام معك

ام عبد الله
اشتقنااالك طمنينا كيف البيبي
ورمضااان والصيام

حواء
منورة كيف برلنت والبيبي والحمل
يلا قربتو يجي دوركم مهونة يارب

لولو
كييييفك وكيف صابرينا
شو مغلباكي ولا لا
وكيف الصيام والرضاعة
متهيالي كملت بنوتتك شهر

نور العمر وام مروان وسما وميوش وفلسطين
شو الاخبااااار

حواء مثالية

07-15-2013, 12:24 PM

هلا دودووو منورة خلي يتدلل هالقمر بطلعلو
بالنسبة للسرة بتنزل ما في داعي للدكتور بس انتي كل غيار حطيلو عليها مطهر سبيرتو يومين ثلاث بتلاقيها نزلت

مامتك سافرت ولا بعدها عندك

مين اسهل الامومة ولا الحمل

برلنت بخير والحمل مع الصيام انسي هالكني بس مو مفكرة افطر لاني قادرة اتحمل الحمدلله الله يهونها علي وعلى الكل

حلا الماس

07-15-2013, 01:42 PM

مسا الخير يا بنات

حواء
حبيبتي انا بخير وبدي سلامتك ... خلص هلأ صارت الأيام معدودة وعم بجهز حالي نفسيا للولادة

يا رب يهونها علينا ونقوم كلنا بالسلامة

دودو
خليه يتدلل عمورة خليه ... بالنسبة للسرة رضعيه منيح وامسحيها مع كل غيار بكحول طبي بتنشف وبتنزل

بالنسبة الي لسه صامدة وقوية لسة قبل شوي اجيت من السوق :) كنت مع أمي الله يخليلي إياها أخذتني شرت لي هدية عشان يجيبوها لما أولد

انا اليوم من طابخة اشي معزوميين عند أخت جوزي ... مرتاحة من الطبيخ اليوم

أنتوا طمنوني عنكم ؟؟؟

فوفو ولولو وأم عبد الله وانبثاقة وميوش وفلسطين ..... وييييييييييينكم غاطسين ؟؟؟

حواء مثالية

07-15-2013, 02:52 PM

بالسلامة يا حلا ومبروك الهدية الله يقيمك بالسلامة يارب

بتعرفي الي اسبوع معي وجع كل ساعتين بجي بس خفيف ماما بتقلي هاد توسع

حلا ياي مشفى راح تولدي ولا لسه ما قررتي

حواء مثالية

07-15-2013, 02:55 PM

والله اجت ببالي اليوم عيون المها وعسولة فلسطين وحيفا واحساس ياريت يطلو ويطمنونا عنهم

~{{ DoDo }}~

07-15-2013, 04:56 PM

اهلا اهلا حلا وحواء والله اشتقتلكم

حواء
والله مع كل غيار بحطله سبيرتو
ان شاء الله خير وما تطول يارب
برافو عليكي والله ازا قادرة تصومي ممتاز
وبرلنت بوسيها الزعرة بكرا بيصيروا هي وعزو يغلبوكي سوا
بالنسبة الي والله التنين صعبين
الامومة والحمل كل واحد اله شي
بس الحمدلله على هالنعمة اكيد الله يعطيها لكل مشتهي ؛)

حلا
يلا هاااااانت
مبروكة الهدية وعقبال قيامك بالسلامة يارب
الله يطمنا عليكي وع كل الصبايا قريبا يارب

لولو الفلسطينية

07-16-2013, 08:59 AM

صباح الخيرات لاحلى بنات
شو اخباركم
اشتقتلكم كلكم .... يا ريت لو كل الصبايا بطمنونا عنهم
حلا
يللا هانت و ما ضل الا القليل .... الله يفومك انتي و يوسف بالسلامة و تكون ولادتك سهله يااا رب
مبروكة الهديه يا عسل
حواء
منورة ام عزوز .... كيفك انتي و برلنت و عزوز أفندي ؟؟
دودو
بيطلعلو يتدلع الازعر ..... ههههه الله يخليلك ياه
كيف هلا صار ضهرك ؟
انا لسا ضهري في وجع ... ممكن من تأثير الطلق الصناعي ... بعين الله
و المشكله انا بعد الولادة بفترة صار يجيني وجع قوي كتييير في بطني من تحت و طلع عندي التهابات قوييييييييه شكله من كتر ما فحثوني يوم الولادة بس هلا اخف من اول .... و لحد الان بضل في شي مدايقني من تحت يعني لما بقوم و بقعد و حتى اما بقرب رجلييه كتير على بعض بحس بشي غريب .... ان شاء الله خير
بالنسبه لصابرينا .. مش مغلبيتني ... بس مشيبيتني ههههه .... المشكله انها في النهار بتنام منيح يعني تقريبا بتضل ترضع و تغير و ترجع تنام و بس طبعا مع شويه واع و وييع ... بعدين صوتها عالي هههه .. و بالليل لاااازم سهرة لبعد الفجر و تحيانا بتوصل الساعه تسعة الصبح و احنا صاحيين و بنحاول ننيمها ... ههههه
بس هي الها يومين حتى بالنهار ما بتسكت ... لانها اخدت طعم الشهر و المسكينه عزبوها و نزلو منها دم كتييير و نجنت و هي تصيح .. كانت بتحزن .. و عملنااها برضو عالشهر فحص السمع و الحوض و الحمد لله كلو تمام
بالنسبه للسرة عادي اتركيها بس زي ما حكولك البنات ضلي عقميها بسبيرتو و خلص و بتنزل لحالها ان شاء الله
الله يخليلنا ياهم و ما بحرم حدا هالنعمة
ام عبد الله و فوفو و سما و نور العمر و ام مروا ن و الصبايا الجدا د فلسطين و ميوش و كلل الصبايا يا رب تكونو بخير
باقي الصبايا الي ما طلو ... استقتلكم كتير و اشتقت اسمع اخباركم
رمضان كريم
يسعد اوقاتكم كلكم

حواء مثالية

07-16-2013, 10:57 AM

الله يسعد اوقاتكم

الله يعينكم لسه ما شفتو شي

لولو ودودو صغاركم بثارو منكم ما تضلو تشكو منهم بعدين بزيدوها كمان

برلنت المفروض عندها طعم السنة اليوم بس ما اخذتها لانه من مبارح عندها حرارة

عزوز مغلبني التعب صار اضعاف مع الصياام

فوفو89

07-16-2013, 11:22 AM

مرحبا يا حلويين

كيفكم وكيف الصيام معاكم ؟ اكيد متعب :(

دودو
الله يعينك ع غلبة ابنك ويخليلك اياه يارب ،، بتذكر ستي كانت تحكي ل مرت عمي تحط نقط من محلول مي وملخ ع السرة ،، بيخليها تتنشف وتنزل بسرعه
اكيد انتي مفطرة لانه لسه ما ربعنتي صح ؟
الصيام كثير متعب ،، بضب تعبانة وجوعانة وعطشانة ووقت الافطار بشرب مي وشوربة وشوية سلطة والاكل باكل منه لقمتين ما بقدر اكثر من الاكل
خايفة الصيام يأثر ع صحتي وصحة بنتي لانه حاسة حالي ضعفت مع رمضان وزني امبارح وزنته طلع 55 كيلو :(

حلا
كيفك يا عسل ،، هاااااااااانت قربتي تولدي ،بالسلامة ان شاء الله وعقبالي لما اصير بالتاسع ،،انا كمان 10 ايام بفوت بالثامن ا ن شاء الله ،،
الصيام كثيير متعب

لولو
الله يعينك ع بنوتك ويخليلك اياها
انتي كنتي بدك تسمي كاترين ،،غيرتي ل صابرينا صح .؟
الاسمين حلوات تتهني
وعقبالي لما اشوف بنتي بخير وسلامة واسميها احلى اسم

ام عبدالله ،، حواء ،، نور ،، سما ،، باقي الصبايا
يسعد صباحكم ،،كيفكم وكيف رمضان معاكم

حواء مثالية

07-16-2013, 11:30 AM

هلا فوفو الله يسعد اوقاتك يا رب والف سلامة عليكي اذا مو قادرة تصومي لا تصومي او روحي على الدكتور تطمني انا رايحة الاسبوع الجاي اتطمن بكون فتت بالتاسع

~{{ DoDo }}~

07-16-2013, 11:50 AM

صبااااااح الفل

لولو
ههههه والله عنا نفس الشي
الافندي الله يحميه ويخليلنا اياه
اوقات رايق وبينام النهار كله
وبالليل بتبلش الحفلة هههههه
وبالنسبة لضهري والله كمان لهلا بيوجعي
وماما مش مخليتني اغيرلو لسا الحفوضة عشان ضهري
هو شكله من الطلق الصناعي بدو وقت ليروح
الله يعيننا عالتعب بس تعب حلو الحمدلله :)

حواء
سلاااامة قلبها برلنت وانشالله العمر كله اسم الله
هههههه لا والله ما بنشكي الحمدلله
هاي نعمة من ربنا يخليلنا اياهم بكل اوقاتهم حلوين
عقبال ما تقومي بالسلامة يارب حبيبتي

فوفو
الله يعينك يا قلبي
ازا ملاقية حالك تعبانة ومش قادرة لا تصومي
معك رخصة تفطري يعني عادي اهم شي صحتك انتي والبيبي
انا لسا ما ربعنت ولسا بينزل علي دم بس خفيف جدا
لانهم نضفوني منيح بعد الولادة بس شكلي مش رح الحق اصوم الا كم يوم بس
الله بيعين

يسعد اوقاتكم جميعا اشتقت لكتييييير صبايا بدون اسماء

حواء مثالية

07-16-2013, 12:26 PM

هلا دودو الله يخليلك اياه القمر نزلي صورة الو حابه اشوفو هالازعر الي كان ببطنك مره فوق ومره تحت بوسي عني واحكي لمامتك الله يعطيها الصحة والعافيه يارب ويخليلك اياها

برلنت بتطلع بسنان ياحرم كلهم طلعو ورى بعض

شو عاملين فطرة اليوم

ام عبدالله لولو

07-16-2013, 02:45 PM

مسا الخير ياصبايا
شو اخباركم حلا مبروك الهدية وان شاء الله وانتي قايمة بالسلامة يارب
دودو الله يسعدك يارب وانا كثير مشتاقلككم بس بتعرفو انا اول رمضان متزوجة هههههه وجديدة ع الوضع وكمان حمل الله يعينا يارب
لولو الله يخليلك اياه للحلوة يارب
حواء نورتي والله اشتقتلك كثيررررر سلامتها برلنت انا قبل يومين كان الي مراجعة عند دكتورتي الحمد لله كل شي تمام راسو تحت بس مش داخل الحوض بعدو وزوتو ممتاز
بدي اسالك كم وزنو ابنك
فوفو ازا ما بتقدري ع الصوم افطري انا الحمد لله بعطش بس الحمد لله مثبتة حالي ههههه

حواء مثالية

07-16-2013, 04:51 PM

هلا ام عبدالله وانا كمان مشتاقلك كثير

الله يخليكي يارب ويقيمنا بالسلامة

انا قبل شهر كان وضع ابني ممتاز كمان وكان الراس لتحت كانو وزنو كيلوو 600 غرام الاحد او الاثنين الجاي راح اروح على الدكتور اشوف شو صار معو مع الصيام

بس من عشر ايام وجاي اوجاع اشكال الوان الله وكيلك يالله هانت اسبوعين ثلاث بنكون مرتاحين ان شاء الله انا خايفه يجي يوم العيد ابني هههههههههههه وهيك حاسه انه راح يجي بالعيد

ام عبدالله لولو

07-16-2013, 05:41 PM

الله يسعدك يا ام عزو ويخليك وانا كثير مشاقة اليك والكل الصبايا الحمد لله انك بخير شو طابخة اليوم وكيف برلنت حاسة بالضيف الجديد الي جاي ولا عادي

وردة سورية

07-16-2013, 08:53 PM

http://forum.hwaml.com/t265001.html#post3296865

حواء مثالية

07-17-2013, 12:53 AM

حبيبتي ام عبدالله الله يخليكي يارب ويقيمك بالسلامة

برلنت حاسه كل ما احكيلها بوبو بتقلي دادا بدها تضربه انشاء الله ما تطلع بتغار

حواء مثالية

07-17-2013, 01:14 AM

صح اليوم عملت معكروووووووووووووونه بس جنان طلعت تمنيتكو معي

نعساااااااااااااااااانة ومش عارفه انااااااااااااااااااااااااااااااام

عزوز مصحصح الله يرضى علي

حواء مثالية

07-17-2013, 10:21 AM

صبااااااااااااااااااااااااح الخير كيفكم

حواء مثالية

07-17-2013, 11:53 AM

ولكوووووووووو وينكم هيك كثير اشتنالكم للمة يا بنات

احساس أنثى

07-17-2013, 05:16 PM

مسا الخير
شمرا للصبايا يلي فتحو الموضوع
وللصبايا يلي نبهوني

وبعتذر منكم كلكم لاني ماقدرت افتحلكم دردشه جديده
لاني كنت مشغوله كتيييييير بفتره مرض زياد وتعبي بالحمل والصيام

حواء مثالية

07-18-2013, 03:48 AM

هلا احساس نورتي المهم انك بخير

خير مالو ابنك ان شاء الله يكون هلا احسن

حواء مثالية

07-18-2013, 03:00 PM

.................................................. .................................................. .......

ام عبدالله لولو

07-18-2013, 04:09 PM

مساء الخير ياصبايا
احساس سلامنو زوزو ونورتي يا عسل شو اخبار حملك والصيام طمنينا عنك فحصتي شو طلع ولد ولا بنوتة هاتي شو عندك اخبار هههههه
حواء الله يسغد اوقاتك يا حلوة شكلو ما في عير انا وانتي بنداوم بالدردشة
لو بعرف انك بتدخلي بعد الفطور بفوت وبنضل تتاسلى مع بعض ههههههه شو طابخة اليوم وامبارح هههه صحتين على المعكرونة طيبة بس جوزي ما بحبه لهيك ما بطبخة بس هي زاكية ههه
حلا ودودو ولولو وفوفو وينكم دودو ولولو عندهم ضيوف جداد معدورات هههههه الله يخليكم اياهم يارب

حواء مثالية

07-18-2013, 05:06 PM

هلا ام عبدالله ما يحرمنا هالطلة والله اغلب الوقت بكون هون بشيك على الصفحة وما بلاقي حدا

اليوم راح اعمل مسخن ان شاء الله

كيفك انتي وكيف ابنك اخر مره رحتي على الدكتور كيف وضعو كان ووزنو

متى متوقعة تولدي ما حكالك الدكتور التاريخ المتوقع للولادة

ام عبدالله لولو

07-18-2013, 05:29 PM

ريتو صحة وهنا يارب ههههه ابعتيلي واحد ههههههه اليوم عاملة مخشي بدنجان
اخر مرة رحت يوم الاحد الي فات مان وزنو اللهم صلي ع النبي 2 كيلو 300 غرام حكتلي ممتاز كان فاضلي 10 ايام وبخلص الثامن هلا عندي ب23 الشهر مراجعة لانو بكون فتت بشهري واخر موعد للولادة 23 |8 بس ان شاء الله قبل هيك اولد ههههه

ام عبدالله لولو

07-18-2013, 05:31 PM

الحمد لله راسو نازل بس بعدو مش داخل الحوض انتي نزل ع الحوض ولا كيف

حواء مثالية

07-18-2013, 09:32 PM

الله يتمملنا على خير ياقلبي الله يحفظلك اياه ويفرحك بضمته يارب

انا الراس نازل عندي من السابع الي عشر ايام معي اوجاع غريبة وبطني نازل كثير انا حاسه انه نازل بالحوض ان شاء الله يوم الاحد او الاثنين بشوف اذا نازل بالحوض وبتطمن على وزنو وعلى كل شي

وبالنسبة للمسخن من عيوني احلى طبق الك يا ام عبود

جهزتي كلشي للولادة انا من شهر كملت كلشي وكمان اسبوع او عشر ايام ان شاء الله راح اجهز الشنته حماتي جابت من السعودية لعزوز جهاز بجنن بس ناسية اشتري فوط للبيبي هاد الي ضل عليا

اي مشفى راح تولدي ان شاء الله

انا بمشفى العائلة المقدسة "الفرنسي "

احساس أنثى

07-19-2013, 11:14 AM

صباحكم مبارك ببركة الجمعه
ام عبدالله :) انا صورت وفيا بنوته ولله الحمد :)
بس الحمل بالبناتمتعب جدا
بس مبسوطه كتيييير الحمد لله

انا اليوم فطوري انا وجوزي عند اخي
عامل مشاوي ( شيش طاووق/ وفخاد حبش/ وكباب/ وسنيتشل )
تفضلو ياصبايا

حلا الماس

07-19-2013, 11:47 PM

مسا الخير يا صبايا

كيفكم جميعا ؟؟ طمنوني عنكم

اعذروني ... صرت ادخل بشكل قليل بس والله الي كم يوم مريضة

تعب الصيام والأدهى وجع أسناني ولثتي ... صرلي ٤ أيام بعاني منها

ودكتور الأسنان ما أعطاني اي مضاد حيوي لأنو ممنوع أخد بالشهر التاسع وهيني مرابطة بستنا رحمة ربي
العلاج الوحيد الي نفع معي المضمضة بالميرمية وفركت لثتي بتوم

حواء
حبيبتي انا جهزت شنطة المستشفى قبل ١٠ أيام تقريبا ... وان شاء الله رح أولد بالمستشفى الأهلي بالخليل مكان ولاداتي كلها

أدعولي ربي يهونها علي ...... لأنو تعبت كتير وعم بعد بالأيام لتمضى وأولد وارتاح :)

حواء مثالية

07-20-2013, 12:43 AM

صحتين احساس مبروووووووووووك البنوته الله يجيبها بالسلامة يارب

حلا قلبي معك الله يكون الك معين يارب ويخفف عنك

انا اليوم ضايجة وبتقاتل مع حالي حاسة حالي بدي انخنق

إنبثاقة أمل

07-20-2013, 06:01 AM

صباح الخير

شو أخباركم حبيباتي

اشششتقتلكم جدا

حلولي ربي يهون عليك ويقومك بالسلامه ياااارب

الله يعينك ع وجع الاسنان شي صعب :(

حواء وام عبدالله

يلا ما ضل شي ربي يسهل عليكم ويفرحنا بسلامتكم

احساس

مبروك البنوته الله يتمم عليك ويقومك بالسلامه

باقي الصبايا شو أخباركم

احساس أنثى

07-20-2013, 11:01 AM

تسلمولي صبايا

حلا ربي بهون عليكي وتولدي بالسلامه ان شالله
حواء كيف انتي اليوم
انبثاقه اشتقتلك كتييييير كيفك

احساس أنثى

07-20-2013, 11:03 AM

بنات انا الي٣ ايام ماصمت
تعبانه كتييييير
لفحة هوا بصدري اول مره تجيني واول مره احس بوجعها
مش قادره اخد نفس
ولوز وسخونه بجد تعب

حواء مثالية

07-20-2013, 12:07 PM

يا هلا وغلا منورات انبثاقة واحساس

والله يا احساس الحمدلله ماشي الحال اليوم اهون نشكر الله

سلامتك يا قمر الله يبعد عنك ياحلوه

جارة القمر

07-20-2013, 12:44 PM

صباح الخير.....

كبريآء أنثى ـآ

07-20-2013, 02:39 PM

يسعد مساكن صبايا

في حدا هوووون ؟؟

أنا اليوم صحيت الصبح ولقيت بنتي بتكح مع إني مدفياها
وبجد خايفة كتييير عليها ومش عارفة شو بدي أعمل خصوصا الأطفال اللي بعمرها ما بياخدوا أدوية
كنت بدي أعمل بابونج بس خايفة يكون تقيل عليها
هلأ عمرها 35 يوم يااااااااريت تفيدوني شو أعمل

كبريآء أنثى ـآ

07-20-2013, 11:02 PM

شوووووووو لهلأ ما حدا رد علية وإلي من الظهر كاتبة إلكم

beboo

07-21-2013, 10:54 AM

مرحبا

كيفكم كل عام وانتو بالف خير

شو اخباركم كتيييير اشتقتلكم

شو ولدت دودو ولولو وباقى الصبايا يلى فاتو بشهرهم الله يقومهم بالسلام

ام مروان انت باي بلد

يعني الجو عندكو بارد ولا كيف

واذا بتكح البنت ضلك رضعيها لانه باذن الله في شفاء من كل شي

وادهني صدرها وبطنها بزيت زيتون ودفيه بشي تقيل والله يشفيلك اياها ويعافيها ياارب

باقى الصبايا طمنوني عليكم شو طابخين اليوم

انا اليوم عند بيت اهلى رايحة افطر ان شاء الله

حواء مثالية

07-21-2013, 11:04 AM

يسعد صباااااااااااحكم يا بنااات

نورتي بيبو

ام مروان انا بعرف الرضاعة منيحه بس اذا البنت كثير تعبانة الافضل تاخديدها عدكتووور

beboo

07-21-2013, 11:09 AM

يسعد صباحك حواء

كيفك وكيف حملك وكيف العسل برلنت ان شاء الله مو غيرانة

شو طابخة اليوم ؟

احساس أنثى

07-21-2013, 06:57 PM

ياسلام كل الحبايب هان :)
ام مروان عادي حبيبتي بيعطو الصفير بابونج مع نعنع بس كميه قليله كتير بس تريحها شويه

حواء مثالية

07-22-2013, 12:04 AM

حبيبتي بيبو انا بيخير شوفتك هون منوره الحمدلله كلشي تمام برلنت عقلها كبير الله يرضى عليها حملي تمام نشكر الله من يومين فتت التاسع

حواء مثالية

07-22-2013, 12:01 PM

.................................................. ................ عساكم بخير يا حلوات وينكم ما بتطلووووووووووووووووو

ام عبدالله لولو

07-22-2013, 12:53 PM

مساء الخير يا صبايا
شو اخباركم الجميع دودو ولولو ان شاء الله تكونو مش متقلبت من ضيوفكم الجدد
حلا الله يقومك بالسلامة يارب يلا هيني بنفس الشهر انا وياك وحواء
احساس منورة يا عسل
بيبو الله يسعدك يارب شو اخبارك واخبار الحلو الي عندك
حواء ههههه فضيتلك شو اخبارك رحت ع الدكتور ولا بعدك انا اليوم مفروض اروح بس كسلانة ههههه وخايفة لانو بسمغ باول التاسع بعملو فحص داخلي حكيت خلص ما بدي اروح هههههه مش عارفة صح هالكلام ولا لا وانا كمان بطني نازلة وكثير بحس بضغط تحت ..بديتي تمشي ولا بدري هاتي ما عندك هههه ازا نسيت شي

احساس أنثى

07-22-2013, 02:11 PM

ام عبدالله ازيك
مابيعملو من اول التاسع لما تعدي شوي بشوف اذا موسعه او لا ولا تخلفي بيسهل عليكي تولدي

ام عبدالله لولو

07-22-2013, 02:49 PM

الله يسعدك يا احساس الحمد لله بخير كيفك انت وزوزو ان شاء الله بخير والحمل كيف معك والصيام طمنتيني ههههه الحمد لله على كل حال شو فطورك اليوم ما سالتك شو بدك تطبخي بعرف مالك بالمطبخ الله يخليك حماتك يارب

حواء مثالية

07-22-2013, 04:27 PM

هلا ام عبدالله كيفك شو اخبارك نورتي ياقمر ما تغيبي كثير هلا نحنا بساعة الصفر

انا اليوم المفروض اروح على الدكتور كمان بستنى بتلفون من السكرتيرة اذا الدكتور راح يداوم بالليل ولا لا

بالنسبة للمشي لسه ما بلشت بس طول النهار بركض ورى برلنت هاي احلى رياضة ومشي الي بعدين مين قلك بعملولك فحص داخلي مستحيل يعملوا الا ليكون معكي طلق ووجع يعني هلا لا

اليوم حاسة حالي عطشانة ومن يومين وقفت البيبي اسبرين حكالي الدكتور من بداية التاسع بتوقفي جهزت الشنظه لاني حاسه حالي مش مطولة بس والله كل الاوجاع بتجي بالليل لما اجي بدي انام ثقل وتعب وانسي

احساس نورتي ياقمراية كيفك شو اخبارك

اليوم مش عارفه شو اعمل مبارح كان عندي عزومه وفي اكل بس زوجي بحكيلي ااعملي شي كمان

ديدو أم عزمي

07-22-2013, 09:46 PM

مرحباااااااااااااااا
كل عام و انتم اقرب الى الله
صحيح انه انا متأخرة عليكم
بس انا عند اهلي استغليت الفرصة قلت اهنيكم برمضان هههههههههههه
حواااااااااااااء ---------- و جاااااااااااارة
شفتكم كاتبين كلام حلو عن دودو و سماااااااااااااا كمان كاتبة
تسلمو عنيك الحلوة
عموما كلكم واحشيني موووووووووووت
بينك روز
حواء مثالية
احساس انثى
غموض انثى
عيون المها
سما
جارة القمر
و مسك السنين
و لولو
و كل البنات اللي كانوا على أيامي ههههههههههههههه

ديدو أم عزمي

07-22-2013, 09:47 PM

حواااااااء
ما شاء الله برلنت حلياااااااااانة و صايرة امووووووووورةمتل مامتها الحلوة سموحة

حواء مثالية

07-22-2013, 10:45 PM

هلا بالغالية كيفك ياقلبي منورة ام عزمي الله ما يحرمنا هالطلة وتضل على طول

عيونك الحلوه الله يسعدك ويخليلك بنتك يارب

بوكل ببطيخ الا بدو يتفضل

حلا الماس

07-22-2013, 11:58 PM

مسا الخير يا صبايا

كيفكم طمنوني عنكم ؟؟

إحساس
مبروك البنوتة ... الله يتمملك على خير وتقومي بالسلامة يا رب

ام عبد الله
يلا هانت يا قلبي ... ما بقي إلا القليل الي وبعدها بيجي دوركم انتي وحواء

حواء
صحة عالبطيخ ... انا عم بأكل صبر اتفضلوا :)

ام عزمي منورة حبيبتي

باقي الصبايا وين غاطسين ؟؟

فوفو وسما ودودو ولولو ونور وانبثاقة وجارة

يا رب الجميع يكون بخير

حواء مثالية

07-23-2013, 12:55 AM

يا هلا بحلا نورتي كيفك اليوم شو ما صار عندك بوادر ولادة

متى متوقعة تحمليها انا حابه اعملها على العيد هههههههههههههههههه كانه بخاطرنا يعني الله يقيمنا بالسلامة يارب وتكون ولادتنا سهلة

دودو وجارة ولولو لولو حمادة واحساس بينك روز غموض انثى انبثاقة وباقي البنات والله حاسه حالي مضيعة شي بدونكم حابه نرجع زي اول ما تبخلو علينا

ام عبدالله لولو

07-23-2013, 02:58 PM

مساء الخير يا صبايا
شو اخباركم اليوم شو عاملين فطرة اليوم
حلا وحواء وانا مع بعض ههههه الله واعلم مين قلبل االتانية بس احساس حلو اما دخلت التاسع صرت كل ما احس بشي احكي بدي اولد هههه انا بدي اطبخ مقلوبة وانتو شو ناوين

حواء مثالية

07-23-2013, 04:00 PM

هلا ام عبدالله بالسلامة ان شاء الله انا مثلك بس والله عندي وجع مستمر كمان ساعتين رايحه على الدكتور بطمنكم

صحتين على المقلوبه ا

انا اليوم عازمه بنات حماتي على كبسة وسفيحة تفضلووووووووووووووووووووووو

ام عبدالله كيف حركة البيبي بدي اسالك انا ايام بكون نشيط وايام نايم

ام عبدالله لولو

07-23-2013, 04:55 PM

الله يسعد مساكي يارب صحتين على السفيحة والكبسة ان شاء الله بتروحي وبترجعي بالسلامة انا هون بعد الفطور بستناكي مش تطنشي ههههههه والله بدك الصراحة حركة اسم الله عليه مابهدى حتى اني ايام بحكي كيف بحكو انو بتقل الحركة هاد زايدة حركنو اللهم صلي على النبي ههههه شكلو يا جاية كثر ملايح الله يفرجه على الجميع شو اخبار برلنت مغلبتك ماشاء الله عنه والله دمه خفيف وبس اسوف صورته بضحك لضحته ماشاء الله عنه كله خفة دم

حلا الماس

07-23-2013, 05:52 PM

مرحبا بنات

حواء وأم عبد الله منورات

والله وانا متلك يا ام عبد الله الحركة اسم عليه نشيط كتير وما بيكن بس يا حرام. اليوم ما تحرك شكلو جوعان ونايم لأنو انا اليوم راح عليي السحور :(

حواء انا حاسة أني رح أولد يوم عزومة دار حماي خخخخخخ عاملين عزومة كبيرة بالصالة يوم الخميس الجاي على آخر موعد الي ١ / ٨ والله هيك حاسة ههههه

صحتين يا صبايا عالاكلات الزاكية .... انا اليوم معزومة بدار خالي انا وجوزي وولادي رح اتركهم لحماتي عاملة مقلوبة ورح تعمل حساب ولادي بالأمل عندها

اتفضلوا بعد الإفطار عاملين قطايف ممممممم

ام عبدالله لولو

07-23-2013, 06:02 PM

منورة يا حلا شو اخبارك صحة وهنا ع العزومة والقطايف
بالك راحة العزومة وخاصة الي مثلنا بشهرهم ههههه والله بشتغل شوية وبقعد شوية هههه بعين الله شكلك بتاخدي كل شهرك بالعادة ولا اول مرة

حلا الماس

07-23-2013, 06:24 PM

حبيبتي ام عبد الله

النور نورك ... اه الله يكترهم العزايم خلي الواحد يرتاح

اه انا بالعادة بكمل شهري كلوا وبولد على ميعادي ... وهيك حاسة كمان المرة هاي
خليني أصوم أيام اكتر وما أفطر .... بس اليوم انا كتييييييييييييييييير عطشانة وخصوصي أني نزلت عالسوق اليوم شريت لبناتي شوز للعيد طبعا شريتلهم لبسة من قبل أسبوع خليني الحق أجهز كل شي قبل ما اولد

نور العمر

07-23-2013, 09:29 PM

كيفكم صبايا ... شو اخباركم ..؟

حواء وحلا وام عبد الله ان شاء الله يااارب تقومو بالسلامه وتكون ساعه سهله عليكم يااارب .. حواء ان شاء الله تكون ولادتك طبيعي ةما تكرري القيصري مره تانيه ونفس الشي حلا وام عبد الله ياارب تكون ولادتكم طبيعي ...

انا صارلي اسبوع وانا من دكتور لدكتور لانو بنتي صار معها اسهال وبعدها صار جفاف ولهلا بنعالج فيها بتاخد كل يوم ابره غير الادويه التانيه ياااحرام صارت كتير ضعيفه وكمان يلي زاد انو ابني اليوم من الظهر كمان صار معو اسهال وبستفرغ كل شي بياكلو او يشربو ما بعرف شو القصه من اول ما سكنت بالبيت الجديد وانا ما عرفت ارتاح من مرض لمرض بحكي يااربت ما سكتا قبل رمضان لوو اجلت النقل احسن ... بس الحمد الله على كل حال ...

احساس مبروك البنوته وان شاء الله تقومي بالسلامه يااارب ..

باقي الصبايا ان شاء الله تكونو بخير وتكونو ب احسن حال ..

اشوفكم على خيرر .. بدي روح صلي ..

جارة القمر

07-23-2013, 09:47 PM

يسعد مسااااااااكم

شو اخباركم؟؟؟

احساس:

كيف صرتي اليوم

حواء:
شو صار معك ؟؟

شو بنات حضرتو للعيد ؟؟؟

حواء مثالية

07-24-2013, 01:37 AM

سلام عليكم كيفكم يا حلوووووووووووووات شو اخباركم

الله يخليكي يا ام عبدالله وعقبال ما تشوفي ضحكت عبدالله ويملا عليكي حياتك برلنت بتسليني بس ما شاء الله ما بتهدى بدها تضل تلعب

اليوم رحت على الدكتور والحمدلله كلشي تمام وزن البيبي ممتاز والراس لتحت بس لسه مش نازل بالحوض حكالي امشي واوكل تمر

حلا الله يقيمك بالسلامة يارب

نور العمر سلامتها بنتك شكلو من المي خلي زوجك يشوف خزانات البيت اذا نضيفه ولا لا وسلامة اولادك

جارة يا هلا وغلا ياقمر انا حضرت من زمان للعيد بس بدي اشتري الي بلوزة يوم جهزت للولادة جهزت للعيد بس ضل علي حلويات العيد والضيافة وهدول جوزي بجيبهم الله يرضى علي

احساس أنثى

07-24-2013, 11:07 AM

يسعد صباحكم ياقمرات

ام عبد الله / مبروك دخولك التاسع عقبال ماتقومي بالسلامه

حلا/ الله يبارك فيكي يارب

نور العمر / الف سلامه عليهم اطفالك هيا فتره من الجو كل الصفار هيك ابني نشف ريقي الو اسبوع كان تلوث من الجو

جاره / شكرا ع سؤالك ياقمر الحمد لله احسن بكتير واليوم صمت الحمد لله بعد اسبوع افطار
ملابس العيد ع الاسبوع الجاي حنزل ان شالله

حواء / كيف برلنت سارت تمشي زوزو لليوم مامشي بس بيطلع بالاسنان سن ورا سن

حواء مثالية

07-24-2013, 12:57 PM

سلام عليكم كيفكم شو اخباركم

هلا احساس نورتي برلنت بتوقف لحالها بتنقل خطوة وبتوقع هي بتستسهل الحبي بتلاقي حالها اسرع وبالنسة للاسنان تساليش الله يعينهم عليهم لهلا ما اعطيتها طعم السنة عشان سنانها كانت سخنانة ومرشحة لهلا

دودو ولولو مو مبينات شكلهم اطفالهم بدللو فيهم هههههههههههههههههههه

beboo

07-24-2013, 04:16 PM

مسا الخير كيفكم

مبروك لكل يلى فاتو التاسع وعقبال قومتهم بالسلامة

احساس مبروك البنوتة

نور الف سلامة عليهم طيب شوفى شو الاتنين اكلو او الميا يلي شربوها والله يقوملك اياهم بالسلامة يارب

دودو ولولو وييييينهم اشتقتلهم

باقى الصبايا نفر نفر كيفكم

وشو طابخين اليوم

حواء مثالية

07-25-2013, 12:44 AM

يسعد مساكم

اشتقتلكم كلكم يا حلواااااااااااااات
قرب العيد يالله تعالو بكفي قرب يخلص رمضان وانتو كسلانين ومش مبينين

حلا الماس

07-25-2013, 11:41 AM

صباح الخير

صباح الطخ والفلين والعلامات العالية والتوجيهي وزمامير السيارات

كيفكم اليوم ؟؟ شو أخباركم ؟؟

مين عندو ناجح توجيهي

بنت عمي جابت ٩٢ علمي وبنت خالتي ٨٥ أدبي وخلص ما في غيرهم

حواء وأم عبد الله طمنوني كيف وضعكم مع الصيام بالشهر التاسع ؟؟

شو طابخين اليوم يا صبايا ؟؟ محتارة كتير ومش عارفة شو بدي اعمل !! أعطوني أفكار

حواء مثالية

07-25-2013, 01:58 PM

يا هلا بحلا شو اخبارك مبرووووووووووووووووووووك للي نجحو عندكم

بنت عمي جابت 85 وبنت خالي بس ما بعرف معدلها

الحمدلله الصيام تمام ولهلا وضعي كويس

ام عبدالله لولو

07-25-2013, 02:37 PM

مساء الخير صبابا

والله من مبارح حاسة وجع رحت المستشفى وحكو طلق خفيف

ومن مبارح الصبح وجع يروح ويجي

حلا الماس

07-25-2013, 05:23 PM

هلا بحواء وأم عبد الله

حواء
الله يبارك فيكي يا رب ومبروك للي نجحوا عندكم كمان ...

طمنتيني عليكي عشان الصيام انا والله صرت اتعب كتير وبعد الإفطار بتصيبني دوخة وما بقدر أقوم ... والحركة إلها يومين معدومة من مرة رحت بارح عالمستشفى عشان الحركة وعملولي تخطيط وحكتلي انو نبض البيبي منيح بس الحركة ضعيفة واحتمال انو من الصيام ... قالولي كلي أشياء حلوة وراقبي الحركة
وجوزي وأمي مصرين أني ما أصوم عشان اقدر أطلق وأولد ... وسالنا الشيخ وحكالي بحالتك يجب انك تفطري وبتعيدي بعد الولادة وهي انا اليوم أفطرت وبرضو حاسة حالي تعبانة والحركة خفيفة ...

ام عبد الله
سلامتك حبيبتي ... هادا هو التاسع كلو أوجاع بيعين الله ربي يهونها على الجميع ونقوم كلنا بالسلامة يارب

ام عبدالله لولو

07-25-2013, 05:36 PM

اهلا ام خليل الله يقيمك بالسلامة يارب تسلني حبيبتي ازا ع الصيام والله عادي بس اليوم كثير حاسه بعطش وتعب وارهاق وكسل ههههه مش مخليه شي
امبارح صحيت بطني وطهري وجع فطيع والله جوزي فكرني رح اولد حجزلي عند الدكنورة بس اما شافني هيك اخدني ع المستشفى غملولي فحص داخلي لقيو في نص سنتي وكمان تخطيط للبيبي طلع ممناز
حلا بالنسبة للحركة كثير كويسة بس انتي بجوز لانو نزل الحوض خفة حركتو لانو بديق المكان عليه الله يتمملك ع خير يارب

ميوووش محمد

07-25-2013, 06:00 PM

السلام عليكم ...

كيفكم صبايااا . بدي اسال بس مين من غزة ؟

كبريآء أنثى ـآ

07-25-2013, 09:27 PM

يسعد مسااااااااااااااكن
انا من غزة ليش بتسألي ؟؟؟؟

beboo

07-25-2013, 09:35 PM

مسا الخير

كيفكم

الف مبارك لكل الناجحين بتوجيهي

وانا كمان من غزة ؟؟

كبريآء أنثى ـآ

07-25-2013, 09:51 PM

هلا بيبو

يسعد مساكي
انا منيحة .. إنتي كيفك ؟؟ \
والله طق قلبي من الزهق مش عارفة شو أعمل لأتسلا وأنا وبنتي لحالنا بالبيت

beboo

07-25-2013, 09:54 PM

هلا ياعسل

ياوردى عليا تعي عندى غيرى جو

اقرى قران اذا بتقدرى

كبريآء أنثى ـآ

07-25-2013, 09:56 PM

هههههه يااااريت بس إنتي فين لو قريبة بآجي هع هع
ممم اليوم إلي 40 يوم والادة وصارلي فترة بصوم بس اليوم صحيت من النوم لقيت بينزل علية دم بني غامق كتيير
ولهلأ بنزل علية وأفطرت وفي معي مغص أسفل بطني ما بعرف ليش هيك صار معي ؟؟؟

beboo

07-25-2013, 10:03 PM

هادا بيكون دم الاربعين ولا هو الستين هههه مابعرف شو بيقولو عليه

ياستي هينا بنحكى هون

شو افطرتو اليوم

كبريآء أنثى ـآ

07-25-2013, 10:09 PM

مممم يعني عادي ؟؟
أنا بصراحة خايفة كتيير لأني عملت شغلة وندمت عليها
من يوم الإثنين بالأسبوع هاد بلشت آخد حبوب منع الحمل أعطوني إياه بعيادة الوكالة
بس بصراحة ندمت اللي أخدته خلص بدي أوقفه
صح مابدي أحمل بالفترة هاي بس بدي أشوف وسيلة غير منع الحمل ...
أفطرنا رز وفراخ وإنتي ؟؟

beboo

07-25-2013, 10:13 PM

اها ممكن بردو من حبوب منع الحمل بس سالتى لتكون بتاثر على الحليب

لانه في حبوب خاصة للرضاعة

صحة والف عافية

واحنا اليوم شنيتسل

كبريآء أنثى ـآ

07-25-2013, 11:43 PM

لا لا هاد الحبوب خاص للي برضعن
بس أنا بدي أوقفو خلص ما بدي آخد حبوب بتاتا
لأنه ضررهم أكتر من نفعهم قريت عنهم ع النت وندمت كتيير اللي أخدتهم 4 أيام
خلص بدي أوقفوا أحسن شي

يلا صحة وعافية يا عسل

حواء مثالية

07-26-2013, 04:43 AM

سلا ....................... 3ا ب4رف لي صار يطل4 بدل الا-رف 42دي ارقا3 3ي2 ب14رف +يف اصل- 5ال6لل

احساس أنثى

07-26-2013, 11:21 AM

جمعه مباركه ياحلوات

حلا / حواء
مبروك للناجحين عندكم عقبال عند الجامعه

بيبو / كيف ابنك بطل يعزبك

ام مروان/ في ناس بيضل عليهم التفاي اكتر من ٤٠ يوم اشربي ساخن عشان ينزل كل الدم الفايد
والمغص كانو يحكو عشان الرحم برجع مكانو

ام عبدالله/ شكلها قربت عندك ربي يقومك بالسلامه

نور العمر

07-26-2013, 01:01 PM

مسا الخير ... جمعه مباركه عليكم جميعا ..

انا اختي امبارح نجحت ومعدلها 80
مع انو السنه سلي فاتت كان معدلها ب ثاني ثانوي 94 واخدت تفوق بس هو التوجيهي بكون حظ والحمد الله انو نجحت

والف مبروووك لكل الناجحين ويلي ما نجحو ان شاء الله بعوضو السنه الجاي ...

كيفكم مع اخر ايام برمضان وشو استعددات العيد انا شريت للعيد قبل رمضان وجهزتلو كل شي قبل رمضان بس بدنا نشتري حلو وضيافه وطبعا الكعك .. بتعملو كعك بالبيت او تشترو جاهز ..؟؟

وبدي طريقة المعمول اذا بتعرفو طريقتها ..

ميوووش محمد

07-26-2013, 01:01 PM

بدي اسالكم بس عند اي دكتور بتابعو ؟؟ ومين افضل دكتور

انا بتابع عند الدكتور ابراهيم الهباش وعملت عنده تلقيح صناعي والحمد لله زبط معي وانا الان حامل بالشهر التاني

ياريت تنصحوني اكمل عنده ولا في حد اشطر اتابع عنده مع العلم انه صاحب بابا وانه بيهتم فيا كتير .. بس انا بدي الافضل لانه الدكتور اللي بدي اتابع عنده بدي اولد عنده .؟..

حواء مثالية

07-26-2013, 02:58 PM

سلام عليكم كيفكم شو اخباركم عساكم بخير

الله يبارك فيكم يا رب

عقبال اولادنا يكونو اوائل يا رب

beboo

07-26-2013, 05:49 PM

مسا الخير كيفكم

جمعة مباركة علينا وعليكم

احساس لا والله بطل يغلبني بس صار يجنني هههههههههههههه\

لانه طلعو السنونين يلي تحت وباقى يلي فوق بدهم يطلعو فمطلع عيني الله يهديه

صبايا شو فطوركم اليوم؟

ام عبدالله لولو

07-26-2013, 09:48 PM

مساء الخير يا صبايا
شو اخباركم بيبو حواء وام مروان واحساس منورات دودو وحلا ولولو نعا طمنونا عنكم باقي الصبايا يسعد مساكم يارب

حواء مثالية

07-26-2013, 11:44 PM

هلا ام عبدالله منورة كيفك شو اخبارك انا الحمدلله تمام هيني حكالي الدكتور امشي وكسلانه

انتي شو صار معك ان شاء الله وضعك مستقر شو كيف الوجع الي اجاكي انا معي وجع مثل وجع الدورة قوي صارله اكثر من عشر ايام بروح وبجي انتي هيك

ام عبدالله لولو

07-26-2013, 11:54 PM

الله يسعد مساكي يارب اه والله يا ام عزو وجع زي الدورة بروح وبيجي وهيني بمشي وباكل تمر هههههه انتي كيف كم وزن ابنك اما روحتي

حواء مثالية

07-27-2013, 12:15 AM

شكلها قربت الي والك الله يتمملنا على خير يارب

انا ابني وزنه 2600غرام ماشاء الله

حكالي الدكتور يمكن يجي ثلاث كيلوا اكثر شوي

جهزتي شنطة المشفى ولا لسه

~{{ DoDo }}~

07-27-2013, 12:18 AM

مسا الخيييير صبايا كيفكم
طمنوني عنكم جميعا والله اشتقتلكم بس عمورة ورمضان ماخدين كل الوقت
بتعرفوا اديه الوقت ديق برمضان وبوجود بيبي بيطير طيراااان
انا الحمدلله بخير عم بتعود عالوضع الجديد والبيبي بخير بس بيخوفني عليه مرات لانه بيقشط من تمه حليب مرات
وبيتشردق كتير بحسه ريقه ديق ما بعرف اذا فهمتوا علي ودكتورته بتضل تقلي طبيعي
بس انا ب خاف كتير بحس حالي بدي اضل مركزة ومتبعه معه 24 ساعة حتى وهو نايم
بجد المسئولية والخوف اشي كبير الله يخليلنا اياهم ، قولولي خبراتكم بموضوع الشردقة والاستفراغ هاد
هو مش استفراغ كامل بس هيك شوية حليب بينزل من تمه او منخورو مع اني بدشيه او بكرعه يعني بعد الرضاعة

حلا وام عبدالله وحواء قربتوا الله يتمملكم على خير يااااااارب هانت طمنونا على طول عنكم
احساس مبروك البنوتة الله يقومك بالسلامة حبيبتي

بيبو وام مراون كيفكم
وميوش الله يتمملك على خير

ولولو اين انتي يا ام صابرينا تعي حدتينا عن مغامراااااتك

مين كمان جارة اشتقناااااالك

وباقي الصبايا سلاماتي الكم جميعا :)

ميوووش محمد

07-27-2013, 12:29 AM

اممممم سوري اني دخلت معاكم ع الخط بس شكلكم هان كلكم صحبات وما بتردو الا ع بعض ..

ع العموم شكرا الاكم كلكم

حواء مثالية

07-27-2013, 12:33 AM

يا هلا بام عمورة نورتي والله الك وحشة يا عسل

بالنسبة لشردقة والاستفراغ طبيعي واغلب الاوقات بكون في بداية الرضاعة عشلن بكون الحليب كثير بالصدر والبيبي ما بلحق يبلع كل الكمية او يتحكم فيها عشان هيك انتي لازم تخففي ادرار الحليب وتخلي البيبي ياخد براحته ارفعي صدرك بين اصبعك الشاهد والوسطة وخلي راس البيبي عالي حطي تحت رجلك مخدة ما بعرف اذا افهمتي علي ان شاء الله اكون فدتك

حواء مثالية

07-27-2013, 12:36 AM

ميوش حبيبيتي شو سالتي انتي والله ما انتبهت

بعدين الفترة هاي البنات مختفيات

عيوني الك انتي اامري

ام عبدالله لولو

07-27-2013, 12:40 AM

هلا ام عمر وين هالغيبة الله يخليلك اياه يارب والله هيني بتعلم منكم ههههه لسه ما بعرف بالواضيع هاي
حواء انا جهزنها للشطنة من اسبوعين تقريبا الله يقومنا بالسلامة يارب
ميوش الله يسامحك يارب بس انتي سالتي ع بنات غزة انا من الضفة يعني لو بدي ارد ما بفيدك بالعكس الكل هون بجاوب واي شي بدك اياه اساليه وشوفي ازا بتقدر افيديك اكيد ما بقصر

~{{ DoDo }}~

07-27-2013, 12:50 AM

حواء

تسلميلي يارب
اه فهمت عليكي انا هيك بعمل
بس الفكرة انه بيتشردق بعد الرضاعة بشوية وقت
ما بعرف يمكن بيكون راضع زيادة
ومرات بيتشردق بريقه هههه يعني وهو بيبلع ريقه
والله قصص وحكايا الافندي

ام عبدالله
ولسا ياما تشوفي وتسمعي وتتعلمي قصص
انا متلك ولدت وانا متل الاطرش بالزفة
بس علموني كل شي بالمستشفى
وامي الله يخليلي اياها قامت بالواجب وزيادة

الله يقومكم بالسلامة ويتمملكم ع خير يا حلوييييييين

ميوش
ان شاء الله بنات غزة يفيدوكي
انا من غزة بس مقيمة بالامارات :)

حواء مثالية

07-27-2013, 12:57 AM

وانا ياميوش ما انتبهت

ام عبدالله الراس نازل عندك بالحوووووووووووووض

ميوووش محمد

07-27-2013, 01:00 AM

تسلمووو صبايااا ما قصرتوو

انا بكرة بدي اروح ع الدكتور عشان اسمع نبض الجنين ياريت تفيدوني باي اسبوع ممكن اسمعه

انا بكرة بابده باول يوم بالاسبوع التامن ..

حواء مثالية

07-27-2013, 01:00 AM

طيب يا دودو دايما نيمي على جنبو وكل شوي اتفقدي بس يصير عمروا ثلاث شهور بصير كلشي الو اسهل

مامتك روحت ولا بعدها عندك

حواء مثالية

07-27-2013, 01:09 AM

ميوش الله يطمنك يا رب النبض بكون بعد اربعين يوم من الحمل

لولو الفلسطينية

07-27-2013, 01:28 PM

مسا الخيرات
شو الاخبار ؟؟
ام مروان
انا زيك .... الدم انقطع نهائيا بعد الولادة باسبوعين و ما نزل بعدهم ولااااا نقطة ... و هلا صارلي والدة 45 يوم بس في اليوم الاربعين نزل نقطة دم بني غاااامق و انا متاكدة انها مش دورة و لا الي بحكو عنها ردة الاربعين او دم الاربعين .... و لحد امبارح و هو بينزل بس يعني قليييل .... يعني أن في اليوم يا دوب نقطة او نقطتين بس .... و خجلانه اتصل على دكتوري أسأله .... بس امي بتحكيلي عادي هادا طبيعي .... ان شاء الله خير ... حتى انا افطرت يومين لما شغته رجع نزل بس بعدين لما اتاكدة انها مش دورة ارجعت اصوم
ام عبد الله و حواء شكلكو قربتو .... الله يقومكم بالسلامه يااا ب و يهونها عليكم
حلا
وينك ؟؟ لتكوني عملتيها يا بنت ... الله يقومك بالسلامه يا احلى ام خليل
دودو
ههههه الحال من بعضو ... انا بتتي نفس الشي و الدكتور بقول طبيعي .... اه و الله بدهم متابعه .. انا ما بنام ... حتى لما بنام بضل قلقانه و بصحا من اي صوت لو كان خفيييف ... بس بصل انيمها على جوانبها عشان لو تشردقت ما تتعب و ما ترجع تبلع الاشي الي بدو يطلع
و هيها كل يوم بحسها كبرت عن الي قبلو .... بس صارت زي البطة ... بتزنن ههههه
الله يخليلنا اياهم يااا ب
ميوش
النبض بيبان من 6 -8 اساببع .... يعني ان شاء الله بهاي الزيارة بتشوفي نبض البيبي و بتتطمني عليه
احساس
الف مبروك البنوتة .... ان شاء الله بتقومي بالسلامهو بتفرحي فيها هي و زوزو
باقي الصبايا كلكم اشتقتلكم
يسعد مسا الجميع

لولو الفلسطينية

07-27-2013, 01:31 PM

بنات بدي اسألكم
انا من بعد ما ولدت بفترة لهلا و انا بحس بوجع في بطني من تحت بس لما بقح او بعطس
ههههه ... حد منكم مر معها هالاشي ؟؟

حواء مثالية

07-27-2013, 03:38 PM

يسعد مساكم يا هلا بام صابرينا نورتي

ما تغيبي والله اشتقنالك حلا مبارح كانت فاتحة الفيس تاعها ما ظني عملتها

اليوم مصدعة انا

كبريآء أنثى ـآ

07-27-2013, 09:35 PM

مرحبااااااااااا
لولو .. اذا تامم بنزل عليكي دم بني حرااام تصومي مش جايز صيامك لازم تفطري
واذا ع قصة المغص أنا متلك بصير معي هيك ولدرجة كمان إني لما بقعد وبطول بالقعدة برضو بتوجع من ورا مابعرف لييييش
انا باليوم 40 نزل علية دم بني غامق كتييير كتييير وتاني يوم نزلت دورة عادية دم أحمر ولهلأ بتنزل يعني مفطرة ههههه

احساس أنثى

07-27-2013, 10:47 PM

مساكم جوري ياحلواااات
كل باسمه :)

ميوووش
انا من رأيي مادام الدكتور الهباش متابع حالتك وكويس خلاص لا تغيري وتخربطي حالك
خليكي عليه / كل دكتور والو خبرتو انا بتابع بمستشفى الاهلي عند دكتور اياد الحديدي ارتحت الو حسيتو شاطر
ربي يتمملك ع خير

حواء مثالية

07-28-2013, 12:17 AM

يسعد مساكم

كيفكم يا بناااااااااااااااااااااااااااااااات

حلا الماس

07-28-2013, 11:03 AM

صباح الخير للجميع

كيفكم ؟؟ طمنوني عنكم ؟؟

وضعي حاليا تعبانة كتييييير وبستنى ساعة الولادة ... عم تجيني أوجاع كل يوم بس مش منتظمة وخفيفة

أدعولي الله يهونها عليي لأنو بجد تعبت مش قادرة

تحياتي لكل الصبايا ... :)

نور العمر

07-28-2013, 11:22 AM

صباح الخير ... كيفكم وشو اخباركم ؟..

حلا ان شاء الله تقومي بالسلامه يااارب .. وتكون ساعه سهله وتشوفي ابنك بحضنك بصحه وسلامه يااارب ..

وكمان حواء وام عبد الله يااارب تقومو بالسلامه يااارب ويهونها عليكم ...

جارة القمر

07-28-2013, 06:06 PM

يسعد مساااااااااااكم

شو افطاركم اليوم؟؟

كبريآء أنثى ـآ

07-28-2013, 06:13 PM

حلا ... ربنا يهونها عليكي وتقومي بالسلامة إن شااااااء الله إنتي والبيبي ..
ممم اليوم إفطارنا .. زوجي جاي على باله مغكرونة بالباشميل وعملت شوربة وفي عندي طبيخ بازيلا من إمبارح وطبعا عملت سلطة

احساس أنثى

07-29-2013, 12:10 AM

يسعد مساكم
حلا ربي يقومك بالسلامه يارب
جاره احنا افطارنا كبده وقوانص وبطاطا ولبن وباذنجان( من الاخر مقالي)

~{{ DoDo }}~

07-29-2013, 01:33 PM

كيفكم صبايا
فتت اطمن على حوامل اخر شهر
الله يقومكم بالسلامة جميعا ويهونها عليكم يارب
يلا طمنونا عنكم يوم بيوم

حلا حبيبتي الله يهونها عليكي ويقيمك سالمة ويوصل يوسف بالسلامة يارب

حواء وام عبدالله ان شاء الله بتهون وبتقومولنا سالمين وبتفرحونا بالاخبار الحلوة

فوفو زمان ما بينت ان شاء الله تكون بخير

واحساس سلامتك الله يهونها عليكي يارب

لولو اكيد مغلباكي صابرينا متل الافندي عندي ما بنيمني الليل طمنيني عنك

انا والله ابني صرلو كم يوم مغص وعياط مش طبيعي كتييييير وبقعد بعيط معه
ما بينام طول الليل بيتلوى من المغص وبينام دقيقتين وبيصحى ع صوت واااااااحد
جد اعصابي هالكم يوم تلفااااااانة ومرهقة ارهاق مش طبيعي
بس الحمدلله شو بدنا نعمل ، الله يهونها عليه وعلي
قولولي تجاربكم بالنسبة لمغص الاطفال ، هو يومين وبيكمل شهر
شو بتنصوني اعمله او اعطيه ليرتاح عن تجربة

كبريآء أنثى ـآ

07-30-2013, 03:05 AM

يسعد صباحكن ...
دودو ... أنا صار معي متل حكايتك مع بنتي وكان عمرها شهر
وكانت تعيط على نفس واحد يمكن شي 4 ساعات متواصلة وماترضى تسكت واذا سكتت من أقل صوت ترجع تعيط
وصرت أعيط عليها وما كنت بعرف إنها ممغوصة وأخدتها على طول ع الدكتور لما شفتها مارضيت تسكت وطلع معها نفخة
وكتبلي دوا نقط أقطرلها بتمها وبتروق عليه كتييير وصرت لما أشوفها صارت تعيط وماتسكت على طول أحطلها بتمها الدوا
اذا بدك بكتبلك اسمه هههه لأنه أنا بعيدة عنه هلأ

كبريآء أنثى ـآ

07-30-2013, 11:09 AM

يسسسعد صباحكن ... ^ـ^

ميوووش محمد

07-30-2013, 12:19 PM

صباح الخير ...

بنات بدي اسال .... في صبايا الله يجزيهم الخير قالولي انه النبض بيبان بعد 40 يوم .. انا امبارح رحت ع الدكتور وما قالي انه في نبض ولما ساته ع النبض قالي ب 12-8 بيبان يعني بيكون لي شهرين عامله التلقيح الصناعي .. مع العلم انه طمني على البيبي وع كيس الحمل وقالي كل شي تمام وقلل حبات التثبيت لاتنين مع اني كنت اخد 3 حبات باليوم ...

اممم مع اني شفت ع الشاشه مكان ما كان يقيس للجنين طوله شي بينبض بس لما سالته ما قالي انه اه ولا لاء ..

طمنوني الله يطمن بالكم

نور العمر

07-30-2013, 12:23 PM

هلا صباح النور .. كيفك ام مروان وكيف البنوته ...

مالكم من امبارح ع نفس الصفحه ...

كيفكم وشو اخباركم ..

وشو اخبار الحوامل حلا وام عبد الله وحواء ..؟