السلام عليكم بنات انا بكتب لكم قصة ولادتي ولو أنها متأخرة
بعد ما دخلت التاسع صرت امشي كل يوم ولمسافات طويله ورحت للدكتوره وانا في نص التاسع قالت الرحم مفتوح 3 سم واستمريت على المشي لين خلصت التاسع ورحت للدكتوره قالت كل شئ تمام ولأنك بكريه بننتظر أسبوع زياده وخلص الأسبوع والرحم مفتوح 3 سم وتقول امشي وانا امشي ولا فيني ولاده شربت الخروع وحطيت مره وحلتيته في الفوطه النسائية ونمت فيها لأني قريت تجربة وحده تقول سوت كذا ونامت وقامت فيها الطلق بس انا ماليه فايده المهم تعيدت عيد الفطر وقلت لزوجي انا طفشششت ابي اووووولد طبعا زوجي ما قصر بالأحم أحم شاد حيله هههههههههههههههه ولا فيه فايده طبعا الدكتوره انزعجت مني كل مارحت لها قلت ولديني يا دكتوره الثقل ذبحني المهم قالت ابعطيك أسبوع ثاني إذا خلص ماولدتي بنعطيك طلق صناعي قلت لها مافيني اصبر قالت حاولي تصبرين لان وضع الجنين كويس ولو ما قدرتي تعالي أولدك بطلق صناعي ولما جا ثالث العيد طلعت انا وزوجي نتعشى برا وكنت لابسه بينزلني في الملاهي متواعده مع اهلي وكان البيبي مرررره ظاغط على كلاي وكنت ابكي من الألم ومقهوره لاني اقول لزوجي ودني ابي اولد وهو رافض يقول اصبري المهم فجأة قال زوجي بكيفك تبين أوديك المستشفى الحين قلت اييييييييييه المهم كلمت أهلي قلت منيب جايه بروح للثمامه انا وزوجي وبنشوي قالت أمي الله يسعدكم وأروح للمستشفى وقلت لهم السالفة قالو يلا ادخلي وعطوني علبه قالوا هاتي بول الله يكرمكم وعطوني كيس قالوا حطي ملابسك والبسي هذا الثوب طبعا مفتوح من ورا وانا مستحيه قلت وش هذا قالوا وتبين تولدين بعد المهم لبسته وانسدحت وحطوا لي التخطيط وأخذوا عينة دم وجت الدكتوره قالت مبين في الجهاز انو مافيك طلق بس خليني اكشف عليك نشوف الرحم مفتوح ولا لا وكشفت قالت مفتوح 5 سم تخيلوا بنات ولا فيه طلق المهم قالت خلاص بسويلك توسيع وبندخلك غرفة الولاده المهم دخلت يدها وقعدت تحفر فيني وتلفلف وانا عيوني طلعت بغيت أموت بعدين ودوني غرفة الولاده وعطوني حقنه شرجية الله يكرمكم بس الصراحه مؤلمه لان تخلي البطن ينمغص بقووووه والمكيفات بارده في غرفة الولاده المهم انا طالبه إبرة الظهر وجا الدكتور وركبها لي وهي توجع بس مؤ حيل منها أبره عاديه وبعدين جلس يحط لي ثلج على رجولي وفخوذي عشان يشوف أحس ولا جاء مفعول الابره حقت الظهر وكانت الساعه 9 في الليل وجلست شوي وجت الدكتوره فتحت المويه وبدا يبان في الجهاز ان الطلق حاااااااااامي وكانت تسألني الدكتوره إذا أحس بشي وكنت ما أحس بشيء ماشاءالله وركبوا لي حقت البول نسيت وش اسمها وما حسيت فيها بسبب أبره الظهر الله يوفق اللي اخترعها وجلست على هذا الحال الين الساعه 8 الصباح تخيلو المهم بديت أحس بألم قووووي وقلت للممرضة تنادي الدكتوره ولما كشفوا علي قالوا ولاده ولاده الرحم مفتوح 10 سم والرأس وااااصل المهم فتحوا كل الانوار وفكوا السرير وطلعوا عدتهم مقصاتهم واغراضهم وقالوا يلا ادفعي يلا يلا وادفع وادفع ومافيه فايده بغيت أموت ولمسوني شعره وتحمست صرت ادفع ادفع وفجأة استفرغت الله يكرمكم كن هذا وقته بعد عاد امي قايله اذا استفرغت الوحده يعني بيطلع الراس المهم كانوا مخليني على راحتي اناقز أوقف على السرير عااااادي عندهم ونشف ريقي ريقي وعطوني علبه كامله شربتها ولا قالوا شيء قلت وين اللي يقولون مربطينا ولا يعطونا مويه المهم مع الدفع طلع الرأس وتعسرررت ولادتي لان وزن ولدي كبير ماشاءالله وهم حسبي الله عليهم ما وسعوا لي مدري شلون مايوسعون لوحده بكر المهم تشققت غلط وبالموت طلعوا ولدي وحطوه على صدري وكان اززررررق بس يوم طلع ماتحرك ولا بكى وخافوا عليه لأني طولت وانا ادفع المهم أخذوه مني وحطوه في العنايه وقعدت ابكي أقول ابي ولدي جيوبه لي وش فيه ما بكى عسى ما مات قالوا لا مافيه شيء بس بنتطمن عليه لانه ما بكى لا يكون فيه نقص أكسجين وجلس أسبوع عندهم قالوا فيه تظخم في الكلى وثقب في القلب بس الحمدلله الحين هو رجال وطيب وبخير وانتهت قصة ولادتي اللي في رمضان هذا بتكمل سنه ان شاءالله،،
أتمنى تستفيدون من قصة ولادتي وتدعون لي بالتوفيق
ملاحظه ،،
ولادتي كانت في مستشفى الحرس قسم إدارة الأعمال وكلفتني 10 آلاف الولاده و1800 إبرة الظهر بس والله يستأهل عنايه واهتمام ونظافة والحمدلله أولا وأخيرا
،،
07-04-2013, 01:26 AM
قصة ولادتي بدحومي ،،
ام عبدالرحمن969 
أحس اني خوفتك 
.gif "hwaml13")
جديد منتدى إستفسارات مرحلة الولادة
العرض العادي
