السلام عليكم ورحمه الله وبركاته
شحالكم بنات انا حابه اشاركم تجربتي خطوه بخطوه بعمليه اطفال الانابيب والله يرزقني بالذريه الصالحه وان شاء الله انفع فيها غيري بإذن الله تعالى ...
في بدايه الامر كنت محتاره وايد وين الاقي افضل دكتور وأفضل عياده ؟؟ اللي قالي سافري برا واللي قالي اصبري لا تستعجلين لاكني وكلت أمري بالله تعالى بعد ماسألت واستخرت لدكتور سمعته وايد زينه وسمعت بتجارب ناجحه عنده
عمليه المنظار :
قبل ما أبتدي فالموضوع انا سويت عمليه تاريخ 13-03-2013 يوم الاربعاء عمليه منظار بسبب وجود كيس على المبيض اليمين وقبل موعد العمليه بثلاث ايام سبحان الله اختفى الكيس بس قالي الدكتور سوي العمليه عشان اجيك على المبايض وقنوات فالوب والرحم بالفعل سويت العمليه والحمدالله اكتشفت ان الانابيب الاثنين عندي مسكرات مقفولات بسبب التهاب قديم وقال لي الدكتور حاولت افتح لج الانابيب بس للاسف مانفتحو وبذلك ماعندج امل غير اطفال الانابيب
نتيجه العمليه : عمل لي ثقوب فالمبيض اليمين لانه كان متضخم وللاسف المبيض اليسار ماكان مبين لانه متلصق فالمصران .؟؟
اذن انسداد فالانابيب تلصقات والمبيض اليسار مو مبين على قولته (الحمدالله على كل شي)
بعد ماسويت العمليه وعرفت شو علتي وهي انسداد الانابيب رحت عند ممرخه او مساحه ايام الدوره وسبحان الله قالت لي نفس الكلام رحمج سليم التبويض ممتاز بس الانابيب مسكرات وقالت لي تعالي لي 3 شهور كل دوره اسويلج كاسات بالهوا واعشاب واذا مانفع بقولج تروحين تسوين اطفال انابيب
يعني انا اضيع وقت 3 شهور ويمكن تصيب او تخيب خليت هالموضوع يولي وشليته من مخي وقررت اسوي انابيب اختصر الموضوع
وشي بعد كنت اسويه لمده اسبوعين بعد العمليه كنت اتبخر لمده اسبوعين متواصلين باعشاب (السد +فيجن) !! بصارحه حسيت بفرق بسيط كان ينزل علي دم بعد ماتبخر شي بسيط ماعرف ليش ؟؟ المهم خليت هالموضوع بعد
نرجع لموضوع اطفال الانابيب بعد مابحثت كثيرا وجدت افضل دكتور فالامارات ولي الكل يمدحه دكتور خليل ابو الوفا دكتور اطفال انابيب
اول شي خبروني انه موجود في مستشفى النور في ابوظبي واتصلت فيهم قالولي للاسف الدكتور طلع من عندنا وبفضل وحده الله يجزاها خير قالت لي الدكتور موجود في مدينه دبي الطبيه وبالفعل اتصلت لهم وحددت موعد يوم الثلاثاء تاريخ 16-04-2013
حضرت الموعد وكان الدكتور في غايه الطيبه واخلاقه عاليه ما شاء الله عليه
سمع تاريخي العام في موضوع الحمل وقال لي كلمه وحده انا ماريد اسمع كلام اي دكتور في تحاليل بتسوينها فحوصات دم وبشوف تصوير سونار الحين وبعد ماتطلع النتايج بنحدد الموضوع
قالي اذا عندج التهاب في قنوات فالوب مابيصير حمل لانه عند زرع الاجنه الالتهاب ينزل على الرحم ويخرب كل شغلنا اذا فيج التهاب نعالج اللالتهاب وبعدين نسوي الانابيب واذا الموضوع عندج كبير وماقدرنا نعالج الالتهاب راح نسكر القنوات لانه مابيكون منها اي فايده وبنبتدي عمليه اطفال الانابيب
طبعا سويت تحليل دم بالضبط اخذو مني 4 غراش دم وقالي الدكتور النتايج بتوصل بعد 11 يوم قلت له ليش وايد متاخر قالي نحن نبعثها برا وبالفعل عملت التحليل وانتظرت 9 ايام ووصلت النتايج وكان مذكور عنوان على الاوراق the doctor laboratory tdl pathology report - london
وكاتبين عنوان المكان في لندن
والحمدالله كلموني وقالولي كل تحاليلج اوكي وماعندج اي مشاكل و مو مبين في التهابات ولا امراض ممكن تعيق عمليه اطفال الانابيب
ملاحظه : تم ارفاق نسخه من تقارير نتيجه التحليل و شو هو التحليل اللي سويته للفائده
وحاليا عندي موعد يوم الاربعاء تاريخ 1-5-2013 مع الدكتور عشان نشوف شو بيصير
وان شاء الله راح اتواصل بموضوعي هذا واكمل كل التفاصيل
أدعولي بنات الله يرزقني والله يرزق كل وحده بالذريه الصالحه وبالحمل السليم العاجل غير الاجل بإذن الله تعالى