قصة ولادتي :)

[نبض الامارات]

السلام عليكم ورحمة الله وبركاته ..

انا الحمدلله ولدت من شهرين ونص ..
وحبيت اكتب قصة ولادتي لاني كنت احب اقرا قصص الولاده يوم كنت حامل واتثقف منها ..

انا دخلت التاسع وخلصته وطوفت 6 ايام منه .. وما كان فيه بوادر ولاده ابدا ..

يمكن ايني ويع بس مب وايد خفيف واذا شد علي اي شوي ويروح ولا يرجع خخخ
في شي لاحظته اني كنت كل شوي ابا الحمام احس واذا ما رحت الحمام بسرعه ما اقدر انش وايني ويع خفيف ..

المهم يوم وصلت اليوم السادس دخلت الحمام اتوضى حق المغرب .. لقيت دم شوي
وتم كل شوي يزيد شوي شوي .. ولين الساعه 9 تقريبا بدا الويع وكل شوي يزيد الدم ..

وقلت ما بروح المستشفى وبتحمل لين احس مب قادره اتحمل الويع ..
المهم تميت متحمله وكنت ملاحظه من يومين حركة بنتي خفت وقريت انه هالشي طبيعي فاخر الايام ..

وصبرت لين الفجر .. كنت راقده بيت اهلي ..طلعت عند امي برع فالحوش ..
وقالتلي شو رايح انروح ونطمن احسن فالمستشفى ..

رحنا وحطولي جهاز النبض والطلق .. كان شي طلق بس نبض الجنين كان مب مطمننهم ..
مرات يطلع ومرات ينزل وعطوني عصير قالو يمكن راقده ..
والدكتوره قالت بنرقدج وكان فاتح عندي بس سانتي وسوتلي توسعه .. الفيس يعبر عن عذاب التوسعه كيف تذبح ..وبعدين سولي تخطيط مره ثاني وقاستلي الدكتوره طلع سانتين بس ..

حولوني غرفة الولاده لانه تخطيط النبض مب اوكيه نفس قبل وعطوني طلق صناعي وسعولي مره ثانيه وفتحو الماي واتعذبت عذاب الحمدلله والشكر على كل حال كله اجر خخخ ..

كان نبض بنتي يطلع صفر حتى مرات فالجهاز .. عقب الدكتوره قالت خلاص ما بنصبر عليها اكثر لانه مب طايع يفتح اكثر من جيه ونبض بنتي كله نازل حولوني قيصري :(


ودخلوني غرفة العمليات وانا اعاني من الطلق .. حتى حضنت الفلبيني اللي هناك من الويع اللي فيني ..

وامي اجبرتني اختار تخدير نصفي ..

كنت واعيه واحس عمري ف حلم حاطين حاجز عشان ما اشوف .. عقب ما طلعو بنتي
راوني اياها وكانت عزكم الله مسوتنها بطني والحبل السري لاف على رقبتها مرتين

الحمدلله ربي سلمها حتى النيرس اتقولي الحمدلله طلعناها ..

وعقب ماخلصت العمليه لقيت اغلب اهلي يايني وكل حد يدخل يسلم علي وانا اصيح مستغربه اللي صار فيني .. تميت فتره عقب الولاده اعاني من اللي شفته وكله اصيح ياني اكتئاب وحتى كنت ما اقدر اكل .. بس احين الحمدلله انا والخير رباعه خخخ ,,

وبنتي يابولي اياها عقب ما حولوني الغرفه ..
الحمدلله حفظلي اياها ونورت حياتي .. ربي لا يحرمني منها ويرز كل محرومه الذريه الصالحه ..

بنات انا ما كنت اتوقع صفر بالميه اني اسوي عمليه حملي كله سليم ف انصدمت جدا
حتى ما كنت اقرا اي شي عن القيصريه كله عن الطبيعي ف نصيحه ثقفو عماركم من الناحيتين ..

[فداك الكون]

صايرة كتير حساسة اتجاه الحمل والولادة .. عينتي رغرغت والله
ألف الحمد لله ع سلامتك

[نبض الامارات]

انته عيوني وفداك

الله يسلمكم من الشر حبيباتي

[نوت "̮]

وعليكم السّلآم ورحمة الله وبركآته ..

الحمدلله ع سلامتك وسلامة البنوته
الله يكتبلك الاجر

[لوليتا22]

الحمدلله ع سلامتك و سلامه البيبي ربي سلمها لك الحركه هي صحيح تخف بس مو كثير كان لازم من حسيتي انها خفت تروحي المستشفى
انا خلصت التاسع بس باقي الاسبوع الاربعين ماخلص
قلت بنتظر لا خلص وماولدت بروح للمستشفى :( دعواتك

[υм вtℓαα]

الف مبرؤك البنوته تتربى بعزكم يارب
الله يكتبلنا الاجر ع هالتعب

والمثل يقولي اولدي وانسي

[dr.loly]

الحمدلله ع سلامتك وتتربي بعزكم
وربي يحفظها
اهم شئ سلامتك سواء طبيعي او قيصري
ماتفرق حمدلله ع سلامتكم

[بحــ العيون ــــــــر]

الف الف مبرروك
والحمدلله على سلامتك وسلامة البنوته

[Am Fatmai]

الحمدلله عسلامتج وسلامه البنوته ربي يحفظها
حبييتي حاسه فيج والله انا صارلي نفسج كل حملي الحمدلله مافي مشاكل الا يوم عطوني الطلق صناعي وماطاع يفتح الرحم وحولوني قيصري بسررررعه ما فهمت السالفه وياني اكتئاب كبييييير بعد الولاده لكن الحمدلله كله عدا على خير وشوفه الضنا تنسي الوجع الحمدلله يارب
ربي يرزق كل مشتاقه يالله

[اكتوبرية]

الحمدلله على سلامتك وسلامة البنوته
قلبي يدق بسسرعه خفت :(
اول حمل لي والحين بالتاسع
الله يسهل على كل الحوامل ويقومهم بالسلامهم ويقر عينهم بشوفت ضناهم