قصة ولادتي بحبيبي ♥ وسام ♥

[شموخ امرأة]

السلام عليكم ورحمة الله وبركاته

كيفكم كروشات شو اخباركم !!

ربي يقوم الجميع بالسلامة ويسهل ولادتكم متل ماكانت ولادتي سهلة ,, اللهم امين يااارب العالمين

وهلا بدي ابدا بقصة ولادتي وشو صار قبلها من احداث
طبعا انا بكرية وهاد اول ولد الي

بيوم 19 / 5 /2012 رحت عند دكتورتي الخاصة وكان في عندي شوية مغص مو كتير وكان ايامها ببداية الثامن يعني داخلة في الثامن 11 يوم
قالتلي بدي فحص بول مشان اتاكد انو مامعك التهاب بالمسالك البولية وعملت وكان النتيجة انو مافي معي التهابات ،، قالتلي هاد طلق كاذب ومن خلال المنتدى كنت عارفة شو هو الطلق الكاذب
قالتلي ارتاحي ومننوع المشي ،، بوقتها كنت امشي بشهر الـ 7 بس مو كل يوم وكنت اعمل رياضة الحمل واهم وحدة منها (وضعية القرفصة)

قالتلي ممنوع مشي ورياضة لتفوتي بشهرك
بيوم 29 / 5 / 2012 الصبح رحت الحمام اكرمكم الله وشفت خيوط رفيعة من الدم مع مخاط ،، وكان معي شوية مغص مثل مغص الدورة ،، بصراحة خفت وكان في شوية الم ، اتصلت بسلفتي لانو مافي حدا من اهلي هون (مغتربة عن اهلي) وقلتلها شو القصة
سالت امها وقالتلي راقبي الدم لو زاد يعني ولادة وبناخذك المستشفى
المهم ماجاني نوم من القلق والوجع لحتى الساعة 8
ع 8:15 حسيت بالم فضيييييييييع بظهري عيطت (صحت) منو وضلو ماسكني لين الساعة 8 ونص
وكنت امسك يد زوجي حتى من الوجع والشد وضغط عليها حسيتو تالم حبيبي
اخدوني ع المستشفى وعملولي فحص بالسونار ،، خلصت فحص فسالتها كيف وضع البيبي قالتلي هلا نشوف
وبعدين عملتلي الفحص الداخلي وراحت
ماقالتلي شي لاعن وضعي وعن وضع الجنين
المهم لبست وطلعت وسالتها نفس السؤال قالتلي هلا بنشوف خدي حلليلنا البول
رحت حلل بول وبطني من تحت يتقطع
اخذت النتيجة ورحت عندها الا تقولي مافيكي شي فكرنا عندك التهابات بالمسالك البولية بس مافي شي
عندك شوية توسعات روحي ارتاحي ونامي ع ظهرك واشربي سوائل كثيرة واذا حسيتي بوجع من هون لبكرة تعاليلنا
سالتها طيب يادكتورة والدم اللي ينزل شو القصة !!!
قالتلي هذا مؤشر ع قرب الولادة >>> انا فهمت انها السدادة المخاطية نزلت عندي لانو الدم اللي ينزل مو كثير يعني دم مع مخاط
رجعت البيت ومن التعب نمت وماصحيت الا ع اذان المغرب
رحت الحمام اكرمكم الله الا الدم يزيد غلاظة
خفت وسالت مرة ثانية قالولي ناخذك ع مستشفى ثاني
رحنا ع المستشفى الثاني وكان معي شوية الم (مغص)
عملت فحص والحمدلله هالمرة كانت الدكتورة احسن من اللي قبل
قالتلي البيبي تمام وضعو والمشيمة تمام ومية الراس تمام
والبيبي نازل عندك بالحوض
هلا بدي اعمل فحص داخلي
عملتلي وراحت
نادت علي وقالتلي اعمليلنا فحص دم وبول
قتللها الصبح عملت وكانت النتائجح سليمة
قالتلي معك الكشف قلتلها لا
قالتلي روحي اعملي من جديد لنتاكد
سحبت دم وعملت الفحص
الا تقلي عندك شوية التهابات بالمسالك البولية
قلتلها عندي توسعات شي يادكتورة !!
قالتلي لا مافي
سالتها وشو سالفة الدم قالتلي هاذا مؤشر ع قرب الولادة :(
قالتلي بس ارتاحي لتفوتي بشهرك وان شاء الله خير
وسالتها عن الجماع قالتلي عادي مافيها شي <<< بس انا هون ما اقتنعت بكلامها ومابجامع من يوم مانزل الدم علي لاني خايفة علي البيبي كتير ويكون هالدم هو السدادة المخاطية ويفوت شي عند الجنين ويضرو
طلعت ومن يومها احيانا احس بوجع (مغص) والدم يروح ويجي
ومرة شوية ومرة كثير
قعدت السدادة المخاطية تنزل علي لمدة 8 ايام من تاريخ 29 ليوم 5 / 6
بيوم 4 / 6 كنت اعاني من مغص بالليل بس كان الم خفيف وكنت احلم بالليل انو مية الراس ( سائل الامينوسي ) ومتل الكوابيس ليلتها
بيوم 5 / 6 زاد الوجع شوي شوي وكان ع شكل مغص مثل(مغص دورة الشهرية) بدون الم في الظهر ،، على العصريات كنت قاعدة على المنتدى وراسلكم
بعدين قمت كتبت الادعية لتسهيل الولادة اللي نزلته بالمنتدى على ورقة واكلت 7 تمرات وبعدين قراءة الادعية على ماء زمزم وكنت كل شوي اشرب منها
موضوع الادعية لتسهيل الولادة (ربي ينول اللي ببالها لصاحبة الموضوع ويرزقها الذرية الصالحة )

ادعية وايات تقرا اثناء الطلق لتسهيل الولادة باذن الله


زاد علي التعب شوي ،، قمت اتصلت بمرة عمي وقالتلي هاد برد روحي اغلي جعدة (هي نبات مسك الجن وحشيشة الريح ، ولها أسماء عديدة منها: مسيكة - جعده - طرف - مسك الحن أرطالس (بربرية) - القصلم (اليمن ) الهلال (بصنعاء) حشيشة الريح (لبنان ). (معجم أسماء النيات )) ودفي حالي <<< مع انو الجو نااااااار مش جو برد
رحت قلت يمكن برد واذا هالمغص من البرد هتروح مع الجعدة ولو طلق هيفضل الوجع مثل ماهو
غليت جعدة وشربت سفن اب ودفيت حالي ونمت ،، لما نمت كان الوجع يصحيني من النوم وهاد كان الساعة 5 العصر ،، بالليل ع ساعة 9 زاد الوجع وعلى الـ 10 خلاااااااااص استويت
كان غلطتي الوحيدة لما كان تيجي الطلقة كنت اضغط على حالي ،، مع اني قرات موضوع اختي الغالية (فديــته الــ غ ــالي)

اخطاااء ارتكبتيها اثناء الولاده .. افيدنا بتجربه


بس سبحان الله الوحدة مع الالم والوجع تنسى شوية اشياء ،، المهم
على ساعة 10 بدأت اقرا الادعية على بطني واشرب الماء الزمزم المقروء لحتى اجى زوجي وانا بالبيت
مسكين من شدة ما المنظر مؤلم تلبك وماعرف شو يتصرف ،، اتصل على سلفتي واجتني خلتني ارتاح شوي وشربتني نعنع وكمان خمس دقايق شربتني ينسون (ينكون / تقدة / كمون حلو / الحبة الحلوة)
وهاد بدورو عملي توسعات ولله الحمد
رحت المستشفى وانا طلقي كان يجي كل 5 دقايق وبطريق صار يقرب شوي شوي لحين وصلت المستشفى صار كل 3 دقايق وكانت الساعة تقريبا 12
دخلوني وعملو كشف داخلي الا تقلي معك 5 سم حالة ولادة ،، سالتني متى اخر دورة قلتلها بـ 1 / 10 فعرفت انو انا بعدني باسبوع 35 يعني مافتت التاسع
اخذت عينة دم مني وقالتلي تسطحي شوي هناك ،، شوي اجتني وقالتلي في وجع قلت اه ،، قالتلي هلا بعملك فحص داخلي كمان مرة وكان ايدها خفيفة كتير وماحسيت بالوجع متل يوم
29 / 5 ،، قالتلي معك توسع 6 وشوية يعني 7 خلص هنطلع فوق لتولدي ان شاء الله
عملتلي تخطيط دقات قلب الجنين ،، ولانو الطلق كان قوي اعطتني مخفف لطلق وصار شوي شوي يتاخر لتيجي الطلقة
بعدها عملتلي فحص داخلي ومزقة سائل الامينوسي وعرفت اني كنت اضغط على حالي لما كانت تيجيني الطلقة من منظر راس ابني
وكل مرة تعمل الفحص كانت تقول ماشاء الله طلقك حامي لانو بتوسع معك بسرعة الرحم ،، وانا بهالوقت كنت اكرر سورة زلزلة واية الكرسي ودعاء اللي حفظتو متل اسمي
حسبي الله لااله الاهو عليه توكلت وهو رب العرش العظيم ،اللهم اني استودعتك نفسي ومافي رحمي لااله الا انت برحمتك استغيث
وكنت احيانا من شدة الالم كنت اقول حسبي الله لا اله الا هو عليك توكلت وهو رب رب العرش العظيم ،، اللهم اني استودعتك نفسي ومافي رحمي
الممرضة استغربت كتير لاني بكرية ومافتت شهري <<< لانو بالعادة البكرية بتاخد شهرها الـ 9 وشوي من الـ 10
بعد مامزقة السائل الامينوسي علمتني كيف لما تجيني الطلقة شو اعمل وقالتلي جربي شوي وجربت الا تقلي ماشاء الله راس البيبي هيو على باب الرحم وقالتلي حسي راسو
بالاول خفت اني احس راس ابني ،، بعدين قلتلها لا بدي حسو ،، وبالفعل حسيت راسو لحبيبي ،، وبوقتها كل ماتيجي طلقة اردد
حسبي الله لا اله الا هو عليك توكلت وهو رب رب العرش العظيم ،، اللهم اني استودعتك نفسي ومافي رحمي
بعدين قالتلي يلا على غرفت الولادة
فتت الغرفة وبعدها جبت ابني حبيبي وسام ،، كانت ميسرة ولله الحمد
لما نزل قلت للمرضة بدي شوفو فرجتني ياه من بعيد وراحت حطتو على جهاز الفحص
سالتها بحتاج حضانة او شي قالتلي لما يجي الدكتور بنعرف كل شي ماشاء الله عليه جبتي ولد بجنن
قالتلي لاتتحركي لعملك تنظيف المشيمة واعطتني ابرة مشان مايصير معي نزيف
اجى الدكتور الاطفال وكشف عليه ،، سالتو بحتاج لتحطو بالخداج ؟ قالي لا ماشاء الله عليه ،، وانا هون ارتتتتتتتتتتتتتحت راحة مش طبيعية انو ابني هيروح معي
اجى 2 كيلو و 800 جرام ماشاء الله عليه

ربي يسهل على كل حامل ولادتها
حبيباتي الادعية ولله الحمد كتير ساعدتني ،، وبالاول وبالاخر توكلي على الله هو اللي سهل ولادتي
وهادي قصة قدوم حبيبي وسام على هالدنيا
كل الحب

[فوضت امري لله]

حمد لله على سلامتك

الله يحفظه لك ويقر عينك بصلاحه

وبره بك

[Loole kenan]

ياحبيبتي الله يباركلك في طفلك والف الحمد لله على سلامتكم ماشاء الله تبارك الله احس كانت مغامرة وتوتر بس الحمد لله
ربنا رزقك طفل سليم ، الله يفرحك فيه وينورلك دربك يارب .. وعقبال مانولد بالسلامة وونشوف اجنتنا سليمين معافين ان شاء الله
لك ودي.

[ياسمينة نجد]

الحمد لله ع سلامتك

[نسيم الصبا]

الف مبرووووووووك
ياقلبي عليك احس عانيتي من شهرك الثامن
بس يهون التعب من تحضني ضناك ربي يخليه لك وتشوفيه عريس
الحمدلله على سلامتك وسلامة البيبي

دعواتك لي بولاده ميسره انا والكروشات يارب

[انثى من عطر]

حمد لله عى سلامتك

تشوفيه عريييس يااارب



الله ييسر لنا يااارب

[استغفرالله(مي)]

الحمدلله على سلامتك
والف مبروووووووووووووك
قصة ولادتك كثير حلوه ومفيده مشكوووووره

[~* عبق الأنوثة *~]

الحمد لله على سلآمتك و سلآمة وسآم
و عقبالنآ نولد بالسلآمة يآرب

[شموخ امرأة]

المشاركة الأصلية كتبت بواسطة فوضت امري لله

حمد لله على سلامتك

الله يحفظه لك ويقر عينك بصلاحه

وبره بك

الله يسلمك ياارب
ويحفك ويخليكي غاليتي
نورتيني عزيزتي
دمتي بحفظ المولى ورعايته
ارق تحية الك

/

[شموخ امرأة]

المشاركة الأصلية كتبت بواسطة loole kenan

ياحبيبتي الله يباركلك في طفلك والف الحمد لله على سلامتكم ماشاء الله تبارك الله احس كانت مغامرة وتوتر بس الحمد لله
ربنا رزقك طفل سليم ، الله يفرحك فيه وينورلك دربك يارب .. وعقبال مانولد بالسلامة وونشوف اجنتنا سليمين معافين ان شاء الله
لك ودي.

الله يسلم عمرك ياارب ويحفظك حبيبتي
اي والله كانت مغامرة وتوتر كتير اللي ولابوه
وكنت خايفة كتير انو يجي ويحطوه بالخداج
والحمدلله انها تيسرت
اللهم امين تسلمي غاليتي وربي يسرلك ولادتك يااارب
دمتي بحفظ المولى ورعايته
ارق تحية الك

/