قصة ولادتي بالتفصيل ( عشانكم بس يا احلى ناس)

[أسـماء]

قصة ولادتي ....
بـ وردة حياتي .. ومهجة فؤادي .. ونور عيناي ..أغلى الناس على قلبي .. وضحكة العمر ,.

الاسم :- فؤاد مع اني كنت اتمنى ان يكون نسيم ,.
العمر :- 12 يوم
الوصف :- ملاك بسم الله ما شاء الله عليه
تاريخ الولاده :- 6-6-2012ميلادي
يوم الولاده :- الأربعاء

ساعة الولادة

:- الثامنه والنصف صباحاً

مكان الولاده :- مستشفى المواساة في مدينة ماركا في الأردن
القيمه :- 300 دينار ارني

طيب يا بنات نصلي على رسول الله .. اللهم صل وسلم وبارك على سيدنا محمد ..

طبعا رح اكتب كل يوم شوي هههههههههه لا تخافوا بكتب بسرعه ,.
رح أكتب كل شيء بالتفصيل الممل جدا جدا جدا فلا تملو

بنات تجمعي الغالي تجمع رجب ربي يقومكم كلكم بالسلامه ويقوم كل حامل بالسلامه ويرزقها ولاده مثل ولادتي ان شاء الله ,.

طبعا حضراتكم عارفين انه من أكثر الأمور اللي كانت مدايقيتني في مرحله الحمل سهر زوجي برا البيت لفترات طويله وياما شكيت الكم وانتو كنتوا اقرب الناس واكثر الناس فاهميني,.

يوم ولادتي يوم الأربعاء الساعه 3 الفجر رجع زوجي ع البيت , طبعا انا معصبه وزعلانه ومدايقه , بس اطلعت كل قهري في ترتيب البيت , رتبت البيت كتير منيح وتعبت وانا برتب في يعني هلكت بصراحه , وبعديها اتحممت ورحت ع تختي ارتاح كانت الساعه تقريبا 4 الفجر , وعيطت كتير وما حكيت مع زوجي وكان يحاول يراضيني وانا ابكي ابكي ابكي بحرقه , المهم راضاني وضحك علي بكلمتين حلوين كالعاده واخدني بحضنه وامممممم وانتو عارفين شو صار بعدها هههههههههه ,.

نمت تقريبا الساعه 5 ونص الفجر , ع الساعه 6 ونربع صحيت بدي اروح الحمام ( اكرمكم الله ) دخلت الحمام الا وينزل علي دم بس مو كتير حكيت يمكن من الجماع وهاي من علامات الولاده لاني ما خليت شيء طول التسع شهور الإ وقرأته عن الحمل والولاده وما الى ذلك طبعا والفضل لكل الحوامل استفدت كتير منكم ربي يقومكم كلكم بالسلامة ,.

بلاش اطلع عن الموضوع حطيت الفوطه اليوميه كير فري وقلت ارتاح شوي بالصالون ما كان معي اي نوع من انواع الألم ولا حاسه بأي شيء والحمدلله , قعدت ع الكنبايه وأحس أنه في شيء نزل علي بقدر كاسه ماء صغير ,, انا قلت ييييييي عملتها ع حالي هههههه ... رحت الحمام( اكرمكم الله ) الا وينزل علي مي كتير لا إراده ولهلا لسه ما حسيت بأي وجع ,.

رحت لزوجي اصحي من النوم خفت اصحي يخاف علي ... بنادي عليه حبيبي سعد حبيبي وانا واقفه بحكيلوا تعبانه شوي , عاد انا لا تعبانه ولا شي بس ما بدي اخوفه واحكيلوا نزل علي دم وماء , بحكيلي متى قمتي من جنبي تعالي تعالي نامي , عاد فش مجال للنوم هلا في مجال للمستشفى بس ههههههههه ,.

بحكيلو شو رايك نروح ع المستشفى وقتها صحي وقف ال شو في متوجعه حكتله لالا حبيبي نزل شويه دم علي وقف واتصل ع اخته الكبيره وفضح الدنيا كانت الساعه وقتها بالزبط 6 ونص الفجر , دخلت اشطف جسمي الا وينزل مي كتير كتير كتير متل الحنفيه وانا خفت وقتها كتير وصرت اعيط من الخوف مو من شيء تاني , وناديت ع زوجي سعد سعد تعال انا خايفه كتير وبعيط وبرجف من الخوف مو من وجع ولا شيء ,. مسكني وقف معاي لحد ما اخدت دش ع السريع السريع ,.

شوي اشوف النونو وارجع أكمل الكم شو صار معاي ,, في رومنسيه هلا كتير لا تفوتوها ههههههههههه

[فديــته الــ غ ــالي]

قبل واتكملي

الف الف الف الحمدلله ع السسسسسلامه يااغاليه

ويتربى بعزك ويخليه من مواليد السعاااده

[ناني عسل]

بنتظارك كملي يالله. ..
والف مبرووووك قبل تكملي وبعد ماتكملي :-)
يتربى بعزكم

[تــوفي]

حمدلله على سلامتك والف مبروك المولود

[روح الورد]

اااااالف مبرووو ك حبيبتي
وبتربى بعزكم يااارب...

[مناير999]

بانتظار التكمله
والله يحفظ لك ابنك وتشوفيه عريس

[استغفرالله(مي)]

الف مبرووووووووووك والحمدلله على سلامتك
يلاه كملي فنتظارك

[SoooSoo]

الف الحمد لله على السلامه ومبرووووك المولود.

[أسـماء]

نرجع نكمل يا بنات ..

اللهم صل على سيدنا محمد وعلى اله وصحبه اجمعين ,.

بدي احكيلكم اني مشيت بشهري اسبوعين طبعا انا بكريه , وكمان ما اخدت اي محفز ولا شي يعني لا شربت قرفه ولا زيت خروع ولا تبخت بميرميه وحتى المشي من اول ما مشيت دخلت بشهري مشيت مرتين بس في كل مره ساعتين او تلات ,.
يعني التسهيل من رب العالمين ومتى ربنا كاتب ولادتك رح تولدي ان شاؤ الله ,.

كنت مقرره ما أصرخ ابدا شو ما كان الوجع قوي متل ما قرأت انه الوجع قوي جدا بس المعرفوف انه الصراح رح يتعبك عشان هيك ما صرخت ولا حتى شوي والحمدلله ,.

خلينا نكمل ,,, نزل اخو زوجي ساكن بالطابق التاني لانه واحنا بالأول اخته الكبيره اتصلت فيه وحكتله انزل شوف سعد واسما شكل في مع اسما ولاده المهم نزل هو ومرته وانا بس خايفه مو متوجعه لسه , المهم بطلع ع زوجي متلبك وحالته حالي حكالي اتصلي بدكتورتك , اتصلت فيها بحكيلها نزل علي دم وماء ,, حكتلي هاي ماء الراس ع المستشفى ع طول وانا جايه هيني , لبست ومرة اخو زوجي كانت واقفه جنبي مسكت المصحف وطول الطريق وانا اقرأ بسوره مريم وسورة الزلزله وقتها بالطريق صار يجي وجع ويروح , بس مو الوجع اللي لا يحتمل لا والله وجع يحتمل , كان بس يجيني هالوجع اصير استغفر استغفر واتنفس بطريقه قرأتها هون ( أشم ورده وأطفي شمعه ) وتروح الوجع بس مو قوي ابدا ابدا , .

المسافه من المستشفى للبيت بعيده شوي يعني ساعه الا ربع تقريبا , بس اخو زوجي جابها بنص ساعه وطول الطريق وهو يزمر ههههههههههه يعني نكته والله ,.

المهم وصلنا المستشفى ع الساعه سبعه ونص بالزبط نادو على الممرضين عشان يجيبولي شيء اقعد عليه وعم يسألو شو في شو في وزوجي بحكيلهم ولاده , وانا اعيط دموع بس بدون صوت دموعي نازلين زي الشلال ولا راضيين يسكتو وماسكه ايد زوجي وبحكيلو خايفه انا كتير خايفه ودموع دموع بس مو من الوجع خوف من المجهول مش اكثر ,.

اه صح نسيت احكي انه وانا بالطريق بحكي لزوجي هات انا اتصل في امي بديش تخاف وتقلق وخاصه انها بالليل حكيت معها ع الانترنت وكانت اموري تمام ما في شي معي وهي بعيد عني يعني هي بفلسطين وانا بالاردن , رنيت عليها ما ردت كانت نايمه شكلها وصيت سعد يخبرها ويحكيلها اني مش متوجعه لاني كنت هاكله هم امي بس مش اكتر خفت تشوفني وانا بتوجع بس انا ما توجعت الحمدلله , المهم لما امي ما ردت حكتله رن ع بابا واحكيلوا وهو بيحكي لامي , حكا لبابا ,.

نرجع وين كنت اه نزلت من السياره ع التخت المتحرك وماكله ايد زوجي ودخلت الغرفه واجتني ممرضه بتحكيلي شو .. بحكيلها معي وجع بيجي وبيروح حكتلي طيب , حكتلها انا خايفه , حكتلي لا تخافي اطمني ان شاء الله ميسره , وانا دموعي شلال ههههههههه حساسه البنت يا عمي ههههههه

المهم اعطتني حقنه شرجيه وحكتلي هلا بتروحي ع الحمام (اكرمكم الله )
واعطتني قميص مفتوح ضهره وحكتلي يلا اشلحي اواعيكي والبسي , وانا ماشيه زي ما بتحكيلي , وكل ما تعملي اشي احكيلها بيوجع بيوجع , وحكتلها حبيبتي سامحيني بعرف اني بسأل كتير بس انا خايفه مسكت ايدي وحكتلي لا تخافي ,.

المهم لبست هاد القميص واجت فحصتني داخلي وما توجعت ولا شي برده وهاد كله الوجع بيجي وبروح بس والله محتمل يعني وجع الدوره اللي كان يجيني اصعب منه , المهم حكتلي فاتح معاكي 6 سم اممممم اتصلت ع دكتورتي لانها اتأخرت شوي وحكتلها جاهزة مريضتك ومستويه ع الاخير ,.

حكيت للممرضه بدي زوجي نادو ,,اجاني مسكت ايده واطلع في متل الطفله وهات ع رومنسيه وحب وغرام بحبك وحبيبي وخايفه ويووووووووووو قصص هلا هلا بحكيلكم ,.

بعدين صار الوجع يحمى معاي شوي بحكيلو سعد حبيبي اي مسكن وحياتي عندك الله يخليك خليهم يعطوني مسكن , واجت الممرضه بحكيلها اعطيني مسكن بتحكيلي يلا هلا بعطيكي حبيبتي , وانا ماسكه ايد زوجي مش عم بتركها , بعدين اجت وحطت ابره في المغذي اللي بإيديحكتلي رح تحسي حالك مش عارفه كيف .. وفعلا حسيت حالي كأني هون ومش هون صاحيه ومش صاحيه حاسه باللي حوالي ومش حاسه , صار يجي الوجع اصحى بدون ما افتح عيوني تحكيلي يلا بس يجي الوجع ادفعي لتحت وانا مش قادره احكي .. بحكيلها انا لا ارادي كل ما يجي الوجع بشد لفوق بتحكي لا حاولي تدفعي لتحت كأنك بدك تخرجي (أكرمكم الله) وانا احكيلها طيب ,.

صار بس يجي الوجع اخد نفس وادفع لتحت احس في شيء تحت بده ينزل مني مش عارفه كيف اوصفلكم بس كأنه اممممممم مش عارفه المهم دفعت زي ما حكتلي يمكن 8 مرات بعدين اجت الدكتوره ربي يجزيها كل خير حكتلها صار فاتح 8 سم حكتلي يلا ارتاحي شوي عشان ننقلك غرفه الولاده ,.

حكتلهم نادولي زوجي .. اجاني وصوتي مش عم يطلع بحكيلو انا بحبك وانا زعلانه منك انت امبارح تركتي وانا ما بحب تتركني وبخبص بالحكي هاد كله حكالي اياه زوجي .. ههههههههه بحكيلو انت بتعرف انك اغلى الناس وما بحب تتركني لحالي وتطلع تسهر مع صحابك وهو بيحكيلي اسما خلص حبيبتي وشوفت دموعه ربي يخليلي اياه وما يحرمني منه , صار الوجع يجي واحس شيء بيدفع لحاله من تحت بحكي لسعد معي وجع ,, وجع ,, وجع هاد انا اللي متزكره بس لاني كنت هون ومش هون ,.

بعدين اطلعوه من عندي وهو بيحكي كوني قويه معلش حبيبتي وكلام كتير ,.

المهم اجت الدكتوره وكمان ممرضتين وحكولي يلا بدنا نروح غرفه الولاده ,, ورحت معاهم لـ غرفه الولاده دخلت الغرفه واطلعت كان في ساعه بتزكر انها كانت 8 هيك شيء ,.

صارت تحكيلي الدكتوره يلا حاولي تيجي ع هاد التخت , وانا مش قادره احمل حالي ابدا ابدا من الابره اللي حطولي اياها , بعدين قلت يا الله يا رب ورفعت حالي على التخت ,, وحطولي رجلي على حديدتين وبعدين صرت احكيلهم ادعولي ادعولي
صاروا يحكي يلا انتي ادعيلنا ,, صرت احكي ربي يسهل ولادة كل حامل , ربي يعطي كل انسان واي انسان كل شيء بتمنى , ربي يريح قلب امي وبالها ويهدي خواتي ويريح قلبهم وبالهم ويرزق الجميع يا الله , وبعدين حسيت بنخزة من تحت وبعديها ما بعرف شو صار صحيت ع الساعه 10 لقيت حالي بغرفتي , وزوجي جنبي واخته الكبيره ومره اهو زوجي , بحكيلهم شو ولدت بحكولي اه خلص , بحكي لزوجي كيف ابني منيح صحته منيحه حلو , بشبه مين وينه , حكالي بفحصوه بس شوي وبنجيبه ,. والكل مبسوط وانا مش حاسه بشي لسه آثار البنج معي , بس ما بنسى عيون زوجي ربي يخليلي اياه كأني كاين معيط دم علي حمر كتيييييييييييير كانوا ,.

المهم ..بعد شوي جابولي ابني , حبيبي , وعمري كله وحطوه جنبي وانا صرت اعيط واحكي لزوجي يا الله شو صغير يا حبيبي يا ماما وابوس في واعيط واعيط ومش عارفه شو الاحساس اللي حسيته .. اديش هالاحساس غريب الا انه هلأ بالوقت الحالي اغرب وأقوى ,.

خلو معي شوي وبعدين ....

يلا هلا شووي وبرجع بكمل يا صبايا ,.

[أسـماء]

حبيباتي يا بنات ربي يبارك فيكم يا رب وعقبالكم كلكم ان شاء الله

ربي يوفقكم ويحميكم من كل شر وادعولي دايما ربي يخليلي اياكم ...

نرجع نكمل.. اخدو البيبي مني وانا قعدت بغرفتي ونمت ليله وحده بالمشفى وماما وصلت الساعه 2 الضهر عندي وبوستني وع طول نزلت تشوف البيبي لانه هاد اول حفيد للماما وييييييييييي شو فرحت ربي يخليلي اياها وسألتني توجعتي يا ماما حكتلها لا تخافي ما توجعت ولا شيء الحمدلله وكانت سهله وبوستني وبستها وبعدين حكو بدهم يطهروا البيبي بما انو رح اضل الليله بالمشفى وبالفعل طهروا وزوجي حكالي انه توجع كتير واول يوم ما رضعته انا من صدري كان بالحضانه وهم رضعوا بس جابو بالليل من كتر ما أصريت اني بدي ارضعه لاني ناويه ارضعه من صدري وبس ان شاء الله ,.

رضعته بس توجعت من صدري والله واول تلات ايام بالزبط كانت الحلمه توجعني لكن ضليت مصره ارضعه وحطيت مرهم اسمه ميبو وصارت الحلمه منيحه الحمدلله وهلا من بعد التلات ايام صارت منيحه وما احس بوجع ,.

بعدين الحليب يا بنات بصير كتير بعد 3 ايام اول تلات ايام ما بكون كتير وضلوا رضعو البيبي دائما ,.

,.

المهم

وانا بالمشفى بالليل طلع ع ايدي تلات حبوب صغار حكيت اكيد هدول ناموس قرصوني ,.
تاني يوم روحت الا وجسمي كله طلع عليه حبوب , ومع حكة قويه كان ع ايدي بالاول وبعدين صار ينتشر ع جسمي ,.

سبحان الله ما تغلبت من الولاده لكن الحساسيه اللي طلعتلي بعد الحمل دبحتني كانت قويه كتير وحكته وحراره قويه كمان , رحت ع دكتورتي وشافتها اعطتني اخد ابره وكانت تخف بس تيجيني بالليل اتألم واصير اعيط منها وكتير , بعد تلات ايام ماما اخدتني ع دكتور اخصائي جلد اسمه حسين كريشات جدا ممتاز بصراحه اعطاني ابره حساسيه واعطاني علاج ودهون والحمدلله رقت عليها وحاليا خفيفه الحساسيه وعم تختفي شوي شوي ,.

بالنسبه للقطب انا تقطبت وما توجعت منهم الا وجع خفيف اعطتي الدكتوره مسكن ديكلوجيسك تحاميل ع مدة 5 ايام وما كنت احس بالوجع بس لهلا ما نزلوا القطب ما بعرف متى رح ينزلوا ,.

كمان عم بتحرك كتير يعني مو قاعده ولا نايمه طول الوقت لا بتحرك وبمشي وبرتب البيت عادي ,.

وتوتو توتو خلصت الحدوته , واي شي جديد بيصير معي رح خبركم عنه ان شاء الله , اممممم طبعا زوجي لهلا متل ما هو بطلع بسهر كالعاده وبتأخر ,, الله يهديه ويوفقه ويرزقه قولوا امين يا بنات ,.

ادعولي ربي يحميلي ابني ويبعد عنه كل مرض يا رب ,.

اختكم :- أســـماء