مرحبا يا أجمل أمهات المستقبل والحاضر, وعدتكم اني أحكيلكم قصة ولادتي المؤلمة
وان شالله اللي تقراها تستفيد من أي شي يعينها على الولادة, يلا نبتدي؟؟ بسم الله الرحمن الرحيم
طبعا قبل الولادة بأسبوعين وأنا أعاني من نغزات في المهبل وإفرازات صفراء خفيفة وعرق ماسكني برجلي اليمين لما سألت عنها قالولي إن الولادةقربت, هذا غير ألم الظهر وآلام المثانة وضيق النفس والحرقان أشياء كلها تهد الحيل هد لدرجة إني صرت أتمنى أولد بأي لحظة من ألمي ومع هذا كله من خوفي كنت مبتعدة عن محرضات الولادة ماكنت أمشي أبدا ونسفت العلاقة بيني وبين زوجي من الشهر الثامن من خوفي من الولادة ومن الآلام اللي أحس فيها...ومرت الأيام والساعات والثواني تقريبا عشر أيام, وهنا كان يوم الأربعاءالساعة 3 فجرا جيت بنام وكنت ميتة من النعس ماأمداني أغمض عيني نص ساعة بدا معي مغص, وطبعا هالمغص مو جديد علي لي فترة أعاني منه يجيني ساعاتين ثلاث بعدين يهدأ, حاولت أنام ماقدرت مع إن المغص مو قوي محتمل يعني وظليت أتقلب على هالحال لين أذن الفجر قمت صليت أنا وزوجي وهو رجع نام وأنا ماعرفت أنام وقعدت أفكر ياربي معقولة أولد اليوم؟ واستمر الألم معي لين الساعة 7 صباحا, طبعا أنا مت من الجوع لا نوم ولا أكل مثل الناس ...خطر على بالي آكل ملعقة عسل طبيعي بس العسل كان في المطبخ بمكان عالي
قومت زوجي من النوم وطلبت منه يعطيني العسل وقلت له حاسة إني بولد اليوم, ناظرني باستغراب
لأني كل يوم أقوله شكلي بولد, بس هالمرة جد غير ماكنت في سريري كنت بالصالة أفكر بالولادة, والشي اللي خلاني أشك إنها ولادة إن بدأ معي الله يعزكم إسهال بعد إمساك دام 3 أيام مع شي يضغط مع أسفل هذا غير الحبوب اللي ظهرت بوجهي ورقبتي مدري وش سببها بس شكيت إنها بسبب هرمون معين أفرز بجسمي وقعدت أفكر ياربي إسهال وحبوب وألم معقول ولادة؟؟ طبعا أنا في هالحالة مشاعر مختلطة بين فرح وبين خوف, ولأن حملي كان صعب جدا جدا كنت أفكر واقول ياترى بتكون ولادتي سهلة ولا صعبة زي حملي!!وهنا بديت أفكر بالموضوع بعمق وشعرت بالخوف الحقيقي وبديت أبكي بصمت خاصة إني بغربة وماحولي أحد
حسيت المغص صار متقارب قلت خليني أحسب الوقت بينهم جبت جوالي وقعدت أحسب كان بين المغصة والمغصة 12 دقيقة ومرات 15 دقيقة ومرة 10دقائق, فتحت النت وقعدت اقرا عن الطلق الكاذب وحسب ما قريت ان هالاعراض للطلق الكاذب ...صارت الساعة 7ونصف قام زوجي يجهز نفسه للعمل, قال هاااولادة ولا لا؟ قلت خلي جوالك معك ممكن
أتصل فيك بأي لحظة وترى هالمرة حاسة الموضوع جد, والظاهر إن التعب ظهر على وجهي وصارت مشيتي مشية وحدة موجوعة قال ادخلي نامي جوا قلت لا هنا مرتاحة, راح جبلي كنبل وغطاني الله يرضى عليه وراح بعد ما راح أنا قعدت بالسرير , شعرت بالوحدةوالخوف والنوم ذابحني حسيت المغص صار متقارب أكثر قلت خليني أجيب كيس الماء الدافي وأحطه على بطني وظهري إن كانه خف علي معناها طلق كاذب, وفعلا حطيته على ظهري وحسيت براحة واسترخاء, وحطيته على بطني وارتحت وخف المغص كثير ساعتها قلت في نفسي شكله طلق كاذب لأنه خف مع الماء الدافي, جمعت نفسي في السرير مثل الأطفال ومسكت بطني وحاولت أتجاهل الألم وأنام, لكن عبث كل ماغمض وارتاح شوي يبدأ معي مغص من ظهري بعدين بطني بعدين شي يضغط لتحت
قعدت على هالحال لين الساعة تسع تقريبا حسيت في شي جوا بعنق غريب مقدر أوصفه بس يمكن احساسي لما انفتح عنق الرحم حسيت في شي قرب مرة وكان شعور غريب قمت بسرعة دقيت على زوجي وقلت له يجي يوديني المستشفى,قمت لبست ملابسي وطلعت شنطة الولادة وبناتي كانوا نايمات دخلت قومتهن وضميتهم وودعتهم وحبيتهم كأني بفارقهم للأبد, وقلت بنات ادعولي الله يقومني بالسلامة, طبعا ماسكة دموعي غصب مابيهم يشوفوني ويخافون, دق زوجي علي قال يلا انزلي ونزلت وآآآه يابنات إحساس لما ركبت السيارة...ضياع+ خوف+ ألم أنا ظر حولي أبي أمي أبي أهلي صرت أفكر ببناتي ياترى رح أرجع أشوفهم؟ ياترى كيف رح أولد بالحالي؟ قعدت أبكي وزوجي علشان يهون علي يقول: كل الحريم يولدون وشي عادي هههههه ياربي أنا موجوعة وأبي كلمة حنونة وهو يتكلم بالمنطق ياحليله ههههههه خايف علي مرة بس ماتوقع إني أولد لأن ماشفت دم ولا ماء الجنين دخلت المستشفى وطبعا مشفى عام على طول السيسترات خذو الضغط والحرارة والوزن وأوراق وأسئلة وطلعوني فوق قسم الولادة علشان الكشف,وطبعا جوالي تركته بالبيت وزوجي تحت ممنوع يدخل وأنا بالحالي دخلوني غرفة الكشف وجت الدكتورة تسوي كشف داخلي ودخلت يدها وزعقت ذيك الزعقة , طلعت يدها كلها دم وقالت مفتوح 3سم وهناااا بدت معاناتي يابنات الله لا يوريكم دخلوني غرفة التخطيط وحطوني على ذاك السرير
ونوموني على ظهري وخلوني, وأنا اللي من بداية الحمل مقدر أنام على ظهري ولا اقدر اتنفس
ربطوني بالسرير مع هالجهاز وراحوووا, في البداية كان الوضع محتمل وقعدت اناظر التخطيط كل عشر دقايق تجي طلقة مرة قوية مرة خفيفةوكل شوي تجي الممرضة تشوف لين جاء وقت اختفو من عندي قعدت أقرأ الأذكار قعدت أدعي وجاني جووووع فظيع وانكتمت وانفي احتقن ماعد أقدر اتنفس وأبي أتصل على زوجي اعلمه وجوالي في البيت , وهو مايدري عن شي ,لين ماتعبت مرةمن النومة على الظهر قعدت أنادي أنادي لين جتني وحدة سعودية اتضح لي لاحقا إنها ممرضة قلت لها فكيني ماعد اقدر أنسدح أكثر تعبت من السرير ظهري ما يتحمل, قالت لازم, قلت مقدر خلاص حسو فيني بروح الحمام فكيني,قالت وش تحسين قلت لا تخافين مو ولادة بس بروح الحمام, وكل شوي عاملات النظافة رايحين جايين وأسألهم معكم جوال يقولون لا... ياربيييي وش هالحالة؟؟قعدت على هالحالة لين11 ونصف تقريبا في الآخر جابولي الجوال وقمت أول ما اتصلت على أمي الله يطول بعمرها, أنا ماكنت بعلمها بس هي أمنتني إني أعلمها علشان تدعيلي وفعلا وأنا أكلمها وهي تدعيلي جتني ذيك الطلقة اللي خلاص خلتني أنهي المحادثة, بعدهااتصلت على زوجي قلت له أبي اكل جوعانة أبي قطرة انف لأني مو قادرة اتنفس, والحمد الله بعد جهد أرسلي عصيرات ولوزينات هههه حلوة لوزينات قمت شربت عصير وذيك السعودية اللئيمة تقول ما يصلح قلت وش اللي مايصلح انخفض سكري أنا حاسة انه بيغمى علي وقعدت أمشي وأمشي وامشي وأتمسك بالسرير لما يجي الطلق ,امشي وامشي وهي لئيمة جدا أكلمها ماترد وإن ردت ترد من غير نفس مع ذا النقاب
اللي ماشفت منه إلا عيونهاكرهتها مرررة, وقعدت أروح ,اجي بالغرفة تبي تجلسني غصب على التخطيط وانا مو قادرة من غير أقول ياااارب ياااارب يااارب وأدعي وأبكي ووجه البوم قدامي
لين صارت الساعة وحدة إلا ربع ظهرا قلت لها قومي تحركي حاسة إن الراس قرب مرة قالت طيب أقعدي علشان ما يطيح بالارض على الأقل تولدي بالسرير!!! وأنا مرة عصبت منها قلت لها مو قادرة أتحمل الألم وأنا واقفة أحسن خلاص نادي أحد, وفعلا نادت الممرضة الأندنوسية وجت قاست عنق الرحم ومدري وش تكلموا وقالت يلا غرفة الولادة
انتهى الجزء الأول أعذروني بنات بكمل القصة بعدين لأن بنتي صحت برضعها بكرا ان شالله بكمل الجزء الثاني