قصتي لتحقيق حلم الإنجاب

[ۼ ــزڷ آڷـ ζ ـربي]

السلام عليكم ورحمة الله وبركاته


أسعد الله اوقاتكم احبتي الكرام

حبيت اني اشارك معكم ب قصتي المتواضعه ويارب يستفيد منها الكثير بإذن الله

حبايبي انا تزوجت بداية سنة 1432هـ الحمد لله ربي وفقني في هالزواج من ناحية الزوج والاهل ناس محترمين وطيبين ..

زوجي الوحيد في عائلته عنده اخ اكبر منه سناً ولكن بسبب مرض مزمن لايستطيع الزواج ..

في بداية الزواج موضوع الحمل ماهو من الاساسيات يعني سبحان الله ما افكر فيه نهائياً مو عشان شي بس لاني توي متزوجه وسافرنا ع ماليزيا وبعدها اندونيسيا ورحنا دبي طبعاً اول شي زرنا المدينه المنوره ..

زوجي اخذ اجازه من عمله شهرين كله عشان ننبسط ونخرج ونسافر والحمد لله ارتاحنا كثير وما كان في مجال اني افكر في الحمل ابدا ..

المهم خلصت الاجازه وبدا زوجي دوامه وبدأت الزيارات اول شي اهله واهلي وعلى بداية الشهر الثالث جو الاقارب الخالات والعمات والجدات طبعا انا ماعندي شغاله انا اللي اضيفهم ..

فـ امي ماتخليني اشيل الاثقال يعني صحن في كاسات كثيره تجري وتاخذه مني استغربت

والله خالتي حتى الطاوله ماتخليني اشيلها قلت في نفسي اشبهم

وهم خارجين الضيوف جدتي قالت لي عساكي " حامل "

فجعتني هالكلمه المفروض هالشي محد يتكلم فيه لسه دوبي كملت شهرين متزوجه

حتى قلت لزوجي كنت مصدومه من سؤالها والله بعض الناس ذابحهم الشقا عندنا ناس فاضيه تتبع اخبار الناس ..

المهم انا حبيت اني اشغل الناس عني كل ما سالني احد اقول لهم لسه بدري مو حلو الوحده على طول تحمل ..

مرت 9 شهور ولا في حمل وانا ابدا ماهمني كلام الناس وقتها لانو في داخلي بالفعل ودي ما احمل في وقت مبكر لكن بعد 11 شهر بدا القلق ..

واتفقت مع زوجي نبدا ب العلاج نروح نكشف من باب الاطمئنان بس قلت له عندي شرط ..

قلت له مابي احد يعرف اننا رحنا كشفنا قال اوك ..

كشفنا والحمد لله ماطلع فينا شي بس مع زوجي لزوجه بسيطه وقالت الدكتورة ما تأثر اعطته علاج وبدا فيه وصفته لنا ثلاث شهور ..

وبعدها ما صار حمل اهله سالوه وبصراحه ماقدر يخبي عليهم قال لهم كشفنا والحمد لله التحاليل سليمه ..

امه قالت له خلي زوجتك تروح ل ممرخه في البداية رفضت وعصبت قلت له ليش اروح انا مافيا شي الحمد لله احترم وجهة نظري ..

في وحده من العائله دايم افضفض لها فتحنا يوم موضوع التمريخ كانت تقول لي انه ممتاز طبعا انا لسه ما قلت لها اني اراجع لاني متمسكه ب الاتفاق ..

بس هي قالت لي وش رايك تجربي تروحي الممرخه طيبه واعرفها ودايم لما اترك حبوب منع الحمل اروح لها ..

فكرت في كلامها وقلت لها اعطيني الرقم بجرب اروح لها رحت لها في الصباح مرختني وقالت لي الرحم عندك نازل ..

خرجت من عندها و اتصلت لي الحرمه اللي دلتني على الممرخه تطمن قلت لها اللي صار المهم نهاية الاسبوع اجتمعنا والصدمه انه وحدها من اللي معنا في المجلس كلامها كان كله ع التمريخ واللي جنبي سالتني متى باقي على دورتك ترى كثير بعد التمريخ ماتجيهم على طول يحملون والله يكتب لك ..

يا بنات ضااااااااااق صدري وقتها الشاي ماقدرت اشربه معقوله تسوي فيني كذا بلغت كل الناس اني رحت ل ممرخه والله انقهرت انا قلت لها بيني وبينك ..

خلاص من هذاك اليوم بدات المعاناه معي يا بنات اكل زي الاوادم ما اكل النوم ما اتهنى فيه كملت سنه ..

المهم قرب موعد الدورة قلت لزوجي بحجز عند الدكتورة قال لي ايش نسوي عندها خلاص مافينا شي مانستفيد شي قلت له نجرب منشطات وقتها كنت ابغى احمل بـ اي طريقه ..

رحت طبعا فتحت ملفي ورفضت تعطيني انا رحت قبل الدورة عشان عارفه ان استخدامها يكون وقت الدورة بس اي يوم ماكنت اعرف و وقتها مابي اضيع ولا شهر ..

قمت اجادل الدكتورة ليش ترفضين انا ابغى واتحمل المسؤوليه الين متى تبغني انتظر كثير ناس تستخدم منشطات وتحمل فـ قالت لي بعضهم في حاجه لها يكون عندهم ضعف انتي مافيكي شي راح تضرك وجلست ابكي ابكي بحاول اقنعها ما قدرت والله يابنات شي صعب الان افتكرت الموقف ودموعي نزلت ..

آه آه آه كان اليوم بسنه يعدي والله الموضوع وصل ل الشغالات تخيلو اذا رحت عند قرايب زوجي الشغالات يقولون لي ليش مافي بزوره بسرعه جيب مو كويس كذا حرمه لازم في بيبي ..

وارجع البيت ابكي طوال الليل مابي زوجي يحس فيني ادخل الغرفه اقول له بنام يستغرب ماهو وقت نومي بس انا ادخل عشان ابكي ..

فكرت ثاني في موضوع المنشطات وغيرت المشفى اعطتني موعد الدكتوره الجديده على اساس بتشوف التبويض ..

كنت ملتزمه بالمواعيد واروح في الوقت المحدد واليوم المعني مابي شي يفوتني كشفت قالت برضو ماراح اعطيكي منشطات في شي قبلها لازم تسوينه قلت اسوي ايش هوه قالت لي اشعة الصبغه ..


وسويت اشعة الصبغه وقت الاشعه ابكي الدكتورة تقول لي ليش تبكي تالمك قلت لها يهون المها الالم اللي في داخلي ماقدر اوصفه لك طبعت الاشعه وفي رجال في الغرفه الثانيه ينزل الاشعه ..

قالت لي طيب ايش فيكي خلاص سويتي الاشعه وان شاء الله ربي يكرمك ..

قلت ل الدكتورة ماتوقعت اوصل ل هالشي اللي وصلني كلام الناس وكاني مذنبه حسسوني ان فيا مرض وانا مخبيته عليهم بالاشهر اجلس في بيتي ما اخرج غير زوجي يحن عليا ويخرجني اقول له مابي ناس نعرفهم وابكي قدام الدكتور السستر ماقدرت تتحمل المشهد لان حتى الدكتورة بكيتها معاي ..

خلصت من الاشعه والحمد لله النتيجه سليمه قالت لي الدكتورة سويت ل ناس قبلك الحمد لله حملو من الشهر الثاني قلت يارب اكون مثلهم ..

واحسب كل يوم الين جا موعد الدورة ونزلت وانتظر شهر بعده وبرضو مافي حمل تعبت صار سنه وخمس شهور كثير ..

رحت ل مستشفى ثالثه وطلبت من الدكتورة منشطات على طول وصفت لي قلت لها عن حالتي بالتفصيل لاني مابي موعد ل التبويض مافيا اصبر كمان قالت لازوم ثلاث شهور متتاليه رجب وشعبان و رمضان قلت اوك ابشري ..

استخدمت الكلوميد في رجب ونفش الشهر نزلت الدورة والله يابنات من كلام الناس ابي احمل ب اسرع وقت اشوف كثير ثلاث شهور ..

انا والله العظيم عمري ماسالت وحده تاخر حملها مستحيل اكون كذا لازم الواحد يراعي مشاعر غيره ليش اتدخل في حياة غيري شي مايخصني ادعي لها افضل بكثير من اني اجرحها ..

انا اللي وصلني ل المشافي كلام الناس بس حاولت اني اصد عنها لكن ماقدرت الناس ترمي علي اشواك من حديد ..

انا من سكان مكه كل ماجاني ضيق من كلام الناس اروح الحرم مافي مكان ارتاح فيه غير الحرم اطلع الدور الثاني قبال الملتزوم عشان اسفل زحمه ماشاء الله واصلي ركعتين وادعي لي ول كل محرمه لانها اكيد تعاني مثلي وابكي جنبي وحده ايرانيه حزنانه علي انا مغطيه وجهي بس تشوف دموعي تنزل معاها هوايه تهوي علي انا من الضيقه خرجت من بيتي ما اخذت معاي ولا شي حتى كلنكس ماعندي امسح دموعي بيدي قامت الله يجزاها خير جابت لي مناديل خلصت من الصلاه والدعاء وارتحت كثير .

داومت على قيام الليل والحمد لله خففت عني كثير صار عندي برود من كلام الناس ..

كل ما اخرج من البيت اتصدق على عمال النظافه اللي في الحرم واللي عند اشارات المرور من مصروفي ..

و زوجي راح مكتب ل رعاية الايتام كفل يتم الحمد لله يصرف له شهرياً مبلغ معين ..


تعبت نفسيتي لان ما افضفض ل احد بعد هذيك الحرمه اللي فضحتني ما صرت اثق في احد بس وحده من صحباتي يوم جلست تفضفض لي عن مشاكلها مع زوجها ف شجعتني اني اتكلم شكيت لها الحال حزنت على وضعي وقالت عشت اللي عشتيه فـ دلتني على ممرخه عالجتها اخذت الرقم منها وعلى طول اليوم الثاني كلمتها كنت توي مخلصه الدورة والله يا بنات جاتني راحه الحمد لله قالت لي الدورة الجايه تعالي لي ثاني يوم الصباح قلت اوك وقفت الكلوميد في شهر شعبان ما اخذت كلوميد ..

جاتني الدورة ورحت الممرخه مرختني طلع عندي انتفاخ في المبايض بسبب الكلوميد واوساخ الله يكرمكم لان دورتي بس ثلاث ايام يعني بقايا دورة ..

اعطتني علاج قالت لي استمري عليه ونبهتني ان الدورة راح تطول هالشهر المهم اتقيدت بكلامها وسويت كل اللي قالت لي عليه ربطت بطني وقالت خلي الرباط اسبوع نزليه وقت الاستحمام فقط قلت ابشري ..

محد يدري اني رحت ل الممرخه غير زميلتي و زوجي


في شهر رمضان قبل الفطر ادعي ان الدورة ماتجي وان ربي يرزقني واروح اصلي التراويح وانا في طريقي ل المسجد ادعي وكل سجده اقول " ربي لا تذرني فرداً وانت خير الوارثين "

جا موعد الدورة مانزلت بالعاده في رمضان تتقدم اربع ايام عن وقتها طلبت من زوجي يجيب تحليل حمل مانزلت اليوم الثاني ولافي اي اعراض لا حمل ولا دورة ..

قمت الساعه 2 الظهر على طولت حللت وحطيته على جنب اتوضيت على اساس اصلي الظهر بعد الوضوء اطالع مافي غير خط واحد ..

رحت صليت ورجعت والحمد لله واخيرا شفت الخط الثاني على طول صليت ركعتين شكر لله مابلغت زوجي لانه في دوامه بس اتصل وسال كان عنده احساس وقتها حاولت اغير الموضوع ابغاها يشوف التحليل بنفسه ..

وصل البيت دخلت وجبت التحليل وشافه يا الله ما تتوقعون قد ايش كانت فرحته تصدقون انها اكثر من فرحتي ..

مانام مسكين يومها قال لي بعد الفطور على طول نروح نحلل حللت والحمد لله بين في تحليل الدم رحنا لاهلي وبشرتهم راح هو لاهله وفرحهم مساكين من الفرحه يبكون امه مانامت هذاك اليوم اخته تقول امك طوال الليل تبكي ..


الحمد لله على الكثير من النعم


و اسأل الله العلي العظيم ان لا يحرم كل زوجه من تلك الفرحه ياكريم اكرم اخواتي بالحمل السليم والذريه الصالحه ..


اعتذر منكم اخواتي على الإطاله

[ندوووش]

ماشاء الله تبارك الله

الله يتمملك ع خير ياارب

وحمدلله صبرتي وربي عوضك

فعلآ كلام الناس يجرح والي يجرح اكثر
الي تثقي فيهاا وتنشر سرك

ماقول غير الله يساامحهم ويرزق جميع
المحرومين بئذن الله

[أماني جميله]

قصصه حزينه ورااااائعه
ربي عوضك جزى صبرك

مثلي اروح أتعالج عشان اسكت أفواه الناس

لكن ربي كريم رازق

[sisi]

الحمد لله ، ربي جزاكي على صبرك ، الله افرحك ، وما شاء الله ، الله على كل شي قدير ، لكن حبيبتي ممكن تقوللي كيف الممرخة بتمرخ ، أنا حابة أعمله لكن أنا سكنة بفرنسا ولو لاقي وحدة هون ؟ صراحة أنا تعبت من المنشطات وسؤال الناس او خاصة أمي تخاف علي ،ممكن رقم الممرخة في مكة ؟ والله اجازيك كل الخير

[فوضت امري لله]

ياقلبي الله يتمم عليك بخير ويقر عينك

به معافا سليم يارب العالمين

قصتك فيها امل وتزيد الواحد ايمان بالله

[انسانهه غير]

قصصصه رائعه تولد الامل في الحياه تحياتي

[حفيدة الامير]

مرااا بكيت

الحمدلله ربي عوضك وان شاءالله يتمملك على خير

وربي قصتك روعه

ولك مني احلىى تقييم تستاهلي ياقلبي

[●•• ShąhǿǾǿĎ ••●]

قصه حزينه اول مره تنزل دموعي في هالمسابقه الله يتمم لج ع خير ويقر عينج بشوفته سليم معافئ ياارب

[ۼ ــزڷ آڷـ ζ ـربي]

المشاركة الأصلية كتبت بواسطة ندوووش

ماشاء الله تبارك الله

الله يتمملك ع خير ياارب

وحمدلله صبرتي وربي عوضك

فعلآ كلام الناس يجرح والي يجرح اكثر
الي تثقي فيهاا وتنشر سرك

ماقول غير الله يساامحهم ويرزق جميع
المحرومين بئذن الله

مرحبا عزيزتي , شرفني حضورك البهي واطلالتك الزاهيه ..
ربي يسمع منك خالص دعائك ولكِ بالمثل ..
مهما حاول الشخص الصد عنه يلاحقه الاذى في اماكن تواجده ..
وكأن الناس لايريدون لغيرهم الفرح تلك الانسانه التي افشت السر الوحيده لم تقدم لي التهنئه في وقت مبكر ..
وعندما قدمتها لي احسست انها ليست فرحانه بحملي ..
والحمد لله على كل حال

[ۼ ــزڷ آڷـ ζ ـربي]

المشاركة الأصلية كتبت بواسطة أماني جميله

قصصه حزينه ورااااائعه
ربي عوضك جزى صبرك

مثلي اروح أتعالج عشان اسكت أفواه الناس

لكن ربي كريم رازق

يسعدك ربي عزيزتي , مازاد من جمال قصتي حضورك العذب ..
نحمده ونشكره على نعمه الكثيره ..
ونسأله سبحانه ان يكرمك بما تتمني ..
أشكرك على إطرائك الراقي ..