البيتزا
المقادير..
3 ك دقيق
3 م ك سكر
1 م ك خميره فوريه
1 م وسط بيكنج باودر
ربع ك زيت
1ك مويه دافيه ويمكن تحتاجي كمان شويه ( يعني انتي شوفها كيف بتصير معاك لازم تكون تلزق بيدك شويه يعني مو مره )
الطريقه..
اخلطي كل المقادير سوا وبللي يدك بالمويه وطبطبي على العجينه من فوق وغطيها بكيس وخليها تخمر نص ساعه
..............................
وانا اسوي الحشوه بطريقتين..
الاولى..
حمري بصل على النار وحطي معاه شويه ثوم بعدبن حطي عصير الطماطم ومكعب ماجي ونقطه فلفل اسود ونقطه كمون وملح صيني ( اجينو موتو ) وخليهم الين يتسبكوا بعدين حطي ملعقتين كتشب وخليه دقيقتين وطفي النار..
وبعد ماتفردي العجينه وتحطي الصوص انثري عليه اوريجانو ( زعتر بري ) بعدين البيبروني والفلفل الرومي والماشروم والجبنه وعلى الوجه الزيتون..
الثانيه..
بعد ماتفردي العجينه حطي عليها كتشب وانثري اوريجانو ( زعتر بري ) بعدين حطي بصل مفروم وفلفل رومي وماشروم ولحمه مفرومه زي حق السمبوسه والجبنه والزيتون على الوجه ورشي رشه خفيفه على الوجه من الزعتر العادي مو الاوريجانو..
والبيتزا طبعا ترجع لذوق كل شخص ايش يحب فيها وايش ما يحب يعني تقدري تحطي اللي تبغي وتشيلي اللي ماتبغي
وصدقوني انو كل وحده اطعم من الثانيه وكل من اكلها مات عليها ويطلبها ثاني وياخذ الطريقه
واذا حابين طريقة العجينه انا في الخدمه عندي طريقة عجينه تجننننننننن زي القطن وتنفع للبيتزا ولكل المعجنات
منقول