اخر صرعة

[حب ومرح]

جارتي الشامية الي تسكن في الشقة المقابلة لي ...جارة سنعه وطيوبه ومؤدبه ...لكن مشكلتها انها (حلوة )
(الله يعينها على هالبلوى!!)

>>>مااخفيكم ان هذي مشكلتي انا !!

عندي رجّال على الطالعه والداخله ينظر لها!!..وهي تحجب يعني مافيه غطا وجه!!

كل ماطلعنا بالمصعد يسوي الشخصية بمراية المصعد يمكن يصادفها ويتيملح عندها!!..عاد انا امارس

دوري المعتاد اني اسحب شخصيته واحنا طالعين من باب المصعد واخلي كل شي يطيح عالارض ويقعد

يلم فيه وانا اقول سوري علق خاتمي بطرف غترتك او الباب شدها او من هالقبيل...

>>هذي سهله

البلا يكمن في التالي >>

مرة دق جرس الباب وقال زوجي : مين ..مااحد رد..!
ناظر من العين السحرية مالقى احد..!

قال: اكيد هذا بزر خافس بالارض العين السحرية ماتكشفه اطلعي افتحي له..

قلت : ايه لو انها جارتي كان فتحت لها الباب وانت تضحك لكن العيال ويش تبي فيهم مايكحلون عيونك!!

قال : اقول خلي الهروج السامجه وروحي افتحي ادوخني الجرس.

قلت : ماني فاتحه وخله يصك اذانك

قال: ترى بتاكلينها

قلت : انا لها
وقام وضربني وضربته وكفخني ووكفخته ..وقررت بعدها اني اروح افتح !!

مالقيت احد!!

صكيت الباب ورحت ادوره باكمل المصاقع لقيته جالس عالكنب ويوم كنت بانقض عليه دق جرس التلفون..رفع

السماعه ...وكلمتين ويعطيني اياه ..

قلت : مين ؟؟..

صار يؤشر بيده جهة شقة جارتي ومبتسم وعيونه تبرق!!..

قلت: هين عيونك هذي بافقعها لك!!

وقلت : الو

قالت : الو اهلين جارة اشلونك..شو اخبارك

قلت لها : الحمد لله

قالت : شو ماتردوا عجرس الباب ارسلت الولاد آلو ماحدى رد!!

قلت لها: كنا انا وزوجي نشرب كوفي عالبلكونة وماسمعنا الجرس>>كذبة بيضاء

قالت: اها الله يهنيكم يارب..طيب افتحي الباب بارسلك طبخه تستاهلك تمك!!

قلت لها : تسلمين
وصكيت السماعه من هنا الا زوجي يقول : اتصدقين ياليت عندنا جهاز كشف صورة المتصل!!

قلت : هالحين انت مافكرت بهالخدمة الا يوم اتصلت جارتي

قال: انتي نيتك باطله!!

نطيت عليه وفقعت له وجهه وشالني وحطني على الارض وبرك علي وقال بتهجدين ولا اشلون؟؟!!

الا جرس الباب يدق

قال : الله فكك ..قومي افتحي

ورحت وفتحت الباب واخذت الطبخه ورجعت له : قلت يمكن حطوا الخدمه الي تبيها بالطبخه مو بالتلفون

قال: نكتة بايخه ..ومابي آكل شبعان!!.

قلت : ايه ماتبي الطبخه تبي الي سوتها!!

قال : اقول ضفي وجهك لااكمل الي بديته!!

قلت : تقوى؟
ماقلت هالكلمة الا هو ضاربني ضربتين وراكلني ركلتين ..وطلع من المعركة منتصر ...وانا ورحت لفراشي وانا اعرج ونمت ماتعشيت
<<والظاهر ان الطبخه نامت ببطن زوجي هذيك الليلة

::::::::::::::::::

وفي يوم جينا من برى لقينا جارتنا توها تفتح باب بيتها طالعه

قال زوجي بصوت خافت: سلمي عليها

قلت بصوت خافت بعد: مالك شغل

قال:ترى لو ماسلمتي باسلم انا!!

قلت : جرب ..والله لاانسيك اسمك ..ولااسلم عليك بقبرك الليله

قال: اهب ياشرك

كل هذا الحوار الهاديء جدا جدا ...وجارتنا لسه ماصكت بابها..يوم شافت زوجي معي رجعت لبيتها وانتظرت الى ان ندخل وطلعت هي بكل ادب ووقار!!

اما انا واياه فقد طبينا الميدان ( كعادتنا )وتضاربنا ومسكنا بشوش بعضنا هو يقول انتي زوجه عاقة!!

قلت انا اعرف العقوق للوالدين بس

قال: طيب ناشز!!

قلت : لييييه ؟ كل هذا عشان ماسلمت!!

قال:ايه ماتبين تحسنين علاقاتك بجيرانك

قلت: الحين هي كل جيراني!!

قال:اقول اتركي المرادد بالكلام وخلك زوجة مطيعه اصلح لك

قلت وانا ماسكه اذانيه وراكبه على ظهره ماني طايعتك بهالامر بالذات ويش بتسوي!!

قال : ولا شي بس بادكك على الارض واطحن لك عظمتين ..وفعلا نفذها ..!!

وقال لي وانا تحت رحمته : (ها ويش قلتي)
قلت : طيب باسلم لاشفتها

وقام وعطاني مقفاه..وانقضيت عليه وسدحته بالارض وبالضربة القاضيه هزمته وقلت له: ماني مسلمة
عليها وانت معي لو يطلع ابوي من قبره >>>(الله يرحمك يابوي).

وطلعت منتصرة من هالمعركة>>يمكن لانه تعبان ..مارقد من يوم ماجا من الدوام ومن العصر وحنا

نحوم مارجعنا غير بالليل !!

:::::::::::::::::::::::::::::::::

ومرة كان يتفرج عالقنوات وشاف واحدة حلووووة قال : شوفي شوفي تشبه جارتنا!!!

وسكت فجأة!!

ولم فمه وحط يده عليه

وقال بنبرة خوف ..زلة لسان ..زلة لسان ..صدقيني!!

قلت : الحين انت اتقول انك ماتشوفها ولاتطالع فيها!!...كيف جبت شبيهتها!!

قال: انا اقصد تشبه جارتنا ام فلان الي قطعت سري وانا صغيّر يوم تولدني امي!!

قلت : اهااااا... لا لا صدقتك ..شف ..شف ..كيف مصدقتك
>>بتصدقونه انتم بكيفكم

اما انا انقضيت عليه ياقاتل يامقتول ...وصبيت من دمه وشربته بعد
>>بتصدقوني بكيفكم اما انا مو مصدقتني!!

:::::::

وفي يوم راحت جارتي مشوار وتركت اولادها عند امها بنفس الشقة ..قلت انا فرصة اروح لامها

واشكي لها اخبرها عاقلة ومحترمه

وجهزت نفسي ورحت لها واستقبلتني العجوز ورحبت في ..وبعد كم هرجة وضحكة وسالفة..قلت لها :

ياخاله انا بافضفض لك!!

قالت : خير يابنتي شوبكي؟

قلت : انا تعبااااااااااااانه..نفسيا!!

قالت: ياساتر يارب ..ومن شو؟

قلت لها: من بنتك!!

قالت: ولووووووو ووشو عملت؟!

قلت لها:والله ماعملت الا كل خير ويشهد الله انها محترمة وطيوبة لكن البلا في زوجي..متعبني عينه طويله ويحب ينظر بالحريم وبنتك لانها قبالتنا دايم يشوفها ويبحلق فيها

قالت: والله بنتي وزوجها يمدحوا في زوجك كتير ويقولوا نعم الجار!!

قلت : لا لا تقولي ن اني اتوهم انا اشوفه بعيوني!!

قالت: يابنتي المشكله مو ببنتي او بزوجك ..لانو بنتي لو فيه شي من هالكلام كان قالت لي ولاخبت علي

شي وانا واسقة بتربيتها.. وزوج بنتي بيثني عليه وعلى رجولته وفرحان بجيرته!!

قلت لها: وين المشكله اجل؟؟!

قالت : المشكله فيك؟!

قلت : انا الحين الي طلعت الغلطانه؟

قالت : مو غلطانه بس غيرتك عزوجك هيّا الي اتخليك اتفكري وتتوهمي؟!!
قلت : بنتك حلووووووووووووة ياخاله

قالت : وانتي احلى اسم الله عليك

قلت:طيب من يقول للاثول الي عندي!!

قالت : هو شايف هيك بس الرجال مابيحكوا؟!

قلت : طيب ياخاله انتوا ليه ماتتغطون<<ابي اصير داعيه!!..يمكن لاتغطت ارتاااااااح انا!!

قالت: يابنتي هالامور ماحب احكي فيها لحتى ماتكتب عليّ!!

قلت لها: طيب بنتك ليه ماتنقل ..ترى العمارة خايسه هذي ويمكن كلنا ننقل منها<<ادور مخرج ثاني

قالت: هههههههه...بيّن عليك تعبانه كتيييييييير!
قلت: لاتتهزي في ياخاله ترى انا شكيت لك من محبتي لكم وعرضت نقطة ضعفي عليك.

قالت : انا مااقصد اتمسخر بس انتي بتتوهمي امور وتتعبي نفسك ومااحد شايفها الا انتي؟!

قلت : مااقدر اتحمل نظراته للحريم..ولايمكن اعقل من هالناحيه!!

قالت : شفتي لو بنتي لاحظت ان زوجها بيطالع فيك؟؟...كان عملت متلك ويمكن اكتر؟؟..انا ماانكر

طبيعة المرة ولا غيرة الزوجة بس كمان لازم توزني الامور صح وتحاولي تتصرفي بثبات اكتر.

قلت لها كيف؟

قالت:انا باضرب لك مثال: هلاّ أهوتك ( قهوتك) كيف بتحبي تشربيها؟

قلت : على مزاجي واحب الكوبتشينو >>عجبني السوال

قالت : اها...وبتوزينيها على مزاجك..وبتزبطي السكر والكريم ..الخ>>>يقطع ابليس العجوز كاني اشم ريحة قهوتي

قلت لها : اكيد

قالت : طيب اعتبري نفسك القهوة ..وزوجك هو انتي!!

ولو اني قعدت ساعه افك طلاسمها بس فهمتها بالاخير

وكملت كلامها :يعني التهي بحالك...وزبطي نفسك زي ماتحبي ويحب زوجك ..وبتلقي زوجك بيشربك

ويعتبرك احلى كيف!!
>>>خطيرة هالشامية

قلت لها : طيب بناتك ماتجوزينهم زوجي لو جاك يخطب ؟!

قالت : هلاّ لساتك بتفكري بهالطريقة!!

قلت : جاوبيني عشان ارتاح!

قالت : لا. .. لانه عنده زوجة حلوة متلك!!

ودعت لي وانا طالعه من عندها : الله يهدي سرك يابنتي ويطمنك على زوجك وبيتك واولادك.

ودخلت البيت وانا افكر بكلامها ونصايحها >>>وناوية اصير قهوة زي ماقالت

وجا زوجي وكنت معه منتهى الروقان والرومانسية ومافتحت له سيرة جارتنا الحلوة ولا طبينا الميدان
انا واياه ابد

ونمنا ..


وقمنا..


وكعادتي .كل صباح ..فتحت دماغي ابحث عن شي اقضي معه صباحي الجميل لوحدي مع قهوتي

>>انا قلت قهوة!!..كأنها اتذكرني بشي بس ناسيته!!

المهم ..اني وجدت بدماغي شوية مشاكل وهموم ومعضلات شي قديم وشي حديث وشي لسه بيصير

ووضعته امامي وانا اتناول فطوري..وبحثت عن المهم لكي ابدأ به يومي فوجدت ان زوجي وجارتي

الحلوة هما اهم مايمكن تداوله الان..!!

وبحثت موضوعهم مع نفسي وقهوتي
<<قلت اتذكرني القهوة بشي بس وشو نااااااااااسيه؟؟!!

المهم اني قررت اني افتح الموضوع مع زوجي اول مايجي من الدوام واقول له ياأنا ..ياهي بالعمارة!!

::::::::::::::::::::::::::::::::::::

>>>تظل الزوجة..غيورة ...مهما حاولت ان تعتبر نفسها قهوة زوجها ومزاجه الخاص.

:::::::::::::::::::::::::::::::

اعذروني عالاطاله
وشكرا لمتابعتكم

[حبيبة توفي]

اعجبتني القصه
بس كنت حابه نهاية احلى


تلسم يدك على اي حال

[سما الجوري]

والله يا أختي مشكلتك عويصة زي مشكلتي ................بس بصراحة تعودت ومن جد ما اخلي على قلب زوجي يعني يتفرج هنا وهناك ويعرف اني انا اللي مروقته وباسطته وفاهمته .... بس في النهاية الدعوة سوالف ونضحك ............الله يعينك المهم الثقة وانك تكونين معاه على طول ....

[كل الحب لحبيبي]

هههههههههههههههههههههههههههههههههههههه

هذه مشكلة كل الزوجات الله يسااعدنا ع رجالنا يارب

الغيره ما تنطاااق ابد

يسلموو يا عمري ع ما قدمتي

[حنين الجنة]

اعجبتني القصه
وخاصة حكم الشامية

[أم عبدو]

أختي بدي أعطيكي بيت شعر من عصر الجاهلية لعنترة بن شداد
تدل على الأخلاق الذي جاء الإسلام ليتتمها فنحن في عصر جاهلية أشد

وأغض طرفي إن بدت لي جارتي *** حتى يواري جارتي مثواها

الحل عزيزتي بالعودة الى أخلاقنا الإسلامية هي التي تحل لنا المشاكل
فمشكلتك بسيطة إن ضبط زوجك جوارحه عن الحرام انتهت المشكلة
رأيتي كم هي سهلة الحل !!!!!!!!!!!للأسف أصبح شبابنا
يتباهى بالنظر الى محارم الله ولا يدري عقاب الله الشديد لمن يفعل هذا

أسأل الله أن يهدي زوجك وجميع شباب المسلمين

[حب ومرح]

المشاركة الأصلية كتبت بواسطة حبيبة توفي

اعجبتني القصه
بس كنت حابه نهاية احلى


تلسم يدك على اي حال

ويديك ياعسسل شاكره مرورك

[حب ومرح]

المشاركة الأصلية كتبت بواسطة سما الجوري

والله يا أختي مشكلتك عويصة زي مشكلتي ................بس بصراحة تعودت ومن جد ما اخلي على قلب زوجي يعني يتفرج هنا وهناك ويعرف اني انا اللي مروقته وباسطته وفاهمته .... بس في النهاية الدعوة سوالف ونضحك ............الله يعينك المهم الثقة وانك تكونين معاه على طول ....

تسلمي ياقلبي على النصيحة

[حب ومرح]

المشاركة الأصلية كتبت بواسطة كل الحب لحبيبي

هههههههههههههههههههههههههههههههههههههه

هذه مشكلة كل الزوجات الله يسااعدنا ع رجالنا يارب

الغيره ما تنطاااق ابد

يسلموو يا عمري ع ما قدمتي

يسلمك ربنا

[حب ومرح]

المشاركة الأصلية كتبت بواسطة حنين الجنة

اعجبتني القصه
وخاصة حكم الشامية

اعجبني مروورك