بسم الله الرحمن الرحيم
اول شي حابه أتكلم عن الممنوعات الي مستحيل تأكلها النفساء لمده أربعين يوم مو اذا صار لها شهر قالت خلاص مافيني إلا العافيه وباكل الي ابي
صدقوني آخر يوم من الأربعين زي اول اليوم يعني لحد يتهاون
الممنوعات( الحوامض،،اي شي بارد،، الغازيات بأنواعها،،العصائر ماعدا عصير التفاح،،الفواكه ماعدا التفاح،،البطيخ،،الشمام،،الملوخية،،،الباميا،،المويا لاتشربينه على الريق أبدا ولا يشرب بارد وكمان ماتشربينه على جوع ) ان شاء الله مانسيت شي
وفيه أشياء ضروري جداً جداً اتباعها الي هي ( تلبسين طرحه على رأسك ،،تلبسين بنطلون طويل،،،ما تنامين بوجه المكيف،،تلبسين شراب،،تقللين من الأستحمام وممكن تعوضين بغسل يدنيك وتجيبين منشفه مبلوله بمويا دافيه وتمسحين فيها جسمك وتغيرين ملابس كلها،،الجوع الجوع الجوع لو حسيني فيه خلاص ضاع كل تعبك ) الي سمين وتسوي رجيم توقفه فتره الاربعين وترجع اذا خلصت وخصوصا ان البُر الي هو اغلب أكلك في الأربعين مايسمن وغير كذا تجنبي الحلا والمعجنات لو كنتي ماتبين السمنه
طبعا وتستخدمين أدوياتك كلها لاتقولين طعمها ولا رائحتها ماناسبوني ترى من جد هي الي بتنفعك عاد كل وحده لها طريقتها وكيف تعمل أدوياتها الخاصه بالنفاس
الفطور يكون بُر هذا افضل شي سواء قرصان او قرص زي الفتيت اوالحنيني مع كأس حليب بحلبه وفلفل ،،الحلبه تستخدم اسبوعين الأولات وبعده وقفيها ،،،فطورك يكون بدري يعني الساعه سبع لازم تكونين خلصتي فطورك وبعده ارجعي نامي
قهوتك حاولي ماتشربينها إلا بنونخه لانها مفيده لرأس
الغداء مرقوق او مطازيز فيهم بهاراتك الخاصه فيهم والعشرين اليوم الأولى لاتفكرين تتغدين إلا هالشي ولو صرتي بطله وتبين تكونين تمام كملي لأخر الاربعين وبتلاحظين الفرق طبعا يفضل باللحم بذات الأيام الأولى عشان يلم خياطتك وعلى قوله جداتنا مايخيط اللحم إلا اللحم
العشاء كذلك أتبعي نفس الغداء بس بأمكانك تغيرين آخر الأيام وتاكلين سمك مشوي تراه مفيد جداً جداً
لاتنسين تاكلين الخس والجرجير والبقدونس مع وجباتك تراهم مفيدات مره
وفيه شي مهم ،،،،،السهر السهر السهر انتبهي تسهرين نامي بدري ترى السهر لنفاس يخوي رأسها
أتمنى أكون مانسيت شي وأي استفسار او شي مافهمتوه انا بالخدمة ،،الله يسهل أموركم ويعينكم يارب العالمين