تقومي بالسلامه يارب ..
قسمي اغراضك عشان لاتنسي بورقه ..
يعني .. اول شي ..
البيبي - تجهيزاته من والى .. من ملابس وامور تخص الرضاعه كالرضاعات و الحليب وخلافه وكذلك اشياء الحمام .. تلاقي في قسم التجهيزات اللي بيفيدك
انت - ملابسك الخاصه بالنفاس .. ارواب استقبال - وقمصان للنوم قطنيه كذلك الملابس الداخليه المريحه ..كذلك الفوط الصحيه وخلافه.. برضه حتلاقي في مواضيع في قسم التجهيزات تشمل هذه الامور ..
اشياء العطار .. يعني الاعشاب اللي لازم توفريها في بيتك وتحتاجيها لك وللبيبي ..
والله انا ماما اعطتني قائمة اشتريها ..وقالت لي شي لي وشي للبيبي ..
كراوية - يانسون - حلبه - سكر نبات - شمر - قرفه -رشاد - زيت زيتون وسمسم من المعصره - غسول النفاس ..
وفي اعشاب ثانيه تلاقيها في القسم البنات ماشاء الله ذاكرينها في اكثر من موضوع ..
وفري علب بلاستيك للاعشاب وخليها في متناول يدك ..او القائم على خدمتك في نفاسك .
كذلك وفري التمر والرطب - وفري السمن البري والعسل الأصلي والحليب ..وحلاوة طحينيه لادرار الحليب ..
- وفري ثلاجه صغيره او ترمس صغير للبيبي .. تحطي فيه المويه الحاره او اليانسون والكراويه ..
وكذلك ترمس لك .. تحطي فيه المشروب الدافي اللي تبغيه .. حليب او غيره ..
ولازم طبعا زوجك يعبي لك البيت .. خضره وفاكهه .. ولحم ودجاج عشان ماتحوسي وقت الطبخه ..ويكون الاكل متوفر
بعد كده عندك .. امور الضيافه .. يعني تشيكي على :
- البن والهيل لزوم قهوة الضيوف ..ودلال القهوه وفناجيلها .. واباريق الشاي وكاساتها ..
- حلويات الضيافه ومعجنات الشاهي للزوار .. وهذه بتجيكي في يومها حسب ضيوفك
- شيكي على غرفة الاستقبال ..
يعني هل حتستقبلي الضيوف في المجلس ولاغرفة نومك ؟؟
.. لو في المجلس حتحتاجي سرير لك غير سرير البيبي .. وممكن تشوفي لك الاطقم الكامله مفارش النفاس وتوابعها .. وبعض المحلات تلبس لك حتى صواني وثلاجات القهوه عشان تصير طقم مع مفرش نفاسك ..
ورتبي الغرفه بحيث تكون مريحه وتكفي لاستقبال ضيوفك .. لو غرفتك واسعه وكبيره جدا .. حطي سريرك بالنص .. ولو غرفتك مو كبيره مره .. حطي السرير اقصى اليمين او اليساروترتبي الكنبات على هذا الاساس ..
- ولاتنسي توزيعات البيبي .. اللي المفروض تكون موجوده من اول يوم لك وانت بالمستشفى ..
كذلك تزيين غرفة المستشفى .. وممكن طبعا تنقلي زينة الباب لبيتك وتحطيها بغرفة استقبال الضيوف بالبيت ..
انا كتبت عشوائيا .. يعني رؤوس اقلام لتذكيرك ويمكن تكوني عارفه هذه الحاجات لكن احيانا مع الربشه الواحد ينسى.. علما بأني بكريه ولسه ماولدت .. بس هذه الاشياء اللي شيكت عليها وماما عبتها ليا ..
ربي يفرحك بالبيبي وتقومي بالسلامه ,,